1-2. Ki miinelo mañi yetaata yebakopana ni yona Lipaki za Jehova babañata?

MUAPOSITOLA PAULUSI naasusuelize Timotea kupeta bukombwa bwahae ka kutala, mi Bakreste kaufela ni bona baswanela kueza nto yeswana. (2 Tim. 4:5) Kaufelaa luna luswanela kusebelisa kelezo yanaafile Paulusi. Kono fokuñwi kueza cwalo kutaata. Mizwale ni likaizeli baluna babañata batokwanga kuba ni bundume kuli baeze musebezi wa kukutaza. (2 Tim. 4:2) Ka mutala, mizwale babañwi bapila mwa linaha ili mo musebezi waluna ukwalezwi kamba habalumelezwi kueza lika zeñwi zeama musebezi waluna. Bazwelapili kukutaza niha baziba kuli kueza cwalo kukona kutahisa kuli balengiwe mwa tolongo.

² Batanga ba Jehova bakopana ni miinelo yetaata yeshutana-shutana yekona kubazwafisa. Ka mutala, mizwale ni likaizeli babañata batokwanga kusebeza nako yeñata kuli bafumanele mabasi abona lika zebatokwa. Nebaka tabela kueza zeñata mwa bukombwa kono sunda haiyo fela, baikutwanga kukatala. Babañwi habakoni kueza zeñata bakeñisa mapongo kamba busupali mi mwendi habakoni kuzwa fa mandu abona. Babañwi bona baikutwanga kuli haki ba butokwa. Kaizeli yabizwa Mary * utalusa kuli: “Hanizwafile, nitokwanga kueza ka taata luli kuli nifelise maikuto anibanga ni ona kuli mane niikutwanga hahulu kukatala mwa munahano. Hasamulaho, niikutwanga bumaswe bakeñisa kuli nipalelwanga kuba ni maata ni nako yeñata ya kukutaza.”

3. Lukanyakisisañi mwa taba ye?

³ Kusina taba ni miinelo yetaata yelukopana ni yona, Jehova wakona kulufa maata alutokwa kuli luzwelepili kumusebeleza ka molukonela kaufela. Pili lusika nyakisisa kale mo Jehova akona kulutuseza, halunyakisiseñi mwanaatuselize Paulusi ni Timotea kuba ni maata a kupeta bukombwa bwabona kusina taba ni miinelo yetaata yene bakopani ni yona mwa bupilo.

4. Ki miinelo mañi yetaata yanaakopani ni yona Paulusi?

⁴ Paulusi naakopani ni miinelo yetaata yemiñata. Mi sihulu naatokwa kutiiswa hanaanatakilwe, kupobaulwa ka macwe, ni kulengiwa mwa tolongo. (2 Makor. 11:23-25) Paulusi naabulezi patalaza kuli fokuñwi naazwafanga. (Maro. 7:18, 19, 24) Hape naakula butuku bobuñwi bwanaatalusize kuli ki “muutwa mwa mubili,” mi naazwezipili kukupa Mulimu kuli auzuse ku yena.—2 Makor. 12:7, 8.

5. Ki lika mañi zanaapetile Paulusi kusina taba ni miinelo yetaata yanaakopani ni yona?

⁵ Jehova naafile Paulusi maata anaa mukonisize kupeta bukombwa bwahae kusina taba ni miinelo yetaata yanaakopani ni yona. Halunyakisiseñi zanaapetile Paulusi. Ka mutala, ka nako yanaatamezwi mwa ndu kwa Roma, naakutalize ka tukufalelo fapilaa baeteleli ba Majuda mwendi ni kwa makwambuyu ba muuso. (Lik. 28:17; Mafil. 4:21, 22) Hape naakutalize kwa balibeleli ba mulena babañata, ni batu kaufela bane bamupotelanga. (Lik. 28:30, 31; Mafil. 1:13) Ka nako yeswana yeo, Paulusi naañozi mañolo ka kususumezwa ki moya wa Mulimu, ili anaatusize Bakreste ba niti ka nako yeo mane kuto fita ni kacenu le. Hape mutala wa Paulusi neutiisize mizwale ni likaizeli ba mwa puteho ya Roma, ili kubatusa kuli babe ni “bundume bobutuna bwa kubulela linzwi la Mulimu basasabi.” (Mafil. 1:14) Nihaike kuli Paulusi naasakoni kueza zeñata sina mwanaabatela, naaezize mwanaakonela kaufela, mi zanaaezize ‘mane nelitusize feela taba yende kuli izwelepili kukutazwa.’—Mafil. 1:12.

6. Ka kuya ka 2 Makorinte 12:9, 10, ki lika mañi zenetusize Paulusi kupeta bukombwa bwahae?

⁶ Paulusi naaziba kuli Jehova ki yena yanaa mutusize kueza lika kaufela zanaaezize mwa sebelezo yahae. Naabulezi kuli maata a Mulimu ‘naabonahezi mwa bufokoli’ bwahae. (Mubale 2 Makorinte 12:9, 10.) Jehova naaitusisize moya wahae okenile kufa Paulusi maata a kupeta bukombwa bwahae ka kutala, kusina taba kuli naanyandisizwe, kulengiwa mwa tolongo, mi naakopani ni miinelo yemiñwi yetaata.

7. Ki miinelo mañi yetaata yanaakopani ni yona Timotea yenekona kumupaleliswa kupeta bukombwa bwahae?

⁷ Timotea, mutangana yanaasebelisani ni Paulusi, ni yena naatokwa kutusiwa ki maata a Mulimu kuli apete bukombwa bwahae. Timotea naayanga ni Paulusi mwa misipili  yemitelele ya bulumiwa. Hape Paulusi naamulumile kupotela liputeho ni kususueza mizwale ni likaizeli bahae. (1 Makor. 4:17) Timotea mwendi naaikutwile kuli naasakoni kupeta buikalabelo bo. Mwendi ki lona libaka Paulusi hanaa mubulelezi kuli: “Ubone teñi kuli hakuna mutu yakunyaziseza kabakala bucaha bwahao.” (1 Tim. 4:12) Hape Timotea ka nako yeo, ni yena naanani muutwa mwa mubili, ili “kukula-kula” kwahae. (1 Tim. 5:23) Kono Timotea naaziba kuli moya wa Jehova omaata okenile, neuka mutusa kuba ni maata anaatokwa kuli akutaze taba yende ni kusebeleza mizwale bahae.—2 Tim. 1:7.

8. Jehova utiisanga cwañi batanga bahae kacenu?

⁸ Kacenu, Jehova ufanga batanga bahae “maata afita a butu” kuli bazwelepili kumusebeleza ka busepahali. (2 Makor. 4:7) Halunyakisiseñi lika zeene zalufile kuli lilutuse kuba ni maata ni kuzwelapili kusepahala ku yena, lika zeo ki: tapelo, Bibele, mizwale ni likaizeli baluna, ni bukombwa bwaluna.

9. Tapelo ikona kulutusa cwañi?

⁹ Lufumana maata ka kulapela. Kwa Maefese 6:18, Paulusi ulususueza kulapela ku Mulimu “ka nako kaufela.” Mulimu ukaalaba litapelo zaluna ka kulufa maata. Muzwale yabizwa Jonnie, yapila kwa Bolivia, naaiponezi mo Jehova naamutuselize kuba ni maata hanaakopani ni miliko yeshutana-shutana. Musalaa hae ni bashemi bahae kaufela nebakulile hahulu ka nako yeswana. Bo Jonnie neku babezi taata kubababalela kaufelaa bona. Bo maa bona batimela, mi nekuungile nako kuli bo ndataa bona bo Jonnie ni bo musalaa bona bafole. Bo Jonnie habahupula za taba yeo, batalusa kuli: “Hane nilembwalanga hahulu, zene nitusanga ki kulapela ku Jehova ni kumutaluseza moniikutwela.” Jehova naafile bo Jonnie maata ane batokwa kuli bakone kuitiisa. Muzwale yabizwa Ronald yali muuna-muhulu mwa puteho, yapila kwa Bolivia, naataluselizwe kuli bo mahe nebakula butuku bwa kansa. Hamulaho wa kweli kuzwa fo, batimela. Ki lika mañi zenee batusize kutiyela muinelo otaata wo? Batalusa kuli: “Hanilapelanga ku Jehova, nimutalusezanga lika kaufela ze kwa pilu yaka. Naziba kuli waniziba hande kufita mutu ufi kamba ufi, mane uniziba hande hahulu kufita ni moniitibela na muñi.” Fokuñwi, luikutwanga kuli halukoni kutiyela miinelo yetaata yelukopana ni yona kamba haluzibangi hande zeluswanela kubulela halulapela. Kono Jehova ubata kuli lulapele ku yena niha kukona kuba taata kutalusa zelunahana kamba moluikutwela.—Maro. 8:26, 27.

10. Sina mokuboniselizwe kwa Maheberu 4:12, ki kabakalañi kubala Bibele ni kunahanisisa litaba zelubala hakuli kwa butokwa?

¹⁰ Lufumana maata halubala Bibele. Paulusi naabalanga Mañolo kuli atiiswe ni kuomba-ombiwa ki ona, ni luna luswanela kueza nto yeswana. (Maro. 15:4) Halunze lubala Linzwi la Mulimu ni kunahanisisa litaba zelubala, Jehova wakona kuitusisa moya wahae kulutusa kuziba molukona kusebeliseza litaba zeo mwa bupilo bwaluna. (Mubale Maheberu 4:12.) Bo Ronald, bababulezwi kwamulaho, bali: “Niitebuha hahulu kuli ninani tomahanyo ya kubalanga Bibele busihu zazi ni zazi. Ninahanisisanga hahulu tulemeno twa Jehova totunde ni mwanaatuselize batanga bahae. Kueza cwalo kunitusanga kuba ni maata.”

11. Kubala Bibele nekutusize cwañi kaizeli yanaashwezwi ki muunaa hae?

¹¹ Kunahanisisa zelubala mwa Linzwi la Mulimu kwakona kulutusa kuba ni mubonelo oswanela ka za miinelo yetaata yelukopana ni yona. Halunyakisiseñi mo mbelwa yomuñwi naatuselizwe kabakala kubala Bibele.  Muunaa-muhulu yomuñwi mwa puteho naaakalelize kuli abale buka ya Jobo, mi naakafumana litaba zeneka mutusa. Hanaabalile buka yeo, amatukela kunyaza Jobo kuli naanani mubonelo ofosahezi. Naaipulelisanga kuli: “Jobo! Usike waisa hahulu pilu kwa miliko yeukopana ni yona!” Kono hasamulaho, kaizeli yo alemuha kuli naanani mubonelo oswana ni wa Jobo. Kueza cwalo neku mutusize kucinca mubonelo wahae ni kutiyela muinelo otaata wanaakopana ni ona wa kushwelwa ki muunaa hae.

12. Jehova uitusisanga cwañi mizwale ni likaizeli baluna kuli alutiise?

¹² Lufumana maata ka kuswalisana ni mizwale ni likaizeli baluna. Nzila yeñwi yalutiisa ka yona Jehova ki ka kulufa mizwale ni likaizeli mwa puteho. Paulusi naañozi kuli naanyolelwa ‘kususuezana’ ni mizwale ni likaizeli bahae. (Maro. 1:11, 12) Bo Mary bababulezwi kwamulaho baikolanga kueza siango ni mizwale ni likaizeli babona. Batalusa kuli: “Jehova unitusize ka kuitusisa mizwale ni likaizeli, ili bao mane nebasa zibi kuli nenikopana ni miinelo yetaata. Neba nibulelelanga manzwi asusueza kamba kunilumela kadi, mi manzwi ao ki ona ane nitokwa luli. Hape natiiswanga haniikambota ni likaizeli babañwi bane bakopani ni miinelo yetaata yeswana ni yenikopana ni yona ni kuituta kwa mutala wabona. Mi baana-bahulu banitusanga kuikutwa kuli ni wa butokwa mwa puteho.”

13. Lukona kutiisa cwañi babañwi haluli kwa mikopano ya puteho?

¹³ Haluli kwa mikopano ya puteho, lukona kususueza hande mizwale ni likaizeli baluna. Hamuya kwa mikopano, muitusisange hande kolo yeo kutiisa mizwale ni likaizeli bamina ka kubabulelela kuli mwabalata mi mwaitebuha bona. Ka mutala, muzwale yali muuna-muhulu mwa puteho yabizwa Peter naabulezi cwana ku kaizeli yomuñwi yanyezwi ki muuna yasi Paki, pili mukopano usika kalisa kale: “Lwasusuezwanga hahulu halu mibona kwa mikopano. Kamita mutahanga ni bana bamina ba 6 mi kaufelaa mina mufanga likalabo zende.” Kaizeli yo naasusuelizwe hahulu kuutwa cwalo, mi naaalabile cwana inzaa enga-enga miyoko: “Kubulela feela niti, manzwi amina anitiisize luli kakuli nenizwafile hahulu kacenu.”

14. Musebezi wa kukutaza ulutusa cwañi?

¹⁴ Lufumana maata haluya mwa bukombwa. Halukutaza ku babañwi, lwatiiswanga ni kukatuluha, ibe kuli batu batabela lushango lwaluna kamba kutokwa. (Liprov. 11:25) Kaizeli yabizwa Stacy naaiponezi mo bukombwa bukona kulutuseza kuba ni maata. Mutu yomuñwi mwa lubasi lwahae hanaazwisizwe mwa puteho, naaikutwile hahulu bumaswe, mi naaipuzanga kuli: ‘Kana kunani lika zeñwi zene nikona kueza kuli nimutuse?’ Bo Stacy nebazwezipili kunahana za taba yeo. Ki nto mañi yenee batusize kutiyela muinelo ozwafisa wo? Ki kuba mwa bukombwa! Hane bayanga mwa bukombwa, nebaisanga hahulu pilu kwa batu bane bakutazanga ku bona, ili bane batokwa kutusiwa. Batalusa kuli: “Ka yona nako yeo, Jehova naanitusize kufumana mutu yanaatabela kuituta Bibele, ili yanaaezize zwelopili kapili-pili. Taba yeo nei nisusuelize hahulu. Nto yenitusize hahulu mwa bupilo ki kueza musebezi wa kukutaza.”

15. Muitutañi kwa litaba zene babulezi bo Mary?

¹⁵ Babañwi baikutwanga kuli habakoni kueza zeñata mwa bukombwa kabakala miinelo yemiñwi yebakopana ni yona mwa bupilo. Haiba ki mona momuikutwela cwalo, muhupule kuli Jehova waitebuhanga haiba lumusebeleza ka molukonela kaufela. Hape halunyakisiseñi mutala wa bo Mary. Hane bayo sebeleza kwa sibaka kokuitusiswa puo isili, nebaikutwile kuli nebasa ezi zeñata mwa sebelezo yabona. Batalusa kuli: “Ka nakonyana, nenifanga  feela likalabo zekuswani, kubala liñolo, kamba kufa trakiti hanili mwa bukombwa.” Taba yeo neitahisize kuli baikutwe kuli nebasa ezi zeñata sina mone baezeza bañi ba puo yeo. Nihakulicwalo, nebacincize mubonelo wabona. Balemuha kuli Jehova naakona kuitusisa bona kusina taba kuli nebasa zibi hande puo yeo. Batalusa kuli: “Lituto za mwa Bibele zautwahala luli mi zakona kucinca bupilo bwa batu kusina taba kuli mutu yakutaza ku bona hazibi hande puo yabona.”

16. Ki lika mañi zekona kutiisa batu babatabela kukutaza kono ili babasa koni kuzwa fa mandu abona?

¹⁶ Jehova waziba kuli babañwi batabela kukutaza kono habakoni kuzwa fa mandu abona. Wakona kubatusa kukutaza kwa batu baba bababalela kamba kwa baalafi. Haiba lubapanya misebezi yene luezanga kwamulaho ni yelueza ka nako ya cwale lwakona kuzwafa. Kono haiba lulemuha mwalutuseza Jehova ka nako ya cwale, lukaba ni tabo mi lukaba ni maata a kutiyela muliko ufi kamba ufi olukona kukopana ni ona.

17. Ka kuya ka sikuka sesi kwa Muekelesia 11:6, ki kabakalañi haluswanela kuzwelapili kukutaza batu niha basaamuheli lushango lwaluna?

¹⁷ Haluzibangi kuli ki peu ifi ya Mubuso yelucala yekamela ni kuhula. (Mubale Muekelesia 11:6.) Ka mutala, kaizeli yabizwa Barbara yali mwa lilimo za ma 80, kamita ukutazanga ka kuitusisa foni ni kuñola mañolo. Mwa liñolo leliñwi lanaañozi, naabeile mwateñi Tawala ya Mulibeleli ya March 1, 2014, yenani toho ya taba yeli, “Mulimu U mi Ezelize Lika Mañi?” Naasazibi kuli naalumile liñolo leo ku bo mutu ni musalaa hae bane bazwisizwe mwa puteho. Bo mutu ni musalaa hae bao, nebakuta-kutezi kubala magazini yeo. Babaana, nebaikutwile inge kuli Jehova naambola ku bona luli. Sibeli sabona bakalisa kufumanehanga kwa mikopano ya puteho, mi hamulaho wa kuba kwande a puteho ka lilimo zefitelela 27, bakutiswa mwa puteho. Kusina kukakanya, bo Barbara hane balemuhile kuli liñolo lene bañozi nelitusize batu babañwi kukutela mwa niti, nebasusuelizwe hahulu ni kutiiswa!

18. Ki lika mañi zeluswanela kueza kuli lutiiswe ki Mulimu?

¹⁸ Jehova ulufile lika zeñata kuli lilutuse kuba ni maata. Lika zeo ki tapelo, Bibele, mizwale ni likaizeli baluna, ni bukombwa bwaluna. Haiba luitusisa lika zeo, lubonisa kuli lusepile kuli Jehova wakona kulutusa mi watabela kueza cwalo. Haike kamita lubonise kuli lusepile Ndataa luna ya kwa lihalimu, yatabela ‘kubonisa maata ahae kutusa babasepahala ku yena ka lipilu zabona kaufela.’—2 Makol. 16:9.