TABA YA KUITUTA 14
“Batu Kaufela Bakaziba Kuli mu Balutiwa Baka ka Taba Ye”
“Batu kaufela bakaziba kuli mu balutiwa baka ka taba ye—haiba mulatana mwahalaa mina.”—JOA. 13:35.
PINA 106 Kuituta Kuba ni Kalemeno ka Lilato
ZELUKA ITUTA a
Kubona lilato leli mwahalaa batu ba Jehova kutusize cwañi batu babasi Lipaki? (Mubone paragilafu 1)
1. Ki lika mañi zebatabelanga hahulu batu habafumaneha kwa mikopano yaluna lwapili? (Mubone ni siswaniso.)
LUUNGEÑI kuli mutu ni musalaa hae baizo fumaneha lwapili kwa mukopano wa Lipaki za Jehova kwa Ndu ya Mubuso. Batabile hahulu kabakala kuamuhelwa hande ni kubona lilato lebabonisana mizwale ni likaizeli mwa puteho. Habakutela kwa ndu, wamusali utaluseza muunaa hae kuli: ‘Lipaki za Jehova ki batu babande mi bashutana ni batu babañwi.’
2. Ki kabakalañi batu babañwi habasitatalile?
2 Mizwale ni likaizeli mwa puteho balatana luli. Nihakulicwalo, Lipaki za Jehova habasika petahala. (1 Joa. 1:8) Halunze luziba hande mizwale ni likaizeli baluna mwa puteho, mwendi lukalemuha kuli banani bufokoli bobuñwi. (Maro. 3:23) Ka bumai, babañwi basitatalisizwe ki bufokoli bwa batu babañwi.
3. Ki nto mañi yezibahaza balateleli ba Jesu ba niti? (Joani 13:34, 35)
3 Hamutalime hape fa toho ya taba. (Mubale Joani 13:34, 35.) Ki nto mañi yezibahaza balateleli ba Kreste ba niti? Ki lilato isiñi kuli bapetahalile. Hape mulemuhe kuli Jesu naasika bulela kuli: ‘Mukaziba kuli mu balutiwa baka ka taba ye.’ Naabulezi kuli: “Batu kaufela bakaziba kuli mu balutiwa baka ka taba ye.” Kacwalo, Jesu naabonisa kuli haki balateleli bahae feela kono hape ni batu babasi batanga ba Jehova nebaka ziba balateleli bahae ba niti kabakala kubonisana lilato lelisina buitati.
4. Ki lipuzo mañi zebakona kubuza batu babañwi ka za Bakreste ba niti?
4 Batu babañwi babasi Lipaki za Jehova bakona kubuza kuli: ‘Lilato likona kulutusa cwañi kuziba balateleli ba Jesu ba niti? Jesu naabonisize cwañi baapositola bahae lilato? Mi lukona kulikanyisa cwañi mutala wa Jesu kacenu? Lipaki za Jehova bakatuseha haiba banahanisisa likalabo za lipuzo zeo. Kueza cwalo kukona kulutusa kubonisa hahulu lilato, sihulu halufosezwa ki babañwi.—Maef. 5:2.
KI LILATO LELICWAÑI LELIZIBAHAZA BALATELELI BA JESU BA NITI?
5. Manzwi anaabulezi Jesu a kwa Joani 15:12, 13, atalusañi?
5 Jesu naatalusize kuli balateleli bahae nebaka bonisana lilato ka nzila yeipitezi. (Mubale Joani 15:12, 13.) Mulemuhe taelo yanaa bafile Jesu, yeli: “Mulatane sina moni milatezi.” Taba yeo italusañi? Jesu naabonisize kuli lilato leo liama kuitombola nto yeñwi, ili lilato lelitahisanga kuli Bakreste bakone mane nihaiba kushwela babañwi hakutokwahala. b
6. Linzwi la Mulimu libonisa cwañi butokwa bwa kuba ni lilato?
6 Linzwi la Mulimu libonisa kuli lilato ki la butokwa hahulu. Batu babañata balata hahulu litimana za mwa Bibele zelatelela: “Mulimu ki lilato.” (1 Joa. 4:8) “Ulukela kulata wahenu mouitatela.” (Mat. 22:39) “Lilato likwahela libi zeñata.” (1 Pit. 4:8) “Lilato halipalelwi.” (1 Makor. 13:8) Litimana zeo ni zeñwi libonisa libaka hakuli kwa butokwa kuba ni lilato ni kubonisa kalemeno kakande kao.
7. Ki kabakalañi Satani hasakoni kutusa batu kuswalisana ni kubonisana lilato la niti?
7 Batu babañata babuzanga kuli: ‘Lukona kuziba cwañi bulapeli bwa niti? Bulapeli kaufela buipapata kuli buluta niti, kono litaba zebuluta ka za Mulimu zashutana.’ Satani ukonile kulyanganisa batu ka kutahisa kuli kube ni likopano zeñata za bulapeli bwa buhata. Kono hakoni kutahisa kuli kube ni kopano ya Bakreste mwa lifasi kaufela babalatana. Ki Jehova feela yakona kueza cwalo. Luziba cwalo bakeñisa kuli lilato la niti lizwa ku Jehova, mi ki batu feela babanani moya wahae ni babafuyaulwa ki yena bababonisana lilato lelicwalo. (1 Joa. 4:7) Ki lona libaka Jesu hanaabulezi kuli lilato lelisina buitati nelika zibahaza balateleli bahae ba niti.
8-9. Batu babañata batusizwe cwañi ki lilato lene baboni mwahalaa Lipaki za Jehova?
8 Sina feela mwanaapolofitezi Jesu, batu babañata bakonile kuziba balateleli bahae ba niti bakeñisa kuli babonisana lilato la niti. Ka mutala, muzwale yabizwa Ian usahupula mukopano omutuna wapili wanaafumanehile ku ona, one uezelizwe mwa sitediyamu yeli bukaufi ni kwapila. Likweli lisikai pili mukopano wo usika ezwa kale, bo Ian nebaizo buha papali yeñwi mwa sitediyamu mo. Batalusa kuli: “Zene niboni hane niizo buha papali mwa sitediyamu mo, nelishutanela kwahule hahulu ni zene niboni hane niile kwa mukopano omutuna. Lipaki nebabonisa mikwa yeminde, nebaapezi hande, mi bana babona nebaikutekile. Baekeza kubulela kuli: “Sa butokwa nikufita kikuli, batu ba nebabonahala kuli batabile mi nekunani kozo mwahalaa bona, ili lika zene ninyolelwa hahulu kuba ni zona mwa bupilo. Hakuna ngambolo niyekana kwa lingambolo zenefilwe fa lizazi leo yenihupula, kono nisahupula mikwa yeminde yene babonisize Lipaki za Jehova.” c Lubonisa mikwa yeminde yeo kabakala lilato la niti leli mwahalaa luna. Bakeñisa kuli lwalata mizwale ni likaizeli baluna, lubabonisanga sishemo ni likute.
9 Muzwale yabizwa John ni yena naatabisizwe ki za naaboni hakala kufumaneha kwa mikopano ya puteho. Utalusa kuli: ‘Nenitabisizwe hahulu ki silikani . . . sa batu kaufela kwateñi, nebabonahala inge [batu baba petahalile]. Nebabonisana lilato la niti, mi taba yeo yanitusa kulemuha kuli nifumani bulapeli bwa niti.’ d Litaba zeo ni zeñwi libonisa kuli batu ba Jehova ki Bakreste ba niti.
10. Ki lili sihulu foluswanela kuboniseza mizwale ni likaizeli baluna kuli lwabalata? (Mubone ni litaluso ze kwatasi.)
10 Sina molunyakisiselize kwa makalelo a taba ye, mizwale ni likaizeli baluna habasika petahala. Fokuñwi, bakabulela kamba kueza lika zeka lunyemisa. e (Jak. 3:2) Zelubulela ni zelueza sihulu ka nako yelufoselizwe, likabonisa haiba lwabalata luli. Mutala walutomezi Jesu, ukona kulutusa cwañi mwa muinelo wo?—Joa. 13:15.
JESU NAABONISIZE CWAÑI BAAPOSITOLA BAHAE LILATO?
Jesu naabonisanga baapositola bahae lilato nihaike kuli fokuñwi nebaezanga mafosisa (Mubone maparagilafu 11-13)
11. Ki mikwa ifi yemaswe yanaabonisize Jakobo ni Joani? (Mubone ni siswaniso.)
11 Jesu naaziba kuli balateleli bahae nebasika petahala. Niteñi, ka lilato, naabatusize kusebeleza fa bufokoli bwabona ni kueza licinceho ilikuli batabise Jehova. Nako yeñwi, baapositola bababeli, ili Jakobo ni Joani, nebakupile maa bona kuli aambole ni Jesu kumukupa kuli abafe litulo zetuna mwa Mubuso. (Mat. 20:20, 21) Ka kueza cwalo, Jakobo ni Joani nebabonisize kuli nebanani buikuhumuso mi nebalata hahulu litulo.—Liprov. 16:18.
12. Kana Jakobo ni Joani ki bona feela bane babonisize mikwa yemaswe? Mutaluse.
12 Jakobo ni Joani haki bona feela bane babonisize mikwa yemaswe ka nako yeo. Mulemuhe zene baezize baapositola babañwi hane bautwile taba yeo, Bibele ili: “Balutiwa babañwi baalishumi habautwa cwalo, banyemela bo mutu ni munyanaa hae bababeli bao.” (Mat. 20:24) Munahane feela kañi yetuna yenebile teñi mwahalaa Jakobo ni Joani, ni baapositola babañwi. Mwendi baapositola babañwi nebabulezi kuli: ‘Kana muikutwa kuli mwalufita hamuikupezi litulo zetuna mwa Mubuso? Haki mina feela bababelekile ka taata ni Jesu. Kaufelaa luna lwaswanela kufiwa litulo zetuna zeo!’ Ibe kuli ki mona mone kubezi cwalo kamba kutokwa, baapositola nebatuhelezi muinelo wo kubapaleliswa kubonisana lilato ka nakonyana.
13. Jesu naatatuluzi cwañi butata bone buliteñi mwahalaa baapositola bahae? (Mateu 20:25-28)
13 Jesu naatatuluzi cwañi butata bo? Naasika halifa. Naasika bulela kuli naakaketa baapositola basili bane babafita, ili baana bane baikokobeza hahulu ni bane bakabonisana lilato ka nako kaufela. Kono Jesu naabonisize pilu-telele baana bane basepahala bao mi naabatusize. (Mubale Mateu 20:25-28.) Naazwezipili kubabonisa lilato nihaike kuli lo nesi lona lwapili kamba lwa mafelelezo hane bakananisani za kuli ki mañi yanaali yomutuna mwahalaa bona.—Mare. 9:34; Luka 22:24.
14. Baapositola ba Jesu nebahuliselizwe mwa libaka zecwañi?
14 Kusina kukakanya, Jesu naaziba kuli baapositola bahae nebanani mikwa yeo kabakala kukukuezwa ki batu bone bapila ni bona. (Joa. 2:24, 25) Nebahuliselizwe mwa libaka ili mo baeteleli ba bulapeli nebakoñomekanga hahulu taba ya kuba ni litulo zetuna. (Mat. 23:6; mubone taba yeli, “Sinagoge—Mwa na Kutalelize Jesu ni Balutiwa ba Hae,” yefumaneha mwa Tawala ya Mulibeleli ya April 1, 2010, make. 16-18) Baeteleli ba bulapeli bwa Sijuda hape nebaikutwa kuli nebalukile hahulu kufita babañwi. f (Luka 18:9-12) Jesu naaziba kuli kuhulela mwa libaka zecwalo nekukona kuama mone baikuungela baapositola bahae ni mone baangela batu babañwi. (Liprov. 19:11) Naaziba kuli balutiwa bahae nebakona kueza mafosisa mi hane baezanga cwalo naababonisanga pilu-telele. Naaziba kuli nebanani lipilu zende; kacwalo, naababonisize pilu-telele ni kubatusa kutuhela kuba ni buikuhumuso ni kulata hahulu litulo mi naabatusize kubonisa lilato.
LUKONA KULIKANYISA CWAÑI MUTALA WA JESU?
15. Luitutañi ku zeneezahezi ku Jakobo ni Joani?
15 Lukona kuituta zeñata ku zeneezahezi ku Jakobo ni Joani. Nebafosize hane bakupile kuli bafiwe litulo zetuna mwa Mubuso. Kono baapositola babañwi ni bona nebafosize hane batuhelezi muinelo wo kubapaleliswa kuzwelapili kuswalisana. Kono Jesu naabonisize baapositola bahae kaufela ba 12 sishemo ni lilato. Luitutañi kwa taba yeo? Haiba batu babañwi balufoseza, haluswaneli feela kuisa pilu kwa mafosisa ni bufokoli bwabona kono hape luswanela kutokomela zelueza. Ki lika mañi zekona kulutusa? Haiba lunyemisizwe ki muzwale kamba kaizelaa luna, lwakona kuipuza kuli: ‘Ki kabakalañi zaezize hali ninyemisize hahulu? Kana taba yeo ibonisa kuli ninani mukwa omuñwi omaswe oniswanela kutuhela? Esi mwendi mutu yaninyemisize yo ukopana ni muinelo omuñwi otaata? Nihaike kuli ninani libaka lelinde haninyemile, kana nakona kubonisa lilato lelisina buitati ka kuswalela mutu yo?’ Haiba luzwelapili kubonisa babañwi lilato, lukabonisa kuli lu balateleli ba Jesu ba niti.
16. Ki lika mañi zeñwi zeluituta kwa mutala wa Jesu?
16 Mutala wa Jesu hape ululuta kuli luswanela kueza molukonela kaufela kuutwisisa mizwale ni likaizeli baluna. (Liprov. 20:5) Ki niti kuli Jesu naaziba zeneli mwa lipilu za batu. Luna halukoni kueza cwalo. Kono lwakona kubonisa mizwale ni likaizeli baluna pilu-telele. (Maef. 4:1, 2; 1 Pit. 3:8) Kukona kulubela bunolo kueza cwalo haiba lubaziba hande. Halunyakisiseñi mutala olatelela.
17. Kuziba hande muzwale wahae nekutusize cwañi muokameli wa mupotoloho yomuñwi?
17 Muokameli wa mupotoloho yomuñwi yapotelanga liputeho ze kwa upa wa Africa uhupula muzwale yomuñwi yanaanga kuli naasina sishemo. Ki lika mañi zanaaezize muokameli wa mupotoloho yo? Utalusa kuli: “Kufita kutokolomoha muzwale yo, neniezize mone nikonela kaufela kumuziba hande.” Kueza cwalo nekutusize muokameli wa mupotoloho yo kuziba litaba zeñwi ka za mwanaahuliselizwe muzwale yo, ili zenetahisize kuli abe ni mikwa yemiñwi. Muokameli wa mupotoloho yo uzwelapili kubulela kuli: “Hane nizibile kuli muzwale yo naaezize buikatazo bobutuna kutuhela mikwa yanaanani yona kuzwa feela kwa bwanana, nacinca mubonelo waka ka za hae. Lwaba balikani babatuna.” Kaniti luli, haiba lueza molukonela kaufela kuziba mizwale ni likaizeli baluna, kuka lubela bunolo kubabonisa lilato.
18. Ki lipuzo mañi zelukona kuipuza haiba lufosezwa ki muzwale kamba kaizelaa luna? (Liproverbia 26:20)
18 Fokuñwi, lukona kuikutwa kuli lutokwa kuambola ni muzwale kamba kaizelaa luna yalufoselize. Kono pili lusika eza kale cwalo, luswanela kuipuza lipuzo zelatelela: ‘Kana naziba litaba kaufela?’ (Liprov. 18:13) ‘Esi mwendi naasika eza ka bomu?’ (Muek. 7:20) ‘Kana nikile naeza mafosisa aswana?’ (Muek. 7:21, 22) ‘Haiba ni muatumela, kana nikatatafaza feela taba?’ (Mubale Liproverbia 26:20.) Haiba lunyakisisa lipuzo zecwalo, lilato laluna ku muzwale kamba kaizelaa luna lika lususueza kutuhelela mafosisa ahae.
19. Muikatulezi kuezañi?
19 Sina sikwata, Lipaki za Jehova babonisa kuli ki balutiwa ba Jesu ba niti. Mañi ni mañi waluna, ubonisa kuli lu balateleli ba Jesu ba niti ka kubonisa mizwale ni likaizeli lilato lelisina buitati kusina taba kuli habasika petahala. Halunze lueza cwalo, lukatusa batu babañwi kuziba bulapeli bwa niti ni kuswalisana ni luna kulapela Jehova, yena Mulimu yanani lilato. Haike luikatulele kuzwelapili kubonisa lilato lelizibahaza Bakreste ba niti.
PINA 17 “Nalata”
a Batu babañata batabelanga kuituta ka za Jehova kabakala lilato la niti lebabonanga mwahalaa luna. Nihakulicwalo, halusika petahala mi fokuñwi kulubelanga taata kubonisa mizwale ni likaizeli baluna lilato. Halunyakisiseñi libaka lilato halili la butokwa hahulu ni molukona kulikanyiseza mutala wa Jesu babañwi haba lufoseza.
b Mubone buka yeli, “Come Be My Follower,” kauha. 17, mapara. 10-11.
c Mubone taba yeli, “Ka Nako ya Cwale, Bupilo Bwaka Sebunani Mulelo,” ye mwa Tawala ya Mulibeleli ya November 1, 2012, make. 13-14.
d Mubone taba yeli, “Nekubonahala Inge Kuli Neniikola Bupilo Luli,” ye mwa Tawala ya Mulibeleli ya May 1, 2012, make. 18-19.
e Mwa taba ye, halunyakisisi libi zetuna zetokwa kutalimwa ki baana-bahulu, inge cwalo zetalusizwe kwa 1 Makorinte 6:9, 10.
f Bupaki bobuñwi bubonisa kuli hamulaho wa lilimo zeñata-ñata kuzwa fo, rabbi yomuñwi naabulezi kuli: “Mwa lifasi, batu babalukile sina Abrahama habafiteleli 30. Haiba ki ba 30, bababeli kwa batu bao ki na ni mwanaaka wamushimani; haiba ki baalishumi, bababeli kwa batu bao ki na ni mwanaaka wamushimani; haiba ki baketalizoho, bababeli kwa batu bao ki na ni mwanaaka wamushimani; haiba ki bababeli, ki na ni mwanaaka wamushimani; kono haiba ki alimuñwi feela, uzibe ki na.”
