1-2. Fokuñwi lukona kuikutwa cwañi ka za litapelo zaluna?

 KANA mukile mwaikutwa kuli Jehova haalabangi litapelo zamina? Haiba ki cwalo, muzibe kuli haki mina munosi. Mizwale ni likaizeli babañata ni bona bakile baikutwa cwalo, sihulu ka nako yene bakopana ni miinelo yetaata. Halukopana ni muinelo otaata, ni luna kukona kulubela taata kulemuha mo Jehova aalabela litapelo zaluna.

² Halunyakisiseñi libaka halukolwa kuli Jehova waalabanga litapelo za batanga bahae. (1 Joa. 5:15) Hape lukanyakisisa lipuzo ze: Ki kabakalañi fokuñwi hakukona kubonahala inge kuli Jehova haalabi litapelo zaluna? Jehova ualabanga cwañi litapelo zaluna kacenu?

3. Ki kabakalañi Jehova habata kuli lulapele ku yena?

³ Bibele ibonisa kuli Jehova ululata hahulu ni kuli luba butokwa ku yena. (Hag. 2:7; 1 Joa. 4:10) Ki lona libaka halumema kuli lukupe tuso ku yena ka tapelo. (1 Pit. 5:6, 7) Ubata kulutusa kuzwelapili kuba bukaufi ni yena ni kutiyela miinelo yetaata yelukopana ni yona.

4. Luziba cwañi kuli Jehova waalabanga litapelo za batanga bahae? (Mubone ni siswaniso.)

⁴ Mwa Bibele, kunani litaba zeñata zebonisa mo Jehova naaalabezi litapelo za batanga bahae. Halunyakisiseñi mitala ya batu babañwi, ili bao litapelo zabona nelialabilwe. Yomuñwi wa batu bao ki Mulena Davida. Mwa bupilo bwahae kaufela, naanani lila zeñata zenebata kumubulaya, mi hañata naalapelanga ku Jehova kuli amutuse. Nako yeñwi naakupile Jehova kuli: “Wena Jehova, uutwe tapelo yaka; uutwe kupo yaka ya kuli unituse. Unialabe ka kusepahala kwahao ni ka kuluka kwahao.” (Samu 143:1) Jehova naaalabile  litapelo za Davida za kuli amulamulele kwa lila zahae. (1 Sam. 19:10, 18-20; 2 Sam. 5:17-25) Davida naakona kubulela ka buikolwiso kuli: “Jehova u fakaufi ni babahuweleza ku yena kaufela.” Ni luna lwakona kuba ni buikolwiso bobucwalo.—Samu 145:18.

5. Kana litapelo za batanga ba Jehova ba kwamulaho kamita nelialabiwanga ka mone balibelelela? Mufe mutala. (Mubone ni siswaniso.)

⁵ Jehova fokuñwi haana kualaba litapelo zaluna ka molulibelelela. Nekubile cwalo ku muapositola Paulusi. Naakupile Mulimu kuli azwise “muutwa mwa mubili” wahae. Paulusi naalapezi ka kunonga ka za butata bo halaalu. Kana Jehova naaalabile litapelo zahae? Eni, kono naasika eza cwalo ka mwanaalibelelela Paulusi. Mwa sibaka sa kufelisa butata bo, Jehova naamufile maata anaatokwa kuli azwelepili kumusebeleza ka busepahali.—2 Makor. 12:7-10.

6. Ki kabakalañi fokuñwi hakukona kubonahala inge kuli Jehova haalabi litapelo zaluna?

⁶ Ni luna mwendi fokuñwi litapelo zaluna halina kualabiwa ka molulibelelela. Lunani buikolwiso bwa kuli Jehova waziba mwa kulutuseza. Mane wakona “kueza hahulu nikufita mwa lika kaufela zelukupa kamba kuutwisisa.” (Maef. 3:20) Kabakaleo, wakona kualaba litapelo zaluna ka nako kamba ka nzila yelusika libelela.

7. Ki kabakalañi fokuñwi halutokwa kucinca lika zene lulapelezi? Mufe mutala.

⁷ Fokuñwi lukatokwa kucinca lika zene lulapelezi hase lulemuhile hande tato ya Jehova. Halunyakisiseñi mutala wa muzwale yabizwa Martin Poetzinger. Nakonyana feela kuzwa fanyalela, Muzwale Poetzinger naatamilwe mwa munganda wa tukufazo wa ba Nazi. Kwa makalelo, naakupile Jehova kuli amutuse kulukululwa mwa munganda wa tukufazo wo ilikuli ayo babalela musalaa hae ni kueza musebezi wa kukutaza hape. Nihakulicwalo, hamulaho wa lisunda zepeli, nekusa bonahali kuli Jehova naaka mutusa kulukululwa. Kacwalo, akala kulapela kuli: “Jehova nakukupa haku nituse kuziba zeubata kuli nieze.” Mi akala kunahanisisa zene bakopana ni zona mizwale babañwi mwa munganda wo. Buñata bwabona nebaikalezwi hahulu ka za basali babona ni bana babona. Kacwalo, Muzwale Poetzinger alapela kuli: “Jehova, naitumela ku wena kwa musebezi omunca ou nifile. Haku nituse kutiisa  mizwale baka ni kubasusueza.” Naaezize musebezi wo ka lilimo ze 9 zanaali mwa munganda wo!

8. Ki nto mañi ya butokwa yeluswanela kuhupulanga halulapela?

⁸ Luswanela kuhupula kuli Jehova unani mulelo mi uka utaleleza ka nako yatomile. Mulelo wo ukopanyeleza kufelisa ka kutala miinelo kaufela yetaata yenyandisa hahulu batu kacenu, yecwale ka likozi za ka taho, makulanu, ni lifu. Jehova ukaitusisa Mubuso wahae kupeta mulelo wahae. (Dan. 2:44; Sin. 21:3, 4) Kono Jehova ulumelelize Satani kubusa lifasi kufitela nako yeo ifita. b (Joa. 12:31; Sin. 12:9) Jehova hanaaka felisa miinelo yetaata kaufela yebakopana ni yona batu ka nako ya cwale, nekuka bonahala inge kuli Satani usweli kubusa hande lifasi. Kacwalo, niha lutokwa kulibelela kuli Jehova ataleleze lisepiso zahae zeñwi, hakutalusi kuli haalutusi. Halunyakisiseñi linzila zeñwi zalutusa ka zona Jehova.

9. Jehova ukona kulutusa cwañi halubata kueza likatulo? Mufe mutala.

⁹ Ulufanga butali. Jehova usepisa kulufa butali bolutokwa kuli lueze likatulo zende. Lutokwa butali bobuzwa ku Mulimu sihulu halueza likatulo zeka luama mwa bupilo bwaluna kaufela, zecwale ka kuzwelapili kuba makwasha kamba kukena mwa linyalo. (Jak. 1:5) Halunyakisiseñi zeneezahezi ku kaizeli yomuñwi yali likwasha yabizwa Maria. c Ka nako yakopana ni muzwale yomuñwi, naasebeza sina paina wa kamita mi naaikola musebezi wo. Utalusa kuli: “Hane lunze luzibana hande, lwakala kutabelana. Neniziba kuli nenitokwa kueza katulo. Nenilapezi hahulu ka za taba yeo. Nenitokwa ketelelo ya Jehova, kono hape neniziba kuli Jehova naasike aniezeza katulo.” Kaizeli yo uikutwa kuli Jehova naaalabile tapelo yahae ya kukupa butali. Ka mukwa ufi? Hanaanzaa eza lipatisiso mwa lihatiso zaluna, naafumani litaba zene mutusize kualaba lipuzo zanaanani zona. Hape naautwile kelezo yende yene bamufile bo mahe. Kelezo yeo neitusize Kaizeli Maria kuitekula. Kacwalo, naakonile kueza katulo yende.

10. Ka kuya ka Mafilipi 4:13, ki lika mañi zakaeza Jehova kuli atuse batanga bahae? Mufe mutala. (Mubone ni siswaniso.)

¹⁰ Ulufanga maata kuli luitiise. Sina feela mone kubezi ku muapositola Paulusi, Jehova uka lufa maata elutokwa kuli lutiyele miinelo yetaata yelukopana ni yona. (Mubale Mafilipi 4:13.) Halunyakisiseñi mo Jehova naatuselize muzwale yabizwa Benjamin kutiyela miinelo yetaata yanaakopana ni yona. Hanaasali yomunca, Muzwale Benjamin ni lubasi lwahae nebapilile ka  nako yetelele mwa minganda ya babalehi mwa Africa. Muzwale Benjamin utalusa kuli: “Nenilapelanga kamita ku Jehova, kumukupa kuli anife maata ilikuli nieze zelukile mwa meeto ahae. Jehova naaalabile litapelo zaka ka kunifa kozo ya mwa munahano, bundume kuli nizwelepili kukutaza, ni lihatiso zenee nitusize kuzwelapili kuba ni silikani sesitiile ni yena.” Hape utalusa kuli: “Kubala litaba zebonisa zeezahezi mwa bupilo bwa Lipaki babañwi ni kuziba mo Jehova naabatuselize kuitiisa neku nitusize kuzwelapili kusepahala ku yena.”

11-12. Jehova ukona kuitusisa cwañi lubasi lwaluna lwa kwa moya kualaba litapelo zaluna? (Mubone ni siswaniso.)

¹¹ Uitusisanga lubasi lwaluna lwa kwa moya. Fa busihu bone butatamiwa ki lizazi lanaafanile bupilo bwahae sina sitabelo, Jesu naalapezi ka taata. Naakupile Jehova kuli asike atuhelela batu kumushubula ni kumuunga sina munyefuli. Jehova naasika eza cwalo kono naatusize Jesu ka kuluma lingeloi kuli limutiise. (Luka 22:42, 43) Ni luna, Jehova wakona kulutusa ka kuitusisa muzwale kamba kaizeli kuli alususueze ka kululizeza foni kamba kulupotela. Kaufelaa luna luswanela kuitusisa kolo ifi kamba ifi yelukona kuba ni yona kuli lubulelele mizwale ni likaizeli baluna “manzwi amande.”—Liprov. 12:25.

¹² Halunyakisiseñi zeneezahezi ku kaizeli yabizwa Miriam. Lisunda lisikai kuzwa fobatimelela bo muunaa bona, bo Miriam nebali kwa ndu banosi mi nebalembwalile hahulu. Nebaswalelezi kulila mi nebatokwa kuambola ni mutu yomuñwi. Batalusa kuli: “Nenifelezwi ki maata kuli mane nenisa koni kulizeza mutu ufi kamba ufi; kacwalo, nalapela ku Jehova. Hane nisalila cwalo ni kulapela, foni yaka yalila. Neli muuna-muhulu, mi naali mulikanaaka yomutuna.” Bo Miriam nebaomba-ombilwe ki muuna-muhulu yo ni musalaa hae. Balumela kuli Jehova ki yena yanaasusumelize muzwale yo kuli abalizeze foni.

13. Hamufe mutala obonisa mo Jehova akona kualabela litapelo zaluna ka kuitusisa batu babasi batanga bahae?

¹³ Ukona kuitusisa batu babasi batanga bahae. (Liprov. 21:1) Ka linako zeñwi, Jehova ualabanga litapelo za batu bahae ka  kususumeza batu babasi batanga bahae kuli babatuse. Ka mutala, naasusumelize Mulena Aritazerisi kulumeleza Nehemia kukutela kwa Jerusalema kuli ayo tusa kuyaha sinca muleneñi wo. (Neh. 2:3-6) Ni kacenu, Jehova wakona kususumeza nihaiba batu babasi batanga bahae kuli balutuse halutokwa tuso.

14. Ki lika mañi zemuitebuhile ku zeneezahezi ku bo Soo Hing? (Mubone ni siswaniso.)

¹⁴ Kaizeli yabizwa Soo Hing uikutwa kuli Jehova naamutusize ka kuitusisa mualafi wahae. Mwanaa hae wamushimani ukatazwa ki matuku a mwa munahano. Mwanaa hae hanaabile mwa kozi yetuna, yena ni muunaa hae batuhela musebezi kuli bamubabalele. Kabakaleo, nebabile ni butata bwa kutokwa hande masheleñi. Bo Soo Hing batalusa kuli nebasike bakona kuzwelapili kutiyela muinelo wo. Nebataluselize Jehova zeneli mwa pilu yabona kaufela ni kumukupa kuli abatuse. Mualafi yo naabatile nzila ya kubatusa ka yona. Kabakaleo, nebaamuhezi lituso zeñwi ku ba muuso mi nebafumani ndu yecipile ya kutelela. Hamulaho wa fo, bo Soo Hing nebabulezi kuli: “Neluboni mo Jehova naalutuselize. Kusina kukakanya, ‘wautwanga litapelo.’”—Samu 65:2.

15. Ki lika mañi zenetusize kaizeli yomuñwi kulemuha kuli Jehova naaalaba litapelo zahae?

¹⁵ Fokuñwi litapelo zaluna halialabiwangi ka nzila yelukona kulemuha ka bunolo. Kono Ndataa luna ya kwa lihalimu ualabanga litapelo zaluna ka nzila yelutusa kuzwelapili kusepahala ku yena. Kacwalo, mulike kubona mwaalabela litapelo zamina Jehova. Kaizeli yabizwa Yoko naaikutwa kuli Jehova naasaalabi litapelo zahae; kacwalo, añola mwa buka lika kaufela zanaakupile Jehova. Hamulaho wa nako, kaizeli yo atalima mwa buka yahae mi alemuha kuli Jehova naaalabile buñata bwa litapelo zahae, nihaiba zeñwi zanaalibezi. Nako ni nako, luswanela kunahanisisanga mo Jehova aalabela litapelo zaluna.—Samu 66:19, 20.

16. Lukona kubonisa cwañi tumelo halulapela? (Maheberu 11:6)

¹⁶ Lubonisa kuli lunani tumelo isiñi feela ka kulapela ku Jehova kono ni ka kuamuhela kalabo kaufela yalufa halulapela ku yena. (Mubale Maheberu 11:6.) Halunyakisiseñi mutala wa muzwale yabizwa Mike ni musalaa hae Chrissy. Nebaitomezi sikonkwani sa kusebeleza fa Betele.  Bo Mike batalusa kuli: “Nelutalelelize mafomu a kukupa kuyo sebeleza fa Betele ka lilimo zeñata, mi nelulapezi ku Jehova hañata-ñata ka za sikonkwani se, kono nelusika memiwa kuyo sebeleza fa Betele.” Bo Mike ni bo Chrissy nebanani buikolwiso bwa kuli Jehova naaziba hande mwakuitusiseza bona mwa sebeleze yahae. Nebaezize mone bakonela kaufela mwa sebelezo yabona ka kusebeza sina mapaina ba kamita kone kutokwahala hahulu bakutazi ba Mubuso ni kutusa mwa musebezi wa kuyaha miyaho ya kopano. Ka nako ya cwale, bo Mike basebeza sina muokameli wa mupotoloho mi bapotelanga liputeho ni bakubona. Bo Mike batalusa kuli: “Fokuñwi Jehova naasaalabangi litapelo zaluna ka mone lulibelelela, kono naalialabile mi naaezize cwalo ka nzila yende hahulu mane kufita mone lulibelelela.”

17-18. Ka kuya ka Samu 86:6, 7, ki buikolwiso mañi bolukona kuba ni bona?

¹⁷ Mubale Samu 86:6, 7. Davida muñoli wa samu ye, naanani buikolwiso bwa kuli Jehova naautwile litapelo zahae ni kulialaba. Ni mina mwakona kuba ni buikolwiso bobuswana. Mitala yelunyakisisize mwa taba ye, ibonisa kuli Jehova wakona kulufa butali ni maata kuli lutiyele muinelo otaata ufi kamba ufi olukona kukopana ni ona. Ukona kuitusisa lubasi lwaluna lwa kwa moya mane nihaiba batu babasa mulapeli ka nako ya cwale kuli balutuse mwa linzila zeñwi.

¹⁸ Nihaike kuli Jehova fokuñwi haana kualaba litapelo zaluna ka molulibelelela, lwaziba kuli uka lialaba. Uka lufa lika zelutokwa luli mi ukaeza cwalo ka nako yeswanela. Kacwalo, muzwelepili kulapela ni kuba ni tumelo, mi mukolwe kuli Jehova uka mibabalela ka nako ya cwale ni kuli ‘ukakulisa takazo ya zepila kaufela’ mwa lifasi lelinca lelituha libateñi.—Samu 145:16.