1-2. Mutaluse zekona kutahisa kuli luitebuhe hahulu likuka zeñwi za mwa Bibele.

 KI FA lizazi la sinawenga, munyali ni munyaliwa babonahala hande hahulu, mi bateeleza ka tokomelo kwa ngambolo ya linyalo yefiwa yetomile fa Bibele. Likuka za mwa Bibele zenyakisiswa mwa ngambolo yeo baliziba nikale. Kono kuzwa feela lizazi le, bakaitebuha hahulu likuka za mwa Bibele zenyakisiswa. Kabakalañi? Kabakala kuli bakatokwa kulisebelisa mwa linyalo labona.

² Nto yeswana yeo yaezahalanga Bakreste babanyalani hababa bashemi. Mwahalaa lilimo zeñata zefitile, mwendi sebateelelize kwa lingambolo zeñata zeambola ka za mwakuhuliseza bana. Kono cwale bakaitebuha hahulu likuka zeo. Batuha baba ni mwana yebaka tokwa kubabalela. Bo ki buikalabelo bobutuna luli! Kusina kukakanya, miinelo yaluna mwa bupilo haicinca, luitebuhanga hahulu likuka zeñwi za mwa Bibele zeluziba. Ki lona libaka batanga ba Jehova hababalanga Mañolo ni kuanahanisisa sina feela mone bataluselizwe malena ba Isilaele kuli baezange cwalo “mazazi kaufela” a bupilo bwabona.—Deut. 17:19.

3. Lukanyakisisañi mwa taba ye?

³ Bashemi, munani yeñwi ya matohonolo a butokwa hahulu akona kuba ni ona Mukreste, ili kuluta bana bamina ka za Jehova. Kono mulelo wamina haki kubataluseza feela litaba ka za Mulimu. Muswanela kutusa bana bamina kumulata hahulu. Mukona kutusa cwañi bana bamina kulata Jehova?  Mwa taba ye, lukanyakisisa likuka zeene za mwa Bibele zekatusa mina bashemi. (2 Tim. 3:16) Hape lukanyakisisa mitala ya bashemi babañwi babali Bakreste babatusizwe kabakala kusebelisa kelezo ya mwa Bibele.

4. Ki sikuka sifi sebakona kuitusisa bashemi kuli batuse bana babona kulata Jehova? (Jakobo 1:5)

⁴ Sikuka 1: Mukupe Jehova kuli amietelele. Mukupe Jehova kuli amife butali ilikuli mutuse bana bamina kumulata. (Mubale Jakobo 1:5.) Ki yena Muelezi yomunde hahulu. Lunani mabaka amañata halubulela cwalo. Halunyakisiseñi feela mabaka amabeli. Sapili, Jehova ki yena yanani hahulu yeloseli ya kuba mushemi. (Samu 36:9) Mi sabubeli, ulufanga kelezo yende yetusa kamita.—Isa. 48:17.

5. (a) Ki lika mañi zeilukisize kopano ya Jehova zekona kutusa bashemi? (b) Sina mokuboniselizwe mwa vidio, muitutileñi ka mo Muzwale ni Kaizeli Amorim nebahuliselize bana babona?

⁵ Jehova, ka kuitusisa Linzwi lahae ni kopano yahae, ulukisize lico zeñata za kwa moya zetomile fa Bibele zebakona kuitusisa bashemi kutusa bana babona kumulata. (Mat. 24:45) Ka mutala, mwakona kufumana kelezo yende mwa litaba zeli, “Litaba Zetusa Mabasi,” zenefumanehanga mwa magazini ya Muzuhe! yehatisizwe, mi cwale selifumaneha fa webusaiti. Hape mwa mavidio amañata afumaneha fa jw.org, kunani lipuisano ni litaba zeñwi zekona kutusa bashemi kusebelisa kelezo ya Jehova habanze bahulisa bana babona. *—Liprov. 2:4-6.

6. Ndate lubasi yomuñwi uikutwa cwañi ka za ketelelo yaamuhezi yena ni musalaa hae kwa kopano ya Jehova?

⁶ Bashemi babañata baitebuhile hahulu tuso yabafile Jehova ka kuitusisa kopano yahae. Ndate lubasi yabizwa Joe utalusa kuli: “Kuhulisa bana babalaalu mwa niti haki nto yebunolo. Na ni bo musalaaka kamita lulapelanga ku Jehova kuli alutuse. Mi hañata neluikutwile kuli taba yeñwi kamba vidio neitile ka nako yeswanela mi nei ilutusize mwa muinelo one lukopana ni ona. Luzwezipili kuitinga fa ketelelo yalufa Jehova.” Bo Joe ni bakubona balemuhile kuli lika zalufile Jehova zeo litusa bana babona kusutelela ku yena.

7. Ki kabakalañi bashemi habaswanela kueza mobakonela kaufela kuba mutala omunde? (Maroma 2:21)

 ⁷ Sikuka 2: Mube mutala omunde. Bana babonanga zebaeza bashemi babona mi hañata babalikanyisanga. Ki niti kuli hakuna mushemi yapetahalile. (Maro. 3:23) Nihakulicwalo, bashemi bababutali baezanga mobakonela kaufela kutomela bana babona mutala omunde. (Mubale Maroma 2:21.) Ndate lubasi yomuñwi naabulezi cwana ka za banana: “Baswana sina siponji sesianya lika kaufela.” Naaekelize kubulela kuli: “Bakaziba haiba lusalateleli lika zelubaluta.” Kacwalo, haiba lubata kuli bana baluna balate Jehova, luna kasibili luswanela kulata hahulu Jehova mi lilato leo liswanela kuiponahalela.

8-9. Muitutileñi kwa litaba zebabulezi bo Andrew ni bo Emma?

⁸ Kunani lika zeñata zebakona kueza bashemi kuli batuse bana babona kulata Jehova. Mulemuhe zanaabulezi muzwale yomuñwi wa lilimo ze 17 yabizwa Andrew: “Bashemi baka kamita neba nisusuezanga kulapela. Zazi ni zazi busihu, bo ndate nebalapelanga ni na niha nenilapezi kale. Bashemi baka kamita neba lubulelelanga kuli: ‘Mwakona kulapela ku Jehova hañata-ñata.’ Kabakaleo, tapelo neibile nto ya butokwa hahulu ku na, mi cwale nilukuluhile kulapela ku Jehova mi nimuunga kuli ki Ndate yalilato.” Bashemi, kamita muhupulange kuli lilato lamina ku Jehova lakona kutusa bana bamina kumulata.

⁹ Hape halunyakisiseñi mutala wa kaizeli yabizwa Emma. Bo ndataa bona hane bayubekile lubasi, nebasiyezi bo maa bona likoloti zeñata hahulu. Bo Emma batalusa kuli: “Hañata bo ma nebasa bangi ni masheleñi a kuleka lika zenetokwahala, kono kamita nebabulelanga kuli Jehova wababalelanga batanga bahae ni kubafa zebatokwa. Neniiponezi kuli nebalumela taba yeo ka mone bapilela. Bo ma nebasebelisanga litaba zene baniluta.” Luitutañi kwa taba yeo? Bashemi bakona kuluta bana babona ka kubatomela mutala omunde niha bakopana ni miinelo yetaata.—Magal. 6:9.

10. Ki kolo mañi yene banani yona bashemi ba Maisilaele kuli balute bana babona ka za Jehova? (Deuteronoma 6:6, 7)

¹⁰ Sikuka 3: Muambolange ni bana bamina kamita. Jehova naalaezi Maisilaele ba kwaikale kuli balutange bana babona ka za hae kamita. (Mubale Deuteronoma 6:6, 7.) Bashemi bao nebabanga ni kolo yeñata mwahalaa lizazi ya kuambola ni bana babona ni kubatusa kulata Jehova. Ka mutala, mutangana wa Muisilaele naakona kutanda nako yeñata kutusa bo ndatahe kucala licalo kamba kukutula. Kaizelaa hae yena mwendi naakona kutanda nako yeñata kutusa bo mahe kuluka, kuinda, ni kueza misebezi yemiñwi ya fa lapa. Bashemi hane basebezanga ni bana babona, nebaitusisanga kolo yeo kuambola litaba zeñata za butokwa ni bona. Ka mutala, nebakona kuambola za kalemeno ka Jehova ka bunde ni mo Jehova naatuseza lubasi lwabona.

11. Ki kolo mañi yebanani yona bashemi ya kuambola ni bana babona?

¹¹ Linako licincize. Mwa linaha zeñata, bashemi habatandangi nako yeñata ni bana babona mwahalaa lizazi. Bashemi bakona kuba kwa musebezi mi bana babona bakona kuba kwa sikolo. Kabakaleo, bashemi baswanela kueza mobakonela kaufela kuba ni nako ya kuambola ni bana babona. (Maef. 5:15, 16; Mafil. 1:10) Bashemi bakona kuitusisa nako ya kulapela sina lubasi kuambola ni bana babona. Muzwale wa mukulwani yabizwa Alexander utalusa kuli: “Bo ndate kamita  balukisanga kuli lube ni nako ya kulapela sina lubasi mi habalumelezangi nto ifi kamba ifi kulupaleliswa kueza cwalo. Hamulaho wa tukiso yeo, lwacanga makande.”

12. Ki lika mañi zaswanela kuhupula toho ya lubasi ka nako ya kulapela sina lubasi?

¹² Haiba mu toho ya lubasi, ki lika mañi zemukona kueza kuli bana bamina baikolange nako ya kulapela sina lubasi? Mwakona kuituta ni bona hatiso yenca ya Muikole Bupilo Kuya Kuile! Kueza cwalo kuka mifa kolo yende ya kuambola ni bana bamina. Mubata kuli bana bamina bamitaluseze mobaikutwela luli ni lika zebabilaeza; kacwalo, musike mwaitusisa nako ya kulapela sina lubasi kubanyaza kamba kubahakulula. Mi musike mwahalifela bana bamina haiba babulela taba yeñwi yesalumelelani ni likuka za mwa Mañolo. Kono muitebuhe kuli bamitaluselize mobaikutwela luli mi mubasusueze kuezanga cwalo. Mukona feela kutusa hande bana bamina haiba muziba mobaikutwela luli.

13. Ki kolo mañi yeñwi yebanani yona bashemi kuli batuse bana babona kusutelela ku Jehova?

¹³ Bashemi, mubange ni nako mwahalaa lizazi kuli mutuse bana bamina kusutelela ku Jehova. Hamutokwi kulibelela feela nako yemuitutanga ni bona Bibele kuli mubalute ka za Mulimu waluna yalilato. Me yomuñwi wa libizo la Lisa utalusa kuli: “Neluitusisize pupo kuluta bana baluna ka za Jehova. Ka mutala, nja yaluna hane iezanga lika zeñwi zenesehisanga bana baluna, neluitusisanga kolo yeo kubataluseza kuli Mubupi waluna ki Mulimu yatabile mi ubata kuli ni luna lutabe ni kuikola lika zesehisa.”

14. Ki kabakalañi hakuli kwa butokwa kuli bashemi batuse bana babona kuketa hande balikani? (Liproverbia 13:20)

¹⁴ Sikuka 4: Mutuse bana bamina kuketa hande balikani. Linzwi la Mulimu libonisa hande kuli batu bolueza silikani ni bona bakona kutahisa kuli lueze lika zende kamba lika zemaswe. (Mubale Liproverbia 13:20.) Bashemi, kana mwaziba balikani ba bana bamina? Kana mukile mwakopana ni bona ni kutanda nako ni bona? Ki lika mañi zemukona kueza kuli mutuse bana bamina kuba ni balikani babalata Jehova? (1 Makor. 15:33) Mwakona kubatusa kuketa hande balikani ka  kumemanga mizwale ni likaizeli babaeza hande kwa moya kuba ni mina ka nako yemueza lika zeñwi sina lubasi.—Samu 119:63.

15. Ki lika mañi zebakona kueza bashemi kuli batuse bana babona kuba ni balikani babande?

¹⁵ Halunyakisiseñi mutala wa ndate lubasi yomuñwi yabizwa Tony. Bo Tony batalusa zene baezize ni bo musalaa bona kuli batuse bana babona kuketa hande balikani, bali: “Ka lilimo zeñata, na ni bo musalaaka nelumemanga mizwale ni likaizeli ba lilimo ni lisimuluho zeshutana kutaha kwa ndu yaluna. Nelucanga ni bona sico mi nelubanga ni bona ka nako ya kulapela sina lubasi. Kueza cwalo neku lufanga kolo yende ya kuziba ka yona mizwale ni likaizeli babalata Jehova ni kumusebeleza ka tabo. Lubile ni tohonolo ya kuba ni baokameli ba mupotoloho, balumiwa, ni Bakreste babañwi bane bafitezi mwa ndu yaluna. Zene bakopani ni zona mwa bupilo, tukufalelo yabona, ni moya wabona wa buitomboli nelisusuelize hahulu bana baluna ni kubatusa kusutelela ku Jehova.” Bashemi, mueze momukonela kaufela kutusa bana bamina kuli babe ni balikani babande.

16. Mukona kueza cwañi haiba mwanaa mina haalati kusebeleza Jehova?

¹⁶ Mukona kueza cwañi haiba yomuñwi wa bana bamina amitaluseza kuli haalati kusebeleza Jehova kusina taba ni buikatazo bomuezize kuli mumutuse kueza cwalo? Musike mwanahana kuli mupalezwi kupeta hande buikalabelo bwamina ka kuba mushemi. Jehova ufile mañi ni mañi waluna, kukopanyeleza cwalo ni mwanaa mina, tukuluho ya kuiketela za kueza, ili kuketa kusebeleza Mulimu kamba kutokwa. Haiba mwanaa mina uikatulezi kutuhela kusebeleza Jehova, muzwelepili kuba ni sepo ya kuli nako yeñwi ukakutela ku Jehova. Muhupule swanisezo ya mwanaa yanaalatehile. (Luka 15:11-19, 22-24) Mutangana yo naaezize lika zemaswe hahulu, kono kwa mafelelezo abaka ni kukutela habo yena. Babañwi bakana babulela kuli: ‘Yeo neli swanisezo feela. Kana mwanaaka wakona kukutela ku Jehova luli?’ Eni, wakona! Mane zeo ki zona zeneezahezi ku muzwale wa mukulwani yabizwa Elie.

17. Mutala wa Muzwale Elie umisusuelize cwañi?

 ¹⁷ Muzwale Elie ubulela cwana ka za bashemi bahae: “Ne ba likile ka mo ne ba konela kaufela ku ni luta ku lata Jehova ni Linzwi la hae, yona Bibele. Kono ha ne ni nze ni hula na kala ku ba mukwenuheli.” Muzwale Elie akala kueza lika zesika luka kwa mukunda, mi ahana tuso kaufela yene bamufile bashemi bahae kuli atiise silikani sahae ni Jehova. Hasaazwile fa lapa, aikenya mwa muzamao omaswe. Nihakulicwalo, fokuñwi naatalusezanga yomuñwi wa balikani bahae litaba zeñwi za mwa Bibele. Muzwale Elie utalusa kuli: “Ku bulelelanga mulikanaa ka niti ka za Jehova, ne ku ni tahisezanga kuli ni nahane hahulu ka za Jehova. Hanyinyani-hanyinyani, litaba za niti ye mwa Bibele ze ne ba ni lutile bashemi ba ka za kala ku mela mwa pilu ya ka.” Hamulaho wa nako, Muzwale Elie akutela ku Jehova. * Munahane feela tabo yetuna yene babile ni yona bashemi bahae kakuli neba mulutile kulata Jehova inzaa sali mwanana!—2 Tim. 3:14, 15.

18. Muikutwa cwañi ka za bashemi babaeza mobakonela kaufela kutusa bana babona kuli balate Jehova?

¹⁸ Bashemi, mufilwe tohonolo yende hahulu ya kuuta bana babakona kusebeleza Jehova kwapili. (Samu 78:4-6) Kueza cwalo haki nto yebunolo; kacwalo, lwamibabaza luli kabakala kuli musweli mwaikataza kutusa bana bamina! Haiba muzwelapili kueza momukonela kaufela kutusa bana bamina kulata Jehova ni kubahulisa ka kalimelo ni kelezo yahae, mukatabisa Ndataa luna yalilato ya kwa lihalimu.—Maef. 6:4.