1. Ki lika mañi zeluswanela kueza kuli lupunyuhe lizazi la Jehova?

 MWA Bibele, pulelo ya “lizazi la Jehova” italusa nako yeo Jehova akayundisa lila zahae ni kupilisa batanga bahae. Kwamulaho, Jehova akile afa macaba amañwi koto. (Isa. 13:1, 6; Ezek. 13:5; Zef. 1:8) Mwa linako zaluna, “lizazi la Jehova” likakala ka kuyundiswa kwa Babilona Yomutuna mi likalibisa kwa ndwa ya Armagedoni. Kuli lupunyuhe “lizazi” leo, lutokwa kuitukiseza ka nako ya cwale. Jesu naasika bulela feela kuli luswanela kuitukiseza “ñalelwa yetuna” kono hape naabulezi kuli luswanela ‘kuzwelapili kuba babaitukiselize’ yona.—Mat. 24:21; Luka 12:40.

2. Ki kabakalañi liñolo la 1 Matesalonika halikona kulutusa?

² Mwa liñolo lapili la muapositola Paulusi lanaañolezi Bakreste ba kwa Tesalonika ka kususumezwa ki moya wa Mulimu, naaitusisize liswanisezo zeshutana-shutana kuli atuse Bakreste kuzwelapili kuitukiseza lizazi la Jehova lelituna la katulo. Paulusi naaziba kuli lizazi la Jehova nelisike lataha ka nako yeo. (2 Mates. 2:1-3) Nihakulicwalo, naasusuelize mizwale bahae kuitukiseza lizazi leo ni kuliinga kuli lituha litaha, mi ni luna lwakona kutusiwa ki kelezo yanaafile. Halunyakisiseñi mwanaataluselize litaba zelatelela: (1) molika tela lizazi la Jehova, (2) babasike bapunyuha lizazi leo, ni (3) molukona kuitukiseza kuli luto punyuha.

3. Lizazi la Jehova likataha cwañi sina lisholi mwahalaa busihu? (Mubone ni siswaniso.)

³ “Sina lisholi mwahalaa busihu.” (1 Mates. 5:2) Ye ki swanisezo yapili kwa liswanisezo zetaalu zeitusisizwe kutalusa za kutaha  kwa lizazi la Jehova. Masholi hañata bauzwezanga batu busihu ka kubapatisa mi bauzwanga kapili-pili. Lizazi la Jehova ni lona likataha ka sipundumukela, mi likapatisa batu babañata. Mane nihaiba Bakreste ba niti bakana bakomokiswa ki molika ezahalela lika kapili-pili. Kono ka kushutana ni batu babamaswe, luna haluna kuyundiswa.

4. Lizazi la Jehova liswana cwañi ni butuku bwa lupepo?

⁴ “Sina butuku bwa lupepo mobutelanga ku musali yaitwezi.” (1 Mates. 5:3) Musali yaitwezi hakoni kuziba lizazi luli fakapuluhela. Kono hakakanyi kuli lizazi leo likataha. Mi nako yeo hase ifitile, butuku bwa lupepo bo bukana bwataha ka sipundumukela mi haana kukona kubutibela. Ka mukwa oswana, haluzibi lizazi ni nako folika tela lizazi la Jehova. Niteñi, lunani buikolwiso bwa kuli lizazi leo likataha mi Mulimu ukayundisa babamaswe ka sipundumukela mi hakuna ni yomukana yakabanduka.

5. Ñalelwa yetuna iswana cwañi ni nako yekupatalala?

⁵ Sina nako yekupatalala. Mwa swanisezo yahae yabulaalu, Paulusi naabulezi hape za masholi babauzwa ka nako ya busihu. Kono ka nako ya cwale, kubonahala kuli Paulusi ubapanya lizazi la Jehova kwa nako yekupatalala. (1 Mates. 5:4) Masholi babauzwanga busihu fokuñwi bapatehanga hahulu kuli mane bakona kupalelwa kulemuha kuli nako ibasiile. Liseli la lizazi lelitatama likona kubapatisa ni kutahisa kuli babonwe ki batu. Ka mukwa oswana, ñalelwa yetuna haika kalisa, batu babaswana sina masholi babazwelapili kuba mwa lififi ka kueza lika zesatabisi Mulimu bakaiponahalela hande. Ka kushutana ni bona, lukona kubonisa kuli luitukiselize nako yeo, ka kuambuka lika zesatabisi Jehova ni kuzwelapili kueza “mufuta kaufela wa bunde ni kuluka ni niti.” (Maef. 5:8-12) Paulusi cwale uitusisa liswanisezo zepeli zeswana kutalusa batu babasike bapunyuha.

6. Batu babañata balobezi ka mukwa ufi? (1 Matesalonika 5:6, 7)

⁶ “Babalobala.” (Mubale 1 Matesalonika 5:6, 7.) Paulusi naabapanyize batu babasike bapunyuha lizazi la Jehova kwa batu babalobezi. Bapalelwa kulemuha zeezahala mwa lifasi kamba nako yelupila ku yona. Kacwalo, habakoni kulemuha hakuezahala nto yeñwi ya butokwa kamba kuunga muhato oswanela. Buñata bwa batu kacenu balobezi kwa neku la kwa moya. (Maro. 11:8) Habaisi pilu kwa bupaki bobubonisa kuli lupila mwa “mazazi a mafelelezo” ni kuli ñalelwa yetuna ituha ikalisa. Hakuezahala lika zeñwi zetuna mwa lifasi, babañwi bakona kuzuha kwa buloko bwa kwa moya ni kuamuhela lushango lwa Mubuso. Niteñi, babañata bakutelanga kuyo lobala kufita kuzwelapili kutona. Mane nihaiba batu babañwi babalumela kuli kukaba ni lizazi la katulo banahana kuli lizazi leo li kwahule hahulu. (2 Pit. 3:3, 4) Nihakulicwalo, lwaziba kuli kelezo yeneñozwi ka kususumezwa ki moya wa Mulimu ya kuli luzwelepili kutona izwelapili kuba ya butokwa hahulu zazi ni zazi.

7. Batu babaka yundiswa ki Mulimu baswana cwañi ni batu babakozwi bucwala?

⁷ “Babakolwa bucwala.” Muapositola Paulusi naabapanyize batu babaka yundiswa ki Mulimu kwa batu babakozwi bucwala. Batu babakozwi bucwala habaangangi muhato kapili-pili hakuezahala nto yeñwi mwa sibaka sebali ku sona, mi habaezangi likatulo zende. Ka mukwa oswana, batu babamaswe habaisangi pilu kwa litemuso za Mulimu. Baiketezi kupila ka nzila yekatahisa kuli bayundiswe. Kono Bakreste basusuezwa kuzwelapili kutona ni kunahana hande. (1 Mates. 5:6) Caziba yomuñwi wa litaba za Bibele utalusa pulelo ya kunahana hande kuli ki “kunyakisisa ni kualakanya lika ka pilu yewile hande ili nto yekona kulutusa kueza katulo yende.” Ki kabakalañi haluswanela kuzwelapili kuwa pilu ni kunahana hande? Kueza cwalo kuka lutusa kusaikenya mwa litaba za lipolitiki kamba zeezahala mwa silalanda selupila ku sona. Batu baka lususueza hahulu kuikenya mwa litaba zeo sihulu lizazi la Jehova halinze liatumela. Nihakulicwalo, haluswaneli kuikalelwa zeluka eza ka nako yeo. Moya wa Mulimu uka lutusa kusaikalelwa ni kunahana hande mi lukaeza likatulo zende.—Luka 12:11, 12.

8. Ka kuya ka 1 Matesalonika 5:8, ki tulemeno tufi totukona kulutusa kuzwelapili kutona ni kunahana hande? (Mubone ni siswaniso.)

⁸ ‘Muapale sisilelezo sa fa sifuba . . . ni . . . kuwani ya busole.’ Paulusi ulubapanya kwa masole babaitukiselize kulwana ni babaapezi liapalo za ndwa. (Mubale 1 Matesalonika 5:8.) Lisole lelili fa musebezi liswanela kuba leliitukiselize kulwana nako ifi kamba ifi yeikona kuzuha ndwa. Ki nto yeswana ni ku luna. Luswanela kuzwelapili kuitukiseza lizazi la Jehova ka kuapala sisilelezo sa fa sifuba sa tumelo ni lilato ni kuapala kuwani ya busole ya sepo. Tulemeno to tukona kulutusa hahulu luli.

9. Tumelo yaluna ikona kulusileleza cwañi?

⁹ Sisilelezo sa fa sifuba nesisilelezanga pilu ya lisole. Tumelo ni lilato lisileleza pilu yaluna ya swanisezo. Lika lutusa kuzwelapili kusebeleza Mulimu ni kulatelela Jesu. Tumelo ilutusa kuba ni buikolwiso bwa kuli Jehova uka lufa mupuzo kabakala kuli luzwelapili kumubata ka pilu yaluna kaufela. (Maheb. 11:6) Ika lutusa kuzwelapili kusepahala ku Mueteleli waluna, yena Jesu, niha lukakopana ni miinelo yetaata. Lukona kutiisa tumelo yaluna ilikuli lutiyele miinelo yetaata ka kuituta kwa mitala ya Bakreste ba mwa linako zaluna bane bazwezipili kusepahala kusina taba ni nyandiso kamba kukopana  ni butata bwa kutokwa hande masheleñi. Mi haluna kundongwama sifumu haiba lulikanyisa mitala ya batu bane banolofalize bupilo bwabona ilikuli babeye za Mubuso mwa sibaka sapili. b

10. Kulata Mulimu ni batu kukona kulutusa cwañi kuitiisa?

¹⁰ Kuba ni lilato hape kukona kulutusa kuzwelapili kutona ni kunahana hande. (Mat. 22:37-39) Kulata Mulimu kulutusa kuzwelapili kuitiisa halunze lukutaza kusina taba ni butata bolukona kukopana ni bona. (2 Tim. 1:7, 8) Bakeñisa kuli lulata nihaiba batu babasa sebelezi Jehova, luzwelapili kukutaza ni kukwahela kalulo yaluna ya simu, mane lukutazanga ka kuitusisa mafoni ni ka kuñola mañolo. Lunani sepo ya kuli nako yeñwi batu bakacinca ni kukala kueza lika zelukile.—Ezek. 18:27, 28.

11. Kulata mizwale ni likaizeli baluna kulutusa cwañi? (1 Matesalonika 5:11)

¹¹ Hape lwalata mizwale ni likaizeli baluna. Lubonisa cwalo ka ‘kususuezana ni kutiisana.’ (Mubale 1 Matesalonika 5:11.) Sina masole babatusana mwa ndwa, ni luna luswanela kususuezana. Ki niti kuli lisole ukona kuholofaza lisole yomuñwi mwa ndwa, kono haakoni kueza cwalo ka bomu. Ka mukwa oswana, haluna kueza lika zekautwisa butuku mizwale ni likaizeli baluna ka bomu kamba kukutisa bumaswe ka bumaswe. (1 Mates. 5:13, 15) Hape lubonisa kuli lwalata mizwale baluna ka kukuteka baba luzamaisa mwa puteho. (1 Mates. 5:12) Paulusi hanaañola liñolo le, puteho ya mwa Tesalonika neisika kwanisa kale silimo kuzwa foitomelwa. Kubonahala kuli baana bane baketilwe kuzamaisa mwa puteho yeo nebasina hande yeloseli mi nebaezanga mafosisa. Niteñi, nebatokwa kuboniswa likute. Ñalelwa yetuna hainze iatumela, lukatokwa kuutwa ketelelo yelufiwa ki baana-bahulu mwa puteho kufita lili kaufela. Mwendi haluna kukona kuamuhela ketelelo kuzwelela kwa ofisi yetuna yezamaisa musebezi waluna mwa lifasi kaufela ni kwa ofisi ya mutai; kacwalo, ki kwa butokwa hahulu kulata baana-bahulu ni kubakuteka ka nako ya cwale. Ibe kuli kukaba cwalo kamba kutokwa, haike luzweleñipili kunahana hande, lusike lwaisa  pilu kwa bufokoli bwabona, kono luhupule kuli Jehova uitusisa Kreste kuetelela baana babasepahala ba.

12. Sepo yaluna ikona kusileleza cwañi minahano yaluna?

¹² Sina feela kuwani ya busole hane isilelezanga toho ya lisole, sepo yaluna ya puluso yalusileleza mi ilutusa kunahana hande. Bakeñisa kuli lunani sepo yetiile, luunga lika za mwa lifasi kuli halina tuso. (Mafil. 3:8) Sepo yaluna ilutusa kusaikalelwa ni kulutusa kunahana hande. Sepo neitusize muzwale yabizwa Wallace ni musalaa hae Laurinda, babasebeleza fa mutai omuñwi mwa Africa. Mwa lisunda zetaalu, bo maa bona bo Laurinda ni bo ndataa bona bo Wallace nebatimezi. Kabakala butuku bobuyambukela bwa COVID-19, nebapalezwi kuyo fumaneha kwa maswabi kuli babe ni mabasi abona. Muzwale Wallace naañozi kuli: “Sepo ya kuli kukaba ni zuho ya bafu initusanga kunahana ka za mobaka bonahalela habaka zusiwa kwa bafu isiñi mone babonahalela pili basika shwa kale. Sepo yeo yanitiisanga ni kuniomba-omba haniikutwa hahulu bumaswe kabakala kushwelwa.”

13. Ki lika mañi zeluswanela kueza kuli lufiwe moya okenile?

¹³ “Musike mwatima mulilo wa moya wa Mulimu.” (1 Mates. 5:19) Paulusi naabapanyize moya okenile kwa mulilo o mwahali ku luna. Haiba luba ni moya wa Mulimu, lukaeza lika zelukile ka kutukufalelwa mi lukaba ni maata a kusebeleza Jehova. (Maro. 12:11) Ki lika mañi zeluswanela kueza kuli lufiwe moya okenile? Luswanela kulapela ku Mulimu kuli alufe ona, kuituta Linzwi la Mulimu lelitahile ka kususumezwa ki moya wahae, ni kuswalisana ni kopano yahae yeetelelwa ki moya wahae. Kueza cwalo kuka lutusa kuba ni “muselo wa moya.”—Magal. 5:22, 23.

14. Ki lika mañi zeluswanela kuambuka kuli luzwelepili kufiwa moya wa Mulimu? (Mubone ni siswaniso.)

¹⁴ Mulimu hasaa lufile moya wahae okenile, luswanela kutokomela kuli ‘halutimi mulilo wa moya wa Mulimu.’ Mulimu ufanga feela moya wahae okenile kwa batu babanahana lika zende ni babanani muzamao omunde. Haana kuzwelapili  kulufa moya wahae haiba lika zelunahana lifosahalile mi lueza lika zeo. (1 Mates. 4:7, 8) Hape kuli luzwelepili kufiwa moya okenile, luswanela kutokomela kuli ‘halunyefuli bupolofita.’ (1 Mates. 5:20) Linzwi la “bupolofita” leliitusisizwe fa liama kwa litaba zalufa Jehova ka kuitusisa moya wahae, zekopanyeleza lizazi la Jehova ni mafelelezo a lifasi. Haluswaneli kukasheza lizazi leo kwapili ka kunahana kuli Armagedoni haina kutaha mwa mazazi aluna. Kono luswanela kuliakufisa kamba kulihupula ka kuzwelapili kuba ni muzamao omunde ni kupateha mwa “likezo za busepahali ku Mulimu” zazi ni zazi.—2 Pit. 3:11, 12.

15. Ki lika mañi zeluswanela kueza kuli lusike lwapumiwa haluka utwa litaba za buhata za madimona? (1 Matesalonika 5:21)

¹⁵ Kwapilinyana, balwanisi ba Mulimu ka nzila yeñwi bakabulela kuli: “Kozo ni buiketo!” (1 Mates. 5:3) Lipulelo zetahile ka kususumezwa ki madimona likaata mwa lifasi mi batu babañata bakapumiwa. (Sin. 16:13, 14) Kana ni luna lukapumiwa? Haluna kupumiwa haiba ‘luikolwisisa lika kaufela.’ (Mubale 1 Matesalonika 5:21.) Linzwi la Sigerike lelitolokilwe kuli “muikolwisise” neliitusisizwe kuama kwa kutatuba lisipi za butokwa kubona haiba ki za luli. Kacwalo, luswanela kuikolwisisa ka za haiba litaba zeluutwa kamba zelubala ki za niti. Neli kwa butokwa kuli Bakreste ba kwa Tesalonika baeze cwalo, mi mane ki kwa butokwa hahulu nikufita ku luna kueza cwalo bakeñisa kuli ñalelwa yetuna i fakaufi. Kufita kulumela litaba kaufela zebabulela batu, luswanela kuitusisa maata aluna a kunahana ka kubapanya litaba zelubala kamba zeluutwa kwa litaba zeiluta Bibele ni kopano ya Jehova. Haiba lueza cwalo, haluna kupumiwa haluka utwa litaba za buhata za madimona.—Liprov. 14:15; 1 Tim. 4:1.

16. Ki sepo mañi yelunani yona, mi luikatulezi kuezañi?

¹⁶ Batanga ba Jehova bakapunyuha ñalelwa yetuna sina sikwata. Kono mañi ni mañi waluna haazibi mobuka bela bupilo bwahae kamuso. (Jak. 4:14) Niteñi, ibe kuli lukapunyuha ñalelwa yetuna kamba lukashwa pili isika taha kale, lukafiwa bupilo bobusa feli haiba luzwelapili kusepahala ku Mulimu. Babatozizwe bakaba ni Kreste kwa lihalimu. Ba lingu zeñwi bakapila mwa paradaisi fa lifasi. Haike kaufelaa luna luise pilu kwa sepo yaluna yende ni kuzwelapili kuitukiseza lizazi la Jehova!