BATU babañata baziba likande lelibonisa kuli Jesu naapahekilwe fa kota mwahalaa likebenga zepeli. (Mat. 27:35-38) Nihakulicwalo, batu babañwi habalumeli taba yebulezwi mwa Bibele ya kuli mubili wa Jesu neupauluzwi fa kota, kulukiswa hande, ni kubulukiwa mwa libita hasamulaho.—Mare. 15:42-46.

Bahanyezi babañwi ba Litaba za Evangeli habalumeli kuli mutu yanaakokotezwi naakalumelezwa kubulukiwa hande mwa libita. Kono balumela kuli mutu yacwalo naasabulukiwangi. Mubihi wa makande yabizwa Ariel Sabar, naabulezi cwana ka za simuluho ya mubonelo wo mwa magazini ya Smithsonian: “Batu bane baangiwa kuba babamaswe hahulu nebakokotelwanga fa sifapahano, mi licaziba babañwi habalumeli kuli Maroma nebaka lumeleza mutu yacwalo kubulukiwa ka nzila yekutekeha.” Maroma nebabatanga kushubula hahulu batu bane baatuzwi kuli neli likebenga; kacwalo, litupu zabona hañata nelisiiwanga fa kota kuli liciwe ki libatana. Hamulaho wa nako, masapo a batu bao naayumbelwanga mwa mabita mone kubulukilwe litupu zeñwi.

Nihakulicwalo, bapumbuli bafumani masapo a Majuda babañwi bane babulukilwe ka kushutana ni mone baangela bahanyezi. Ka silimo sa 1968, masapo a muuna yomuñwi yanaakokotezwi fa kota ibato ba ka nako yanaali fa lifasi Jesu, naafumanwi. Naafumanwi mwa libita la lubasi loluñwi lwa Sijuda bukaufi ni Jerusalema. Masapo ao naafumanwi mwa mbokisi ya masapo. Lisapo la kwa lisito neli leliñwi la masapo anaali mwa mbokisi yeo. Nelikokotezwi fa libala ka mapo ya sipi yeeza lisentimita ze 11.5 (mainci a 4.5). Mubihi wa makande yo yabizwa Sabar, utalusa kuli: “Lisapo la kwa lisito leo, ki la muuna yabizwa Yehochanan, mi litusize kufelisa kañi yenebile teñi ka nako yetelele ka za haiba Litaba za Evangeli zebulela kuli Jesu naabulukilwe mwa libita ki za niti.” Muuna yo uzwelapili kubulela kuli: “Lisapo la kwa lisito la Yehochanan, ili yo naakokotezwi fa sifapahano mwa linako za Jesu, ki bupaki bobubonisa kuli Maroma nebalumelezanga Majuda kubuluka mutu yakokotezwi fa sifapahano.”

Lisapo la kwa lisito lene lifumanwi leo likona kutahisa kuli batu babe ni mibonelo yeshutana-shutana ka za mwanaakokotelezwi Jesu fa kota. Kono niti kikuli, likebenga zeñwi zenekokotezwi fa kota nelibulukilwe mwa mabita, nelisika nepelwa feela mwa libita mone kubulukilwe batu babañata. Kaniti luli, zeibulela Bibele ka za kuli mubili wa Jesu neubulukilwe hande mwa libita ki za niti. Bupaki bo bwalumelelana ni zeibulela Bibele.

Sa butokwa nikufita kikuli, Jehova naapolofitile kuli mubili wa Jesu neuka bulukiwa mwa libita ki muuna wa mufumi, mi hakuna yakona kupaleliswa linzwi la Mulimu kutalelezwa.—Isa. 53:9; 55:11.