Nenipepilwe ka silimo sa 1983. Hane nisali mwanana, neniiketile, kono hanito kwanisanga lilimo zelishumi, nakalisa kuutwanga butuku mubili kaufela. Hamulaho wa lilimo zepeli kuzwa fo, zazi leliñwi kakusasana hanizuha, napalelwa kuzamaya. Nenilikile ka taata kunyanganyisa mahutu aka, kono nekupalile bakeñisa kuli nenisina maata. Kuzwa lona lizazi leo, hanisika zamaya hape. Butuku bo, hape butahisize kuli nituhele kuhula. Ni kacenu, nisali yomunyinyani inge mwanana.

Ka nako yene nipotezwi ki basali bababeli bane bali Lipaki za Jehova, nese nikwanisize likweli lisikai nisazwi fa lapa bakeñisa kukula. Hañata, neniipatanga hane kutahanga baenyi fa lapa, kono zazi leo nenisika ipata, mi basali bababeli bao baambola ni na. Hane bakalile kuambola za Paradaisi, nahupula taba yene niutwile hane ninani lilimo zeketalizoho. Ka nako yeo, mulumiwa wa libizo la Jethro, yanaapila kwa Suriname naapotanga mwa munzi waluna hañwi ka kweli, mi naaitutanga Bibele ni bo ndate. Bo Jethro neba nibonisanga sishemo sesituna. Mi neni balata hahulu. Hape, bo kuku nebayanga ni na kwa mikopano yemiñwi ya Lipaki za Jehova yene ezezwanga mwa munzi waluna. Kacwalo, bo Florence, babañwi ba basali bane batilo nipotela kwa ndu yaluna zazi leo, hane banibuzize haiba nenitabela kuziba zeñata ka za Bibele, nalumela.

Fa musipili one utatami, bo Florence bataha ni bakubona bo Justus, mi sibeli sabona bakalisa kuituta Bibele ni na. Hane balemuhile kuli nenisa zibi kubala, baniluta kubala. Hamulaho wa nako, nakalisa kubalanga ninosi. Zazi leliñwi, bo Florence ni bakubona banitaluseza kuli nebakupilwe kuyo sebeleza kwa Suriname. Ka bumai, mwa Orealla nekusina mutu yanaakona kuzwelapili kuituta Bibele ni na. Kono ka litohonolo, Jehova naasika nilibala.

Nakonyana kuzwa fo, bo Floyd, bane bali mapaina, bataha mwa munzi wa Orealla, mi hane banze bakutaza fa ndu ni ndu banifumana. Hane banibuzize ka za haiba nenitabela kuituta Bibele, namenya. Banibuza kuli: “Ki kabakalañi hamumenyize?” Nabataluseza kuli kwamulaho neniitutile broshuwa ya Ki Sifi Seo Mulimu A Tokwa ku Luna? mi nenikalile kuituta buka ya Zibo Ye Isa kwa Bupilo bo Bu Sa Feli. * Nabataluseza libaka tuto yaka hane iyemi. Bo Floyd baituta ni na likauhanyo zenesiyezi mwa buka ya Zibo, kono hasamulaho, ni bona bakupiwa kuyo sebeleza ku sili. Hase baile, nasiyala hape kusina mutu yaituta Bibele ni na.

 Kono ka silimo sa 2004, bo Granville ni bo Joshua, ili bane bali mapaina babaipitezi, nebalumilwe kuto sebeleza mwa Orealla. Nebakutazanga fa ndu ni ndu, mi zazi leliñwi bakopana ni na. Hane banibuzize ka za haiba nenitabela kuituta Bibele, namenya. Nabataluseza kuli luitute buka ya Zibo kukala kwa makalelo. Nenibata kubona haiba nebaka niluta litaba zeswana zene banilutile bane niitutanga ni bona sapili. Bo Granville banitaluseza kuli kunani mikopano yeneeziwanga mwa munzi waluna. Nenibata kuyo fumaneha kwa mikopano yeo nihaike kuli nese nitandile lilimo zelishumi inze nisazwi fa lapa. Bo Granville bataha kwa ndu yaluna mi lwaya hamoho kwa Ndu ya Mubuso inze banikasha mwa sipula sa mawili.

Hamulaho wa nako, Bo Granville banisusueza kuiñolisa mwa Sikolo sa Bukombwa sa Teokratiki. Neba nibulelelanga kuli: “Niha muli lihole, mwakona kubulela. Zazi leliñwi mukafa ngambolo ya nyangela. Mukafa luli.” Manzwi abona asusueza naanitusize kuba ni bundume.

Nakala kukutazanga ni bo Granville. Kono nekuli taata kukasha sipula sa mawili mwa mikwakwa ya mwa munzi waluna, bakeñisa kuli nekunani matulungundu. Nataluseza bo Granville kuli banikashange mwa ngolobani mwa sibaka sa kuitusisa sipula sa mawili. Kueza cwalo neku lutusize hahulu luli. Mwa April 2005, nakolobezwa. Nakonyana kuzwa fo, mizwale baniluta musebezi wa kubabalela libuka ni kutalima za mulumo kwa Ndu ya Mubuso.

Ka bumai, ka silimo sa 2007, bo ndate bawela mwa mezi, mi baholofazwa ki sisepe; hamulaho a mazazi asikai kuzwa fo, batimela. Lubasi lwaluna neluikutwile hahulu bumaswe. Bo Granville balapela ni luna, mi baluomba-omba ka kulubalela mañolo a mwa Bibele. Hamulaho wa lilimo zepeli kuzwa fo, nelukomokisizwe hahulu ki kozi yeñwi yeneezahezi—bo Granville ni bona batimela sisepe sene bali ku sona hane sitibile.

Puteho yaluna yenyinyani, ili yeneli mwa maswabi, neisiyezi kusina muuna-muhulu kwandaa sikombwa sa puteho alimuñwi. Bo Granville neli balikani baka babatuna; kacwalo, neniutwile hahulu butuku kwa pilu habatimela. Neba nitusanga kusutelela ku Jehova, mi neba nifanga lika zeñwi zene nitokwa kwa mubili. Sunda yenetatami kuzwa fobashwela, nafiwa buikalabelo bwa kubala maparagilafu ka nako ya Tuto ya Tawala ya Mulibeleli. Nenikonile feela kubala maparagilafu amabeli, mi nakalisa kulila, miyoko neisweli kusuluha feela. Mi senizwa fa libulelelo.

Mizwale bane bazwa kwa puteho isili hane batile kwa Orealla kuto lutusa, neniikutwile hande. Hape, ofisi ya mutai neilumile Muzwale Kojo, yanaali paina yaipitezi kuto sebeleza kwa sibaka saluna. Nenitabile hahulu bo ma ni munyanaaka wamushimani, hane bakalile kuituta Bibele ni kukolobezwa. Mwa March 2015, neniketilwe kusebeza sina sikombwa sa puteho. Nakonyana kuzwa fo, nafa ngambolo ya nyangela yapili mwa bupilo bwaka. Zazi leo, nenitabile hahulu, kono hape nenilotisize miyoko hane nihupuzi manzwi a Muzwale Granville anaabulezi lilimonyana kwamulaho. Naaize: “Zazi leliñwi mukafa ngambolo ya nyangela. Mukafa luli.”

Tukiso ya JW Broadcasting^® initusize kulemuha kuli kunani Lipaki babañwi babali mwa muinelo oswana ni waka. Kono kusina taba kuli ki lihole, bapila bupilo bobunde mi batabile luli. Ni na kunani lika zenisa kona kueza. Bakeñisa kuli neninani takazo yetuna ya kueza zeñata mwa sebelezo yaka ku Jehova, nakala kusebeza sina paina wa kamita. Mi mwa kweli ya September 2019, nekuezahezi nto yeñwi yetabisa luli mwa bupilo bwaka! Mwa kweli yeo, nenitaluselizwe kuli niketilwe kusebeza sina muuna-muhulu mwa puteho yaluna mone kunani bahasanyi babato ba 40.

Niitumela hahulu kwa mizwale ni likaizeli bane baitutile Bibele ni na, ili baba nitusize kusebeleza Jehova. Mi sa butokwa nikufita kikuli, niitumela hahulu ku Jehova kakuli hasika nilibala.