Bahasanyi babañata baitusisanga Progilamu ya JW Library^® kuitukiseza mikopano mi baitebuha kuli progilamu ye ibonisanga litaba za kuituta ze mwa magazini ya Tawala ya Mulibeleli iliñwi ka iliñwi. Kono mwa hatiso ya kuituta ya Tawala ya Mulibeleli hañata kubanga ni litaba zeñwi zeli lico za kwa moya. Mukona kufumana cwañi litaba ze ni kutusiwa ki zona hamuitusisa Progilamu ya JW Library?

• Kwa mafelelezo a taba ni taba ya kuituta mwa Tawala ya Mulibeleli, kunani tohonyana ya taba yeli, “Additional Reading.” Mwatasaa tohonyana ya taba ye, musine linki yeli, “Other articles in this issue.” Mutatube mukoloko wa litaba ze mwahali, mi mulemuhe litoho za litaba za kuituta ni linombolo zazona. Musine toho ya taba ya taba yeñwi yemubata kubala.

• Fa likepe lapili la Progilamu ya JW Library mwatasaa kalulo yeli, “What’s New,” muikungele hatiso yenca ya Tawala ya Mulibeleli isafumaneha feela. Mukwalule magazini yemuikungezi mi mutatube mukoloko wa litaba ze mwahali kuli mutusiwe hahulu ki litaba kaufela ze mwa magazini yeo.