1. Ki katulo mañi ya butokwa yebaswanela kueza batu kaufela?

 BATU kacenu baswanela kueza katulo ya butokwa. Baswanela kuikatulela haiba bakayemela Jehova Mulimu sina Mubusi wa pupo kaufela kamba bakaswalisana ni sila sahae sesituna, yena Satani Diabulosi. Batu kaufela banani kuiketela yebaka swalisana ni yena. Katulo yebaka eza ikatahisa kuli bapile kuya kuile kamba kutokwa. (Mat. 25:31-33, 46) Ka nako ya “ñalelwa yetuna,” bakaswaiwa kuli bapiliswe kamba kutimezwa.—Sin. 7:14; 14:9-11; Ezek. 9:4, 6.

2. (a) Maheberu 10:35-39 ilususueza kuezañi? (b) Buka ya Sinulo ikona kulutusa cwañi?

² Mubale Maheberu 10:35-39. Haiba muiketezi kuyemela bubusi bwa Jehova, uzibe muezize keto yende. Cwale semubata kutusa babañwi kueza katulo yelukile. Mwakona kuitusisa litaba za mwa buka ya Sinulo kuli mubatuse. Buka yende yeo ibonisa zekaezahala kwa batu babalwanisa Jehova, kono hape ibonisa limbuyoti zebaka ikola batu babazwelapili kuyemela bubusi bwahae ka busepahali. Luswanela kuituta litaba za butokwa zeo. Kueza cwalo kuka lutusa kuikatulela kuzwelapili kusebeleza Jehova. Hape lwakona kuitusisa litaba zeluitutile kuli lutuse babañwi kuikatulela kusebeleza Jehova ni kuzwelapili kueza cwalo.

3. Lukanyakisisañi mwa taba ye?

³ Mwa taba ye, lukanyakisisa lipuzo ze: Ki limbuyoti mañi zebaka ikola batu babayemela bubusi bwa Mulimu? Mi ki lika mañi zekaezahala kwa batu babaikatulela kuyemela sibatana sa mubala wa bufubelu bobutona sesibulezwi mwa buka ya Sinulo?

4. Ki sikwata mañi sabona muapositola Joani inze sili ni Jesu kwa lihalimu?

⁴ Mwa pono, muapositola Joani ubona likwata zepeli zeyemela bubusi bwa Jehova mi lifiwa mupuzo wa bupilo bobusa feli. Batu babali mwa sikwata sapili ki ba 144,000. (Sin. 7:4) Baangilwe fa lifasi kuli bayo busa ni Jesu mwa Mubuso kwa lihalimu. Babusa hamoho ni yena fahalimwaa lifasi. (Sin. 5:9, 10; 14:3, 4) Mwa pono, Joani ubabona inze bayemi ni Jesu fa Lilundu la Sione leli kwa lihalimu.—Sin. 14:1.

5. Ki lika mañi zetuha liezahala ku babasiyezi fa lifasi babali mwa sikwata sa ba 144,000?

⁵ Kuzwa feela mwa nako ya baapositola kuto fita cwale, batu babañata-ñata baketilwe kuli babe mwa sikwata sa ba 144,000. (Luka 12:32; Maro. 8:17) Nihakulicwalo, Joani utalusezwa kuli ki bo masiyaleti feela kamba palo ya batu babanyinyani kwa sikwata seo babakaba fa lifasi mwa mazazi a mafelelezo. “Babasiyezi” bao bakaamuhela ‘liswayo’ la mafelelezo lelibonisa kuli batabisize Jehova, pili ñalelwa yetuna isika kalisa kale. (Sin. 7:2, 3; 12:17) Mi nakonyana kuzwa foika kalela ñalelwa yetuna, bo masiyaleti bao bakaangelwa kwa lihalimu kuli bayo ba ni babañwi ba 144,000 bane basepahalile kuisa lifu. Bakayo busa ni Jesu mwa Mubuso wa Mulimu.—Mat. 24:31; Sin. 5:9, 10.

6-7. (a) Ki sikwata sifi sabona Joani cwale, mi luitutañi ka za batu bao? (b) Ki kabakalañi bo masiyaleti ni “buñata bobutuna bwa batu” habanyolelwa kubona bupolofita bobu kwa Sinulo kauhanyo 7 habutalelezwa?

⁶ Hamulaho wa kubona sikwata sa batu babakaya kwa lihalimu, Joani cwale ubona “buñata bobutuna bwa batu.” Ka kushutana ni ba 144,000, batu baba mwa sikwata se ki babañata hahulu kuli mane hakuna yakona kubabala. (Sin. 7:9, 10) Luitutañi ka za batu bao? Joani utalusezwa kuli: “Ba ki bona babazwa mwa ñalelwa yetuna, mi batapisize liapalo zabona ni kulisweufaza mwa mali a Ngunyana.” (Sin. 7:14) “Buñata bobutuna bwa batu” bao hase bapunyuhile ñalelwa yetuna, bakapila fa lifasi fa ni kuikola limbuyoti zeñata.—Samu 37:9-11, 27-29; Liprov. 2:21, 22; Sin. 7:16, 17.

⁷ Ibe kuli luketilwe kuya kwa lihalimu kamba kuzwelapili kupila fa lifasi le, kana lwaipona inze luli mwahalaa batu bababulezwi kwa Sinulo kauhanyo 7? Lwaswanela. Yeo ikaba nako yetabisa luli kwa likwata zepeli za batu babasebeleza Mulimu! Lukaba ni tabo yetuna kabakala kuli neluiketezi kuyemela bubusi bwa Jehova. Ki lika mañi zeñwi zei lubulelela buka ya Sinulo ka za ñalelwa yetuna?—Mat. 24:21.

8. Ñalelwa yetuna ikakalisa cwañi, mi buñata bwa batu bakaezañi kabakala taba yeo?

⁸ Sina molunyakisiselize mwa taba yefelile, likopano za lipolitiki za lifasi le lituha lilwanisa Babilona Yomutuna, bona bulapeli kaufela bwa buhata mwa lifasi. (Sin. 17:16, 17) Ao akaba ona makalelo a ñalelwa yetuna. Kana taba yeo ikatahisa kuli batu babañata-ñata bakale kulapela Jehova? Batili. Mane Sinulo kauhanyo 6 ibonisa kuli ka yona nako yetaata yeo, batu babasa sebelezi Jehova bakakupa likopano za lipolitiki ni likopano za lipisinisi za lifasi le, ili zeswanisezwa kwa malundu kuli libasileleze. Bakeñisa kuli habana kuyemela Mubuso wa Mulimu, Jehova uka baanga kuli ki balwanisi.—Luka 11:23; Sin. 6:15-17.

9. Ki lika mañi zekatahisa kuli batanga ba Jehova babonahale kushutana ni batu babañwi kaufela ka nako ya ñalelwa yetuna, mi kukaezahalañi ku bona?

 ⁹ Ka yona nako yetaata yeo, kukaiponahalela hande kuli batanga ba Jehova babasepahala bashutana ni batu babañwi. Ki bona feela banosi mwa lifasi babaka zwelapili kusebeleza Jehova Mulimu ni babaka hana kuyemela “sibatana.” (Sin. 13:14-17) Muhato wabona wa kuzwelapili kusepahala ku Jehova, ukahalifisa hahulu babalwanisa Jehova. Kabakaleo, linaha za lifasi likaswalisana hamoho kulwanisa batanga ba Mulimu mwa lifasi kaufela. Bibele italusa taba yeo kuli ki twaniso ya Gogo wa kwa Magogo.—Ezek. 38:14-16.

10. Sina mokuboniselizwe kwa Sinulo 19:19-21, Jehova ukaezañi batanga bahae habaka lwaniswa?

¹⁰ Jehova ukaezañi batanga bahae habaka lwaniswa? Ulutaluseza kuli: “Mabifi aka amatuna akatuka.” (Ezek. 38:18, 21-23) Sinulo kauhanyo 19 italusa zekaezahala hasamulaho. Jehova ukaluma Mwanaa hae kuli asileleze batanga bahae ni kuyundisa lila zabona. Jesu ukatusiwa ki “limpi ze kwa lihalimu,” ili mangeloi asepahala ni ba 144,000 kulwanisa lila zeo. (Sin. 17:14; 19:11-15) Ki lika mañi zekaezahala hamulaho wa ndwa yeo? Batu kaufela ni likopano kaufela zelwanisa Jehova bakayundiswa!—Mubale Sinulo 19:19-21.

11. Ki kezahalo ifi ya butokwa hahulu yebulezwi mwa buka ya Sinulo?

¹¹ Munahane feela mobaka ikutwela batanga ba Mulimu babasepahala habaka punyuha muta lila za Mulimu liyundiswa! Kaniti luli, bakaba ni tabo yetuna! Babilona Yomutuna haakayundiswa, kukaba ni tabo yetuna kwa lihalimu, kono mane kunani nto yeñwi yekatahisa kuli kube ni tabo yetuna hahulu nikufita. (Sin. 19:1-3) Ki yona kezahalo ya butokwa hahulu mwa buka ya Sinulo, lona “linyalo la Ngunyana.”—Sin. 19:6-9.

12. Sina mokuboniselizwe kwa Sinulo 21:1, 2, linyalo la Ngunyana likaba teñi lili?

¹² Linyalo leo likaba teñi lili? Ba 144,000 kaufela bakaba kwa lihalimu pili ndwa ya Armagedoni isika kalisa kale. Kono linyalo la Ngunyana halina kubateñi ka nako yeo. (Mubale Sinulo 21:1, 2.) Linyalo la Ngunyana likaba teñi hamulaho wa ndwa ya Armagedoni, lila za Mulimu kaufela fa lifasi hase liyundisizwe, ni Satani ni madimona ahae hase banepezwi mwa mukoti.—Samu 45:3, 4, 13-17.

13. Ki lika mañi zekaezahala ka nako ya linyalo la Ngunyana?

¹³ Ki lika mañi zekaezahala ka nako ya linyalo la Ngunyana? Sina feela linyalo halikopanya muuna ni musali hamoho, linyalo la swanisezo le, likopanya Mulena, yena Jesu Kreste, ni “munyaliwa” wahae, bona ba 144,000. Kezahalo ya butokwa yeo haika ezahala, Jesu ni ba 144,000 bakakala kubusa lifasi ka lilimo ze 1,000.—Sin. 20:6.

14-15. Sinulo kauhanyo 21 ibapisa ba 144,000 kwañi? (Mubone siswaniso sesi fa kava.)

¹⁴ Cwale Sinulo kauhanyo 21 ibapisa ba 144,000 kwa muleneñi omunde hahulu obizwa “Jerusalema Yomunca.” (Sin. 21:2, 9) Muleneñi wo unani macwe a mutomo a 12 fokuñozwi “mabizo a 12 a baapositola ba Ngunyana ba 12.” Ki kabakalañi Joani hanaatabisizwe ki taba yeo? Kabakala kuli naaboni libizo lahae inze liñozwi ku leliñwi la macwe ao. Kaniti luli, yeo neli tohonolo yetuna!—Sin. 21:10-14; Maef. 2:20.

 ¹⁵ Muleneñi wa swanisezo wo, hauswani ni mileneñi yemiñwi. Likululu la muleneñi ki la gauda, minyako yaona ipangilwe fa lipelela ze 12, makwakwa ni mitomo yaona likabisizwe ka macwe a butokwa, mi maneku aona amane alikanelela. (Sin. 21:15-21) Kono kunani nto yeñwi yetondahala. Mulemuhe zalutaluseza Joani cwale: “Nenisika bona tempele mwateñi, kakuli Jehova Mulimu Yamaata Kaufela neli yena tempele yaona, ni Ngunyana neli tempele yaona. Mi muleneñi hautokwi liseli la lizazi kamba kweli, kakuli neumonyehelwa ki kanya ya Mulimu, mi lambi yaona neli Ngunyana.” (Sin. 21:22, 23) Babali kalulo ya Jerusalema Yomunca bakaba ni kolo ya kubona Jehova. (Maheb. 7:27; Sin. 22:3, 4) Kacwalo, Jehova ni Jesu ki bona tempele ya muleneñi wo.

16. Ki limbuyoti mañi zebaka ikola batu ka nako ya Puso ya Mubuso wa Mulimu ya Lilimo ze 1,000?

¹⁶ Bakreste babatozizwe babanga ni tabo yetuna habanahanisisa za muleneñi wo. Kono nihaiba Bakreste babanani sepo ya kupila fa lifasi baitebuha hahulu muleneñi wo. Ka nako ya Puso ya Mubuso wa Mulimu ya Lilimo ze 1,000, Jerusalema Yomunca ukatahisa limbuyoti zeñata fa lifasi. Joani utalusa kuli naaboni limbuyoti zeo halibuba sina “nuka ya mezi a bupilo.” Mi mwabuse bobuñwi ni bobuñwi bwa nuka nekunani “likota za bupilo” zenenani matali anaatusa “kufolisa macaba.” (Sin. 22:1, 2) Batu kaufela babaka pila ka nako yeo, bakatusiwa ki lika zende zeo. Hanyinyani-hanyinyani, batu kaufela babautwa Mulimu bakapetahala. Hakusana kukula, kuutwa butuku, ni kulotisa miyoko kabakala kutahelwa ki maswabi.—Sin. 21:3-5.

17. Sina mokuboniselizwe kwa Sinulo 20:11-13, ki bo mañi babaka ikola limbuyoti zekatahiswa ki Mubuso wa Mulimu ka nako ya Puso ya Lilimo ze 1,000?

¹⁷ Ki bo mañi babaka ikola limbuyoti zende zeo? Pili, ki buñata bobutuna bwa batu babaka punyuha Armagedoni, hamohocwalo ni bana babakana bapepa mwa lifasi lelinca. Kono Sinulo kauhanyo 20 hape isepisa kuli babashwile bakazusiwa kwa bafu. (Mubale Sinulo 20:11-13.) Batanga ba Jehova “babalukile” babashwile, hamohocwalo ni batu “babasika luka,” babashwile basikaba ni kolo ya kuituta ka za Jehova, kaufelaa bona bakazusiwa kwa bafu mi bakapila fa lifasi  le. (Lik. 24:15; Joa. 5:28, 29) Kana fo kutalusa kuli batu kaufela babashwile bakazusiwa kwa bafu mi bakapila fa lifasi ka nako ya Puso ya Mubuso wa Mulimu ya Lilimo ze 1,000? Batili. Batu bane bahanile kusebeleza Jehova hane banani kolo ya kueza cwalo pili basika shwa kale, habana kuzusiwa kwa bafu. Kusina taba kuli nebanani kolo ya kumusebeleza, nebasika eza cwalo, ili kubonisa kuli habaswaneli kupila mwa Paradaisi.—Mat. 25:46; 2 Mates. 1:9; Sin. 17:8; 20:15.

18. Ki muinelo mañi obakaba ku ona batu hamulaho wa lilimo ze 1,000?

¹⁸ Lilimo ze 1,000 halika fela, batu kaufela babaka pila fa lifasi bakaba babapetahalile. Batu habana kukopana ni manyando atahiswa ki sibi seluhozize ku Adama. (Maro. 5:12) Sibi seluhozize ku Adama sikafeliswa ka kutala. Ka mukwa wo, babaka pila fa lifasi ‘bakazuha’ kakuli bakapetahala hamulaho wa lilimo ze 1,000.—Sin. 20:5.

19. Ki kabakalañi batu habaka likiwa lwa mafelelezo?

¹⁹ Jesu naazwezipili kusepahala ku Mulimu kusina taba kuli Satani naalikile kumukukueza kuli alobe milao yahae. Kono kana batu kaufela babapetahalile bakazwelapili kusepahala ku Jehova, Satani haka balika? Mañi ni mañi waluna ukaba ni kolo ya kubonisa busepahali bwahae ku Jehova, Satani hakalukululwa mwa mukoti kwa mafelelezo a lilimo ze 1,000. (Sin. 20:7) Babaka zwelapili kusepahala ku Jehova ka nako ya tiko ya mafelelezo yeo, bakafiwa bupilo bobusa feli mi bakaikola tukuluho ya niti. (Maro. 8:21) Babaka kwenuhela Jehova bakayundiswa kuya kuile, hamohocwalo ni Diabulosi ni madimona ahae.—Sin. 20:8-10.

20. Muikutwa cwañi ka za bupolofita bobutabisa bobufumaneha mwa buka ya Sinulo?

²⁰ Muikutwa cwañi hamulaho wa kunyakisisa ka bukuswani litaba zefumaneha mwa buka ya Sinulo? Kusina kukakanya, munyolelwa kupila mwa lifasi lelinca ni kubona bupolofita bobutabisa bo habutalelezwa. Mi taba yeo imisusueza kumema batu babañwi kuli baswalisane ni luna kulapela Mulimu waluna ka nzila yelukile. (Sin. 22:17) Lunani tabo yetuna hamulaho wa kunyakisisa lika zekaezahala kwapili, mi lubata kulikanyisa muapositola Joani, yanaaize: “Ameni! Taha, Mulena Jesu.”—Sin. 22:20.