MUSOLE yomuñwi wa ba Nazi naabulelezi sikwata sa Lipaki za Jehova ka nako yene ikolota Ndwa ya Lifasi Yabubeli kuli: “Haiba yomuñwi ku mina ahana kulwanisa naha ya France kamba ya England, kaufelaa mina mukabulaiwa!” Nihaike kuli masole ba Nazi bane basweli litobolo nebayemi bukaufi, hakuna nihaiba alimuñwi kwa mizwale baluna yanaalumezi kueza cwalo. Mizwale bao nebanani bundume luli! Mutala wabona ubonisa hande mubonelo olunani ona sina Lipaki za Jehova ka za lindwa: Haluikenyangi mwa lindwa za lifasi le. Niha lubembiwa kuli lukabulaiwa, lwahananga kuikenya mwa lindwa za lifasi.

1. BATU BA MULIMU KAUFELA NEBALI SICABA SILISIÑWI

Kwamulaho, Jehova naakubukanyize batu bahae kubaeza sicaba silisiñwi, bona Maisilaele. Naabizize Maisilaele kuli ki “sicaba [sahae] tota mwahalaa macaba kaufela.” (Exo. 19:5) Mulimu hape naabafile naha mone bakapila. Kacwalo, Mulimu hanaalaezi Maisilaele kuyo lwanisa macaba amañwi, nebasayo lwanisi kamba kubulaya batanga ba Mulimu sina bona. *

Kacenu, Bakreste ba niti bazwa mwa “macaba kaufela ni mishobo ni batu ni malimi.” (Sin. 7:9)  Batu ba Mulimu hane bakaya kwa ndwa, uzibe nebaka lwanisa mane nihaiba kubulaya Bakreste ka bona.

2. JEHOVA NAALAEZI MAISILAELE KUYA KWA NDWA

Kwamulaho, Jehova naatalusezanga Maisilaele fone baswanela kuyela kwa ndwa ni libaka hane baswanela kueza cwalo. Ka mutala, Mulimu naalaezi Maisilaele kulwanisa Makanana kuli afitise katulo yahae kabakala kuli nebalapela badimona, kuikenya mwa muzamao wa buhule oswabisa, ni kufa bana babona sina matabelo. Jehova naalaezi Maisilaele kuzwisa bumaswe bo mwa naha yanaa basepisize. (Liv. 18:24, 25) Maisilaele hase bayahile mwa Naha ya Sepiso, Mulimu fokuñwi naabalumelezanga kuya kwa ndwa kuli basileleze naha kwa lila zenebata kubahatelela. (2 Sam. 5:17-25) Nihakulicwalo, Jehova naasalumelezangi Maisilaele kuikatulela kuya kwa ndwa. Hane baezanga cwalo, hañata zenezwanga mwateñi neli zemaswe hahulu.—Num. 14:41-45; 2 Makol. 35:20-24.

Kacenu, Jehova halaelangi batu kuya kwa ndwa. Linaha lilwananga kuli lizwisezepili milelo yazona kufita kueza zabata Mulimu. Batu bakana baya kwa ndwa ilikuli bahape kalulo ya naha yeñwi kamba kufumana sifumu kamba kuzwisezapili milelo ya naha yabona. Kono kucwañi ka za batu babali habalwana baeza tato ya Mulimu kuli basileleze bulapeli bwabona kamba kubulaya lila za Mulimu? Jehova ukasileleza balapeli ba niti ni kuyundisa lila zabona mwa ndwa yekalwanwa kwapili, yona ndwa ya Armagedoni. (Sin. 16:14, 16) Mwa ndwa yeo, Mulimu ukaitusisa feela libupiwa za moya ze kwa lihalimu, isiñi batu baba mulapela.—Sin. 19:11-15.

3. MAISILAELE NEBASA BULAYANGI BATU BANE BABONISA TUMELO KU JEHOVA

Kwamulaho, mpi ya Maisilaele hañata neibonisanga sishemo batu bane babonisa tumelo ku Mulimu ni kubulaya feela batu banaaatuzi Jehova kuli nebaswanela kubulaiwa. Halunyakisiseñi mitala yemibeli. Nihaike kuli Jehova naalaezi  Maisilaele kuyundisa muleneñi wa Jeriko, nebapilisize Rahaba ni lubasi lwahae kabakala kuli naabonisize tumelo ku Mulimu. (Josh. 2:9-16; 6:16, 17) Hamulaho wa fo, muleneñi kaufela wa Gibioni neusika yundiswa bakeñisa kuli Magibioni nebabonisize kuli nebasaba Mulimu.—Josh. 9:3-9, 17-19.

Kacenu, linaha zelwanisana halipilisangi batu bababonisa tumelo ku Mulimu. Mi fokuñwi, batu babasi masole babasina mulatu babulaiwanga ka nako yeikolota ndwa.

4. MAISILAELE NEBATOKWA KULATELELA MILAO YA MULIMU YA MWAKULWANELA

Kwamulaho, Jehova naabata kuli masole ba Maisilaele balwane ka kuya ka litaelo zanaa bafile. Ka mutala, Mulimu fokuñwi naabatalusezanga kueza “tumelelano ya kozo” ni muleneñi one ubalwanisa. (Deut. 20:10) Jehova hape naabata kuli masole ba Maisilaele babe babakenile kwa mubili ni mwa muzamao ni kukenisa mafulo abona. (Deut. 23:9-14) Nihaike kuli limpi za macaba anaa bapotolohile hañata neliswalanga basali likalala halitula mileneñi yemiñwi, Jehova naahanisize Maisilaele kueza cwalo. Mane nebasa lumelezwi kunyala musali yahapilwe konji hase kufitile kweli kuzwa fouhapelwa muleneñi.—Deut. 21:10-13.

Kacenu, buñata bwa linaha liezize tumelelano ya kulatelela milao yemiñwi ka za ndwa. Nihaike kuli milao yeo ilelezwi kutusa batu babasi masole, ka bumai, hañata hailatelelwangi.

5. MULIMU NAALWANELANGA SICABA SAHAE

Kwamulaho, Jehova naalwanelanga Maisilaele, mi hañata naaezanga limakazo kuli batule ndwa. Ka mutala, Jehova naatusize cwañi Maisilaele kutula muleneñi wa Jeriko? Ka kulatelela taelo ya Jehova, Maisilaele “hase bahuwile mukosi omutuna wa ndwa, limota lawela fafasi,” ili nto yenetusize kuli bahape muleneñi ka bunolo. (Josh. 6:20) Mi Maisilaele nebatuzi cwañi Maamori? Bibele ibulela kuli: “Jehova abawisakela macwe amatuna a simbwewewe . . . Mane bane babulailwe ki macwe a simbwewewe neli babañata kufita bane babulailwe ka mukwale wa Maisilaele.”—Josh. 10:6-11.

BAKRESTE BABATISEZA BABAÑWI KOZO

Litaba zelunyakisisize libonisa kuli muinelo oluli ku ona kacenu ushutanela kwahule ni one bali ku ona Maisilaele ba kwaikale. Nihakulicwalo, mabaka elunyakisisize haki ona feela atahisa kuli lusike lwayanga kwa ndwa. Kunani mabaka amañwi halusa ezangi cwalo. Ka mutala, Mulimu naapolofitile kuli mwa mazazi a mafelelezo, batu babalutiwa ki yena “habasana kuituta ndwa,” kamba mane kuya kwa ndwa. (Isa. 2:2-4) Kuzwa fo, Kreste naabulezi kuli balutiwa bahae haki “ba lifasi”; nebasike baikenya mwa lindwa za lifasi le.—Joa. 15:19.

Kreste hape naasusuelize balateleli bahae kueza nto yeñwi. Naabalaezi kuambuka mikwa yenekona kutahisa kuli babe ni ndimbelela, bunyemi, ni kulwanisa babañwi. (Mat. 5:21, 22) Hape naalaezi balateleli bahae kuli ‘babatiseze babañwi kozo’ ni kulata lila zabona.—Mat. 5:9, 44.

Luna bo? Mwendi halukoni kuya kwa ndwa, kono kana lunani sitoyo mwa lipilu zaluna, ili nto yekona kutahisa kuli lulwanisane ni babañwi kamba kuli kusike kwaba ni swalisano mwa puteho? Haike luzwelepili kueza molukonela kaufela kufelisa maikuto acwalo mwa lipilu zaluna.—Jak. 4:1, 11.

Mwa sibaka sa kuikenya mwa lindwa za lifasi, lueza lika zetahisa kuli kube ni kozo ni lilato mwahalaa luna. (Joa. 13:34, 35) Haike lueze molukonela kaufela kusaikenya mwa lindwa za lifasi le halunze lulibelela nako yeo Jehova akafelisa lindwa kuya kuile.—Samu 46:9.