1-2. Lukona kusebelisa cwañi kelezo yeñozwi kwa Liproverbia 4:25? Mufe mutala.

HALUNYAKISISEÑI miinelo ye. Kaizeli wa musupali uhupula lika zende zanaaikozi kwamulaho. Nihaike kuli ukopana ni miinelo yetaata ka nako ya cwale, uzwelapili kueza mwakonela kaufela mwa sebelezo yahae ku Jehova. (1 Makor. 15:58) Zazi ni zazi, unahanisisanga mokuka bela kwapili muta yena ni balatiwa bahae bakapila hamoho mwa lifasi lelinca lasepisize Mulimu. Kaizeli yomuñwi uhupula kuli Mukreste yomuñwi naamufoselize, kono uikatulela kusaba ni ndimbelela. (Makolo. 3:13) Muzwale yomuñwi uhupula mafosisa anaaezize kwamulaho, kono uikatulela kuli kuzwa cwale, ukazwelapili kusepahala ku Jehova.—Samu 51:10.

² Bakreste babalaalu bao baezize lika mañi zeswana? Kaufelaa bona nebahupuzi zeneezahalile kwamulaho, kono nebasika zwelapili kulinahana. Nebazwezipili ‘kutalimela feela kwapili.’—Mubale Liproverbia 4:25.

3. Ki kabakalañi haluswanela ‘kutalimela feela kwapili’?

³ Ki kabakalañi haluswanela ‘kutalimela feela kwapili’? Sina feela mutu yazwelapili kuitemuna kwamulaho hakona kuzwa mwa nzila yazamaya ku yona, ni luna haiba luzwelapili kunahana lika zeezahalile kwamulaho, haluna kukona kuzwelapili kusebeleza Jehova.—Luka 9:62.

4. Lukanyakisisañi mwa taba ye?

⁴ Mwa taba ye, lukanyakisisa lika zetaalu zekona kutahisa kuli lunahane hahulu lika za kwamulaho. Lika zeo ki: (1) kuikumbuta lika za kwamulaho, (2) kuba ni ndimbelela, ni (3) kuikutwa  hahulu mulatu. Mwa miinelo yeo kaufela, lukanyakisisa likuka za mwa Bibele zekona kulutusa kuli lusike lwaisa hahulu pilu kwa “lika za kwamulaho” kono lueze ka taata kuli lufumane “za kwapili.”—Mafil. 3:13.

5. Liñolo la Muekelesia 7:10 lilususueza kuambukañi?

⁵ Mubale Muekelesia 7:10. Mulemuhe kuli liñolo leo halibonisi kuli kufosahalile kubuza kuli: “Kiñi mazazi a kwamulaho hanaali amande?” Jehova ulufile buikoneli bwa kuhupula zeezahalile kwamulaho. Kono liñolo leo, libulela kuli: “Usike wali: ‘Kiñi mazazi a kwamulaho hanaali amande kufita mazazi a?’” Kacwalo, luswanela kutokomela kuli halubapanyi mone lupilela bupilo kwamulaho ni mose lupilela kacenu, ni kunahana kuli lika kaufela kacenu limaswe hahulu. Liñolo leo libala cwana mwa toloko yeñwi ya Bibele: “Usike wabuza wali: ‘Mawe, ki kabakalañi lika hane lili zende kwa kale?’ Haki puzo yangana yeo.”

6. Ki kabakalañi halusa swaneli kunahananga kuli bupilo kwamulaho nebuli bobunde hahulu kufita bwa kacenu? Mufe mutala.

⁶ Ki kabakalañi halusa swaneli kunahananga kuli bupilo kwamulaho nebuli bobunde hahulu kufita kacenu? Kuikumbuta lika za kwamulaho kukona kutahisa kuli luhupulange feela lika zende za kwamulaho. Mi mwendi lwakona kulibala miinelo yetaata yene lukopani ni yona. Halunyakisiseñi mutala wa Maisilaele ba kwamulaho. Hamulaho wa kulukululwa mwa Egepita, neba libezi kapili manyando ane bakopani ni ona. Kono nebahupuzi lico zende zene baikolanga. Nebaize: “Luhupula litapi zene lucanga mwa Egepita lusa lileki, hamohocwalo ni bo kyukamba, mahapu, liki, nyanisi, ni galiki!” (Num. 11:5) Kono kana ki niti luli kuli nebacanga lico zeo ‘basa lileki’? Batili. Maisilaele nebanyandisizwe maswe; ka nako yene bali mwa Egepita, Maegepita neba babelekisa ka taata sina batanga. (Exo. 1:13, 14; 3:6-9) Kono hasamulaho, balibala manyando ao kaufela mi bakala kuikumbuta lico zene bacanga kwamulaho. Nebaikumbutile mazazi a  kwamulaho kufita kuitebuha lika zende zanaa baezelize Jehova. Jehova naasika tabiswa ki moya one babonisize.—Num. 11:10.

7. Ki lika mañi zenetusize kaizeli yomuñwi kusaikumbuta lika za kwamulaho?

⁷ Ki lika mañi zeka lutusa kusaikumbuta lika za kwamulaho? Halunyakisiseñi mutala wa kaizeli yanaakalile kusebeleza fa Betele ya kwa Brooklyn ka 1945. Hamulaho wa nako, kaizeli yo anyalwa ku muzwale yanaasebeleza fa Betele, mi bazwelapili kusebeleza hamoho fa Betele ka lilimo zeñata. Kono ka 1976, muunaa hae akala kukula. Kaizeli yo naatalusize kuli muunaa hae hanaalemuhile kuli naatuha ashwa, naamufile kelezo yende yeneka mutusa hasaashwile. Muunaa hae naamubulelezi kuli: “Lu bile ni linyalo la tabo. Ku ba bañata ha ku bangi cwalo.” Muzwale yo hape naamubulelezi kuli: “U si ke wa zwelapili ku nahana za kwamulaho—nihaike mihupulo ya zona i ka zwelapili. Nako i ka ku tusa ku libala za teñi. U si ke wa filikana ni ku ishwela makeke. U be ya tabile kuli u bile ni limbuyoti ni tabo ye. . . . Mihupulo ya za kwamulaho ki mpo ye zwa ku Mulimu.” Kaniti, yeo neli kelezo yende luli!

8. Kaizeli yomuñwi naatusizwe cwañi kabakala kusanahana hahulu lika za kwamulaho?

⁸ Kaizeli yo naasebelisize kelezo yeo. Naasebelelize Jehova ka busepahali kuisa lizazi latimela inzaa nani lilimo ze 92. Lilimo lisikai pili asika timela kale, naabulezi kuli: “Ha ni iheta lilimo ze 63 za sebelezo ya ka nako kaufela ku Jehova, ni kona ku bulela kuli bupilo bwa ka bu bile bo bunde.” Kabakalañi? Naabulezi kuli: “Se si tahisa luli kuli bupilo bu be bo bunde ki sizwale sa luna se sinde ni sepo ya ku pila ni mizwale ni likaizeli ba luna mwa paradaisi fa lifasi, inze lu sebeleza Mubupi wa luna yo Mutuna, yena Mulimu a nosi wa niti, Jehova, ku ya ku ile.” * Kaniti luli, kaizeli yo ki mutala omunde wa mutu yanaatalimisize meeto ahae kwa lika za kwapili!

9. Sina mokutaluselizwe kwa Livitike 19:18, ki nto mañi yekona kutahisa kuli kulubele taata kuswalela baba lufoselize?

⁹ Mubale Livitike 19:18. Fokuñwi, kulubelanga taata kuswalela mutu yalufoselize, sihulu haiba mutu yo ki muzwale kamba kaizeli mwa puteho, ki mulikanaa luna yomutuna, kamba ki wahabo luna. Ka mutala, kaizeli yomuñwi naatamilwe taba ki Mukreste yomuñwi ya kuli naamuuzwelize masheleñi. Hasamulaho, Mukreste yo alemuha kuli nekusi cwalo mi aikupela swalelo, kono kaizeli yanaatamilwe taba ya buhata yo naazwezipili kuba ni ndimbelela. Kana ni mina mukile mwaikutwa cwalo nako yeñwi? Buñata bwaluna niha lusika kopana kale ni muinelo ocwalo, mwendi lukile lwaikutwa kuli haluna kuswalela mutu yomuñwi yalufoselize.

10. Lukona kufelisa cwañi ndimbelela?

¹⁰ Lukona kufelisa cwañi ndimbelela? Luswanela kuhupula kuli Jehova ubona lika kaufela. Waziba lika kaufela zelukopana ni zona, mi walemuhanga ni haluezwa maswe. (Maheb. 4:13) Uikutwanga bumaswe haalubona inze lunyanda. (Isa. 63:9) Mi usepisa kuli kwapili, ukafelisa bumaswe kaufela bolukopana ni bona.—Sin. 21:3, 4.

11. Lutusiwa cwañi haiba lutuhela kuba ni ndimbelela?

¹¹ Hape, luswanela kuhupula kuli haiba lutuhela kuba ni ndimbelela, lukatuseha. Kaizeli yanaatamelelizwe taba ya buhata naalemuhile cwalo hasamulaho. Hamulaho wa nako, atuhela kuba ni ndimbelela. Naalemuhile kuli haiba luswalela babañwi, Jehova ni yena uka luswalela. (Mat. 6:14) Naaziba kuli zanaaezize ku yena kaizeli yomuñwi nelisika luka, kono aikatulela kusaba ni ndimbelela. Kabakaleo, kaizeli yo naabile ni tabo mi naazwezipili kuisa pilu kwa sebelezo yahae ku Jehova.

12. Liñolo la 1 Joani 3:19, 20 lilulutañi?

¹² Mubale 1 Joani 3:19, 20. Fokuñwi, kaufelaa luna lwaikutwanga mulatu. Ka mutala, babañwi baikutwanga mulatu kabakala lika zene baezize kwamulaho basika ituta kale niti. Babañwi bona baikutwanga mulatu bakeñisa mafosisa ane baezize hamulaho wa kukolobezwa. Kaufelaa luna lukile lwaikutwa cwalo. (Maro. 3:23) Ki niti kuli lubata kueza zelukile. Kono “kaufelaa luna lwasitatalanga hañata.” (Jak. 3:2; Maro. 7:21-23) Nihaike kuli halutabelangi kuikutwa mulatu, kuikutwa cwalo kwakona kulutusa. Kabakalañi? Kakuli haiba luikutwa mulatu, lukabata kueza licinceho mwa bupilo bwaluna, mi lukaeza molukonela kaufela kusakutela mafosisa aswana.—Maheb. 12:12, 13.

13. Ki kabakalañi haluswanela kutokomela kuli haluikutwi hahulu mulatu?

¹³ Kono hape, lwakona kuzwelapili kuikutwa hahulu mulatu kusina taba kuli lubakezi kale libi zaluna mi Jehova uluswalezi. Kuikutwa hahulu mulatu cwalo kukona kulutahiseza butata. (Samu 31:10; 38:3, 4) Ka mukwa ufi? Halunyakisiseñi mutala wa kaizeli yomuñwi yanaazwezipili kuikutwa mulatu kabakala sibi sanaaezize kwamulaho. Naabulezi kuli: “Ne ni ikutwile kuli ne ni ka eza hande ha ne ni ka tuhela ku ikataza mwa sebelezo [yaka ku Jehova] kakuli mwendi ha ku sa na ze nde ku na.” Babañata ku luna mwendi lukile lwaikutwa cwalo. Kacwalo, luswanela kutokomela kuli haluikutwi hahulu mulatu. Muhupule kuli haiba lutuhela kusebeleza Jehova, lukatabisa Satani, kono Jehova yena mwendi uluswalezi kale.—Mubapanye 2 Makorinte 2:5-7, 11.

14. Lukona kuziba cwañi kuli Jehova watabela kuluswalela?

¹⁴ Kono mwendi lukona kuipuza kuli: ‘Nikona kuziba cwañi kuli Jehova watabela kuniswalela?’ Haiba luipuza puzo yeo, lubonisa  kuli lwaziba kuli Jehova wakona kuluswalela. Lilimo zeñata kwamulaho, magazini ya Tawala ya Mulibeleli neibulezi kuli: “Niha selutuhezi mukwa waluna omaswe, fokuñwi lwakona kusitatala ni kuwa hañata-ñata bakeñisa kuli nese luhapilwe hahulu ki mukwa wo. . . . Musike mwazwafa. Musike mwanahana kuli muezize sibi sesisa koni kuswalelwa. Satani ubata kuli munahane cwalo. Taba ya kuli muikutwanga bumaswe hamueza mafosisa aswana mi mwainyazanga luli, ibonisa kuli hamu batu babamaswe mi Jehova wakona kumiswalela. Muzwelepili kuikokobeza ni kukupa Mulimu kuli amiswalele, kumitusa kuli mube ni lizwalo lelinde hape. Muye ku yena sina mwana mwayelanga ku ndatahe hali mwa butata, kusina taba kuli seli hakai inze mumukupa kuli amituse fa bufokoli bobuswana, mi Jehova uka mitusa kabakala sishemo sahae sesituna.”

15-16. Batu babañwi baikutwile cwañi hane bazibile kuli Jehova wakona kubaswalela?

¹⁵ Batanga ba Jehova babañata baikutwile kuomba-ombiwa kabakala kuziba kuli Jehova wakona kubaswalela. Ka mutala, lilimo-limo kwamulaho, muzwale yomuñwi naasusuelizwe hahulu ki taba yeñwi yanaabalile kwa litaba zeli, “Bibele Yacincanga Bupilo Bwa Batu.” Mwa taba yeo, kaizeli yomuñwi naaitumelezi kuli bakeñisa lika zemaswe zanaaezize kwamulaho, neku mubezi taata kulumela kuli Jehova naakona kumulata. Mi naaikutwile cwalo niha sekufitile lilimo zeñata kuzwa fakolobelezwa. Kono kunahanisisa za tiululo, neku mutusize kulumela kuli Jehova naamulata. *

¹⁶ Likande la kaizeli yo nelitusize cwañi muzwale yo? Naañozi kuli: “Hane nisali mwanana, nenibuhanga maswaniso a mapunu, mi nenifumana taata kutuhela mukwa wo. Cwanoñu fa nenikutezi kubuha maswaniso a mapunu hape. Nenikupile baana-bahulu mwa puteho kunitusa, mi nisweli kueza monikonela kaufela kutula butata bo. Baana-bahulu banitusize kulemuha kuli Mulimu usa nilata mi ubata kunitusa. Kono fokuñwi nisaikutwanga kuli hanina tuso, mi Jehova haakoni feela kunilata. Kubala likande la kaizeli yo neku nitusize luli. Mi cwale seniutwisisa kuli haiba niikutwa kuli Mulimu haakoni kuniswalela, fo nitalusa  kuli sitabelo sa Mwanaa hae hasikoni kukwahela libi zaka. Nikumuzi makepe fokufumaneha taba ya kaizeli yo ilikuli nikone kubalanga ni kunahanisisa litaba zefumaneha fateñi nako kaufela haniikutwa kuli hani wa butokwa.”

17. Ki nto mañi yenetusize muapositola Paulusi kusaikutwa hahulu mulatu?

¹⁷ Litaba zecwalo liluhupulisa likande la muapositola Paulusi. Pili asikaba kale Mukreste, naaezize lika zemaswe hahulu. Paulusi naahupuzi lika zanaaezize, kono naasika zwelapili kunahana zateñi. (1 Tim. 1:12-15) Naalumela kuli sitabelo sa tiululo neli mpo yanaafile Mulimu ku yena kasibili. (Magal. 2:20) Kacwalo, Paulusi naasika zwelapili kuikutwa hahulu mulatu, kono naaikatulezi kusebeleza Jehova mwanaakonela kaufela.

18. Luitutileñi mwa taba ye?

¹⁸ Luitutileñi mwa taba ye ka za kuhupula za kwamulaho? (1) Jehova ulufile buikoneli bwa kuhupula lika zende zeneezahezi kwamulaho; kono kusina taba kuli bupilo bwaluna neli bobunde cwañi kwamulaho, bupilo kwapili bukaba bobunde hahulu nikufita mwa lifasi lelinca. (2) Batu babañwi bakona kulufoseza, kono haiba lubaswalela, lukakona kuzwelapili kusebeleza Jehova. (3) Kuikutwa hahulu mulatu kukona kutahisa kuli lusike lwasebeleza Jehova ka tabo. Kacwalo, sina Paulusi luswanela kukolwa kuli Jehova uluswalezi.

19. Luziba cwañi kuli mwa lifasi lelinca haluna kuhupulanga lika za kwamulaho zekatahisa kuli luikutwe bumaswe?

¹⁹ Lunani sepo ya kupila kuya kuile. Mwa lifasi lelinca laka lulukiseza Mulimu, haluna kuhupulanga lika za kwamulaho zekatahisa kuli luikutwe bumaswe. Bibele ibulela cwana ka za nako ya kwapili yeo: “Lika zakale halisana kuhupulwa.” (Isa. 65:17) Munahane feela taba ye: Babañwi ku luna lusebelelize Jehova kuzwa feela kwa bwanana bwaluna, kono cwale selusupezi; mwa lifasi lelinca lukakutela kwa bunca hape. (Jobo 33:25) Kacwalo, haike luikatulele kusanahananga hahulu lika za kwamulaho. Kono lutalimele kwapili ni kueza molukonela kaufela kuli luyo kena mwa lifasi lelinca.