TABA YA KUITUTA 45
Mwalutuseza Jehova Kupeta Bukombwa Bwaluna
“Bakaziba luli kuli nekubanga ni mupolofita mwahalaa bona.”—EZEK. 2:5.
PINA 67 ‘Mukutaze Linzwi’
ZELUKA ITUTA a
1. Ki lika mañi zeluziba, mi ki buikolwiso mañi bolunani bona?
LWAZIBA kuli lukalwaniswa halunze lupeta musebezi waluna wa kukutaza. Mane mwendi kwapili lukalwaniswa hahulu nikufita. (Dan. 11:44; 2 Tim. 3:12; Sin. 16:21) Nihakulicwalo, lwakona kuba ni buikolwiso bwa kuli Jehova uka lutusa. Kabakalañi? Kuzwa feela kwamulaho, Jehova utusize batanga bahae kupeta misebezi yanaa bafile kusina taba kuli misebezi yeo neli yetaata. Ka mutala, halunyakisiseñi lika zeñwi zeneezahezi mwa bupilo bwa mupolofita Ezekiele yanaakutalize kwa Majuda bane bali mwa buhapiwa mwa Babilona.
2. Jehova naatalusize cwañi batu banaaka kutaza ku bona Ezekiele, mi lukanyakisisañi mwa taba ye? (Ezekiele 2:3-6)
2 Ki batu babacwañi banaaka kutaza ku bona Ezekiele? Jehova ubatalusa kuli neli batu “babasa utwi,” “ba lipilu zetaata,” ni “bakwenuheli.” Batu bao nebakona kutahisa kozi sina miutwa mi nebasabisa sina tubanze. Ki lona libaka Jehova hanaakuta-kutezi kubulelela Ezekiele kuli: “Usike wasaba”! (Mubale Ezekiele 2:3-6.) Ezekiele naakonile kupeta musebezi wahae wa kukutaza kabakala kuli (1) naalumilwe ki Jehova, (2) naatusizwe ki moya wa Mulimu, ni (3) naatiisizwe ki manzwi a Mulimu. Lika zetaalu zeo nelitusize cwañi Ezekiele? Mi lilutusa cwañi kacenu?
EZEKIELE NAALUMILWE KI JEHOVA
3. Ki manzwi afi alukela kuba anaatiisize Ezekiele, mi Jehova naamukolwisize cwañi kuli naaka mutusa?
3 Jehova naabulelezi Ezekiele kuli: ‘Nakuluma.’ (Ezek. 2:3, 4) Manzwi ao alukela kuba anaatiisize Ezekiele. Ka mukwa ufi? Kubonahala kuli Ezekiele naahupuzi kuli Jehova naaitusisize manzwi aswana ni ao hanaaketile Mushe ni Isaya kuba bapolofita bahae. (Exo. 3:10; Isa. 6:8) Ezekiele hape naaziba mo Jehova naatuselize bapolofita bababeli bao kupeta musebezi wanaa bafile niha nekuli taata kueza cwalo. Kacwalo, Jehova hanaabulelezi Ezekiele habeli kuli: ‘Nakuluma,’ mupolofita yo naanani buikolwiso bwa kuli Jehova naaka mutusa. Kuzwa fo, mwa buka ya Ezekiele manzwi a kuli: “Linzwi la Jehova lataha ku na,” afumaneha hañata-ñata. (Ezek. 3:16) Manzwi ali: “Linzwi la Jehova hape lataha ku na” ni ona akutakutezwi. (Ezek. 6:1) Kaniti, Ezekiele naakozwi kuli naalumilwe ki Jehova. Hape ka kuba mwanaa muprisita, Ezekiele mwendi naalutilwe ki ndatahe mo Jehova kuzwa feela kwamulaho, naakolwiselize bapolofita bahae kuli naaka batusa. Jehova naataluselize Isaka, Jakobo, ni Jeremia manzwi a kuli: “Niinzi ni wena.”—Gen. 26:24; 28:15; Jer. 1:8.
4. Ki manzwi afi aomba-omba alukela kuba anaatiisize Ezekiele?
4 Buñata bwa Maisilaele nebaka anga cwañi lushango lwanaaka kutaza ku bona Ezekiele? Jehova naabulezi kuli: “Ba ndu ya Isilaele bakahana kukuutwa, kakuli habalati kuniutwa.” (Ezek. 3:7) Ka kuhana Ezekiele, batu nebahana Jehova. Manzwi ao naakolwisize Ezekiele kuli batu hane bahanile kumuutwa, nekusa talusi kuli naapalezwi kupeta musebezi wanaafilwe wa kuba mupolofita. Jehova hape naakolwisize Ezekiele kuli likatulo zanaashaezi hane likatalelezwa, batu nebaka ziba kuli “nekubanga ni mupolofita mwahalaa bona.” (Ezek. 2:5; 33:33) Kusina kukakanya, manzwi aomba-omba ao, naatusize Ezekiele kuba ni maata a kupeta bukombwa bwahae.
LULUMILWE KI JEHOVA KACENU
Ka kuswana ni Ezekiele, batu babañwi bakana bahana kuamuhela lushango lwaluna mi bakana balulwanisa, kono lwaziba kuli Jehova uinzi ni luna (Mubone paragilafu 5 ni 6)
5. Ka kuya ka Isaya 44:8, ki nto mañi yelutiisa?
5 Kuziba kuli lulumilwe ki Jehova kwalutiisa ni luna. Ulukutekile ka kulubiza kuli lu “lipaki” zahae. (Isa. 43:10) Yeo ki tohonolo yetuna luli! Sina feela Jehova mwanaataluselize Ezekiele kuli: “Usike wasaba,” Jehova ulutaluseza kuli: “Musike mwasaba.” Ki kabakalañi halusa swaneli kusaba baba lulwanisa? Ka kuswana ni Ezekiele, ni luna lulumilwe ki Jehova mi walutusa.—Mubale Isaya 44:8.
6. (a) Ki lika mañi zebonisa kuli Jehova uka lutusa? (b) Ki lika mañi zeluomba-omba ni kulutiisa?
6 Jehova ulusepisa kuli uka lutusa. Ka mutala, pili Jehova asika bulela kale kuli: “Mu lipaki zaka,” naabulezi kuli: “Hauka fita mwa mezi, nikaba ni wena, mi hauka fita mwa linuka, halina kukukwahela. Hauka zamaya mwa mulilo, hauna kucisiwa, hauna kubabulwa ki malimi a mulilo.” (Isa. 43:2) Fokuñwi halunze lupeta bukombwa bwaluna, lutalimananga ni miinelo yetaata yekona kubapanywa kwa muunda kamba miliko yekona kubapanywa kwa mulilo. Nihakulicwalo, luzwelapili kukutaza ka tuso ya Jehova. (Isa. 41:13) Sina mone kubezi mwa mazazi a Ezekiele, buñata bwa batu kacenu bahana taba yelukutaza ku bona. Luswanela kuhupula kuli batu habahana kuteeleza ku luna, hakutalusi kuli lupalezwi kupeta musebezi waluna sina Lipaki za Mulimu. Kuziba kuli Jehova watabanga haluzwelapili kushaela lushango lwahae ka busepahali kwaluomba-omba ni kulutiisa. Muapositola Paulusi naabulezi kuli: “Mutu ni mutu ukaamuhela mupuzo wahae luli kulikana ni musebezi wahae.” (1 Makor. 3:8; 4:1, 2) Kaizeli yomuñwi yasasebelize sina paina ka nako yetelele utalusa kuli: “Nibanga ni tabo yetuna kuziba kuli Jehova wafuyaulanga buikatazo bwaluna.”
EZEKIELE NAATUSIZWE KI MOYA WA MULIMU
Ezekiele ubona pono ya koloi ya Jehova ya kwa lihalimu, ili yemutusa kuba ni buikolwiso bobutiile bwa kuli Jehova uka mutusa kupeta bukombwa bwahae (Mubone paragilafu 7)
7. Kunahanisisa pono yanaaboni Ezekiele neku muamile cwañi? (Mubone siswaniso sesi fa kava.)
7 Ezekiele naaiponezi kuli moya wa Mulimu umaata luli. Mwa pono, naaboni mo moya okenile neutuselize libupiwa za moya zemaata ni kuzamaisa mawili amatuna a koloi ya kwa lihalimu. (Ezek. 1:20, 21) Pono yeo neiamile cwañi Ezekiele? Ulutaluseza zeneezahezi. Utalusa kuli: “Hani libona, nawela fafasi ka pata.” Zanaaboni Ezekiele neli musabisize hahulu kuli mane awela fafasi. (Ezek. 1:28) Hamulaho wa nako, Ezekiele hanaanahanisisanga pono yetabisa yeo, ilukela kuba yene mukolwisize kuli ka tuso ya moya wa Mulimu, naakakona kupeta bukombwa bwahae.
8-9. (a) Taelo yanaafile Jehova ku Ezekiele nei mutusize cwañi? (b) Ki lika mañi zeñwi zanaaezize Jehova kuli atuse Ezekiele kuyo kutaza kwa batu bane basatabeli kuamuhela lushango lwahae?
8 Jehova naalaezi Ezekiele kuli: “Mwanaa mutu, yema ka mahutu ahao kuli nibulele ni wena.” Taelo yeo neitusize Ezekiele kuba ni maata kamba “moya” kuli ayeme fafasi. Ezekiele naañozi kuli: “Moya wakena ku na mi waniyemisa ka mahutu.” (Ezek. 2:1, 2) Hamulaho wa fo, ni ka nako ya bukombwa bwahae kaufela, Ezekiele naaetelezwi ki “lizoho” la Mulimu, ili kutalusa moya wa Mulimu okenile. (Ezek. 3:22; 8:1; 33:22; 37:1; 40:1) Moya wa Mulimu neutusize Ezekiele kupeta musebezi wanaafilwe, ona wa kukutaza kwa batu bane banani “toho-taata ni lipilu zetaata.” (Ezek. 3:7) Jehova naataluselize Ezekiele kuli: “Nitahisize kuli sifateho sahao sitatafale sina lifateho zabona, ni kuli pata yahao itatafale sina lipata zabona. Nitahisize kuli pata yahao iswane ni daimani, itiye hahulu kufita licwe lelitiile. Usike wabasaba kamba kumbemukiswa ki lifateho zabona.” (Ezek. 3:8, 9) Nekuswana feela inge kuli Jehova naabulelela Ezekiele kuli: ‘Usike wazwafiswa ki muñañatoho wa sicaba. Nika kutiisa.’
9 Hamulaho wa fo, moya wa Mulimu waanga Ezekiele ni kumuisa kwa sibaka kwanaakayo kutaleza. Ezekiele naañozi kuli: “Lizoho la Jehova nelili ku na ka maata.” Nekuungezi mupolofita yo sunda mutumbi kuli autwisise hande lushango lwanaakayo shaela. (Ezek. 3:14, 15) Hasamulaho, Jehova amutaluseza kuya mwa musindi, mi teñi ko, “moya kiha ukena ku [yena].” (Ezek. 3:23, 24) Ezekiele naaitukiselize kupeta bukombwa bwahae.
LUTUSIWA KI MOYA WA MULIMU KACENU
Ka kuswana ni Ezekiele, ki lika mañi zelutusa kupeta bukombwa bwaluna kacenu? (Mubone paragilafu 10)
10. Ki lika mañi zelutusa kupeta musebezi waluna wa kukutaza, mi ki kabakalañi?
10 Ki lika mañi zelutusa kupeta musebezi waluna wa kukutaza? Kuli lualabe puzo yeo, halunyakisiseñi zeneezahezi ku Ezekiele. Pili asika kala kale kukutaza, moya wa Mulimu neu mutusize kuba ni maata. Ka kuswana ni Ezekiele, ni luna kacenu lukona feela kupeta musebezi wa kukutaza ka tuso ya moya wa Mulimu. Kabakalañi? Kakuli Satani walulwanisa kuli lutuhele kukutaza. (Sin. 12:17) Mwa meeto a batu, kukona kubonahala inge kuli halukoni kutula Satani. Kono lusweli lwamutula ka musebezi olueza wa kukutaza! (Sin. 12:9-11) Ka mukwa ufi? Halukutaza, lubonisa kuli halusabi Satani yasweli kulubemba. Nako kaufela halukutaza, lutula Satani. Kacwalo, ki lika mañi zelutusa kupeta musebezi waluna wa kukutaza kusina taba ni twaniso? Kwaiponahalela hande kuli lutusiwa ki moya okenile mi lutabisa Jehova.—Mat. 5:10-12; 1 Pit. 4:14.
11. Moya wa Mulimu uka lutusa cwañi, mi luswanela kuezañi kuli luzwelepili kuba ni ona?
11 Ki lika mañi zeñwi zeluituta kwa taba ya kuli Jehova naatatafalize sifateho sa Ezekiele ni pata yahae ka swanisezo? Moya wa Mulimu ukona kulutusa kutula butata bufi kamba bufi bolukona kukopana ni bona mwa bukombwa. (2 Makor. 4:7-9) Kono luswanela kuezañi kuli luzwelepili kuba ni moya wa Mulimu? Luswanela kutundamena kuukupa ku Jehova, inze lunani buikolwiso bwa kuli ukautwa litapelo zaluna. Jesu naataluselize balutiwa bahae kuli: “Muzwelepili kukupa, . . . muzwelepili kubata, . . . muzwelepili kungongota.” Mi Jehova ‘ukafa moya okenile ku babamukupa.’—Luka 11:9, 13; Lik. 1:14; 2:4.
EZEKIELE NAATIISIZWE KI MANZWI A MULIMU
12. Ka kuya ka Ezekiele 2:9–3:3, muputo neuzwa kai, mi ki lika mañi zeneñozwi mwateñi?
12 Ezekiele naasika tusiwa feela ki moya wa Mulimu kono hape naatiisizwe ki manzwi a Mulimu. Mwa pono, Ezekiele naaboni lizoho lene lisweli muputo. (Mubale Ezekiele 2:9–3:3.) Muputo wo neuzwa kai? Ki lika mañi zeneñozwi mwateñi? Neutiisize cwañi Ezekiele? Halunyakisiseñi lipuzo zeo. Muputo wo neuzwa kwa lubona lwa Mulimu. Mwendi Jehova naaitusisize leliñwi la mangeloi amane anaaboni Ezekiele kwamulaho kumutambeka muputo wo. (Ezek. 1:8; 10:7, 20) Mwa muputo wo, nekuñozwi manzwi a Mulimu, ili lushango kaufela lwa katulo lwanaaswanela kutaluseza Ezekiele bahapiwa bane bakwenuhezi Mulimu. (Ezek. 2:7) Lushango lo neluñozwi mwahali ni fande a muputo.
13. Jehova naabulelezi Ezekiele kuezañi kwa muputo, mi ki kabakalañi hane uli omunati?
13 Jehova naataluselize mupolofita wahae kuca muputo wo ni ‘kutaza mba yahae ka ona.’ Ezekiele naaezize zanaabulelezwi, mi aca muputo wo kaufelaa ona. Taba yeo neitalusañi? Ezekiele naatokwa kuutwisisa ka kutala lushango lwanaakayo shaela. Naatokwa kulumela lushango lo, ili nto yeneka ama hahulu mwanaaikutwela. Cwale kwaezahala nto yeñwi yekomokisa. Ezekiele alemuha kuli muputo wo, “neli omunati inge linosi.” (Ezek. 3:3) Kabakalañi? Ezekiele naanga tohonolo ya kuyemela Jehova sina nto yemunati kamba yetabisa. (Samu 19:8-11) Naaitebuha tohonolo yanaa mufile Jehova ya kusebeza sina mupolofita wahae.
14. Ki lika mañi zenetusize Ezekiele kuitukiseza kupeta musebezi wanaafilwe?
14 Hamulaho wa fo, Jehova ataluseza Ezekiele kuli: “Uutwe manzwi kaufela eni kubulelela mi uise pilu ku ona.” (Ezek. 3:10) Ka kufa Ezekiele litaelo zeo, Jehova naabata kuli azwelepili kuhupula manzwi anaañozwi mwa muputo ni kuanahanisisa. Kueza cwalo nekutiisize hahulu Ezekiele. Hape neku mutusize kushaela lushango lolumaata lo kwa batu ka bundume. (Ezek. 3:11) Ezekiele hasaautwisisize hande lushango lwa Mulimu, naaitukiselize kupeta musebezi wanaafilwe ka kutala.—Mubapanye Samu 19:14.
LUTIISWA KI MANZWI A MULIMU KACENU
15. Ki nto mañi yeluswanela kueza kuli luzwelepili kuitiisa?
15 Kuli lupete bukombwa bwaluna, ni luna lutokwa kuzwelapili kutiiswa ki manzwi a Mulimu. Lutokwa kuzwelapili ‘kuutwa’ manzwi kaufela alubulelela Jehova. Kacenu, Jehova uambolanga ku luna ka kuitusisa Linzwi lahae, yona Bibele. Ki lika mañi zeluswanela kueza kuli Linzwi la Mulimu lizwelepili kuama zelunahana, moluikutwela, ni milelo yaluna?
16. Ki lika mañi zeluswanela kueza kuli lutusiwe ki Linzwi la Mulimu?
16 Sina feela mibili yaluna haikona kutiya haluca lico ni kulitafuna, lwatiiswanga kwa moya halubala Linzwi la Mulimu ni kunahanisisa zelubala. Yeo ki yona tuto yeluituta kwa pono ya muputo. Jehova ubata kuli ‘lutaze mba yaluna’ ka Linzwi lahae, fo kikuli, luswanela kuliutwisisa hande. Lukona kueza cwalo haiba lulapela, kulibala, ni kunahanisisa litaba zelubala. Pili, luswanela kulapela kuli lipilu zaluna liamuhele manzwi a Mulimu. Kihona lukabala litimana zeñwi mwa Bibele. Hase luezize cwalo, luswanela kunahanisisa litaba zelubalile. Lukatusiwa cwañi haiba lueza cwalo? Kuba ni nako yeñata ya kunahanisisa litaba zelubala kuka lutusa kuutwisisa hande Linzwi la Mulimu mi tumelo yaluna ikatiya.
17. Ki kabakalañi hakuli kwa butokwa hahulu kunahanisisa zelubala mwa Bibele?
17 Ki kabakalañi hakuli kwa butokwa hahulu kubalanga Bibele ni kunahanisisa zelubala? Haiba lueza cwalo, lukaba ni maata aka lukonisa kukutaza lushango lwa Mubuso cwale ni kushaela lushango lolumaata lwa katulo loluka shaela kwapilinyana. Hape haiba lunahanisisa za tulemeno twa Jehova, silikani saluna ni yena sikatiya hahulu. Kueza cwalo kukatahisa kuli lube ni nto yetabisa hahulu, ili kuba ni kozo ya mwa munahano ni kukolwa ka lika zelunani zona.—Samu 119:103.
ZELUTUSA KUITIISA
18. Ki taba mañi yebaka lemuha batu mwa sibaka selukutaleza ku sona?
18 Ka kushutana ni Ezekiele, halusika susumezwa ki moya wa Mulimu kupolofita kwa batu. Nihakulicwalo, luikatulezi kuzwelapili kushaela lushango lolususumelizwe ki moya wa Jehova lolu mwa Linzwi lahae kufitela lupeta musebezi wo ka kutala kulikana ni mwatokwela. Nako ya katulo haika fita, batu mwa sibaka selukutaleza ku sona habana kuba ni libaka la kuikemela ka kubulela kuli nebasika fiwa temuso kamba kuli Mulimu naasika baisa pilu. (Ezek. 3:19; 18:23) Kono bakalemuha kuli lushango lone lukutalize ku bona neluzwa ku Mulimu.
19. Ki lika mañi zeka lutusa kupeta bukombwa bwaluna?
19 Ki lika mañi zeka lutusa kupeta bukombwa bwaluna? Lika zetaalu zenetusize Ezekiele zakona kulutusa ni luna. Luzwelapili kukutaza kakuli lwaziba kuli lulumilwe ki Jehova, lutusiwa ki moya wahae okenile, ni kutiiswa ki Linzwi lahae. Ka tuso ya Jehova, luzwelapili kupeta bukombwa bwaluna ni kuitiisa “kuisa kwa mafelelezo.”—Mat. 24:13.
PINA 65 Muzwelepili!
a Mwa taba ye, lukanyakisisa lika zetaalu zenetusize mupolofita Ezekiele kupeta musebezi wahae wa kukutaza. Kunyakisisa mo Jehova naatuselize mupolofita wahae, kuka lutusa kuba ni buikolwiso bwa kuli Jehova ni luna uka lutusa kupeta bukombwa bwaluna.