Batu babañwi babuzanga puzo yeo hamulaho wa kubala likande leo kusina kunahanisisa. Kono niti kikuli, litimana zeo liambola za batu bababeli babashutana ba libizo la Mefibosheti mi lwakona kuituta zeñata ka kunyakisisa zeneezahezi.

Mulena Saule wa Isilaele naanani bana babashimani ba 7 ni babasizana bababeli. Mweli wa Saule neli Jonatani. Hamulaho wa nako, mulena hape aba ni mwana wamushimani wa libizo la Mefibosheti, ili yanaapepile ni siendi sahae yabizwa Rizipa. Kono hape Jonatani ni yena naanani mwana wamushimani wa libizo la Mefibosheti. Kacwalo, Mulena Saule naanani mwana wamushimani wa libizo la Mefibosheti ni muikulu wa libizo la Mefibosheti.

Ka nako yeñwi, Mulena Saule afetuhela Magibioni bane bapila mwahalaa Maisilaele mi abata kubayundisa. Kubonahala kuli naabulaile babañata ku bona. Taba yeo neifosahalile luli. Kabakalañi? Kakuli kwamulaho mwa linako za Joshua, manduna ba Isilaele nebaezize tumelelano ya kozo ni Magibioni.—Josh. 9:3-27.

Tumelelano yeo neisa tama Maisilaele nihaiba mwa linako za Mulena Saule. Kono mulena naasika kuteka tumelelano yeo mi abata kuyundisa Magibioni. Taba yeo neitahisize kuli ‘Saule ni ba ndu yahae babe ni mulatu wa mali.’ (2 Sam. 21:1) Hamulaho wa nako, Davida aba mulena. Magibioni bane babandukile bamutaluseza mafosisa amatuna anaaezize Saule. Davida abakupa kuli bamutaluseze zanaatokwa kueza kuli mulatu omutuna wa Saule ulifiwe, ilikuli Jehova afuyaule naha ya Isilaele. Mwa sibaka sa kukupa masheleñi, Magibioni bakupa kuli bafiwe bana babashimani ba 7 ba muuna ‘yanaalelile kubayundisa’ kuli bababulaye. (Num. 35:30, 31) Davida aeza sina mone bakupezi.—2 Sam. 21:2-6.

Ka nako yeo, Saule ni Jonatani nebashwezi mwa ndwa kono Mefibosheti mwanaa Jonatani naasapila. Mefibosheti naabile sihole kabakala kozi yanaaipumani ku yona hanaasali mwanana mi naasika tusa bo kuku wahae kulwanisa Magibioni. Davida naaezize tumelelano ya bulikani ni Jonatani yeneka tusa bana ba Jonatani hamohocwalo ni Mefibosheti. (1 Sam. 18:1; 20:42) Bibele ibulela kuli: “Mulena [Davida] abonisa mukekecima Mefibosheti mwanaa Jonatani mwanaa Saule, bakeñisa buitamo bone buezizwe fapilaa Jehova.”—2 Sam. 21:7.

Niteñi, Davida naaezize sina mone bakupezi Magibioni. Afa Magibioni bana ba Saule bababeli, mi yomuñwi ku bona naabizwa Mefibosheti, ni baikulu ba Saule baketalizoho. (2 Sam. 21:8, 9) Muhato wanaangile Davida neutahisize kuli mulatu wa mali one uli fahalimwaa naha ufele.

Likande le liluluta lituto za butokwa. Mulao wa Mulimu neuikutwahalela hande. Neuize: “Bana habaswaneli kubulaiwa kabakala zebaeza bo ndataa bona.” (Deut. 24:16) Jehova naasike alumeleza kuli bana ba Saule bababeli ni baikulu bahae baketalizoho babulaiwe kambe nebasina mulatu. Mulao wo hape neuize: “Mutu uswanela kubulaelwa feela sibi sahae.” Kubonahala kuli bana ba Saule bao ni baikulu bahae nebaswalisani ni yena ka nzila yeñwi kubulaya Magibioni. Kabakaleo, kaufelaa bona ba 7 nebabulailwe kabakala sibi sabona.

Likande le libonisa kuli mutu hakoni kulatula kuli haana mulatu wa lika zeñwi zemaswe zaezize ka kubulela kuli naaezize cwalo kabakala kuli naalatelela feela litaelo zanaafilwe. Lishitanguti leliñwi libulela kuli: “Ulukise nzila mwakafita mahutu ahao, mi linzila zahao kaufela likakonda.”—Liprov. 4:24-27; Maef. 5:15.