1. Jehova ubata kuli batanga bahae baezeñi? (Mubone ni siswaniso.)

 KI MAÑI yakona kulutusa halutokwa kuomba-ombiwa ni kuetelelwa? Lwaziba kalabo ya puzo yeo. Lwakona kulapela ku Jehova Mulimu. Mane Jehova ulumema kueza cwalo. Ubata kuli lulapelange kamita—‘kulapela ka nako kaufela.’ (1 Mates. 5:17) Lwakona kulapela ku yena ka nako ifi kamba ifi ni kumukupa kuli aluetelele mwa lika kaufela zelueza mwa bupilo bwaluna. (Liprov. 3:5, 6) Lwakona kulapela ku Jehova Mulimu hañata-ñata kakuli ulumema kueza cwalo.

2. Lukanyakisisañi mwa taba ye?

² Lwaitebuha mpo ya tapelo. Niteñi, kabakala mipateho, lwakona kupalelwa kufumana nako ya kulapela. Hape lukona kuikutwa kuli lutokwa kubolosola litapelo zaluna. Lwaitumela ku Mulimu ka kulufa Mañolo kuli alutuse ni kuluetelela. Mwa taba ye, lukanyakisisa zelukona kuituta ku Jesu ka za mwakubela ni nako ya kulapela. Hape lukanyakisisa molukona kubolosolela litapelo zaluna ka kulapelelanga lika za butokwa zeketalizoho.

3. Ki lika mañi zanaaziba Jesu ka za tapelo?

³ Jesu naaziba kuli Jehova uunga tapelo kuba ya butokwa hahulu. Lilimo zeñata-ñata pili asika taha kale fa lifasi, naaboni mo Ndatahe naaalabezi litapelo za batanga bahae babasepahala. Ka mutala, Jesu naali ni Ndatahe hanaaalabile litapelo zenezwelela kwatasaa pilu zene balapezi batanga bahae babacwale ka Anna, Davida, ni Elia. (1 Sam. 1:10, 11, 20; 1 Mal. 19:4-6; Samu 32:5) Ki lona libaka Jesu hanaalutile balutiwa bahae kulapelanga kamita ni kukolwa kuli litapelo zabona likaalabiwa.—Mat. 7:7-11.

4. Luitutañi kwa litapelo zanaalapezi Jesu?

 ⁴ Jesu naatomezi balutiwa bahae mutala wa mwakulapelela ka litapelo zanaalapelanga ku Jehova. Ka nako ya bukombwa bwahae kaufela, Jesu naalapezi hañata-ñata. Bakeñisa kuli hañata naapatehanga mi batu babañata nebatahanga ku yena, naatokwa kufumana nako ya kulapela. (Mare. 6:31, 45, 46) Naazuhanga isali kakusasana kuli abe ni nako ya kulapela inzaa li anosi. (Mare. 1:35) Nako yeñwi, naalapezi busihu kaufela pili asika eza kale katulo yeñwi ya butokwa. (Luka 6:12, 13) Mi Jesu naakuta-kutezi kulapela fa busihu bwahae bwa mafelelezo pili asika bulaiwa kale hanaanzaa nahana za kupeta kalulo yetaata hahulu ya musebezi wanaatezi fa lifasi.—Mat. 26:39, 42, 44.

5. Lukona kulikanyisa cwañi Jesu halulapela?

⁵ Mutala wa Jesu ululuta kuli kusina taba ni mipateho yelukona kuba ni yona, luswanela kubanga ni nako ya kulapela. Ka kuswana ni Jesu, mwendi lukatokwa kulukisa nako ya kulapela, inge cwalo kuzuha isali kakusasana kamba kuliyeha hanyinyani kulobala. Haiba lueza cwalo, lukabonisa Jehova kuli lwaitebuha mpo yende ye yalufile. Kaizeli yomuñwi yabizwa Lynne naaitebuhile hahulu hanaaitutile lwapili za mpo ya tapelo. Utalusa kuli: “Kuziba kuli nenikona kulapela ku Jehova ka nako ifi kamba ifi neku nitusize kumuunga sina Mulikanaaka yomutuna mi taba yeo nei nisusuelize kubata kubolosola litapelo zaka.” Kusina kukakanya, buñata bwaluna luikutwa cwalo. Kacwalo, halunyakisiseñi litaba za butokwa zeketalizoho zelukona kulapelela.

6. Ka kuya ka Sinulo 4:10, 11, ki lika mañi zaswanela kufiwa Jehova?

⁶ Mulumbeke Jehova. Mwa pono yesabisa yanaaboni muapositola Joani, naaboni baana-bahulu ba 24 kwa lihalimu inze balapela Jehova. Nebalumbeka Mulimu ka kubulela kuli waswanela kufiwa “kanya ni likute ni maata.” (Mubale Sinulo 4:10, 11.) Mangeloi asepahala ni ona anani mabaka amañata a kulumbeka Jehova ni kumukuteka. Apila kwa lihalimu ni yena mi amuziba hande hahulu. Alemuhanga tulemeno twanani tona mwa lika zaeza. Hanzaa bona lika zaeza  Jehova, asusuezwanga kumulumbeka.—Jobo 38:4-7.

7. Ki kabakalañi haluswanela kulumbeka Jehova?

⁷ Ni luna luswanela kulumbeka Jehova mwa litapelo zaluna, kumutaluseza zelulata ni zeluitebuha ka za hae. Hamunze mubala ni kuituta Bibele, mueze momukonela kaufela kulemuha tulemeno twa Jehova tomutabela hahulu. (Jobo 37:23; Maro. 11:33) Hasamulaho, mutaluseze Jehova momuikutwela ka za tulemeno to. Hape luswanela kulumbeka Jehova kabakala kuli walutusanga ni kutusa mizwale ni likaizeli baluna. Kamita walubabalelanga ni kulusileleza.—1 Sam. 1:27; 2:1, 2.

8. Ki mabaka afi amañwi haluswanela kuitumela ku Jehova? (1 Matesalonika 5:18)

⁸ Muitumele ku Jehova. Lunani mabaka amañata haluswanela kuitumela ku Jehova mwa tapelo. (Mubale 1 Matesalonika 5:18.) Luswanela kuitumela ku yena kabakala lika zende kaufela zelunani zona; esi mane mpo yende kaufela izwa ku yena. (Jak. 1:17) Ka mutala, lwakona kuitumela ku yena kabakala mwalukiselize hande lifasi ni lika zekomokisa zabupile. Hape lwakona kuitumela ku yena kabakala kulufa bupilo, lubasi lwaluna, balikani baluna, ni sepo yende ya za kwapili. Hape luswanela kuitumela ku Jehova kabakala kululumeleza kuikola silikani sesinde ni yena.

9. Ki kabakalañi halutokwa kueza molukonela kaufela kuitumela ku Jehova?

⁹ Lutokwa kueza molukonela kaufela kunahanisisa mabaka haluswanela kuitumela ku Jehova. Lupila mwa lifasi ili mo batu babañata habana buitumelo. Batu hañata baisanga feela pilu kwa lika zebabata isiñi kwa lika zebakona kueza kuli babonise buitumelo. Haiba lukala kuba ni mukwa wo, litapelo zaluna selikaba feela za kukupa Jehova kuli aluezeze lika zeñwi. Kuli taba yeo isike yaezahala, luswanela kuzwelapili kuitumela ku Jehova kabakala lika kaufela zaluezeza.—Luka 6:45.

10. Kuba ni moya wa buitumelo nekutusize cwañi kaizeli yomuñwi kuitiisa? (Mubone ni siswaniso.)

¹⁰ Kuba ni moya wa buitumelo kwakona kulutusa kutiyela miinelo yetaata. Halunyakisiseñi mutala wa kaizeli yabizwa Kyung-sook, ofumaneha mwa Tawala ya Mulibeleli ya January 15, 2015. Bo Kyung-sook nebafumanwi ni butuku bwa kansa ya kwa maswafu bone buzwelapili kutotobela. Batalusa kuli: “Butuku bo ne bu ni bilaeza hahulu. Ne ni ikutwile kuli ne ni latehezwi ki lika kaufela, mi ne ni sabile hahulu.” Ki lika mañi zene batusize kutiyela muinelo wo? Batalusa kuli zazi ni zazi busihu pili basika lobala kale, nebayanga fa situwa sa ndu yabona ni kuyo lapela ka kutumusa, kuitumela ku Jehova kabakala lika zeketalizoho zanaa baezelize mwa lizazi leo. Kueza  cwalo neku batiisanga hahulu ni kubasusueza kulata Jehova. Nebalemuhile kuli Jehova watusanga batanga bahae babasepahala habakopana ni miinelo yetaata ni kuli limbuyoti zelunani zona ki zeñata hahulu kufita miliko yelutalimana ni yona mwa bupilo bwaluna. Ka kuswana ni bo Kyung-sook, lunani mabaka amañata haluswanela kuitumela ku Jehova nihaikaba kuli lukopana ni muinelo omuñwi otaata. Kuitumela ku yena mwa tapelo kuka lutusa kuzwelapili kuitiisa ni kusaikalelwa.

11. Ki kabakalañi balutiwa ba Jesu hane batokwa kuba ni bundume Jesu hasaakutezi kwa lihalimu?

¹¹ Mukupe Jehova kuli amituse kuba ni bundume hamukutaza. Nakonyana pili Jesu asika kutela kale kwa lihalimu, naahupulisize balutiwa bahae ka za musebezi wanaa bafile wa kupaka ka za hae “mwa Jerusalema, mwa Judea kaufela ni mwa Samaria, ni kuyo fita kwa libaka za kwahule hahulu za lifasi.” (Lik. 1:8; Luka 24:46-48) Kusika fita nako yetelele kuzwa fo, baeteleli ba Majuda batama muapositola Pitrosi ni muapositola Joani, babatisa fapilaa kuta ya Sanhedrini, mi balaela baana babasepahala bao kuli batuhele kukutaza mi bababemba. (Lik. 4:18, 21) Pitrosi ni Joani nebaezize cwañi habautwa cwalo?

12. Ka kuya ka Likezo 4:29, 31, ki lika mañi zene baezize balutiwa ba Jesu?

¹² Pitrosi ni Joani nebaalabile baeteleli ba bulapeli bwa Sijuda bane bababemba bao kuli: “Muikatulele mina beñi, haiba kulukile mwa meeto a Mulimu kuli luteeleze ku mina kufita Mulimu. Kono haili luna, halukoni kutuhela kubulela lika zeluboni ni zeluutwile.” (Lik. 4:19, 20) Pitrosi ni Joani hane balukuluzwi, balutiwa balapela ku Jehova kuli abatuse kueza tato yahae. Nebalapezi kuli: “Utuse batanga bahao kuzwelapili kubulela linzwi lahao ka bundume.” Jehova naaalabile tapelo yenezwelela kwatasaa pilu yeo.—Mubale Likezo 4:29, 31.

13. Luitutañi kwa mutala wa Muzwale Jin-hyuk?

¹³ Lukona kulikanyisa mutala wa balutiwa ka kuzwelapili kukutaza, ba muuso niha balulaela kuli lusike lwaeza cwalo. Halunyakisiseñi mutala wa muzwale yabizwa Jin-hyuk yanaalengilwe mwa tolongo kabakala kuhana kukena busole. Mwa tolongo, naafilwe musebezi wa kubabalela mapantiti bane batamilwe mwa sitokisi banosi, kono naasalumelezwi kuambola ni bona litaba lisili zenesa ami musebezi wo, nihaiba litaba za mwa Bibele. Naalapezi ku Mulimu kuli amutuse kuba ni bundume ni maseme a kukutaza fanaabela ni kolo kaufela. (Lik. 5:29) Utalusa kuli: “Jehova naaalabile litapelo zaka ka kunifa bundume ni butali bwa kukalisa lituto za Bibele za mizuzu yeketalizoho zene nizamaisezanga fa minyako ya litokisi. Mi busihu, neniñolanga mañolo ane nifanga mapantiti bao habusa.” Ni luna lwakona kuba ni buikolwiso bwa kuli Jehova uka lutusa kupeta bukombwa bwaluna. Ka kuswana ni Muzwale Jin-hyuk, lwakona kulapela ku Jehova kuli alufe bundume ni butali.

14. Ki lika mañi zekona kulutusa halukopana ni miinelo yetaata? (Samu 37:3, 5)

¹⁴ Mukupe Jehova kuli amituse kutiyela miinelo yetaata. Buñata bwaluna lutalimana ni miinelo yetaata yecwale ka makulanu, kushwelwa ki mulatiwa waluna, butata bobuñwi mwa lubasi, nyandiso, kamba miinelo yemiñwi yetaata. Mi lika zecwale ka matuku ayambukela ni  lindwa litahisize kuli kube taata hahulu kutiyela miinelo yeo. Mutaluseze Jehova kaufela ze mwa pilu yamina. Mumutaluseze za butata bomukopana ni bona sina feela mone mukaezeza ku mulikanaa mina yomutuna. Mukolwe kuli Jehova ‘uka mitusa.’—Mubale Samu 37:3, 5.

15. Tapelo ikona kulutusa cwañi ‘kuitiisa haluli mwa manyando’? Hamufe mutala.

¹⁵ Kutundamena kulapela kuka lutusa ‘kuitiisa haluli mwa manyando.’ (Maro. 12:12) Jehova waziba zebakopana ni zona batanga bahae mi “uutwa muhuwo wabona wa kuli abatuse.” (Samu 145:18, 19) Kaizeli wa lilimo ze 29 yabizwa Kristie, yali paina, naaiponezi buniti bwa taba yeo. Naakalile kukula hahulu ka sipundumukela. Kabakaleo, alembwala hahulu. Hamulaho wa nako, atalusezwa kuli bo mahe nebakula butuku bobuñwi bone busina kalafo. Bo Kristie batalusa kuli: “Nenilapelanga ku Jehova ka taata kuli anife maata a kutiyela muinelo wo zazi ni zazi. Nenizwezipili kuezanga lika za kwa moya zecwale ka kufumaneha kwa mikopano ni kueza tuto ya ka butu.” Baekeza kubulela kuli: “Tapelo nei nitusize kutiyela butata bo. Kuziba kuli Jehova naali ni na kamita neku niomba-ombile hahulu. Nihaike kuli nenisika fola honafo feela, Jehova naaalabile litapelo zaka ka kunitusa kuba ni kozo ya mwa munahano ni kusaikalelwa.” Haike luzweleñipili kuhupula kuli “Jehova waziba mwakupiliseza batu babasepahala ku yena kubazwisa mwa manyando.”—2 Pit. 2:9.

16. Ki kabakalañi halutokwa kutusiwa ki Jehova kuli lutule miliko?

¹⁶ Mukupe Jehova kuli amituse kutula miliko. Bakeñisa kuli halusika petahala, kamita lutokwa kuikataza luli kuli lutule muliko wa kueza lika zemaswe. Satani ueza mwakonela kaufela kuli alupaleliswe kueza cwalo. Nzila yeñwi yalika ka yona kusinya minahano yaluna ki ka kuitusisa  lika za kuitabisa ka zona zemaswe. Lika za kuitabisa ka zona zeo likona kutahisa kuli lube ni mihupulo yemaswe, ili nto yekona kusilafaza mutu yeluli yena mwahali ni kutahisa kuli lueze sibi sesituna.—Mare. 7:21-23; Jak. 1:14, 15.

17. Lukona kubonisa cwañi kuli lueza sina molulapelezi ku Jehova kuli alutuse kutula miliko? (Mubone ni siswaniso.)

¹⁷ Lutokwa kutusiwa ki Jehova kuli lutule muliko wa kueza lika zemaswe. Mwa tapelo yahae yeli mutala, Jesu naalutile balutiwa bahae kukupa Mulimu kuli: “Ulutuse kusakena mwa muliko, mi ululamulele ku yamaswe.” (Mat. 6:13) Jehova ubata kulutusa, kono lutokwa kumukupa kuli aeze cwalo. Hape luswanela kueza sina molulapelezi. Luswanela kueza molukonela kaufela kuli luambuke lika zekona kutahisa kuli lube ni mihupulo ni mibonelo yefosahezi yetumile mwa lifasi la Satani. (Samu 97:10) Kuli lube ni mihupulo yeminde, luswanela kubalanga Bibele ni kuituta yona. Hape kufumanehanga kwa mikopano ni kukutaza kukona kulutusa kunahana lika zende. Mi Jehova ulusepisa kuli haana kulutuhelela kuli lulikwe ki muliko olusa koni kutiyela.—1 Makor. 10:12, 13.

18. Ka kuya ka zeluitutile ka za tapelo, kaufelaa luna luswanela kuezañi?

¹⁸ Mañi ni mañi waluna uswanela kulapela ku Jehova kuli amutuse kuzwelapili kusepahala ku yena sihulu mwa mazazi ataata a. Mubange ni nako ya kulapela zazi ni zazi. Jehova ubata kuli ‘lumubulelele kaufela ze mwa lipilu zaluna’ halulapela ku yena. (Samu 62:8) Mulumbeke Jehova mi muitumele ku yena kabakala lika kaufela zamiezeza. Mumukupe kuli amituse kuba ni bundume hamukutaza. Mumukupe kuli amituse kutiyela butata bufi kamba bufi ni kutula muliko ufi kamba ufi omukopana ni ona. Musike mwatuhelela nto ifi kamba ifi kamba mutu ufi kamba ufi kumipaleliswa kulapelanga ku Jehova kamita. Kono Jehova ualabanga cwañi litapelo zaluna? Puzo ya butokwa yeo ikaalabiwa mwa taba yetatama.