1. Ka kuya ka Mateu 24:9, ki kabakalañi halusa swaneli kukomoka haiba lifasi lilutoya?

JEHOVA ulubupile inze lunani buikoneli bwa kulata batu babañwi ni kubata kuli lulatiwe ki bona. Kacwalo, haiba mutu yomuñwi alutoya, luikutwanga hahulu bumaswe mi mane mwendi lwaikalelwanga. Ka mutala, kaizeli yabizwa Georgina yapila kwa Europe, ubulela kuli: “Hane ninani lilimo ze 14, bo ma neba nitoile kabakala kuli nenisebeleza Jehova. Naikutwa hahulu bumaswe mi nakala kunahana kuli mwendi nenili mutu yamaswe.” * Muzwale yabizwa Danylo naabulezi kuli: “Nenisabile hahulu ni kuikutwa kushubulwa masole hane baninatakile, kunilwahaka, ni kunibemba kabakala kuba yomuñwi wa Lipaki za Jehova.” Luikutwanga hahulu bumaswe halutoiwa ki batu, kono taba yeo hai lukomokisi. Jesu naapolofitile kuli lukatoiwa.—Mubale Mateu 24:9.

2-3. Ki kabakalañi balateleli ba Jesu habatoilwe?

² Lifasi litoile balateleli ba Jesu. Kabakalañi? Kabakala kuli sina Jesu, ‘halu ba lifasi.’ (Joa. 15:17-19) Kacwalo, niha lulatelela milao ya muuso, haluikenyangi mwa litaba za lipolitiki, kucaela ndembela silutu, kamba kuopela pina ya naha. Lulapela feela Jehova anosi. Luyemela taba ya kuli Mulimu ki yena feela yanani tukelo ya kubusa batu, kono Satani ni ‘bana bahae’ bahana kuli Mulimu haana tukelo yeo. (Gen. 3:1-5, 15) Lukutaza taba ya kuli Mubuso wa Mulimu ki ona feela okona kufelisa manyando abakopana ni ona batu ni kuli ukayundisa batu kaufela baba ulwanisa. (Dan. 2:44; Sin. 19:19-21) Batu babaishuwa  batabela lushango lo, kono batu babamaswe bona balutoile.—Samu 37:10, 11.

³ Hape lutoilwe kabakala kuli lupila ka kulatelela likuka za Mulimu zelukile. Likuka zeo lishutana hahulu ni likuka zebalatelela batu ba lifasi le babanani muzamao omaswe. Ka mutala, batu babañata kacenu baanga kuli hakusika fosahala kupila ka muzamao wa buhule oswana ni one utahisize kuli Mulimu atimeze batu ba mwa Sodoma ni Gomora. (Juda 7) Bakeñisa kuli lumamela likuka za mwa Bibele mi luambuka muzamao ocwalo, batu babañata balusheununa mi baluunga kuli lu liñañeli.—1 Pit. 4:3, 4.

4. Ki tulemeno mañi totuka lutusa kuitiisa halutoiwa ki batu?

⁴ Ki lika mañi zekona kulutusa kuitiisa batu haba lutoya ni kulutapaula? Luswanela kuba ni tumelo yetiile ya kuli Jehova uka lutusa. Sina tebe, tumelo yaluna yakona ‘kutima masho kaufela atuka a yamaswe.’ (Maef. 6:16) Kono kwandaa kuba feela ni tumelo, lutokwa kuba ni lilato. Kabakalañi? Kabakala kuli lilato “halifilikani.” Likwahela ni kuitiisa mwa lika kaufela zeutwisa butuku. (1 Makor. 13:4-7, 13) Cwale halunyakisiseñi mo kulata Jehova, kulata mizwale ni likaizeli baluna, mane ni kulata lila zaluna kukona kulutuseza kuitiisa halutoiwa.

5. Jesu naatusizwe cwañi kabakala kuli naalata Ndatahe?

⁵ Fa busihu bwa mafelelezo pili Jesu asika bulaiwa kale ki lila zahae, naabulelezi balateleli bahae babasepahala kuli: “Nilata Ndate, [mi] nieza sina mwanilaelezi.” (Joa. 14:31) Bakeñisa kuli Jesu naalata Jehova, naakonile kutiyela miliko yetaata yanaakopani ni yona. Kulata Jehova kuka lutusa ka nzila yeswana ni luna.

6. Ka kuya ka Maroma 5:3-5, batanga ba Jehova baikutwa cwañi habatoiwa ki lifasi?

⁶ Kulata Mulimu kutusize batanga bahae kutiyela nyandiso. Ka mutala, kuta yetuna yemaata ya Majuda hane ilaezi baapositola kutuhela kukutaza, lilato labona ku Mulimu neli batusize “kuutwa Mulimu sina mubusi kufita batu.” (Lik. 5:29; 1 Joa. 5:3) Lilato lelituna lelicwalo ki lona hape lelitusa mizwale ni likaizeli kacenu kuzwelapili kuitiisa, kusina taba kuli buñata bwabona basweli kunyandiswa ki mibuso yemaata yenani situhu. Halutoiwa ki lifasi, haluzwafi kono luzwelapili kuba ni tabo.—Lik. 5:41; mubale Maroma 5:3-5.

7. Luswanela kueza cwañi haiba ba mwa lubasi lwaluna balulwanisa?

⁷ Ba lubasi lwaluna haba lulwanisa, kukona kulubela hahulu taata kuitiisa. Haiba balemuha kuli lukalile kuituta niti, bakona kunahana kuli lupumilwe. Babañwi bakona kunahana kuli lwatakana. (Mubapanye Mareka 3:21.) Mane bakona kululwanisa hahulu. Kono taba yeo haiswaneli kulukomokisa. Jesu naabulezi kuli: “Lila za mutu ikaba ba ndu yahae luli.” (Mat. 10:36) Kusina taba ni moba luungela bahabo luna, haluna kubaanga sina lila zaluna. Kono lilato laluna ku Jehova halinze lizwelapili kuekezeha, lukazwelapili kulata ni batu. (Mat. 22:37-39) Kono nikamuta, haluna kutuhela kumamela milao ni likuka za Mulimu zefumaneha mwa Bibele ka kubata feela kutabisa batu.

8-9. Ki lika mañi zenetusize kaizeli yomuñwi kuzwelapili kuitiisa kusina taba ni twaniso yetuna yanaakopani ni yona?

⁸ Bo Georgina bababulezwi kwamulaho nebakonile kutiyela twaniso yetuna yenezwa ku bo maa bona. Batalusa kuli: “Na ni bo ma nelukalile kuituta Bibele ni Lipaki za Jehova. Kono hamulaho wa likweli ze 6 kuzwa fo, hane nibata kukalisa kuyanga kwa mikopano, bo  ma bakala kunilwanisa. Nalemuha kuli bo ma nebakalile kubala litaba za bakwenuheli, mi hane baambolanga ni na, nebabulelanga litaba za buhata ka za Lipaki za Jehova zene babalile zeo. Hape neba nilwahakanga, kunihoha milili, kunikama, ni kuyumba lihatiso zaka. Hane nikwanisize lilimo ze 15, nakolobezwa. Bo ma balika kunipaleliswa kusebeleza Jehova ka kuniisa kwa sibaka sesiñwi kone kuiswanga banana bane basautwi, ili bao babañwi ku bona nebaitusisa milyani yekola ni kueza lika zemaswe. Kutaata hahulu kutiyela twaniso yezwa kwa batu bolulibelela kuli baswanela kululata ni kuluisa pilu.”

⁹ Bo Georgina nebatiyezi cwañi muinelo wo? Batalusa kuli: “Lizazi lebakala kunilwanisa bo ma, ki lona lizazi lene nifelize kubala Bibele mukatumbi. Ka nako yeo, neniikolwisisize kuli nifumani niti, mi neniikutwa kuba bukaufi hahulu ni Jehova. Hañata, nenilapelanga ku yena mi naaalabanga litapelo zaka. Ka nako yene nipila kwa sibaka seo, kaizeli yomuñwi animemela kwa ndu yahae mi lwayo nyakisisa litaba za mwa Bibele hamoho. Mi mwahalaa nako yeo, mizwale ni likaizeli neba nitiisize. Neba niinga sina yomuñwi wa mwa lubasi lwabona. Neniiponezi fokusweu kuli Jehova unani maata amatuna kufita mutu ufi kamba ufi yakona kululwanisa.”

10. Ki buikolwiso mañi bolukona kuba ni bona ka za Jehova Mulimu waluna?

¹⁰ Muapositola Paulusi naañozi kuli hakuna nto niyekana yekona “kulukauhanya kwa lilato la Mulimu lelili ku Kreste Jesu Mulenaa luna.” (Maro. 8:38, 39) Nihaike kuli lukona kunyanda ka nakonyana, kamita Jehova ukaba ni luna mi uka luomba-omba ni kulutiisa. Mi zeneezahezi ku bo Georgina lilutusa kulemuha kuli Jehova ulutusanga ka kuitusisa mizwale ni likaizeli mwa puteho.

11. Lilato lanaatalusize Jesu kwa Joani 15:12, 13 nelitusize cwañi balutiwa bahae? Mufe mutala.

¹¹ Fa busihu bone butatamiwa ki lizazi lanaabulailwe, Jesu naalaezi balutiwa bahae kuli balatane. (Mubale Joani 15:12, 13.) Naaziba kuli hane bakabonisana lilato la buitomboli nebaka swalisana mi nebaka itiisa habatoiwa ki lifasi. Halunyakisiseñi zeneezahezi mwa puteho ya mwa Tesalonika. Kuzwa feela foitomelwa puteho yeo, mizwale ni likaizeli ba mwateñi nebanyandisizwe. Niteñi, nebazwezipili kusepahala ni kubonisana lilato. (1 Mates.  1:3, 6, 7) Paulusi naabasusuelize kuzwelapili kubonisana lilato “ka kutala.” (1 Mates. 4:9, 10) Lilato nelika batusa kuomba-omba bane balobehile lipilu ni kutiisa bane bafokozi. (1 Mates. 5:14) Mizwale ni likaizeli bao nebalatelezi kelezo ya Paulusi, kakuli mwa liñolo labubeli lanaa bañolezi ibato ba silimo silisiñwi kuzwa fo, naabulezi kuli: “Lilato la yomuñwi ni yomuñwi wamina, lemubonisana mwahalaa mina, lisweli laekezeha.” (2 Mates. 1:3-5) Kuba ni lilato neku batusize kutiyela miinelo yetaata yene bakopana ni yona hamohocwalo ni nyandiso.

12. Ka nako ya ndwa, mizwale ni likaizeli ba mwa naha yeñwi nebabonisize cwañi lilato mwahalaa bona?

¹² Halunyakisiseñi hape zeneezahezi ku Muzwale Danylo yabulezwi kwamulaho, ni musalaa hae. Mwa tolopo yene bapila ku yona hane kuzuhile ndwa, nebazwezipili kuyanga kwa mikopano ya puteho, kukutaza ka mone bakonela kaufela, ni kuikabela lico zene banani zona ni mizwale ni likaizeli babona. Zazi leliñwi, bo Danylo baatumelwa ki masole bane balwezi litobolo. Bo Danylo batalusa kuli: “Masole bao nebabata kuli nilatule tumelo yaka. Hane nihanile kueza cwalo, bakala kunititika ni kueza inge bababata kunikunupa, mi malumo ato fita fahalimwaa toho yaka. Basika funduka kale, banibemba ka kubulela kuli nebaka kuta ni kuto swala musalaaka likalala. Kono mizwale baluna balutusa kukwela sitima sene siya kwa tolopo isili. Hanina kulibala lilato lene balubonisize mizwale bao. Mi hase lufitile kwa tolopo yeo, mizwale ba kwateñi balufa lico, mi banitusa kufumana musebezi ni ndu! Kacwalo, hamulaho wa nako, nelukonile kutusa Lipaki bane babalehile kabakala ndwa yeo kufumana sibaka kone bakapila.” Litaba zecwalo libonisa kuli lilato lelubonisana mwahalaa luna lakona kulutusa kuitiisa halutoiwa.

13. Moya okenile ulutusa cwañi halutoiwa ki batu kabakala kusebeleza Jehova?

¹³ Jesu naabulelezi balateleli bahae kuli baswanela kulata lila zabona. (Mat. 5:44, 45) Kana kueza cwalo ki nto yebunolo? Kutokwa nihanyinyani! Kono moya wa Mulimu okenile wakona kulutusa kueza cwalo. Muselo wa moya wa Mulimu ukopanyeleza lilato, pilu-telele, sishemo, bunolo, ni buiswalo. (Magal. 5:22, 23) Tulemeno to, tulutusa kuitiisa halutoiwa. Batu babañata batuhezi kululwanisa kabakala kuli bo muunaa bona, bo musalaa  bona, mwanaa bona, kamba mutu yomuñwi yapila bukaufi ni bona naabonisize tulemeno to. Batu babañata bane balulwanisa mane sebali mizwale ni likaizeli baluna. Kacwalo, haiba kumibela taata kulata batu baba mitoile kabakala kuli musebeleza Jehova, mulapele kuli mufiwe moya okenile. (Luka 11:13) Mi mube ni buikolwiso bwa kuli kueza lika ka nzila yatabela Jehova kamita kwatusa.—Liprov. 3:5-7.

14-15. Liñolo la Maroma 12:17-21 nelitusize cwañi bo Yasmeen kubonisa lilato ku bo muunaa bona nihaike kuli neba balwanisa hahulu?

¹⁴ Halunyakisiseñi zeneezahezi ku kaizeli yabizwa Yasmeen. Hanaabile yomuñwi wa Lipaki za Jehova, muunaa hae naanahana kuli naapumilwe mi alika kumupaleliswa kusebeleza Mulimu. Muunaa kaizeli yo amutapaula mi asusueza bahabo, yomuhulu wa bulapeli ni mulauli kumubemba ni kumutameleza kuli naatahisa kuli lubasi lwabona lusike lwaswalisana. Muunaa hae mane naalwahakile mizwale ni likaizeli ka nako ya mukopano wa puteho! Bo Yasmeen hañata nebalilanga kakuli nebanyandiswa ki bo muunaa bona.

¹⁵ Bo Yasmeen nebaomba-ombilwe ni kutiiswa ki mizwale ni likaizeli kwa Ndu ya Mubuso. Baana-bahulu neba basusuelize kusebelisa kelezo yefumaneha kwa Maroma 12:17-21. (Mubale.) Bo Yasmeen batalusa kuli: “Kueza cwalo nesi nto yebunolo. Kono nenikupile Jehova kuli anituse, mi neniezize mone nikonela kaufela kusebelisa kelezo ya mwa Bibele yeo. Kacwalo, bo muunaaka hane basululelanga mubu mwa liapehelo, neni ufiyelanga. Hane banitapaulanga, neni baalabanga ka musa. Mi hane bakulanga, neni bababalelanga.”

16-17. Muitutañi kwa mutala wa bo Yasmeen?

¹⁶ Bo Yasmeen nebafuyauzwi kabakala kuli nebabonisize bo muunaa bona lilato. Batalusa kuli: “Bo muunaaka nebakalile kunisepa kabakala kuli nebaziba kuli kamita nenibulelanga niti. Bakala kuteeleza ka tokomelo hane luikambotanga litaba zeama bulapeli, mi balumela kuli nebaka pilisana ka kozo ni na fa lapa. Mi cwale banisusuezanga kuya kwa mikopano ya puteho. Ka nako ya cwale na ni bo muunaaka seluutwana hahulu mi selupilisana ka kozo. Tapelo yaka ki ya kuli bo muunaaka bakalise kuituta niti ni kuswalisana ni na kusebeleza Jehova.”

¹⁷ Zeneezahezi ku bo Yasmeen libonisa kuli lilato “likwahela lika kaufela, . . . lisepa lika kaufela, liitiisa mwa lika kaufela.” (1 Makor. 13:4, 7) Lilato linani maata kufita sitoyo. Haiba  lulata batu babañwi, bakona kucinca moba luungela. Mi hape lukatabisa Jehova. Kusina taba kuli balwanisi bazwelapili kulutoya, lusakona kuzwelapili kuba ni tabo. Kabakalañi?

18. Ki kabakalañi halukona kuba ni tabo halutoiwa?

¹⁸ Jesu naabulezi kuli: “Tabo ki yamina, batu haba mitoya.” (Luka 6:22) Haki kuli lubata kutoiwa. Halubatangi kuli batu balunyandise kabakala tumelo yaluna. Kono cwale ki kabakalañi halukona kuba ni tabo halutoiwa? Halunyakisiseñi mabaka amalaalu alatelela. Sapili, halutiyela manyando, lutabisa Mulimu. (1 Pit. 4:13, 14) Sabubeli, lubanga ni tumelo yetiile. (1 Pit. 1:7) Mi sabulaalu, lukafiwa mupuzo omunde hahulu, ili bupilo bobusa feli.—Maro. 2:6, 7.

19. Ki kabakalañi baapositola hane babile ni tabo hamulaho wa kushapakiwa?

¹⁹ Jesu amano zusiwa kwa bafu, baapositola nebabile ni tabo sina mwanaabulelezi. Kusina taba kuli nebashapakilwe ni kulaelwa kuli batuhele kukutaza, nebanani tabo. Kabakalañi? “Kakuli nebaezizwe babalukela kushwaulwa kabakala libizo [la Jesu].” (Lik. 5:40-42) Nebalata hahulu Mulenaa bona kufita kusaba kuli nebaka kutoiwa ki lila zabona. Mi nebabonisize kuli neba mulata ka kuzwelapili kukutaza taba yende “basaliseli.” Buñata bwa mizwale ni likaizeli baluna kacenu bazwelapili kusebeleza Jehova ka busepahali kusina taba ni miinelo yetaata yebakopana ni yona. Baziba kuli Jehova haana kulibala misebezi yabona ni lilato lebabonisize kwa libizo lahae.—Maheb. 6:10.

20. Lukanyakisisañi mwa taba yetatama?

²⁰ Lifasi likazwelapili kulutoya ibile feela kuli halisika fela kale. (Joa. 15:19) Kono haluswaneli kusaba. Sina moluka itutela mwa taba yetatama, Jehova ‘ukatiisa ni kusileleza’ batanga bahae babasepahala. (2 Mates. 3:3) Kacwalo, haike luzweleñipili kulata Jehova, kulata mizwale ni likaizeli baluna, mane ni kulata lila zaluna. Haiba lueza cwalo, lukazwelapili kuswalisana ni kutiya kwa moya, lukakanyisa Jehova, mi lukabonisa kuli lilato linani maata kufita sitoyo.