1. Ki kabakalañi batu babañata habapalelwa kuziba bulapeli bwa niti?

KACENU, kunani bulapeli bobuñata-ñata bobuipapata kuli ki bwa Sikreste ni kuli bulapela Mulimu ka nzila yelukile. Ki lona libaka batu babañata habasa zibi kuli bulapeli bwa niti ki bufi. Bakona kubuza kuli: “Kana kunani bulapeli bwa niti bulibuñwi feela, kamba kana bulapeli kaufela bwatabisa Mulimu?” Kana luikolwisisize luli kuli luna Lipaki za Jehova luluta niti ni kuli lulapela Jehova ka nzila yemutabisa? Kana luli lwakona kuba ni buikolwiso bobucwalo? Halunyakisiseñi libaka halulumela cwalo.

2. Ki kabakalañi muapositola Paulusi hanaanani buikolwiso bobutuna bwa kuli litaba zanaalumela neli za niti? (1 Matesalonika 1:5)

² Muapositola Paulusi naanani buikolwiso bobutuna bwa kuli litaba zanaalumela neli za niti. (Mubale 1 Matesalonika 1:5.) Naasikaba ni buikolwiso bo ka libaka feela la kuli litaba zeo neli mufa tabo. Kono Paulusi naaitutile Linzwi la Mulimu ka tokomelo. Naalumela kuli “liñolo kamukana liñozwi ka kususumezwa ki moya wa Mulimu.” (2 Tim. 3:16) Kueza cwalo neku mutusize cwañi? Paulusi naafumani bupaki bobukolwisa bwa kuli Jesu neli yena Mesia yanaasepisizwe, ili bupaki bone basika isa pilu ku bona baeteleli ba bulapeli bwa Sijuda. Baeteleli ba bulapeli bane banani buipi bao, nebaipapata kuli nebaluta batu niti ka za Mulimu kono neba mulatula ka misebezi yabona. (Tite 1:16) Ka kushutana ni baeteleli ba bulapeli bao, Paulusi yena naasika keta litaba za mwa Linzwi la Mulimu zanaaka lumela ni zanaasike alumela. Naaitukiselize kuluta ni kusebelisa “kelezo kaufela ya Mulimu.”—Lik. 20:27.

3. Kana luswanela kuba ni likalabo kwa lipuzo kaufela zelunani zona kuli luikolwisise kuli litaba zelulumela ki za niti? (Mubone ni mbokisi yeli, “ Misebezi ya Jehova ni Mihupulo Yahae ki Yemiñata.”)

 ³ Batu babañwi baikutwa kuli bulapeli bwa niti buswanela kuba ni likalabo kwa lipuzo kaufela, mane nihaiba lipuzo zesika alabiwa ka kunonga mwa Bibele. Kana taba yeo yakonahala? Halunyakisiseñi mutala wa Paulusi. Naasusuelize balumeli ka yena kuli ‘baikolwisise lika kaufela,’ kono hape naaitumelezi kuli kunani lika zeñata zanaasa utwisisi. (1 Mates. 5:21) Naañozi kuli “zibo yaluna haisika talelela,” hape naaekelize kubulela kuli, “haluboni hande mwa siiponi sa sipi.” (1 Makor. 13:9, 12) Paulusi naasika utwisisa lika kaufela, mi ki nto yeswana ni luna. Kono naautwisisa litaba zeñwi ka za Jehova. Litaba zeo neli mutusize kuba ni buikolwiso bwa kuli zanaalumela neli za niti!

4. Ki nto mañi yekona kulutusa kuba ni buikolwiso bwa kuli lufumani niti, mi lukanyakisisañi ka za Bakreste ba niti?

⁴ Nto yeñwi yekona kulutusa kuba ni buikolwiso bwa kuli lufumani niti ki kunyakisisa mutala wanaatomile Jesu wa mwakulapelela Mulimu ni kubona haiba Lipaki za Jehova balapela Mulimu ka nzila yeswana kacenu. Mwa taba ye, lukanyakisisa kuli Bakreste ba niti (1) habalapeli maswaniso, (2) bakuteka libizo la Jehova, (3) balata niti, ni (4) balatana luli mwahalaa bona.

5. Luitutañi ku Jesu ka za mwakulapelela Mulimu ka nzila yeswanela, mi lukona kusebelisa cwañi zanaalutile?

⁵ Bakeñisa kuli Jesu naalata hahulu Mulimu, naalapelanga feela yena anosi, hanaali kwa lihalimu ni hanaali fa lifasi. (Luka 4:8) Naalutile balutiwa bahae kueza nto yeswana. Jesu ni balutiwa bahae nebasa itusisangi maswaniso mwa bulapeli. Bakeñisa kuli Mulimu  ki Moya, hakuna mutu yakona kueza nto ifi kamba ifi yeswana ni yena! (Isa. 46:5) Kono kana Bakreste baswanela kuitusisa maswaniso a batu babaangiwa kuli ki bahalalehi ni kulapela ku bona? Mwa Mulao wabubeli kwa Milao Yelishumi, Jehova naaize: “Usike waikezeza siswaniso sa kubeta kamba siswaniso sa nto ifi kamba ifi ye mwa mahalimu kwahalimu kamba fafasi mwa lifasi . . . Usike walikubamela.” (Ex. 20:4, 5) Batu bababata kutabisa Mulimu baziba kuli Mulimu haatabeli kuli baitusise maswaniso mwa bulapeli.

6. Lipaki za Jehova kacenu balikanyisa mutala wa bo mañi wa mwakulapelela Mulimu?

⁶ Baituti ba litaba za kwamulaho, babulela kuli Bakreste ba kwa makalelo nebalapelanga feela Mulimu. Ka mutala, buka yeñwi yetalusa za lika zeneezahalile kwamulaho (History of the Christian Church) ibulela kuli Bakreste ba kwa makalelo “balukela ku ba ba ne ba toile hahulu” nihaiba feela muhupulo wa kubeya maswaniso mwa libaka za kulapelela. Lipaki za Jehova kacenu balikanyisa mutala oswana one batomile Bakreste ba kwa makalelo. Halulapelangi maswaniso a batu babaangiwa kuli ki bahalalehi kamba mangeloi, mane halulapeli nihaiba Jesu. Mi halucaelangi ndembela silutu kamba kueza nto ifi kamba ifi yebonisa kuli lulapela naha yaluna. Kusina taba ni zebakona kulueza batu, luikatulezi kumamela manzwi a Jesu a, aali: “Ki Jehova Mulimu wahao yeulukela kulapela.”—Mat. 4:10.

7. Lipaki za Jehova bashutana cwañi ni bulapeli bobuñwi kaufela?

⁷ Batu babañata kacenu batabela kuteeleza kwa baeteleli ba bulapeli babatumile. Babalata hahulu kuli mane babatanga kubalapela. Batu babañata bayanga kwa likeleke zabona, balekanga libuka zabona, mi babafanga masheleñi amañata kamba kufa likopano zebaswalisana ni zona. Batu babañwi balumelanga lika kaufela zebabulela baeteleli ba bulapeli bao. Batabanga hahulu haba babona, inge mane bababoni Jesu! Kono batanga ba Jehova bona habana babahulu ba bulapeli. Nihaike kuli lwakuteka babaetelela mwahalaa luna, lumamela manzwi anaabulezi Jesu, aali: “Kaufelaa mina mu mizwale.” (Mat. 23:8-10) Halulapeli batu, ibe kuli ki baeteleli ba bulapeli kamba ki babusi ba lifasi. Mi haluyemelangi milelo yabona ya bulapeli bwabona kamba ya bupolitiki. Kono luzwelangapili kusaikenya mwa litaba za lipolitiki ni kuikambusa kwa lifasi. Lika zeo kaufela litahisa kuli lushutane ni bulapeli bobuñata bobuipapata kuli ki bwa Sikreste.—Joa. 18:36.

8. Luziba cwañi kuli Jehova ubata kuli libizo lahae likanyiswe ni kuli lizibahale kwa batu kaufela?

⁸ Jesu ka nako yeñwi, naalapezi kuli: “Ndate, kanyisa libizo lahao.” Jehova yena ka sibili naaalabile tapelo yeo ka linzwi lelituna lene lizwelela kwa lihalimu, mi naasepisize kuli naakakanyisa libizo lahae. (Joa. 12:28) Ka nako kaufela ya bukombwa bwahae bwa fa lifasi, Jesu naakanyisize libizo la Ndatahe. (Joa. 17:26) Kacwalo, Bakreste ba niti baikutwa kuli ki tohonolo yetuna kuitusisa libizo la Mulimu ni kulizibahaza ku babañwi.

9. Bakreste ba mwa linako za baapositola nebabonisize cwañi kuli nebakuteka libizo la Mulimu?

⁹ Mwa linako za baapositola, nakonyana kuzwa foitomelwa puteho ya Sikreste, Jehova “naasikuluhezi lwapili ku ba macaba kuli aange ku bona batu bababizwa ka libizo lahae.” (Lik. 15:14) Bakreste ba kwa makalelo bao, nebasa swabeli kuitusisa libizo la Mulimu ni kulizibahaza ku babañwi. Nebaitusisanga libizo la Mulimu hane bakutazanga ni hane bañola  libuka za Bibele. * Ka kueza cwalo, nebabonisize kuli neli batu bane babizwa ka libizo la Mulimu.—Lik. 2:14, 21.

10. Ki bupaki bufi bobubonisa kuli Lipaki za Jehova ki batu bababizwa ka libizo la Jehova?

¹⁰ Kana Lipaki za Jehova ki batu bababizwa ka libizo la Jehova? Halunyakisiseñi litaba zelatelela. Baeteleli ba bulapeli babañata kacenu baezize mobakonela kaufela kupata libizo la Mulimu. Balizwisize mwa Libibele zabona, mi mane mwa libaka zeñwi, bahanisize batu kuitusisa libizo leo mwa likeleke zabona. * Kwaiponahalela hande kuli Lipaki za Jehova ki bona feela babakuteka libizo la Jehova ka mokuswanelehela. Lusweli kutusa batu babañata-ñata mwa lifasi kaufela kuziba libizo la Mulimu kufita bulapeli bufi kamba bufi. Halueza cwalo, lupila ka kuya ka selitalusa libizo laluna, lona la Lipaki za Jehova. (Isa. 43:10-12) Luhatisize likopi zefitelela 240 milioni za Bibele ya Toloko ya Lifasi Lelinca, mi Bibele yeo ikutiselize libizo la Jehova mwa libaka molizwisizwe ki batoloki ba Libibele zeñwi. Mi luhatisa lihatiso zetomile fa Bibele mwa lipuo zefitelela 1,000, ili zezibahaza libizo la Jehova!

11. Bakreste ba kwa makalelo nebabonisize cwañi kuli nebalata niti?

¹¹ Jesu naalata niti, ili niti ka za Mulimu ni  milelo yahae. Jesu naapilile ka kuya ka niti yeo mi naaizibahalize ku babañwi. (Joa. 18:37) Balutiwa ba Jesu ba niti ni bona nebalata hahulu niti. (Joa. 4:23, 24) Mane muapositola Pitrosi naatalusize kuli bulapeli bwa Bakreste neli yona “nzila ya niti.” (2 Pit. 2:2) Bakeñisa kuli Bakreste ba kwa makalelo nebalata hahulu niti, nebahanile lituto za bulapeli, lizo, ni mibonelo ya batu yenesa lumelelani ni niti. (Makolo. 2:8) Ni kacenu, Bakreste ba niti baeza mobakonela kaufela ‘kuzwelapili kuzamaya mwa niti’ ka kutoma lituto zabona kaufela fa Linzwi la Jehova ni kupila ka kuya ka litaba zebabala mwateñi.—3 Joa. 3, 4.

12. Ba Sitopa Sesietelela baezanga cwañi habalemuha kuli lutokwa kucinca moluutwisiseza taba yeñwi, mi ki kabakalañi habaezanga cwalo?

¹² Lipaki za Jehova habaipapatangi kuli baziba ka kutala litaba kaufela zefumaneha mwa Bibele. Fokuñwi, baezanga mafosisa ka mobataluseza lituto zeñwi za mwa Bibele kamba mobaezeza lika mwa puteho. Halukomokiswi ki taba yeo. Mañolo abulela hande ka kuutwahala kuli lukona kuba ni zibo yenepahezi hanyinyani-hanyinyani nako hainze iya. (Makolo. 1:9, 10) Jehova upatululanga niti hanyinyani-hanyinyani, mi luswanela kulibelela kufitela luutwisisa niti yeo ka kutala. (Liprov. 4:18) Ba Sitopa Sesietelela habalemuha kuli lutokwa kucinca moluutwisiseza taba yeñwi, baezanga licinceho zeo kapili-pili. Bulapeli bobuñata kacenu buezanga licinceho zeama lituto zabona ilikuli butabise batu babona kamba kuli butume hahulu mwa lifasi. Kono Lipaki za Jehova bona baezanga licinceho kabakala kuli babata kusutelela ku Mulimu ni kumulapela ka nzila yeswana yanaa mulapelanga ka yona Jesu. (Jak. 4:4) Haluezangi licinceho kabakala kuli mibonelo ya batu mwa lifasi icincize, kono luezanga cwalo kabakala kuli seluutwisisa hande litaba za mwa Bibele. Lwalata niti!—1 Mates. 2:3, 4.

13. Ki kalemeno kafi ka butokwa hahulu kane babonisize Bakreste ba niti, mi Lipaki za Jehova babonisa cwañi kalemeno kao?

¹³ Bakreste ba mwa linako za baapositola nebazibahala ka lika zende zeñata, kono kalemeno ka butokwa hahulu kane bazibahala hahulu ka kona ki lilato. Jesu naabulezi kuli: “Batu kaufela bakaziba kuli mu balutiwa baka ka taba ye—haiba mulatana mwahalaa mina.” (Joa. 13:34, 35) Lipaki za Jehova kacenu balatana mi baikola swalisano yende mwa lifasi kaufela. Lwashutana ni bulapeli bobuñwi kaufela bakeñisa kuli lu lubasi lululuñwi nihaike kuli luzwa mwa linaha zeshutana-shutana mi lunani lizo zeshutana. Lwaiponelanga lilato leo kwa mikopano yaluna ya puteho, mikopano ya mupotoloho, ni mikopano yemituna. Taba yeo ilukolwisa kuli lulapela Jehova ka nzila yemutabisa.

14. Ka kuya ka Makolose 3:12-14, ki ifi nzila ya butokwa yelukona kubonisa ka yona kuli lwalatana ka lilato lelituna?

¹⁴ Mañolo alususueza ‘kulatana ka lilato lelituna.’ (1 Pit. 4:8) Nzila yeñwi yelubonisa ka yona lilato leo ki ka kuswalelana ni kuzwelapili kutuhelela mafosisa a babañwi. Hape luezanga cwalo ka kuba ni bufani ni kubonisa moya wa kuamuhela baenyi kwa mizwale ni likaizeli baluna kaufela mwa puteho, mane nihaiba kwa batu baba lufoselize. (Mubale Makolose 3:12-14.) Lilato lelicwalo lelubonisana mwahalaa luna libonisa kuli lu Bakreste ba niti.

15. Ki mwa linzila lifi zeñwi ili mo lulikanyisa mone balapelelanga Bakreste ba mwa linako za baapositola?

¹⁵ Lulikanyisa mone balapelelanga Bakreste ba mwa linako za baapositola mwa linzila zeñwi  hape. Ka mutala, luonga-ongilwe ka nzila yeswana yene baonga-ongilwe ka yona Bakreste bao. Lunani baokameli ba mupotoloho, baana-bahulu, ni likombwa za puteho sina feela mone kubelanga mwa linako za baapositola. (Mafil. 1:1; Tite 1:5) Ka kuswana ni Bakreste bao, lwakuteka milao ya Jehova ka za somano ni linyalo, lwayemela mubonelo wa Mulimu ka za mali, mi lusileleza puteho kwa baezalibi babasa baki.—Lik. 15:28, 29; 1 Makor. 5:11-13; 6:9, 10; Maheb. 13:4.

16. Luitutañi kwa manzwi a kwa Maefese 4:4-6?

¹⁶ Jesu naabulezi kuli batu babañata nebaka ipapata kuli ki balutiwa bahae, kono haki kaufelaa bona babali balutiwa bahae ba niti. (Mat. 7:21-23) Hape Mañolo abulela kuli mwa mazazi a mafelelezo, batu babañata nebaka ‘bonahala [feela] kuba balumeli.’ (2 Tim. 3:1, 5) Nihakulicwalo, Bibele ibulela hande ka kunonga kuli kunani feela “tumelo iliñwi” yetabisa Mulimu.—Mubale Maefese 4:4-6.

17. Ki bo mañi babalikanyisa Jesu ni kubonisa tumelo iliñwi ya niti kacenu?

¹⁷ Ki bo mañi bababonisa tumelo iliñwi ya niti kacenu? Lunyakisisize litaba ka butungi. Lunyakisisize nzila yanaalutile Jesu ya mwakulapelela Mulimu, ili yene balatelezi Bakreste ba kwa makalelo. Lipaki za Jehova ki bona feela bababonisa tumelo iliñwi ya niti kacenu. Kaniti luli, ki tohonolo yetuna kuba babañwi ba Lipaki za Jehova ni kuziba niti ka za Jehova ni milelo yahae! Haike kaufelaa luna luzweleñipili kuikolwisisa kuli lufumani niti.