SILIMO ni silimo, lingu za Jehova zelatwa zakutisiwanga mwa puteho. Kaniti luli, lingu zeo halikutanga kubanga ni ‘tabo yetuna kwa lihalimu’! (Luka 15:7, 10) Haiba mukutisizwe mwa puteho, mukolwe kuli Jesu, mangeloi, ni Jehova batabile hahulu kumibona hamukutela mwa puteho. Kono kunani butata bobuñwi bomukona kukopana ni bona hamunze mutiisa silikani samina ni Jehova hape. Ki butata mañi bona bo, mi ki lika mañi zekona kumitusa?

Mizwale ni likaizeli babañata basaikutwanga bumaswe nihaiba hamulaho wa kukutiswa mwa puteho. Mwendi mwautwisisa mwanaaikutwezi Mulena Davida. Nihaiba hamulaho wa kuswalelwa libi zahae, naabulezi kuli: “Lifoso zaka liniimezi.” (Samu 40:12; 65:3) Mutu niha sakutezi ku Jehova ukona kuzwelapili kuikutwa mulatu ni maswabi ka lilimo zeñata. Bo Isabelle nebazwisizwe mwa puteho ka lilimo zefitelela 20. * Batalusa kuli: “Neku nibezi taata kuutwisisa kuli Jehova wakona kuniswalela.” Haiba muzwafa, mwakona kufokola kwa moya hape. (Liprov. 24:10) Mueze momukonela kaufela kuli nto yeo isike yaezahala ku mina.

Batu babañwi baikalelwanga kuli habana kukona kueza lika kaufela zetokwahala kuli babe ni silikani sesinde ni Jehova hape. Muzwale yabizwa Antoine naabulezi cwana hamulaho wa kukutiswa mwa puteho: “Neniikutwa kuli nenilibezi lika kaufela zene niitutile ni zene niezanga ka nako yene nili Paki ya Jehova.” Bakeñisa kuli batu babañwi baikutwanga cwalo, habasebelezangi Jehova ka mobakonela kaufela.

Ka mutala, haiba mutu yomuñwi asinyehelwa ki ndu yahae yende kabakala liñungwa, ukona kuikutwa hahulu kuimezwa hanahanisisa musebezi omutuna wa kulukisa sinca ndu yeo ni nako yakatanda  hanzaa eza cwalo. Ka mukwa oswana, haiba silikani samina ni Jehova nesisinyehile kabakala kuli nemuezize sibi sesituna, mukona kuikutwa kuli mukatokwa kueza ka taata luli kuli mube ni silikani sesinde hape ni Jehova. Kono kunani zekona kumitusa.

Jehova ulumema kuli: “Hamutahe cwale, lulukise litaba mwahalaa luna.” (Isa. 1:18) Muezize ka taata ‘kulukisa litaba’ ni yena. Jehova wamilata kabakala buikatazo bomuezize. Bakeñisa kuli mukutezi ku yena, Jehova wakona kuitusisa mina kubonisa kuli Satani ki lihata.—Liprov. 27:11.

Muhato omuungile wa kukutela ku Jehova ubonisa kuli mubata kusutelela ku yena, mi usepisa kuli ni yena ukasutelela ku mina. (Jak. 4:8) Nihakulicwalo, kunani lika zeñwi zemutokwa kueza kwandaa kulemuhiwa feela ki babañwi kuli mukutile mwa puteho. Muswanela kuzwelapili kutiisa lilato lamina ku Ndataa mina ni Mulikanaa mina, Jehova. Mukona kueza cwañi cwalo?

Muitomele likonkwani zemukona kupeta. Mwendi musahupula lituto za makalelo zene muitutile ka za Jehova ni sepiso yahae ya Paradaisi. Kono cwale muswanela kueza lika zene muezanga inze musali Bakreste, zecwale ka kukutaza taba yende kamita, kufumanehanga kwa mikopano, ni kutandanga nako ni mizwale ni likaizeli bamina. Mulike kuitomela likonkwani zelatelela.

Mulapelange ku Jehova kamita. Ndataa mina waziba kuli haiba muzwelapili kuikutwa mulatu kabakala lika zemaswe zene muezize, kukona kumibela taata kulapela ku yena. (Maro. 8:26) Nihakulicwalo, “mutundamene kulapela,” mi mutaluseze Jehova kuli mubata kuba ni silikani sesinde ni yena. (Maro. 12:12) Muzwale yabizwa Andrej, hahupula taba yeo, utalusa kuli: “Neniikutwanga hahulu mulatu ni maswabi. Kono neniikutwanga hande hamulaho wa kulapela. Nenibanga ni kozo ya mwa munahano.” Haiba hamuzibi zemuswanela kulapelela, munyakisise litapelo za Mulena Davida yanaabakile zeñozwi kwa Samu 51 ni 65.

Muitutange Bibele kamita. Kueza cwalo kuka mitusa kutiya kwa moya ni kulata hahulu Jehova. (Samu 19:7-11) Muzwale yabizwa Felipe, utalusa kuli: “Bakeñisa kuli nenisa balangi Bibele ni kueza tuto ya ka butu kamita, nakala kufokola kwa moya mi naswabisa Jehova. Nenisa lati kueza mafosisa aswana; kacwalo, naikatulela kuezanga tuto ya ka butu kamita.” Ni mina mwakona kueza nto yeswana. Haiba hamuzibi hande litaba zemukona kunyakisisa hamueza tuto ya ka butu, mwakona kukupa tuso ku mulikanaa mina yahulile kwa moya.

Mube ni silikani sesinde ni mizwale ni likaizeli bamina hape. Batu babañwi babakutiswanga mwa puteho baikalelwanga kuli mwendi mizwale ni likaizeli basa banyemezi. Kaizeli yabizwa Larissa utalusa kuli: “Neniikutwa hahulu maswabi. Hape neniikutwile kuli niswabisize mizwale ni likaizeli baka. Nenizwezipili kuikutwa cwalo ka nako yetelele.” Mukolwe kuli baana-bahulu ni Bakreste babañwi babahulile kwa moya batabela kumitusa kuli mube ni silikani sesinde ni Jehova hape. (Mubone mbokisi yeli, “ Ki Lika Mañi Zebaswanela Kueza Baana-Bahulu?”) Batabile kuli muungile muhato wa kukuta mwa puteho, mi babata kuli mukondise!—Liprov. 17:17.

Ki lika mañi zemuswanela kueza kuli muswalisane hahulu ni puteho? Kamita, mufumanehange kwa mikopano ya puteho ni mizwale ni likaizeli bamina, mi muyange ni bona mwa bukombwa. Kueza cwalo kuka mitusa cwañi? Muzwale yabizwa Felix utalusa kuli: “Mizwale ni likaizeli nebanyolelwa kuli nikute mwa puteho. Neniikutwile kulatiwa. Kaufelaa bona neba nitusize kuikutwa kuli ni wa butokwa mwa puteho, kuikutwa kuli Jehova uniswalezi, ni kunitusa kuzwelapili kumusebeleza hape.”—Mubone mbokisi yeli, “ Ki Lika Mañi Zemuswanela Kueza?”

Satani ukazwelapili kumitahiseza miliko ilikuli amifokolise hamunze muikataza kutiisa silikani samina ni Jehova hape. (Luka 4:13) Mueze momukonela kaufela kutiisa silikani samina ni Jehova ka nako ya cwale.

Jehova ubulela cwana ka za lingu zahae, uli: “Nikabata yelatehile, nikakutisa yekeluhile, nikatama yeholofezi, mi nikatiisa yefokozi.” (Ezek. 34:16) Jehova utusize batu babañata kutiisa silikani sabona ni yena hape. Mukolwe kuli ubata kumitusa kuli muzwelepili kuba ni sikani sesitiile ni yena.