1. Ka kuya ka liñolo la Mateu 28:18-20, ki taelo mañi yanaafile Jesu?

JESU hasaazusizwe kwa bafu, naabonahezi kwa balutiwa bahae bane bakopanezi mwa Galilea. Naabata kubabulelela taba yeñwi ya butokwa. Ki taba mañi ona yeo? Zanaabulezi lifumaneha kwa Mateu 28:18-20.—Mubale.

2. Ki lipuzo mañi zeluka nyakisisa?

² Batanga ba Mulimu kacenu ni bona baswanela kumamela taelo yanaafile Jesu ya kuluta batu kuba balutiwa. Kacwalo, halunyakisiseñi lipuzo zetaalu zeama taelo yalufile Jesu. Sapili, kwandaa kuluta balutiwa babanca zabata Mulimu kuli baeze, ki lika mañi zeñwi zeluswanela kubaluta? Sabubeli, bahasanyi kaufela mwa puteho bakona kutusa cwañi baituti ba Bibele kueza zwelopili ya kwa moya? Sabulaalu, lukona kutusa cwañi bahasanyi babafokozi kuli ni bona bakale kueza musebezi one baezanga wa kuluta batu kuba balutiwa?

3. Ki taba mañi yenongile yanaabulezi Jesu hanaafa taelo yahae?

³ Litaelo za Jesu zautwahala. Luswanela kuluta batu lika zanaalaezi. Nihakulicwalo, haluswaneli kulibala sisupo sesiñwi sa butokwa sanaabulezi. Mulemuhe kuli Jesu naasika bulela kuli: ‘Mubalute lika kaufela zeni milaezi.’ Kono naabulezi kuli: “Mubalute kumamela lika kaufela zeni milaezi.” Kuli lumamele taelo yenongile yeo, luswanela kuluta batu boluituta ni bona Bibele kuziba zebaswanela kueza, ni kubabonisa mobakona  kuezeza cwalo. (Lik. 8:31) Ki kabakalañi haluswanela kueza cwalo?

4. Mufe mutala obonisa molukona kutuseza baituti baluna ba Bibele kumamela taelo ya Kreste.

⁴ Kuli luzibe molukona kulutela mutu kumamela lika zanaalaezi Kreste, halunyakisiseñi mutala wo. Luungeñi kuli mutu yomuñwi yalutanga batu kuzamaisa mota ubata kuluta baituti bahae kumamela milao ya fa mukwakwa. Muluti wakona kuluta baituti bahae litaelo za fa mukwakwa habali mwa kilasi. Kono kuli alute baituti bahae mwakumamelela milao yeo, kunani nto yeñwi yaswanela kueza. Uswanela kuya ni baituti bahae ni kubaetelela habanze bazamaisa luli fa mukwakwa ni habanze basebelisa zebaitutile. Luitutañi kwa mutala wo?

5. (a) Ka kuya ka liñolo la Joani 14:15 ni la 1 Joani 2:3, luswanela kuluta baituti baluna ba Bibele kuezañi? (b) Mufe mutala obonisa molukona kutuseza baituti baluna kusebelisa likuka za mwa Bibele.

⁵ Haluituta Bibele ni batu, lubaluta zabata Mulimu kuli baeze. Kono kunani lika zeñwi zeluswanela kueza. Luswanela kuluta baituti baluna ba Bibele kusebelisa zebaituta mwa bupilo bwabona. (Mubale Joani 14:15; 1 Joani 2:3.) Ka lika zelueza, lwakona kutusa baituti baluna ba Bibele kusebelisa likuka za mwa Bibele habali kwa sikolo, kwa musebezi, kamba habaitabisa. Lwakona kubataluseza taba yeñwi yeneezahezi mwa bupilo bwaluna kuli lubatuse kubona mo kusebelisa likuka za mwa Bibele neku lusilelelize kwa likozi kamba mone kulutuselize kueza likatulo zende. Haluli ni baituti baluna ba Bibele, lwakona kulapela ku Jehova kuli abafe moya okenile kuli ubaetelele.—Joa. 16:13.

6. Kuluta batu kumamela litaelo za Jesu kuamañi?

⁶ Kuluta batu kumamela litaelo za Jesu kuamañi? Luswanela kutusa baituti baluna ba Bibele kulata musebezi wa kuluta batu kuba balutiwa. Baituti ba Bibele babañwi bakona kusaba kueza musebezi wa kukutaza. Kacwalo, luswanela kuba ni pilu-telele halunze lubatusa kuutwisisa niti ya mwa Bibele ilikuli bakone kuba ni tumelo yetiile, mi lika zebaituta hase libafitile kwa pilu, bakaanga muhato wa kukutaza. Ki lika mañi zeluswanela kueza kuli lutuse baituti ba Bibele kulata kukutaza taba yende ku babañwi?

7. Lukona kutusa cwañi muituti kulata kukutaza taba yende ku babañwi?

⁷ Lukona kubuza baituti baluna ba Bibele lipuzo zelatelela: “Kusebelisa zeiluta Bibele kumitusize cwañi mwa bupilo? Kana muikutwa kuli babañwi batokwa kuutwa lushango lo? Mukona kuezañi kuli mubatuse?” (Liprov. 3:27; Mat. 9:37, 38) Mubonise muituti matrakiti afumaneha mwa Lihatiso Zeluitusisanga Kwa Kuluta Batu, mi mumukupe kuli akete fateñi abona kuli bahabo yena, balikani kamba babeleka ni bona baka atabela. Mufe muituti wamina matrakiti asikai kwa matrakiti aketile. Mumubonise mwakona kufela matrakiti ao ku babañwi ka maseme. Niteñi, muituti waluna hasaabile muhasanyi yasika kolobezwa, lutokwa kukutaza ni yena kuli lumutuse.—Muek. 4:9, 10; Luka 6:40.

8. Ki kabakalañi baituti baluna habaswanela kulata hahulu Mulimu ni batu? (Mubone ni mbokisi yeli, “ Molukona Kutuseza Baituti Baluna Kutiisa Lilato Labona ku Mulimu.”)

⁸ Muhupule kuli Jesu naalulaezi kuli lulute batu “kumamela lika kaufela” zalulaezi. Lika zeo likopanyeleza litaelo zepeli zetuna ka kufitisisa, ili kulata Mulimu ni kulata babañwi, mi kumamela litaelo zeo kwalutusa mwa musebezi wa kukutaza ni kuluta  batu kuba balutiwa. (Mat. 22:37-39) Kulutusa cwañi? Libaka lelituna halueza musebezi wa kukutaza kikuli lwalata Mulimu ni batu. Ki niti kuli baituti ba Bibele babañwi bakona kusaba kueza musebezi wa kukutaza. Kono lwakona kutiisa baituti baluna ka kubataluseza kuli Jehova uka batusa mi hamulaho wa nako, bakatuhela kusaba batu. (Samu 18:1-3; Liprov. 29:25) Mbokisi yezamaelela ni taba ye, ibonisa lika zeluswanela kueza kuli lutuse muituti waluna kulata hahulu Mulimu. Kono ki lika mañi zebaswanela kueza mizwale ni likaizeli mwa puteho kuli batuse balutiwa babanca kuzwelapili kubonisa lilato?

9. Mwa swanisezo ya mutu yaituta kuzamaisa mota, muituti uituta cwañi lituto za butokwa?

⁹ Hape halunyakisiseñi mutala wa mutu yaituta kuzamaisa mota. Hanzaa zamaisa mota inzaa li ni muluti wahae kwatuko, muituti uituta cwañi? Uituta ka kuteeleza ku muluti wahae ni kulemuha zebaeza bazamaisi babañwi ba limota babazamaisa hande. Ka mutala, muluti ukona kusupeza muituti muzamaisi yafa yomuñwi sibaka sa kufita kwapilaa hae. Kamba ukona kusupeza muituti muzamaisi wa mota yafukuza kwa liseli la malaiti a mota yahae kuli asike afata bazamaisi babañwi. Mitala yecwalo iluta muituti lituto za butokwa zakona kuitusisa hali fa mukwakwa.

10. Ki nto mañi yekona kutusa muituti wa Bibele kueza zwelopili ya kwa moya?

¹⁰ Ka mukwa oswana, muituti wa Bibele hakala kusebeleza Jehova, haituti feela ku muluti wahae kono hape uituta ni kwa mitala yeminde ya batanga ba Jehova babañwi. Kacwalo, ki nto mañi yekona kutusa hahulu baituti ba Bibele kueza zwelopili ya kwa moya? Ki kufumaneha kwa mikopano yaluna ya puteho. Kabakalañi? Kabakala kuli litaba za mwa Mañolo zebaka ituta kwa mikopano likona kubatusa kuekeza kwa zibo yabona, kutiisa tumelo yabona, ni kubatusa kutiisa lilato labona ku Mulimu. (Lik. 15:30-32) Kuzwa fo, habali kwa mikopano, bahasanyi bakona kuzibahaza muituti wabona kwa mizwale ni likaizeli ba mwa puteho babakile bakopana ni miinelo yeswana ni yakopana ni yona. Mwa puteho, muituti wakona kulemuha mitala ya mizwale ni likaizeli bababonisana lilato.

11. Ki mitala yecwañi yakona kulemuha muituti wa Bibele mwa puteho, mi mitala yeo ikona kumutusa cwañi?

¹¹ Halunyakisiseñi miinelo yelatelela. Muituti wa Bibele yali mushemi wa likwasha ulemuha kaizeli yakopana ni miinelo yeswana ni yakopana ni yona. Muituti ususuezwa hahulu kubona kaizeli yo yalika mwakonela kaufela kufumaneha kwa Ndu ya Mubuso ni bana bahae babanyinyani. Muituti yalika ka taata kutuhela kuzuba kwai uzibana ni muhasanyi yanaakopani ni muinelo oswana kono ili yanaakonile kutuhela kuzuba kwai. Muhasanyi utaluseza muituti yo mo kutiisa lilato lahae ku Jehova neku mutuselize kumamela milao ya Mulimu. (2 Makor. 7:1; Mafil. 4:13) Muhasanyi yo hasafelize kutaluseza muituti mwanaatuhelezi kuzuba kwai, umubulelela kuli: “Ni mina mwakona kutuhela kuzuba kwai.” Muituti ususuezwa hahulu kuutwa cwalo mi uba ni buikolwiso bwa kuli ni yena wakona kutuhela kuzuba kwai. Musizana yaituta Bibele ulemuha kaizeli wa mukulwani yanani tabo yetuna kabakala kuba Paki. Muituti wa Bibele halemuha tabo yanani yona kaizeli wa mukulwani yo, ubata kuziba zemutusize kuba ni tabo.

12. Ki kabakalañi halukona kubulela kuli mañi ni mañi mwa puteho wakona kutusa baituti ba Bibele kueza zwelopili ya kwa moya?

¹² Baituti ba Bibele habazibana ni mizwale ni likaizeli babashutana-shutana, ili  babasepahala, bakaituta kwa mutala wabona sekutalusa kumamela taelo ya Kreste ya kulata Mulimu ni batu. (Joa. 13:35; 1 Tim. 4:12) Kuzwa fo, sina mose lunyakisiselize, muituti wa Bible wakona kuituta kwa bahasanyi babakopana ni miinelo yeswana ni yakopana ni yona. Mitala ya bahasanyi bao yakona kutusa muituti yo kulemuha kuli ni yena wakona kueza licinceho zeka mutusa kuba mulutiwa wa Kreste. (Deut. 30:11) Mañi ni mañi mwa puteho wakona kutusa baituti ba Bibele mwa linzila zeshutana-shutana kuli baeze zwelopili ya kwa moya. (Mat. 5:16) Muezanga buikatazo mañi kuli mususueze muituti wa Bibele yatahanga kwa mikopano?

13-14. Jesu naaezize cwañi baapositola bahae hane bafokozi?

¹³ Luswanela kutusa mizwale ni likaizeli baluna babafokozi kuli bakale kueza musebezi one baezanga wa kuluta batu kuba balutiwa. Zanaaezize Jesu baapositola bahae hane bafokozi lilutusa kuziba zeluswanela kueza ni luna kacenu.

¹⁴ Kwa mafelelezo a bukombwa bwa Jesu bwa fa lifasi, hanaatuha abulaiwa, baapositola bahae “kaufelaa bamuyubeka ni kubaleha.” (Mare. 14:50; Joa. 16:32) Jesu naaezize cwañi baapositola bahae hane bafokozi ka nako yeo? Nakonyana kuzwa fazusezwa kwa bafu, Jesu naabulelezi balutiwa bahae babañwi kuli: “Musike mwasaba! Hamuye, muyo zibisa banyani baka [kuli nizusizwe kwa bafu].” (Mat. 28:10a) Jesu naasika yubeka baapositola bahae. Nihaike kuli neba muyubekile, Jesu naasa babiza kuli “banyani baka.” Sina Jehova, Jesu naabashwezi makeke mi naabaswalezi.—2 Mal. 13:23.

15. Luswanela kuunga cwañi mizwale ni likaizeli babatuhezi kueza musebezi wa kukutaza?

¹⁵ Ka mukwa oswana, ni luna luswanela kubonisa kuli lwaisa hahulu pilu mizwale ni likaizeli babatuhezi kukutaza. Ki mizwale ni likaizeli baluna, mi lwabalata! Lusahupula lika kaufela zene baezize mwa sebelezo yabona ku Mulimu, babañwi ku bona mwendi neba musebelelize ka nako yetelele. (Maheb. 6:10) Kaniti, lwabatonda luli! (Luka 15:4-7) Ka kulikanyisa Jesu, lukona kubonisa cwañi kuli lwabaisa pilu?

16. Lukona kubonisa cwañi kuli lwaisa pilu mizwale ni likaizeli baluna babafokozi?

¹⁶ Ka lilato, mubameme kutaha kwa mikopano. Nzila yeñwi yeo Jesu naasusuelize ka yona baapositola bahae bane bafokozi, neli ka kubamemela kwa mukopano. (Mat. 28:10b; 1 Makor. 15:6) Ni luna kacenu lwakona kususueza bahasanyi babafokozi kufumaneha kwa mikopano. Lwaziba kuli mwendi lukatokwa kukuta-kutela kubamema pili basika taha kale kwa mikopano. Kusina kukakanya, Jesu naatabile hahulu balutiwa bahae hane baamuhezi memo yahae.—Mubapanye Mateu 28:16 ni Luka 15:6.

17. Luswanela kuezañi haiba muhasanyi yafokozi ataha kwa mikopano?

¹⁷ Mubaamuhele ka lilato. Jesu naaamuhezi hande balutiwa bahae hane bakopani ni yena; naangile muhato wa kuambola ni bona. (Mat. 28:18) Lukaeza cwañi haiba muhasanyi yafokozi ataha kwa Ndu ya Mubuso? Luswanela kumuatumela ni kumuamuhela ka lilato. Kwa makalelo, mwendi lukona kuikalelwa kuli haluzibi zeluka bulela. Kufita kutahisa kuli aikutwe maswabi, lwakona kumutaluseza kuli lutabile hahulu kumubona.

18. Lukona kutiisa cwañi bahasanyi babafokozi?

¹⁸ Mubasusueze kuzwelela kwatasaa pilu. Balutiwa ba Jesu mwendi nebaikutwile kuli  habana kukona kueza musebezi wa kukutaza mwa lifasi kaufela. Jesu naabasusuelize ka kubabulelela kuli: “Niinzi ni mina mazazi kaufela.” (Mat. 28:20) Kana kueza cwalo neku batusize? Eni. Nakonyana kuzwa fo, nebapatehile “kuluta batu ni kushaela taba yende.” (Lik. 5:42) Bahasanyi babafokozi ni bona baswanela kutiiswa. Bakona kukala kukutaza hape. Lwakona kubatiisa ka kubataluseza kuli habana kukutazanga banosi. Habaka bata kuya mwa bukombwa, lwakona kulukisa kusebeza ni bona. Kusina kukakanya, bakaitebuha tuso yelu bafa habanze bakutaza taba yende hape. Haluunga bahasanyi babafokozi kuli isali mizwale baluna, bakona kukala kuswalisana ni puteho hape.

19. Ki nto mañi yelutabela kueza, mi ki kabakalañi?

¹⁹ Lukazwelapili kueza musebezi wa kuluta batu kuba balutiwa kuisa lili? Lukaeza cwalo kuisa nako ya kufela kwa lifasi. (Mat. 28:20; mubone Litaluso za Manzwi Aitusisizwe Mwa Bibele, “Nako ya kufela kwa lifasi.”) Kana lukakona kukutaza ni kuluta batu kuba balutiwa kuisa nako yeo? Luikatulezi kueza cwalo! Lutabela kuitusisa nako yaluna, maata aluna, ni maluo aluna kuli lufumane “ba lipilu zende bababata bupilo bobusa feli.” (Lik. 13:48) Halueza cwalo, lulikanyisa mutala wa Jesu. Naabulezi kuli: “Sico saka ki kueza tato ya yena yanilumile ni kufeleleza musebezi wahae.” (Joa. 4:34; 17:4) Ni luna ki mona moluikutwela cwalo. Lubata kufeza musebezi olufilwe. (Joa. 20:21) Mi lubata kutusa babañwi, kukopanyeleza cwalo ni babafokozi, kuli bazwelepili kueza musebezi wo hamoho ni luna.—Mat. 24:13.

20. Ka kuya ka liñolo Mafilipi 4:13, ki kabakalañi halukona kukondisa mwa musebezi walufile Jesu?

²⁰ Ki niti kuli kumamela taelo ya Jesu ya kuluta batu kuba balutiwa haki nto yebunolo. Nihakulicwalo, haluezi musebezi wo lunosi. Jesu naasepisize kuli ukaba ni luna. Lueza musebezi wa kuluta batu kuba balutiwa ka ‘kusebeza hamoho ni Mulimu’ ni “ka kuswalisana ni Kreste.” (1 Makor. 3:9; 2 Makor. 2:17) Kacwalo, lwakona kukondisa mwa musebezi wo. Kaniti luli, lunani tohonolo yetuna ya kueza musebezi wo ni kutusa babañwi kuueza.—Mubale Mafilipi 4:13.