Ki kabakalañi Jesu pili asika shwa kale hanaakutezi kubulela manzwi anaabulezi Davida añozwi kwa Samu 22:1?

Manzwi amañwi a mafelelezo anaabulezi Jesu pili asika shwa kale, afumaneha kwa Mateu 27:46 ni Mareka 15:34, naaize: “Mulimu waka, Mulimu waka, unituheleziñi?” Ka kubulela cwalo, Jesu naatalelelize manzwi a muñoli wa samu Davida añozwi kwa Samu 22:1. Haki kuli naabulezi manzwi ao bakeñisa kuli naabilaela kuli Jehova naasika mueza hande kamba kuli naatuhezi kuba ni tumelo ka nakonyana. Jesu naaziba hande libaka hanaatokwa kushwa, mi naaitatezi kueza cwalo. (Mat. 16:21; 20:28) Hape naaziba kuli ka nako yanaaka bulaiwa, Jehova naasike ‘amusileleza’ nihanyinyani. (Jobo 1:10) Kacwalo, Jehova naatuhezi kusileleza Jesu kakuli naabata kuli Jesu abonise kuli naakazwelapili kusepahala ku yena kusina taba kuli naakabulaiwa cwañi.—Mare. 14:35, 36.

Kacwalo, ki kabakalañi Jesu hanaabulezi manzwi afumaneha mwa samu ye? Nihaike kuli haluzibi hande libaka, halunyakisiseñi mabaka amañwi mwendi anaatahisize kuli abulele manzwi ao. *

Ka kubulela manzwi ao, Jesu mwendi naakoñomeka taba ya kuli Jehova naasike amusileleza kwa lifu. Jesu naatokwa kufa sitabelo sa tiululo kusina kutusiwa ki Jehova. Naatokwa kulupa lifu kuli “ashwele batu kaufela.”—Maheb. 2:9.

 Ka kubulela manzwi asikai afumaneha mwa samu yeo, Jesu mwendi naabata kuhupulisa batu litaba kaufela zefumaneha mwateñi. Ka nako yeo, Majuda nebapetanga lisamu zeñata. Kacwalo, hane bakautwa taba yeñwi ya mwa samu, nebaka hupula litaba zefumaneha mwa samu yeo kaufela. Mi haiba neli ona mulelo wa Jesu wo, uzibe naatusize balateleli bahae ba Majuda kuhupula bupolofita bobuñata bobuñozwi mwa samu ye, bobubulela za lifu lahae. (Samu 22:7, 8, 15, 16, 18, 24) Hape mwendi nebahupuzi kuli litimana za kwa mafelelezo a samu yeo libulela za kulumbeka Jehova, mi limutalusa kuli ki Mulena wa lifasi kaufela.—Samu 22:27-31.

Ka kukutela kubulela manzwi ao anaabulezi Davida, Jesu mwendi naakoñomeka taba ya kuli naabulailwe kusina mulatu. Pili Jesu asika bulaiwa kale, naazekisizwe mwa kuta ya Sanhedrini isi ka mulao, mi naafilwe mulatu wa kuli naali munyefuli. (Mat. 26:65, 66) Ba kuta ya Sanhedrini nebatalimile taba yeo ka bubebe busihu, mi nebalobile milao yenetomilwe ya mwakutalimela litaba. (Mat. 26:59; Mare. 14:56-59) Jesu hanaabulezi kuli: “Mulimu waka, Mulimu waka, unituheleziñi?” mwendi naabonisa kuli hakuna mulatu wanaaezize kuli abulaiwe.

Jesu mwendi hanaabulezi manzwi ao naahupulisa batu babañwi kuli nihaike kuli Davida, muñoli wa samu ye, naanyandisizwe, taba yeo neisa talusi kuli naasaezi lika zenetabisa Jehova. Davida hanaabuzize puzo yeo, hakutalusi kuli naasina tumelo ku Mulimu. Zanaabulezi hamulaho wa kubuza puzo yeo, libonisa kuli naanani tumelo ya kuli Jehova wakona kupilisa batu bahae, mi Jehova naazwezipili kumufuyaula. (Samu 22:23, 24, 27) Ka mukwa oswana, nihaike kuli Jesu, “Mwanaa Davida,” naanyandile fa kota ya linyando, taba yeo haitalusi kuli naasatabisi Jehova.—Mat. 21:9.

Ka kubulela manzwi ao, Jesu mwendi naabonisa kuli naautwa butuku bobutuna bakeñisa kuli Jehova naatuhezi kumusileleza ilikuli busepahali bwahae bulikiwe ka kutala. Jehova naasika lela kuli Mwanaa hae anyandiswe ni kubulaiwa. Kono Adama ni Eva hane bakwenuhezi Mulimu, Jesu alumiwa kuli ato shwela libi zaluna. Jesu naasika eza sibi, kono naanani kunyandiswa ni kubulaiwa kuli atatulule taba yanaazusize Satani ni kufa bupilo bwahae sina tiululo, ilikuli aleke sinca bupilo bobupetehile bwanaalatehezwi ki bona Adama. (Mare. 8:31; 1 Pit. 2:21-24) Taba yeo neika konahala feela Jehova hanaaka tuhela kusileleza Jesu ka nakonyana, ili nto yenesika ezahala kale.

Mwendi Jesu naabata kutusa balateleli bahae kunahanisisa libaka Jehova hanaa mutuhelezi kuli abulaiwe ka nzila ye. * Jesu naaziba kuli lifu lahae la kubulaiwa sina sikebenga fa kota ya linyando, nelika sitatalisa batu babañata. (1 Makor. 1:23) Balateleli bahae hane bakanahanisisa libaka luli hanaabulaiwe, nebaka utwisisa butokwa bwa lifu lahae. (Magal. 3:13, 14) Nebaka muunga kuli ki Mupilisi wabona isiñi kuli ki sikebenga.

Kusina taba ni libaka luli lene litahisize kuli Jesu akutele kubulela manzwi a, naaziba kuli hanaaka bulaelwa fa kota ya linyando, naaeza tato ya Jehova. Nakonyana kuzwa fabulelela manzwi a samu ye, Jesu naaize: “Kupetahalile!” (Joa. 19:30; Luka 22:37) Kaniti luli, Jehova hanaatuhelezi kusileleza Jesu ka nakonyana, naamutusize kupeta ka kutala musebezi wanaatezi fa lifasi. Hape kueza cwalo neku mutusize kutaleleza lika kaufela zeneñozwi ka za hae “mwa Mulao wa Mushe ni mwa litaba za Bapolofita ni mwa Lisamu.”—Luka 24:44.