1. Ki lika mañi zetabisa zekaezahala ka nako ya Puso ya Lilimo ze 1,000?

 MUNAHANE feela tabo yetuna yelukaba ni yona zuho ya bafu haika kalisa fa lifasi ka nako ya Puso ya Kreste ya Lilimo ze 1,000! Batu kaufela babashwezwi ki balatiwa babona banyolelwa hahulu kubabona hape. Jehova ni yena unyolelwa kubabona. (Jobo 14:15) Kaniti luli, batu mwa lifasi kaufela bakaba ni tabo yetuna balatiwa babona habaka zusiwa kwa bafu! Sina moluitutezi mwa taba yefelile, “babalukile,” ili bao mabizo abona añozwi mwa buka ya bupilo, ‘bakazuhela bupilo.’ (Lik. 24:15; Joa. 5:29) Mwendi mane balatiwa baluna bakaba babañwi ba batu bapili kuzusiwa fa lifasi. * Kuzwa fo, batu “babasika luka,” inge cwalo batu bane basikaba ni kolo yende ya kuituta ka za Jehova kamba kumusebeleza ka busepahali pili basika shwa kale, ‘bakazuhela katulo.’

2-3. (a) Sina mokuboniselizwe kwa Isaya 11:9, 10, ki musebezi mañi omutuna hahulu okaeziwa mwa lifasi? (b) Lukanyakisisañi mwa taba ye?

² Batu bao kaufela babaka zusiwa, bakatokwa kulutiwa. (Isa. 26:9; 61:11) Kacwalo, musebezi wa kuluta batu ukatokwa kueziwa, mi ukaba ona musebezi omutuna hahulu kufita lili kaufela. (Mubale Isaya 11:9, 10.) Kabakalañi? Libaka leliñwi kikuli, batu babasika luka babaka zusiwa kwa bafu  bakatokwa kuituta ka za Jesu Kreste, Mubuso wa Mulimu, tiululo, butokwa bwa libizo la Jehova, ni libaka hanani tukelo ya kubusa. Mane nihaiba batu babalukile ni bona bakatokwa kuituta mo Jehova naazwezipili kupatulula mulelo wahae ka za lifasi hanyinyani-hanyinyani. Babañwi kwa batanga ba Mulimu babasepahala bao nebashwile lilimo zeñata kwamulaho pili Bibele isika fezwa kale kuñolwa. Batu babasika luka ni babalukile bakatokwa kuituta zeñata.

³ Mwa taba ye, lukanyakisisa lipuzo zelatelela: Musebezi omutuna wa kuluta batu wo ukaeziwa cwañi? Ki lika mañi zekaezahala kwa batu babaka sebelisa lituto zebaka lutiwa, ni kwa batu babaka hana kusebelisa lituto zeo? Likalabo za lipuzo zeo ki za butokwa hahulu ku luna kacenu. Sina moluka itutela, bupolofita bobuñwi bobutabisa bobu mwa buka ya Daniele ni ya Sinulo buka lutusa kuutwisisa libaka hakubile ni kutwisiso yenca kuamana ni zekaezahala batu babashwile habaka zusiwa. Halukaleñi ka kunyakisisa likezahalo zetabisa zefumaneha mwa bupolofita bobu kwa Daniele 12:1, 2.

4-5. Daniele 12:1 ibulelañi ka za nako ya mafelelezo?

⁴ Mubale Daniele 12:1. Buka ya Daniele italusa mo likezahalo zetabisa likaezahalela ka kutatamana mwa nako ya mafelelezo. Ka mutala, Daniele 12:1 ibonisa kuli Mikaele, yena Jesu Kreste, ‘uyemela sicaba [sa Mulimu].’ Kalulo ya bupolofita ye neikalile kutalelezwa ka silimo sa 1914, Jesu haketiwa kuba Mulena wa Mubuso wa Mulimu wa kwa lihalimu.

⁵ Nihakulicwalo, Daniele hape naataluselizwe kuli Jesu “ukayema” mwa “nako ya ñalelwa yesika bonwa kale kuzwa fositomelwa sicaba kufitela nako yeo.” “Nako ya ñalelwa” yeo ki yona “ñalelwa yetuna” yebulezwi kwa Mateu 24:21. Jesu ukayema kamba kusileleza sicaba sa Mulimu kwa mafelelezo a nako ya ñalelwa, ili fa Armagedoni. Buka ya Sinulo italusa sikwata se sina “buñata bobutuna bwa batu babazwa mwa ñalelwa yetuna.”—Sin. 7:9, 14.

6. Ki lika mañi zekaezahala buñata bobutuna bwa batu hase bupunyuhile ñalelwa yetuna? Mutaluse. (Mubone ni taba yeli, “Lipuzo Zezwa Kwa Babali” yeambola za batu babaka zuhela bupilo fa lifasi, yefumaneha mwa magazini ye.)

⁶ Mubale Daniele 12:2. Ki lika mañi zekaezahala buñata bobutuna bwa batu hase bupunyuhile nako ya ñalelwa yeo? Bupolofita bo habuamboli za zuho ya swanisezo, zuho ya kwa moya yene luutwisisa kwamulaho kuli neika ezahala kwa batanga ba Mulimu mwa mazazi a mafelelezo. * Kono manzwi a atalusa zuho ya bafu yekaezahala mwa lifasi lelinca. Ki kabakalañi halubulela cwalo? Linzwi la “liluli” hape liitusisizwe kwa Jobo 17:16 kutalusa “Libita.” Taba yeo ibonisa kuli Daniele 12:2 iambola za zuho tenyene yekaezahala mazazi a mafelelezo hasaafelile ni hamulaho wa ndwa ya Armagedoni.

7. (a) Batu babañwi bakazuhela “bupilo bobusa feli” ka mukwa ufi? (b) Ki kabakalañi zuho ye haili “zuho ya bafu yende hahulu”?

⁷ Kono liñolo la Daniele 12:2 litalusañi halibulela kuli babañwi bakazuhela “bupilo bobusa feli”? Liñolo leo litalusa kuli babaka zusiwa kwa bafu mi bazwelapili kuziba ni kuutwa Jehova ni Jesu mwahalaa lilimo  ze 1,000, bakafiwa bupilo bobusa feli kwapili. (Joa. 17:3) Zuho ye ikaba “zuho ya bafu yende hahulu” kufita zuho ya batu babañwi bane bazusizwe kwamulaho. (Maheb. 11:35) Kabakalañi? Kabakala kuli batu babasika petahala bao nebashwile hape.

8. Babañwi bakazuhela “kushubulwa ni kushwaulwa kuya kuile” ka mukwa ufi?

⁸ Kono haki batu kaufela babaka zusiwa kwa bafu babaka bata kulutiwa ki Jehova. Bupolofita bwa Daniele bubulela kuli batu babañwi bakazuhela “kushubulwa ni kushwaulwa kuya kuile.” Bakeñisa kuli bakabonisa moya wa bukwenuheli, mabizo abona haana kuñolwa mwa buka ya bupilo mi habana kufiwa bupilo bobusa feli. Kono ‘bakashwaulwa kuya kuile,’ kamba kuyundiswa. Kacwalo, Daniele 12:2 italusa zekaezahala hasamulaho kwa batu kaufela babaka zusiwa kwa bafu, kulikana ni zebaka eza hamulaho wa kuzusiwa. * (Sin. 20:12) Babañwi bakafiwa bupilo bobusa feli; babañwi bona habana kufiwa bupilo bo.

9-10. Ki lika mañi zeñwi zekaezahala hamulaho wa ñalelwa yetuna, mi ki bo mañi ‘babaka benya sina mbyumbyulu ya lihalimu’?

⁹ Mubale Daniele 12:3. Ki lika mañi zeñwi zekaezahala hamulaho wa “nako ya ñalelwa”? Kwandaa litaba zeñozwi kwa Daniele 12:2, timana 3 ya liñolo leo italusa lika zeñwi zekaezahala hamulaho wa ñalelwa yetuna.

¹⁰ Ki bo mañi ‘babaka benya sina mbyumbyulu ya lihalimu’? Manzwi anaabulezi Jesu kwa Mateu 13:43 akona kulutusa kuziba batu bao, aali: “Ka nako yeo, babalukile bakabenya sina lizazi mwa Mubuso wa Ndataa bona.” Ka kubulela cwalo, Jesu naatalusa “bana ba Mubuso,” bona banyani bahae babatozizwe, babaka busa ni yena mwa Mubuso wa kwa lihalimu. (Mat. 13:38) Kacwalo, Daniele 12:3 iswanela kutalusa za Bakreste babatozizwe ni musebezi obaka eza mwa Puso ya Lilimo ze 1,000.

11-12. Ki musebezi mañi obaka eza ba 144,000 mwahalaa lilimo ze 1,000?

¹¹ Bakreste babatozizwe bakatusa cwañi “babañata kuba babalukile”? Bakreste babatozizwe bakasebelisana hamoho ni Jesu Kreste kuetelela musebezi wa kuluta batu okaezwa fa lifasi mwahalaa lilimo ze 1,000. Ba 144,000 bakabusa sina malena ni kusebeza sina baprisita. (Sin. 1:6; 5:10; 20:6) Kacwalo, bakatusa mwa musebezi wa “kufolisa macaba,” ili kutusa batu kuba babapetahalile hanyinyani-hanyinyani. (Sin. 22:1, 2; Ezek. 47:12) Taba yeo ikatabisa hahulu Bakreste babatozizwe!

¹² Ki bo mañi babakaba mwahalaa batu “babañata” babaka tusiwa kuba babalukile? Batu bao bakopanyeleza batu babaka zusiwa kwa bafu ni babaka punyuha Armagedoni, hamohocwalo ni bana babakana bapepwa mwa lifasi lelinca. Hamulaho wa lilimo ze 1,000, batu kaufela babaka pila fa lifasi bakapetahala. Kacwalo, ki lili fo mabizo abona akañolwa ka swanisezo mwa buka ya bupilo ka inki isiñi ka potoloto, asatokwi kutakulwa?

13-14. Ki lika mañi zebaka tokwa kueza batu kaufela babapetahalile fa lifasi pili basika fumana kale bupilo bobusa feli?

¹³ Luswanela kuhupula kuli kuba mutu yapetahalile ka ili kona feela hakutalusi kuli  mutu ukafumana bupilo bobusa feli. Muhupule zeneezahezi ku Adama ni Eva. Nihaike kuli neli batu babapetahalile, nebatokwa kuutwa Jehova Mulimu kuli bafiwe bupilo bobusa feli. Kono ka bumai, nebasika muutwa.—Maro. 5:12.

¹⁴ Batu babaka pila fa lifasi bakaba mwa muinelo mañi kwa mafelelezo a lilimo ze 1,000? Kaufelaa bona bakaba babapetahalile. Kana batu babapetahalile bao kaufela bakayemela puso ya Jehova kuya kuile? Kamba kana babañwi ku bona bakaba sina Adama ni Eva, ili bao kusina taba kuli nebapetahalile, nebasika sepahala ku Mulimu? Lipuzo ze, likatokwa kualabiwa, kono ka mukwa ufi?

15-16. (a) Batu kaufela bakaba lili ni kolo ya kubonisa busepahali bwabona ku Jehova? (b) Ki lika mañi zekaezahala hamulaho wa tiko ya mafelelezo yeo?

¹⁵ Satani ukatamiwa ka lilimo ze 1,000. Mwahalaa nako yeo, haana kukona kukelusa mutu ufi kamba ufi. Kono kwa mafelelezo a lilimo ze 1,000, Satani ukalukululwa mwa tolongo. Hasamulaho, ukalika kukelusa batu babapetahalile. Ka nako ya tiko yeo, batu kaufela babapetahalile fa lifasi bakaba ni kolo ya kubonisa hande fokusweu ka za haiba bakuteka libizo la Mulimu ni kuyemela bubusi bwahae kamba kutokwa. (Sin. 20:7-10) Zakaeza mutu ni mutu ka nako yakalikiwa ki Satani likatahisa kuli libizo lahae  liñolwe mwa buka ya bupilo lisatakulwi kamba kutokwa.

¹⁶ Batu babañwi ba palo yesazibahali, bakahana bubusi bwa Jehova, sina mwanaaezelize Adama ni Eva. Ki lika mañi zekaezahala ku bona? Sinulo 20:15 ilutaluseza kuli: “Mutu kaufela yanaasika fumanwa añozwi mwa buka ya bupilo anepelwa mwa lisa la mulilo.” Kaniti, bakwenuheli bao kaufelaa bona bakayundiswa kuya kuile. Kono buñata bwa batu babapetahalile bakasepahala mwa tiko ya mafelelezo yeo. Hasamulaho, mabizo abona akañolwa mwa buka ya bupilo asatakulwi.

17. Ki lika mañi zanaataluselizwe Daniele kuli nelika ezahala mwa nako yaluna? (Daniele 12:4, 8-10)

¹⁷ Kwatabisa luli kunahanisisa lika zekaezahala kwapili zeo! Nihakulicwalo, Daniele hape naataluselizwe ki lingeloi litaba zeñwi za butokwa zeama nako yaluna, yona “nako ya mafelelezo.” (Mubale Daniele 12:4, 8-10; 2 Tim. 3:1-5) Lingeloi nelitaluselize Daniele kuli: “Zibo yaniti ikaata.” Kaniti, bupolofita bobu mwa buka ya Daniele nebuka utwisiswa hande ki batu ba Mulimu. Lingeloi neliekelize kubulela kuli ka nako yeo  “babamaswe bakaeza zemaswe, mi hakuna yamaswe yakautwisisa.”

18. Ki lika mañi zekaezahala kwa batu babamaswe hona cwale-cwale fa?

¹⁸ Kacenu, kukona kubonahala inge kuli batu babamaswe habafiwi koto kabakala likezo zabona zemaswe. (Mala. 3:14, 15) Kono hona cwale-cwale fa, Jesu ukaatula batu babaswanisezwa kwa lipuli mi uka bakauhanya kwa batu babaswanisezwa kwa lingu. (Mat. 25:31-33) Batu babamaswe bao habana kupunyuha ñalelwa yetuna, mi habana kuzusiwa kuli bato pila mwa lifasi lelinca. Mabizo abona haana kuba mwa “buka ya kupulo” yebulezwi kwa Malaki 3:16.

19. Ki lika mañi zeluswanela kueza cwale, mi ki kabakalañi? (Malaki 3:16-18)

¹⁹ Ye ki yona nako ya kubonisa kuli halu babañwi ba batu babamaswe. (Mubale Malaki 3:16-18.) Jehova usweli kukubukanya batu baanga kuli ki ‘sicaba sahae tota,’ kamba batu ba butokwa ku yena. Kaniti luli, lubata kuba mwahalaa batu bao.

20. Ki sepiso mañi ya mafelelezo yanaafilwe Daniele, mi ki kabakalañi hamunyolezwi kubona sepiso yeo haitalelezwa?

²⁰ Kaniti luli, lupila mwa linako zetabisa. Kono mane lika zende hahulu nikufita lituha liezahala. Hona cwale-cwale fa, bumaswe kaufela bukafeliswa. Hasamulaho, Jehova ukataleleza sepiso yanaafile ku Daniele yeli: “Ukayema kuli ufiwe kabelo yahao kwa mafelelezo a mazazi.” (Dan. 12:13) Kana munyolezwi nako yeo Daniele hamoho ni balatiwa bamina ‘bakayema’ hape? Haiba ki cwalo, mueze momukonela kaufela kusepahala ku Mulimu ka nako ya cwale, mi mukaba ni buikolwiso bwa kuli libizo lamina likazwelapili kuba mwa buka ya Jehova ya bupilo.