1. Ki kabakalañi Jesu hanaakupile Jehova kuli asileleze balutiwa bahae?

FA BUSIHU bwahae bwa mafelelezo pili asika bulaiwa kale, Jesu naanahana za miinelo yetaata yene bakakopana ni yona balutiwa bahae. Bakeñisa kuli Jesu naalata balutiwa bahae, naakupile Ndatahe kuli “[abasileleze] kabakala yamaswe.” (Joa. 17:14, 15) Jesu naaziba kuli hasaakambamezi kwa lihalimu, Satani Diabulosi naakazwelapili kulwanisa mutu kaufela yabata kusebeleza Jehova. Kaniti luli, batu ba Jehova nebaka tokwa kusilelezwa.

2. Luziba cwañi kuli Jehova ukaalaba litapelo zaluna?

² Jehova naaalabile tapelo ya Jesu kabakala kuli naamulata. Haiba lueza molukonela kaufela kutabisa Jehova, uka lulata ni luna, mi ukaalaba litapelo zaluna za kukupa tuso ni silelezo. Ka kuba Toho ya lubasi yalilato, Jehova ukazwelapili kubabalela bana bahae. Haiba asaezi cwalo, libizo lahae likasinyeha, mi haana kuba ni libubo lelinde.

3. Ki kabakalañi halutokwa kusilelezwa ki Jehova kacenu?

³ Kacenu, lutokwa hahulu kusilelezwa ki Jehova kufita lili kaufela. Satani ulunduzwi kwa lihalimu “inze ahalifile hahulu.” (Sin. 12:12) Ukolwisize batu babañwi babasweli kulunyandisa kunahana kuli habaeza cwalo baeza “sebelezo yekenile ku Mulimu.” (Joa. 16:2) Batu babañwi babasa lumeli ku Mulimu balunyandisa kabakala kuli halulikanyisi mikwa ya batu ba lifasi. Kusina taba ni libaka leba lunyandiseza, halusabi. Kabakalañi? Kakuli Linzwi la Mulimu libulela kuli: “Mulena ki yasepahala, mi uka mitiisa ni kumisileleza ku yamaswe.” (2 Mates.  3:3) Jehova ulusileleza cwañi? Halunyakisiseñi linzila zepeli mwaezezanga cwalo.

4. Ka kuya ka Maefese 6:13-17, ki lika mañi zalufile Jehova kuli lilusileleze?

⁴ Jehova ulufile liapalo za ndwa zekona kulusileleza halulwaniswa ki Satani. (Mubale Maefese 6:13-17.) Liapalo za ndwa za kwa moya zeo litiile mi zatusa. Kono likona feela kulusileleza haiba luzwelapili kuapala kalulo ni kalulo ya liapalo zeo ni kusaitubula. Kalulo ni kalulo ya liapalo zeo iyemelañi? Halunyakisiseñi taba yeo ka butungi.

5. Lukanda lwa niti luyemelañi, mi ki kabakalañi haluswanela kuitama lona?

⁵ Lukanda lwa niti luyemela niti yefumaneha mwa Linzwi la Mulimu, yona Bibele. Ki kabakalañi haluswanela kuitama lukanda lo? Kakuli lubata kusilelezwa ku Satani, yena “ndatahe buhata.” (Joa. 8:44) Uzwezipili kupuma ka lilimo zeñata-ñata mi ukelusize “lifasi kaufela.” (Sin. 12:9) Kono niti yefumaneha mwa Bibele ilutusa kuli lusike lwapumiwa. Lukona kuitama cwañi lukanda lwa niti lo? Lukona kueza cwalo ka kuituta niti ka za Jehova, kumulapela “ka moya ni ka niti,” ni ka kupila ka busepahali mwa lika kaufela.—Joa. 4:24; Maef. 4:25; Maheb. 13:18.

6. Sisilelezo sa fa sifuba sa kuluka siyemelañi, mi ki kabakalañi haluswanela kuapala sisilelezo seo?

⁶ Sisilelezo sa fa sifuba sa kuluka siyemela likuka za Jehova zelukile. Ki kabakalañi haluswanela kuapala sisilelezo sa fa sifuba? Sina feela sisilelezo sa fa sifuba hasikona kusileleza pilu ya lisole kuli isike yatabiwa, sisilelezo sa fa sifuba sa kuluka sisileleza pilu yaluna ya swanisezo, kamba mutu wa mwahali, kuli isike yakukuezwa ki lifasi le. (Liprov. 4:23) Jehova ubata kuli lumulate ni kumusebeleza ka pilu yaluna kaufela. (Mat. 22:36, 37) Kacwalo, Satani ubata kuli lube ni pilu yealuhani ka kulika kulukukueza kuli lulate lika ze mwa lifasi, ili zatoile Jehova. (Jak. 4:4; 1 Joa. 2:15, 16) Mi haiba milelo yahae ipala, ulikanga kulunyandisa ilikuli lueze lika zesatabisi Jehova.

7. Lukona kuapala cwañi sisilelezo sa fa sifuba sa kuluka?

⁷ Lukona kuapala sisilelezo sa fa sifuba sa kuluka ka kusebelisa likuka za Jehova zeama lika zelukile ni zesika luka ni ka kupila ka kuya ka likuka zeo. (Samu 97:10) Batu babañwi baikutwa kuli likuka za Jehova libapaleliswa kuba ni tukuluho. Kono haiba lutuhela kusebelisa likuka za Jehova mwa bupilo bwaluna, lukaswana sina lisole yatubula sisilelezo sahae sa fa sifuba ka nako ya ndwa bakeñisa kuli uikutwa kuli sibukiti hahulu. Bo neikaba butoto butuna luli! Kono haiba lwalata Jehova, haluna kuunga kuli milao yahae ‘yaimeza’ kono luka iinga kuli yapilisa.—1 Joa. 5:3.

8. Kutina makatulo a kuitukiseza kushaela taba yende ya kozo kutalusañi?

⁸ Paulusi hape ulususueza kutina makatulo a kuitukiseza kushaela taba yende ya kozo. Taba yeo italusa kuli kamita luswanela kuba babaitukiselize kushaela taba yende ya Mubuso. Haiba lutaluseza babañwi lushango lwa mwa Bibele, tumelo yaluna ikatiya. Kwatabisa luli kubona kuli batanga ba Jehova mwa lifasi kaufela baeza mobakonela kaufela kushaela tabe yende. Baezanga cwalo ibe kuli ba kwa mubeleko, kwa sikolo, mwa libaka za lipisinisi, habakutaza fa ndu ni ndu, habayo leka lika, habapotela bahabo bona babasi Lipaki, habaikambota ni batu bobazibana ni bona, mane ni ka nako yebasa koni kuzwa fa mandu abona ka nakonyana. Kono haiba lukenelwa ki sabo ni kutuhela kukutaza, lukaswana sina lisole yatubula makatulo ahae ka nako ya ndwa; mahutu ahae akona kuholofala  ka bunolo. Kukona kumubela taata kuitwanela halwaniswa, mi haana kukona kumamela litaelo za mulenaa hae.

9. Ki kabakalañi haluswanela kuswala tebe yetuna ya tumelo?

⁹ Tebe yetuna ya tumelo iyemela tumelo yelunani yona ku Jehova. Lunani tumelo ya kuli Jehova ukataleleza lisepiso zahae kaufela. Tumelo yeo ika lutusa ‘kutima masho kaufela atuka a yamaswe.’ Ki kabakalañi haluswanela kuswala tebe yetuna yeo? Bakeñisa kuli ilutusa kuli lusike lwapumiwa ki litaba zebahasanya bakwenuheli, ni kusazwafiswa ki batu babanyaza lituto zelulumela. Halusina tumelo, haluna kukona kuicemela batu babañwi habalika kulukukueza kuli lusike lwamamela likuka za Jehova. Kono nako kaufela haluhana kueza lika zatoile Jehova haluli kwa mubeleko kamba kwa sikolo, fo kutalusa kuli lusilelezwa ki tebe yaluna. (1 Pit. 3:15) Mi nako kaufela haluhana kukena musebezi ofumanisa masheleñi amañata, kono ili okona kutahisa kuli lupalelwe kueza lika za kwa moya, lusilelezwa ki tebe yaluna. (Maheb. 13:5, 6) Hape nako kaufela haluzwelapili kusebeleza Jehova kusina taba ni twaniso, lusilelezwa ki tebe yaluna.—1 Mates. 2:2.

10. Kuwani ya puluso iyemelañi, mi ki kabakalañi haluswanela kuipala?

 ¹⁰ Kuwani ya puluso iyemela sepo yalufile Jehova ya kuli uka lupilisa kwa lifu ni kufa mupuzo batu kaufela babaeza tato yahae. (1 Mates. 5:8; 1 Tim. 4:10; Tite 1:1, 2) Sina feela kuwani haikona kusileleza toho ya lisole, sepo ya puluso isileleza munahano waluna. Ka mukwa ufi? Sepo yeo ilutusa kuisa pilu kwa lisepiso zalufile Mulimu ni kusaimezwa ki miinelo yetaata yelukopana ni yona. Lukona kuapala cwañi kuwani yeo? Lukona kueza cwalo ka kuba ni mubonelo oswana ni wanani ona Mulimu. Ka mutala, halusika sepa bufumu bobusa swalehi, kono lusepile Mulimu.—Samu 26:2; 104:34; 1 Tim. 6:17.

11. Mukwale wa moya uyemelañi, mi ki kabakalañi haluswanela kuitusisa ona?

¹¹ Mukwale wa moya uyemela Linzwi la Mulimu, yona Bibele. Mukwale wo wakona kupunya kuyo fita kwabuse, ili kupatulula litaba za buhata kaufela ni kulukulula batu mwa butanga bobutahiswa ki lituto za buhata ni mikwa yemaswe. (2 Makor. 10:4, 5; 2 Tim. 3:16, 17; Maheb. 4:12) Kuli luzibe hande mwakuitusiseza mukwale wo, luswanela kubanga ni nako ya kueza tuto ya ka butu ni kusebelisa lituto zelufiwa mwa kopano ya Mulimu. (2 Tim. 2:15) Kwandaa kulufa feela liapalo za ndwa kuli lilusileleze, Jehova hape ulusileleza ka nzila yeñwi. Ki nzila ifi ona yeo?

12. Ki tuso mañi yeñwi yelutokwa, mi ki kabakalañi?

¹² Lisole yacuukile waziba kuli haakoni kutula mpi yetuna anosi; utokwa kutusiwa ki masole babañwi. Ka mukwa oswana, ni luna halukoni kutula Satani ni balateleli bahae lunosi; lutokwa kutusiwa ki mizwale ni likaizeli baluna. Jehova ulufile “kopano ya mizwale” mwa lifasi kaufela kuli balutuse.—1 Pit. 2:17.

13. Ka kuya ka Maheberu 10:24, 25, lutusiwa cwañi halufumaneha kwa mikopano ya puteho?

¹³ Nzila yeñwi yelufumana tuso ka yona ki ka kufumaneha kwa mikopano ya puteho. (Mubale Maheberu 10:24, 25.) Fokuñwi, kaufelaa luna lwazafanga kono mikopano yakona kulutiisa. Lwasusuezwanga ki likalabo zende zebafanga mizwale ni likaizeli baluna. Lingambolo zetomile fa Bibele ni liponiso zebafanga, lilususuezanga kuzwelapili kusebeleza Jehova. Mi haluikambotanga ni mizwale ni likaizeli baluna pili mikopano isika kalisa kale ni hasamulaho, lwasusuezwanga luli. (1 Mates. 5:14) Mi haluli kwa mikopano, lubanga ni kolo ya kutusa babañwi, ili nto yelutahisezanga tabo. (Lik. 20:35; Maro. 1:11, 12) Mikopano yaluna ilutusa mwa linzila zeñwi hape. Ilutusa kuekeza kwa buikoneli bwaluna bwa kukutaza ni kuluta. Ka mutala, mikopano ilutusa kuziba molukona kuitusiseza hande Lihatiso Zeluitusisanga Kwa Kuluta Batu. Kacwalo, muitukisezange hande mikopano ya puteho. Ka nako ya mikopano, muteelezange ka tokomelo. Mi hasamulaho wa mikopano, musebelise lituto zemuitutile. Ka kueza cwalo, mukaba “lisole lelinde la Kreste Jesu.”—2 Tim. 2:3.

14. Ki tuso ifi yeñwi yelufiwa?

¹⁴ Hape lutusiwa ki mangeloi amañata-ñata amaata. Lingeloi lililiñwi likona kueza lika zetuna! (Isa. 37:36) Cwale munahane feela zeikona kueza mpi yemaata ya mangeloi. Hakuna batu kamba madimona babakona kutula mpi yemaata ya Jehova. Kusina taba kuli lila ki zeñata cwañi, Jehova haali ni Paki alimuñwi yasepahala, Paki yo ni Jehova ki babañata kufita lila zeo. (Baat. 6:16) Taba yeo ki ya niti luli! Muihupulange hamukenelwa ki sabo kabakala nto yeñwi yaeza kamba yabulela mutu yomuñwi yomubeleka ni yena, yomukena ni  yena sikolo, kamba wahabo mina yasi Paki. Muhupule kuli hamulwani munosi. Jehova uka mitusa kabakala kuli mulatelela ketelelo yahae.

15. Ka kuya ka Isaya 54:15, 17, ki kabakalañi batu ba Mulimu habasa koni kutuheliswa kukutaza taba yende?

¹⁵ Kunani mabaka amañata lifasi la Satani hali lutoile. Haluikenyangi nihanyinyani mwa litaba za lipolitiki mi haluyangi kwa ndwa. Luzibahaza libizo la Mulimu, lukutaza kuli Mubuso wahae ki ona feela okona kutahisa kozo, mi lumamela likuka zahae zelukile. Lutusa batu kulemuha kuli mubusi wa lifasi le ki lihata lelituna mi ki mubulai. (Joa. 8:44) Mi hape lushaela taba ya kuli lifasi la Satani lituha liyundiswa. Niteñi, Satani ni balateleli bahae habakoni kulupaleliswa kueza musebezi wa kukutaza. Kono lukazwelapili kulumbeka Jehova ka kuitusisa linzila zeshutana-shutana! Nihaike kuli Satani unani maata, haasika kona kulutuhelisa kukutaza taba yende ya Mubuso kwa batu mwa lifasi kaufela. Taba yeo ikonahala feela kabakala kuli Jehova usweli walusileleza.—Mubale Isaya 54:15, 17.

16. Jehova ukatusa cwañi batu bahae ka nako ya ñalelwa yetuna?

¹⁶ Ki lika mañi zelulibelela kwapili? Ka nako ya ñalelwa yetuna, Jehova uka lusileleza. Pili, ukasileleza batanga bahae babasepahala ka nako yakatahisa kuli malena ba lifasi basinye Babilona Yomutuna, bona bulapeli kaufela bwa buhata. (Sin. 17:16-18; 18:2, 4) Hasamulaho, ukasileleza batu bahae hakayundisa lifasi la Satani kaufela ka nako ya Armagedoni.—Sin. 7:9, 10; 16:14, 16.

17. Lukatusiwa cwañi haiba luzwelapili kusutelela ku Jehova?

¹⁷ Haiba luzwelapili kusutelela ku Jehova, Satani haana kukona kueza nto ifi kamba ifi yekatahisa kuli lupalelwe kufumana bupilo bobusa feli. Mane Satani ki yena yakayundiswa kuya kuile. (Maro. 16:20) Kacwalo, muapale liapalo za ndwa zekwanile mi nikamuta musike mwalitubula! Musike mwalwana ndwa ye munosi. Mutuse mizwale ni likaizeli bamina. Mi mulatelele ketelelo ya Jehova. Haiba mueza cwalo, mukaba ni buikolwiso bwa kuli Ndataa mina ya kwa lihalimu uka mitiisa ni kumisileleza.—Isa. 41:10.