1-2. Ki kabakalañi hamusa swaneli kuzwafa haiba hamusika itukiseza kukolobezwa? (Mubone siswaniso sesi fa kava.)

 HAIBA mubata kukolobezwa, uzibe muitomezi sikonkwani sesinde. Kana muitukiselize kuunga muhato wo ka nako ya cwale? Haiba muikutwa kuli muitukiselize mi baana-bahulu balumela, musike mwazina-zina kukolobezwa fa mukopano otatama. Haiba mueza cwalo, mukaikola limbuyoti zeñata mwa sebelezo yamina ku Jehova.

² Kucwañi haiba mubata kukolobezwa kono mutalusezwa kuli musatokwa kueza zwelopili pili musika anga kale muhato wo? Kamba kucwañi haiba mina bañi mulemuha kuli musatokwa kueza zwelopili? Haiba ki cwalo, musike mwazwafa. Ibe kuli mu babahulu kamba mu banana mwakona kukwanisa zetokwahala kuli muunge muhato wa butokwa wo.

3. Nduna wa Muetopia naabuzize Filipi puzo mañi, mi ki puzo mañi yelukona kubuza? (Likezo 8:36, 38)

³ Mubale Likezo 8:36, 38. Nduna yomuñwi wa kwa Etopia, naabuzize Filipi mukutazi kuli: “Kiñi sesi nipalelwisa kukolobezwa?” Muuna wa Muetopia yo naabata kukolobezwa, kono kana luli naaitukiselize kuunga muhato wa butokwa wo?

4. Nduna wa Muetopia naabonisize cwañi kuli naabata kuzwelapili kuituta?

⁴ Muuna wa Muetopia yo “naaile kwa Jerusalema kuyo lapela.” (Lik. 8:27) Kubonahala kuli naali muproselite wa Mujuda; naacincize bulapeli bwahae ni kukala kuswalisana ni bulapeli bwa Sijuda. Kusina kukakanya, naaitutile ka za Jehova mwa  Mañolo A Siheberu akenile. Nihakulicwalo, naasabata kuituta zeñata. Mi ki lika mañi zanaaeza muuna yo Filipi hakopana ni yena mwa nzila? Naabala muputo wa litaba zeneñozwi ki mupolofita Isaya. (Lik. 8:28) Zeo neli litaba zetungile za mwa Mañolo. Nduna wa Muetopia yo naasika ikutwa kuli kulikani kuituta feela litaba za matatekelo za mwa Mañolo; naabata kuzwelapili kuituta zeñata.

5. Ki lika mañi zanaaezize muuna wa Muetopia ka za litaba zanaaitutile?

⁵ Muuna yo neli sikombwa sesituna sa mulena wamusali Kandasi wa Etopia; ki “yena yanaababalela bufumu kaufela bwa Kandasi.” (Lik. 8:27) Kacwalo, ulukela kuba muuna yanaapatehile hahulu kabakala kuba ni misebezi yemiñata ya kueza. Nihakulicwalo, naabanga ni nako ya kulapela Jehova. Naasika ikutwa kuli kulikani kuituta feela niti; naasebelisize litaba zanaaitutile. Ki lona libaka hanaazamaile musipili omutelele kuzwa kwa Etopia kuya kwa Jerusalema kuyo lapela Jehova kwa tempele. Kubonahala kuli muuna yo naasinyehezwi ki masheleñi amañata mwa musipili wo mi nekuungile nako yetelele kuli ayo fita kwanaaya, kono naatabela kuitombola lika zeñata kuli alapele Jehova.

6-7. Ki lika mañi zanaaezize nduna wa Muetopia kuli lilato lahae ku Jehova lizwelepili kutiya?

⁶ Nduna wa Muetopia naaitutile ku Filipi litaba za niti za butokwa, ili litaba zanaasa zibi, mi yeñwi ya litaba zanaaitutile neli kuli Jesu neli yena Mesia. (Lik. 8:34, 35) Kaniti luli, nduna wa Muetopia yo naaitebuhile hahulu kuziba zanaa muezelize Jesu. Naaezizeñi hamulaho wa kuituta litaba zeo? Naakona kuzwelapili honacwalo sina muproselite wa Mujuda ya kutekeha. Kono lilato lahae ku Jehova ni Mwanaa hae nelitiile. Naasusuelizwe kueza katulo ya butokwa mwa bupilo bwahae ya kukolobezwa sina mulateleli wa Jesu Kreste. Filipi hanaalemuhile kuli muuna yo naaitukiselize, amukolobeza.

⁷ Kulikanyisa mutala wa muuna wa Muetopia kuka mitusa kuitukiseza kukolobezwa. Ni mina mukakona kubulela ka buikolwiso bobutuna kuli: “Kiñi sesi nipalelwisa kukolobezwa?” Halunyakisiseñi momukona kulikanyiseza mutala wahae: Naazwezipili kuituta, naasebelisize litaba zanaaitutile, mi naazwezipili kutiisa lilato lahae ku Mulimu.

8. Ka kuya ka Joani 17:3, ki lika mañi zemuswanela kueza?

⁸ Mubale Joani 17:3. Kana manzwi anaabulezi Jesu kwa liñolo leo naamitusize kuikatulela kuituta Bibele? Buñata bwaluna nelususuelizwe ki manzwi ao. Kono kana manzwi ao hape alususueza kuzwelapili kuituta? Eni. Lukatokwa “kuzwelapili [kuziba]  . . . Mulimu anosi wa niti.” (Muek. 3:11) Lukazwelapili kuituta kuya kuile. Haiba luzwelapili kuituta ka za Jehova, lukasutelela hahulu ku yena.—Samu 73:28.

9. Ki lika mañi zelutokwa kueza hamulaho wa kuituta lituto za matatekelo za Bibele?

⁹ Ki niti kuli halubata kuziba Jehova, lukalanga ka kuituta lituto za matatekelo za mwa Bibele. Mwa liñolo lanaañolezi Bakreste ba Maheberu, muapositola Paulusi naabizize lituto zeo kuli ki “litaba za matatekelo.” Naasanyinyafazi “tuto ya makalelo”; naaibapanya kwa mabisi afepiwa mbututu kuli ihule hande. (Maheb. 5:12; 6:1) Kono hape naasusuelize Bakreste kaufela kuituta litaba zetungile za mwa Linzwi la Mulimu kwandaa kuziba feela lituto za matatekelo. Kana mwatabela kuituta litaba zetungile za mwa Bibele? Kana mwatabela kuzwelapili kuhula kwa moya, kuzwelapili kuituta ka za Jehova ni mulelo wahae?

10. Ki kabakalañi batu babañwi haku babelanga taata kuituta?

¹⁰ Nihakulicwalo, buñata bwaluna kulubelanga taata kuituta. Mina bo? Kana kwa sikolo nemuitutile mwakubalela hande ni kuituta? Kana nemuikolanga kuituta, mi muikutwa kuli kueza cwalo neku mitusize? Kamba kana muikutwa kuli nemusa ikolangi kubala libuka? Haiba muikutwa cwalo, muzibe kuli haki mina munosi. Nihakulicwalo, Jehova wakona kumitusa. Ki yena Muluti yomunde ka kufitisisa mi upetahalile.

11. Jehova ubonisa cwañi kuli ki “Muluti Yapahami”?

¹¹ Jehova uitalusa kuli ki “Muluti Yapahami wamina.” (Isa. 30:20, 21) Ki Muluti yanani pilu-telele, sishemo, ni kutwisiso. Uisanga pilu kwa lika zende zebaeza baituti bahae. (Samu 130:3) Mi haabatangi kuli lueze lika zelusa koni kueza. Muhupule kuli naaezize booko bwamina, yona mpo yende hahulu. (Samu 139:14) Lubupilwe ni takazo ya kubata kuituta. Mubupi waluna ubata kuli luzwelepili kuituta kuya kuile ni kuikola kueza cwalo. Kacwalo, ki kwa butokwa ‘kushukelwa’ litaba za mwa Bibele ka nako ya cwale. (1 Pit. 2:2) Muitomele likonkwani zemukona kupeta ni kulatelela tomahanyo ya kubalanga Bibele ni kuituta yona. (Josh. 1:8) Ka tuso ya Jehova, mwakona kuikola kubalanga ni kuituta ka za hae.

12. Ki kabakalañi haluswanela kuituta ka za Jesu halueza tuto ya ka butu?

¹² Kamita munahanisisange za bupilo bwa Jesu ni bukombwa bwahae. Kuhata ka busepahali mwanaahatile Jesu kuka lutusa kusebeleza Jehova, sihulu mwa linako zetaata ze. (1 Pit. 2:21) Jesu naasika patela balateleli bahae kuli nebaka kopana ni miliko. (Luka 14:27, 28) Niteñi, naaziba kuli balateleli bahae ba niti nebaka zwelapili kusepahala ku Mulimu sina yena. (Joa. 16:33) Muitute zeñata ka za bupilo bwa Jesu, mi muitomele likonkwani za momukona kumulikanyiseza zazi ni zazi mwa bupilo bwamina.

13. Ki lika mañi zemuswanela kuzwelapili kukupa Jehova, mi ki kabakalañi?

¹³ Kuba feela ni zibo hakusika likana. Kuba ni zibo ki kwa butokwa bakeñisa kuli kuka mitusa kuituta zeñata ka za Jehova, kumulata, ni kuba ni tumelo ku yena. (1 Makor. 8:1-3) Hamunze muzwelapili kuituta, muzwelepili kukupa Jehova kuli amiekeleze kwa tumelo. (Luka 17:5) Waalabanga litapelo zecwalo. Kuba ni tumelo ya niti yetomile fa zibo yenepahezi ya Mulimu waluna kuka mitusa kueza zwelopili ya kwa moya.—Jak. 2:26.

14. Muapositola Pitrosi naabonisize cwañi butokwa bwa kusebelisa zeluituta? (Mubone ni siswaniso.)

¹⁴ Muapositola Pitrosi naabonisize libaka hakuli kwa butokwa kuli balateleli ba Kreste  bazwelepili kusebelisa zebaituta. Naaezize cwalo ka kuitusisa likande la Nuwe yabulezwi mwa Bibele. Jehova naabulelezi Nuwe kuli naakatahisa muunda one ukayundisa batu babamaswe ba mwa linako zahae. Kuziba feela kuli muunda neutuha utaha nekusike kwatusa Nuwe ni lubasi lwahae kupunyuha. Mulemuhe kuli Pitrosi naaama kwa nako yeo pili Muunda usika taha kale, “aleka hane isweli kuyahiwa.” (1 Pit. 3:20) Kaniti luli, Nuwe ni lubasi lwahae nebasebelisize zene baitutile ku Mulimu ka kuyaha aleka, sona sisepe sesituna. (Maheb. 11:7) Pitrosi hape naabapanyize zanaaezize Nuwe kwa kolobezo, ka kubulela kuli: “Kolobezo, yeswaniseza taba yeo, ni yona yamipilisa cwale.” (1 Pit. 3:21) Ka mubulelelo omuñwi, lukona kubapanya zemueza ka nako ya cwale hamunze muitukiseza kukolobezwa kwa musebezi wa kuyaha aleka wanaaezize Nuwe ni lubasi lwahae ka lilimo zeñata-ñata. Ki lika mañi zemutokwa kueza kuli mukolobezwe?

15. Lukona kubonisa cwañi kuli lubakile habuniti?

¹⁵ Yeñwi ya lika zapili zeluswanela kueza ki kubakela libi zaluna habuniti. (Lik. 2:37, 38) Haiba lubaka habuniti, lukacinca luli. Kana mutuhezi kueza lika zesatabisi Jehova zecwale ka muzamao wa buhule, kuzuba kwai, kamba kuitusisa lipulelo zemaswe? (1 Makor. 6:9, 10; 2 Makor. 7:1; Maef. 4:29) Haiba hamusika eza kale cwalo, mueze momukonela kaufela kueza licinceho. Muambole ni mutu yaituta ni mina Bibele kamba mukupe baana-bahulu ba puteho kuli bamituse. Haiba musali banana mi mupila ni bashemi bamina, muzwelepili kubakupa kuli bamituse kutuhela mukwa ufi kamba ufi omaswe okona kumipaleliswa kukolobezwa.

16. Ki lifi lika za kwa moya zeluswanela kuezanga kamita?

¹⁶ Hape ki kwa butokwa kuezanga lika za kwa moya kamita. Taba yeo ikopanyeleza kufumanehanga kwa mikopano ya puteho ni kuabana ku yona. (Maheb. 10:24, 25) Mi musakwanisa feela zetokwahala kuli mukutazange hamoho ni puteho, muezange cwalo kamita. Hamunze muzwelapili kueza musebezi opilisa wo, mukaikola hahulu kuueza. (2 Tim. 4:5) Haiba mu banana mi mupila ni bashemi bamina, muipuze kuli: ‘Kana bashemi baka batokwanga kunihupulisa kuli nifumanehe kwa mikopano ya puteho kamba kuya mwa bukombwa? Kamba kana naikupulisanga kueza lika zeo na muñi?’ Haiba  mueza lika zeo mina bañi, mukabonisa kuli munani tumelo ku Jehova Mulimu, mwamulata, mi mwaitumela ku yena kabakala lika zamiezeza. Zeo ki “likezo za busepahali ku Mulimu,” ili limpo zemufa Jehova. (2 Pit. 3:11; Maheb. 13:15) Limpo kaufela zelufa Mulimu ka kuitatela zamutabisa. (Mubapanye 2 Makorinte 9:7.) Luezanga cwalo kakuli lwaziba kuli kusebeleza Jehova ka molukonela kaufela kulutusa kuba ni tabo.

17-18. Ki kalemeno kafi kakakona kumitusa kueza zwelopili kuli mukolobezwe, mi ki kabakalañi? (Liproverbia 3:3-6)

¹⁷ Hamunze mueza zwelopili kuli mukolobezwe, mukakopana ni miliko. Batu babañwi bakona kumisheununa kabakala litaba zese mulumela; mane bakona kumilwanisa kamba kuminyandisa. (2 Tim. 3:12) Kusina taba kuli musweli kuikataza kutuhela mukwa omuñwi omaswe omunani ona, fokuñwi mukaipumana kuli mukutela kueza nto yeswana hape. Kamba mukona kuikutwa kuzwafa ni kunahana kuli kuka miingela nako yetelele kuli mupete sikonkwani samina sa kukolobezwa. Ki lika mañi zekona kumitusa kuitiisa? Nto ya butokwa hahulu yekona kumitusa ki kulata Jehova.

¹⁸ Kulata Jehova ki yona nto ya butokwa hahulu yemuswanela kueza. (Mubale Liproverbia 3:3-6.) Kulata hahulu Mulimu kuka mitusa kutiyela miinelo yetaata yemukona kukopana ni yona mwa bupilo. Bibele italusa kuli Jehova ubonisanga lilato lahae lelisa feli kwa batanga bahae. Taba yeo italusa kuli haana kuyubeka batanga bahae nikamuta kamba kutuhela kubalata. (Samu 100:5) Muezizwe ka siswaniso sa Mulimu. (Gen. 1:26) Mukona kubonisa cwañi lilato leliswana leo?

19. Ki lika mañi zekona kumitusa kuitumela hahulu ku Jehova kabakala lika zamiezelize? (Magalata 2:20)

¹⁹ Nto yeñwi yekona kumitusa ki kubonisa buitumelo. (1 Mates. 5:18) Zazi ni zazi muipuzange kuli: ‘Jehova unibonisize cwañi lilato?’ Mi muitumele ku Jehova ka tapelo, kumutaluseza lika zamiezelize. Muzibe kuli Jehova umiezezanga lika zende ka butu kabakala kuli wamilata; muapositola Paulusi ni yena naalemuhile taba yeo ka za Jehova. (Mubale Magalata 2:20.) Muipuze kuli: ‘Kana ni na nibata kumubonisa kuli namulata?’ Kulata Jehova kuka mitusa kuzwelapili kusepahala ku yena hamulikiwa ni kutiyela miinelo yetaata yemukona kukopana ni yona. Lilato leo lika misusueza kuezanga  lika za kwa moya kamita, kuzwelapili kubonisa lilato lamina ku Ndataa mina zazi ni zazi.

20. Kuneela bupilo bwamina ku Jehova kuamañi, mi ki kabakalañi katulo yeo haili ya butokwa?

²⁰ Hamulaho wa nako, lilato lamina ku Jehova lika misusueza kulapela tapelo ya butokwa hahulu ku yena. Mukaneela bupilo bwamina ku Mulimu. Muhupule kuli musaneela feela bupilo bwamina ku Jehova, mukaba ni sepo yende ya kumusebeleza kuya kuile. Hamuineela ku Jehova, mumusepisa kuli mukazwelapili kumusebeleza ibe kuli lika limizamaela hande kamba kutokwa. Hase muneezi bupilo bwamina ku Jehova, hamuna kutokwa kueza cwalo hape. Niti kikuli, kuneela bupilo bwaluna ku Jehova ki muhato wa butokwa hahulu olukona kuunga. Kono halunyakisiseñi taba ye: Mukaeza likatulo zeñata mwa bupilo bwamina mi zeñwi ku zona likaba zende hahulu, kono katulo yende hahulu nikufita yemukona kueza ki kuineela ku Jehova. (Samu 50:14) Satani ukalika kufokolisa lilato lamina ku Ndataa mina, ka kunahana kuli mukatuhela kusepahala ku Mulimu. Musike mwalumeleza Satani kumikoma! (Jobo 27:5) Haiba mulata hahulu Jehova, mukazwelapili kueza lika zene mumusepisize hane muineezi ku yena mi mukasutelela hahulu ku Ndataa mina wa kwa lihalimu.

21. Ki kabakalañi hamuswanela kuzwelapili kueza zwelopili ya kwa moya ni hase mukolobelizwe?

²¹ Hase muneezi bupilo bwamina ku Jehova, muambole ni baana-bahulu ba mwa puteho yamina ka za muhato omuñwi wa butokwa hahulu omubata kuunga. Kono kamita muhupulange kuli hase mukolobelizwe, hamuswaneli kutuhela kueza zwelopili ya kwa moya. Kolobezo imifa kolo ya kusebeleza Jehova kuya kuile. Kacwalo, mutiise lilato lamina ku Ndataa mina ka nako ya cwale. Muitomele likonkwani kuli lilato lamina lizwelepili kutiya zazi ni zazi. Kueza cwalo kuka misusueza kuunga muhato wa kukolobezwa. Leo likaba lizazi lelinde luli. Kono ao ki makalelo feela. Haike lilato lamina ku Jehova ni Mwanaa hae lizwelepili kutiya kuya kuile!