1-2. Ki lika mañi zeezahalanga hañata batu habakolobezwa, mi lukanyakisisañi mwa taba ye?

 KANA mukile mwabona sikwata sa batu babayo kolobezwa? Mubautwa inze baalaba ka buikolwiso lipuzo zepeli zebabuziwa pili basika kolobezwa kale. Ba lubasi lwabona ni balikani babona batabile hahulu. Mubabona inze batabile habaomboka mwa mezi, mi muutwa batu habakwashela. Batu babañata-ñata bakolobezwanga sunda ni sunda, ili kuba Lipaki za Jehova Mulimu, babaineezi ku yena.

² Mina bo? Haiba munahana za kukolobezwa, uzibe mu ba butokwa hahulu mwa lifasi lelimaswe le bakeñisa kuli ‘mubata Jehova.’ (Samu 14:1, 2) Taba ye iñolezwi mina ibe kuli mu babahulu kamba mu banana. Kono ni luna base bakolobelizwe kale lubata kueza molukonela kaufela kusebeleza Jehova kuya kuile. Kacwalo, halunyakisiseñi mabaka amalaalu kwa mabaka amañata halusebeleza Jehova.

3. Ki kabakalañi batanga ba Jehova habalata niti ni kuluka? (Samu 119:128, 163)

³ Jehova naalaezi batu bahae kuli ‘balate niti.’ (Zak. 8:19) Jesu naasusuelize balateleli bahae kuli babate kuluka. (Mat. 5:6) Taba yeo italusa kuli mutu uswanela kuba ni takazo yetuna ya kueza lika zelukile, zende, ni zekenile mwa meeto a Mulimu. Kana mwalata niti ni kuluka? Ki cwalo luli. Mutoile buhata ni lika kaufela zemaswe. (Mubale Samu 119:128, 163.) Mutu habulela buhata, ulikanyisa Satani, yena mubusi wa lifasi le. (Joa. 8:44; 12:31) Satani ubata kusinya libizo lelikenile la Jehova Mulimu. Satani uzwezipili kuhasanya litaba za buhata ka za Mulimu waluna kuzwa feela fa bukwenuheli bone bubile teñi mwa simu ya Edeni. Naabonisize inge  kuli Jehova ki Mubusi yanani buitati ni yasasepahali, ili yatimanga batu lika zende. (Gen. 3:1, 4, 5) Litaba za buhata zazwezipili kuhasanya Satani ka za Jehova litahisize kuli batu babe ni mubonelo omaswe ka za hae. Haiba batu baiketela ‘kusalata niti,’ Satani uka bakukueza kueza mifuta kaufela ya lika zesika luka ni bumaswe.—Maro. 1:25-31.

4. Jehova ubonisize cwañi kuli ki “Mulimu yanani niti”? (Mubone ni siswaniso.)

⁴ Jehova ki “Mulimu yanani niti,” mi ka lilato, ulutanga niti batu baba mulata. (Samu 31:5) Ka kueza cwalo, ubatusa kusazwelapili kupumiwa ki Satani. Jehova hape uluta batanga bahae kuba batu babasepahala ni babalukile. Kacwalo, habana kueza lika zekona kubashubulisa mi bakaba ni kozo ya mwa munahano. (Liprov. 13:5, 6) Mwendi Jehova uezize nto yeswana ku mina hane munze muituta Bibele. Muitutile kuli linzila za Jehova litusa batu kaufela mi ni mina zamitusa. (Samu 77:13) Kacwalo, muikatulezi kueza zelukile mwa meeto a Mulimu. (Mat. 6:33) Mubata kuyemela niti ni kutusa batu kuziba kuli litaba zanaabulezi Satani ka za Mulimu waluna Jehova ki za buhata. Mukona kueza cwañi cwalo?

5. Mukona kubonisa cwañi kuli mwayemela niti ni kuluka?

⁵ Haiba muiketela kupila ka nzila yetabisa Mulimu, kuswana feela inge kuli mubulela kuli: “Nihana litaba za buhata zasweli kuhasanya Satani kono niyemela niti. Nibata Jehova kuli abe Mubusi waka, mi nibata kueza lika zelukile mwa meeto ahae.” Mukona kueza cwañi cwalo? Muineele ku Jehova ka tapelo ni kubonisa buineelo bwamina fapilaa nyangela ka kukolobezwa. Haiba mulata lika za niti ni zelukile, mukasusuezwa hahulu kuunga muhato wa kukolobezwa.

6. Ka kuya ka Samu 45:4, ki kabakalañi hamulata Jesu Kreste?

⁶ Ki kabakalañi hamulata Jesu Kreste? Mulemuhe mabaka amañwi amande afumaneha kwa Samu 45:4. (Mubale.) Jesu ulata niti, buikokobezo, ni kuluka. Haiba mwalata niti ni kuluka, uzibe mwalata ni Jesu Kreste. Munahane feela mo Jesu naaboniselize bundume ka kuyemela lika za niti ni zelukile. (Joa. 18:37) Kono Jesu naabonisize cwañi butokwa bwa kuba ni buikokobezo?

7. Ki lika mañi zemuitebuha ka za buikokobezo bwa Jesu?

 ⁷ Jesu naabonisize butokwa bwa kuba ni buikokobezo ka kulutomela mutala omunde. Ka mutala, naasabati kuli alumbiwe ki batu, kono naabata kuli Ndatahe afiwe kanya kaufela. (Mare. 10:17, 18; Joa. 5:19) Muikutwa cwañi kuziba kuli Jesu naaikokobeza ka nzila yeo? Kaniti luli, taba yeo imisusueza kulata Mwanaa Mulimu ni kumulatelela. Ki kabakalañi Jesu haikokobeza? Kabakala kuli ulata Ndatahe mi ubata kumulikanyisa, mi Ndatahe waikokobeza. (Samu 18:35; Maheb. 1:3) Kana taba yeo hai misusuezi kulata Jesu, yena yalikanyisa tulemeno twa Jehova ka kutala?

8. Ki kabakalañi halulata Jesu, yena Mulenaa luna?

⁸ Lulata Jesu Mulenaa luna kakuli ki yena Mubusi yaswanela. Jehova kasibili ulutile Mwanaa hae mi umuketile kuli abuse. (Isa. 50:4, 5) Hape munahanisise lilato lelituna lanaa mibonisize Jesu. (Joa. 13:1) Mwaswanela luli kulata Jesu kabakala kuli ki Mulenaa mina. Naabulezi kuli batu baba mulata luli, ili batu baanga kuli ki balikani bahae, babonisa lilato labona ku yena ka kumamela litaelo zahae. (Joa. 14:15; 15:14, 15) Kaniti luli, kuba mulikanaa Mwanaa Jehova ki tohonolo yetuna hahulu!

9. Kolobezo ya balateleli ba Jesu iswana cwañi ni ya Kreste?

⁹ Yeñwi ya litaelo zanaafile Jesu ki ya kuli balateleli bahae baswanela kukolobezwa. (Mat. 28:19, 20) Naalutomezi mutala. Kolobezo yahae yashutana ni ya balateleli bahae mwa linzila zeñwi. (Mubone mbokisi yeli, “ Moishutanela Kolobezo ya Jesu ni ya Balateleli Bahae.”) Kono hape yaswana ni ya balateleli bahae mwa linzila zeñwi. Jesu hanaakolobezwa, naabonisize kuli naabata kueza tato ya Ndatahe. (Maheb. 10:7) Ka mukwa oswana, balateleli ba Kreste habakolobezwa babonisanga fapilaa nyangela kuli baineezi ku Jehova Mulimu. Kuzwa yona nako yeo, nto yebaanga kuba ya butokwa hahulu mwa bupilo bwabona, ki kueza tato ya Mulimu kufita kueza zebabata bona bañi. Ka kueza cwalo, balikanyisa mutala wa Mulenaa bona.

10. Lilato lamina ku Jesu limisusueza kuezañi?

¹⁰ Mulumela kuli Jesu ki Mwanaa Jehova wa libanda mi ki Mulena yaketilwe ki Mulimu kuli alubuse. Mwaziba kuli Jesu waikokobeza, mi ulikanyisanga Ndatahe ka kutala. Muitutile kuli Jesu naafepile batu bane balapile, kuomba-omba bane bazwafile, mane nihaiba kufolisa bane bakula. (Mat. 14:14-21) Muiponezi mwasweli kuetelela puteho kacenu. (Mat. 23:10) Mi mwaziba kuli ka kuba Mulena wa Mubuso wa Mulimu, uka luezeza lika zende hahulu nikufita kwapili. Mukona kubonisa cwañi kuli mwamulata? Ka kulikanyisa mutala wahae. (Joa. 14:21) Mukona kueza cwalo ka kuneela bupilo bwamina ku Jehova ni kukolobezwa.

11. Ki lifi libaka la butokwa hahulu hamuswanela kukolobezwa?

¹¹ Ki lifi libaka la butokwa hahulu hamuswanela kukolobezwa? Jesu naabonisize taelo ya butokwa hahulu kwa litaelo za Mulimu, hanaaize: “Ulukela kulata Jehova Mulimu wahao ka pilu yahao kaufela ni ka moyo wahao kaufela ni ka munahano wahao kaufela ni ka maata ahao kaufela.” (Mare. 12:30) Kana ki mona momulatela Mulimu cwalo?

12. Ki kabakalañi hamulata Jehova? (Mubone ni siswaniso.)

¹² Kunani mabaka amañata hahulu hamuswanela kulata Jehova. Ka mutala, muitutile kuli ki yena “simbule sa bupilo” ni kuli ki  Mufani wa “mpo yende kaufela ni mpo yepetehile kaufela.” (Samu 36:9; Jak. 1:17) Lika kaufela zende zemuikola lizwa ku Mulimu waluna yalilato, ni yanani bufani.

13. Ki kabakalañi tiululo haili mpo yende hahulu?

¹³ Tiululo ki mpo yende hahulu yalufile Jehova. Ki kabakalañi halubulela cwalo? Munahane za silikani sesituna sesi mwahalaa Jehova ni Mwanaa hae. Jesu naabulezi kuli: ‘Ndate wanilata’ ni kuli “nilata Ndate.” (Joa. 10:17; 14:31) Hamulaho wa kusebeza hamoho ka lilimo zeñata-ñata, lilato lene banani lona mwahalaa bona nelizwezipili kutiya. (Liprov. 8:22, 23, 30) Munahane feela butuku bwanaautwile Mulimu kubona Mwanaa hae hanyandiswa ni kubulaiwa. Jehova ulata hahulu batu kukopanyeleza cwalo ni mina kuli mane naafile Mwanaa hae yalatwa sina sitabelo ilikuli mina ni batu babañwi mupile kuya kuile. (Joa. 3:16; Magal. 2:20) Leo ki lona libaka la butokwa hahulu halulata Mulimu.

14. Ki sikonkwani mañi sesinde hahulu semukona kuitomela mwa bupilo bwamina?

¹⁴ Lilato lamina ku Jehova lizwezipili kutiya bakeñisa kuituta zeñata ka za hae. Kaniti luli, mubata kuba balikani bahae cwale ni kuya kuile. Mi mwakona kueza cwalo. Ka lilato, umisusueza kutabisa pilu yahae. (Liprov. 23:15, 16) Mukona kueza cwalo isiñi feela mwa lipulelo kono hape ni ka likezo. Momupilela bupilo bwamina kukabonisa kuli mulata hahulu Jehova. (1 Joa. 5:3) Seo ki sona sikonkwani sesinde  hahulu semukona kuitomela mwa bupilo bwamina.

15. Mukona kubonisa cwañi kuli mwalata Jehova?

¹⁵ Mukona kubonisa cwañi kuli mwalata Jehova? Sapili, muswanela kulapela tapelo ya butokwa hahulu ya kuineela ku Mulimu anosi wa niti. (Samu 40:8) Kihona mukabonisa buineelo bwamina bwa kwa mukunda ka kukolobezwa fapilaa nyangela. Sina molunyakisiselize mwa taba ye, kukolobezwa ki muhato wa butokwa hahulu omukona kuunga mwa bupilo mi kueza cwalo kukona kumitahiseza tabo. Mukalisa mupilelo omunca, isiñi kuipilela mina bañi, kono kupilela Jehova. (Maro. 14:8; 1 Pit. 4:1, 2) Mukona kuikutwa kuli wo ki muhato omutuna luli, mi ki cwalo luli. Kono kuunga muhato wo kuka mitusa kupila bupilo bobunde hahulu. Ka mukwa ufi?

16. Sina mokuboniselizwe kwa Samu 41:12, Jehova ukafuyaula cwañi batu babaitusisa bupilo bwabona kumusebeleza?

¹⁶ Jehova ki yena Mufani yomutuna. Kusina taba ni zemuitombola kabakala hae, Jehova kamita uka mifa hahulu nikufita. (Mare. 10:29, 30) Uka mitusa kupila bupilo bobunde hahulu ni kuba ni tabo, mane nihaiba ka nako ye yelupila mwa lifasi lelimaswe le lelituha lifela. Mi ao ki makalelo feela. Hamuswaneli kutuhela kueza zwelopili ya kwa moya bakeñisa kuli kikale mukolobezwa. Mwakona kuzwelapili kusebeleza Ndataa mina yalilato kuya kuile. Lilato lelili mwahalaa mina ni Ndataa mina likazwelapili kutiya mi mukapila kuya kuile sina yena.—Mubale Samu 41:12.

17. Ki lika mañi zasina Jehova zemukona kumufa?

¹⁷ Haiba muneela bupilo bwamina ku Jehova ni kukolobezwa, muba ni tohonolo yakufa nto ya butokwa hahulu ku Ndataa mina. Umifile lika kaufela zende zemuikozi. Mukona kubonisa buitumelo bwamina ku Mubupi wa lihalimu ni lifasi ka kumufa nto yeñwi yasina, ili sebelezo yamina ya ka kuitatela. (Jobo 1:8; 41:11; Liprov. 27:11) Yeo ki nzila yende ka kufitisisa yemukona kuitusisa ka yona bupilo bwamina. Kusina kukakanya, libaka la butokwa hahulu hamubata kukolobezwa kikuli mwalata Jehova.

18. Ki lipuzo mañi zemukona kuipuza?

¹⁸ Kacwalo, mukona kualaba cwañi puzo ye: Kana mukaanga muhato wa kukolobezwa? Ki mina feela babakona kualaba puzo yeo. Kono nekuka tusa hane mukaipuza kuli: ‘Ki nto mañi yenipaleliswa kukolobezwa?’ (Lik. 8:36) Muhupule mabaka amalaalu olunyakisisize. Libaka lapili kikuli, mwalata niti ni kuluka. Muipuze kuli: ‘Kana ninyolelwa kubona nako yeo batu kaufela bakabulela niti ni kueza zelukile?’ Libaka labubeli kikuli, mwalata Jesu Kreste. Muipuze kuli: ‘Kana nibata kuli Mwanaa Mulimu abe mulenaaka, mi nibata kulikanyisa mutala wahae?’ Mi libaka labulaalu, ili la butokwa hahulu kikuli, mwalata Jehova. Muipuze kuli: ‘Kana nibata kutabisa pilu ya Jehova ka kumusebeleza sina Mulimu waka?’ Haiba mualabile kuli eni kwa lipuzo zeo, ki kabakalañi he hamusa kolobezwi? Ki nto mañi yemipaleliswa?—Lik. 16:33.

19. Ki kabakalañi hamusa swaneli kuzina-zina kukolobezwa? Mufe mutala. (Joani 4:34)

¹⁹ Haiba mwazina-zina kukolobezwa, munyakisise swanisezo yanaaitusisize Jesu. (Mubale Joani 4:34.) Mulemuhe kuli Jesu naabapanyize kueza tato ya Ndatahe kwa lico. Kabakalañi? Lico ki za butokwa ku luna. Jesu naaziba kuli lika kaufela zabata Jehova kuli lueze lilelezwi kulutusa. Jehova habati kuli lueze nto ifi kamba ifi yekona kulutahiseza butata. Kana Jehova ubata kuli mukolobezwe? Eni. (Lik. 2:38) Kacwalo, mwakona kuba ni buikolwiso bwa kuli kumamela taelo yeo kuka mitahiseza limbuyoti. Haiba hamuzina-zinangi kuca lico zetabusa, uzibe hamuswaneli kuzina-zina kukolobezwa.

20. Lukanyakisisañi mwa taba yetatama?

²⁰ Ki kabakalañi batu babañwi habazina-zinanga kukolobezwa? Babañwi babulelanga kuli habasika itukiseza. Niti kikuli, katulo ya butokwa hahulu yemukona kueza ki kuneela bupilo bwamina ku Jehova ni kukolobezwa. Kacwalo, kuli mukolobezwe, mutokwa kuikataza, kunahanisisa ka tokomelo ka za muhato wo, mi kukona kumiingela nako kuli mueze cwalo. Kono haiba munani takazo yetuna ya kuunga muhato wo, ki lika mañi zemukona kueza cwale kuli muitukiseze? Puzo yeo ikaalabiwa mwa taba yetatama.