Bibele haibuleli sesiñwi ka za taba yeo. Kono ilutaluseza litaba zeñwi zetabisa zelutusa kuziba libaka mwendi hane basika eza cwalo.

Lingeloi nelitaluselize Maria kuli naakaitwala ni kuba ni mwana. Lingeloi hane litaluselize Maria lushango lo, Maria ni Josefa nebapila mwa Nazareta, muleneñi wa mwa Galilea. (Luka 1:26-31; 2:4) Hamulaho wa nako, hase bazwile kwa Egepita, nebakutezi kwa Nazareta. Jesu naahulezi mwa muleneñi wo mi abizwa Munazareta. (Mat. 2:19-23) Kacwalo, kwaswanela kuli halubulela za Nazareta, luhupulanga za Jesu, Josefa, ni Maria.

Maria naanani wahabo yena wa libizo la Elizabeta yanaapila mwa Juda. Elizabeta neli musalaa muprisita Zakaria mi ki yena yanaatilo pepa Joani Mukolobezi. (Luka 1:5, 9, 13, 36) Maria naapotezi Elizabeta mi aina ni yena ka likweli zetaalu mwa Juda. Hasamulaho, Maria akutela kwa Nazareta. (Luka 1:39, 40, 56) Kacwalo, Maria naaziba naha ya Juda.

Hamulaho wa nako, Josefa amamela taelo ya “kuyo iñolisa.” Ka mukwa ocwalo, Josefa atama musipili wa kuzwa kwa Nazareta kuliba kwa Betelehema, ili ona “muleneñi wa Davida” one upolofitilwe kuli ki mona mwanaaka pepelwa Mesia. (Luka 2:3, 4; 1 Sam. 17:15; 20:6; Mika 5:2) Maria hasaapuluhile, Josefa naasabati kuli azamaye musipili omutelele wa kukutela kwa Nazareta ni Jesu yanaasazo pepwa. Kacwalo, bazwelapili kupila mwa Betelehema, yeneeza likilomita zebato ba ze 9 kuzwa kwa Jerusalema. Kabakaleo, neku babezi bunolo kuisa mbututu wabona kwa tempele ni kuyo fa nubu sina mone uboniseza Mulao.—Liv. 12:2, 6-8; Luka 2:22-24.

Lingeloi la Mulimu kwamulaho nelibulelezi Maria kuli mwanaa hae wamushimani naakafiwa “lubona lwa Davida” mi ‘naakabusa sina Mulena.’ Kubonahala kuli Josefa ni Maria nebaanga kuli neli nto ya butokwa kuli Jesu apepelwe mwa muleneñi wa Davida. (Luka 1:32, 33; 2:11, 17) Kubonahala kuli nebanahana kuli neikaba hande kuzwelapili kupila mwa Betelehema kufitela Mulimu abataluseza sene baswanela kueza.

Haluzibi kuli nese bapilile mwa Betelehema nako yekuma kai habapotelwa ki babanuha ka linaleli. Kono ka nako yeo, lubasi lwa Josefa nese lupila mwa ndu, mi ‘mwanaa bona’ naasahulile, nesi mbututu. (Mat. 2:11) Kubonahala kuli mwa sibaka sa kukutela kwa Nazareta, nebaikatulezi kupila mwa Betelehema ka nakonyana kuli batwaele kupila mwateñi.

Heroda naalaezi kuli “bana babashimani kaufela mwa Betelehema . . . kukala kuba lilimo zepeli kutisa mwatasi” babulaiwe. (Mat. 2:16) Mulimu hasaa bataluselize ka za taelo yeo, Josefa ni Maria babalehela kwa Egepita mi baina kwateñi kufitela Heroda ashwa. Hasamulaho, Josefa aisa lubasi lwahae kwa Nazareta. Ki kabakalañi hane basika kutela kwa Betelehema? Naasaba mwana wamushimani wa Heroda, Arkelausi yamaswe, yanaabusa Judea, mi naabata kumamela taelo yanaafilwe ki Mulimu. Mwa Nazareta, Josefa naakona kuhulisa hande Jesu kuli abe mutanga wa Mulimu, kusina mutu yanaazuma bupilo bwahae.—Mat. 2:19-22; 13:55; Luka 2:39, 52.

Kubonahala kuli Josefa naashwile pili Jesu asika shwa kale ni kukwalululela batu babañwi nzila ya kuli baye kwa lihalimu. Kabakaleo, Josefa ukazusezwa kuto pila fa lifasi. Batu babañata bakakona kuya ku yena ni kumubuza libaka luli yena ni Maria hane bazwezipili kupila mwa Betelehema Jesu hasaapepilwe.