Halunyakisiseñi mo Bibele ialabela lipuzo ze.

Likezo 24:15 ilutaluseza kuli kukaba ni “zuho ya babalukile ni babasika luka.” Babalukile ki batu bane bautwile Mulimu pili basika shwa kale; kacwalo, mabizo abona añozwi mwa buka ya bupilo. (Mala. 3:16) Batu babasika luka bakopanyeleza batu babashwile basikaba ni kolo yende ya kuituta ka za Jehova; kacwalo, mabizo abona haasika ñolwa mwa buka ya bupilo.

Joani 5:28, 29 ibulela za likwata zepeli za batu zeswana zebulezwi kwa Likezo 24:15. Jesu naabulezi kuli batu “bane baezize lika zende” bona “[bakazuhela] bupilo, mi bane baezize lika zemaswe [bakazuhela] katulo.” Batu babalukile nebaezize lika zende pili basika shwa kale. Bakazuhela bupilo bakeñisa kuli mabizo abona asañozwi mwa buka ya bupilo. Kono batu babasika luka bona nebaezize lika zemaswe pili basika shwa kale. Bakazuhela katulo. Mabizo abona haasika ñolwa kale mwa buka ya bupilo, mi bakaatulwa, kamba kutatubiwa kuli kubonwe haiba baswanela. Ka nako yeo, bakaba ni kolo ya kuituta ka za Jehova mi haiba bamuutwa, mabizo abona akañolwa mwa buka ya bupilo.

Sinulo 20:12, 13 italusa kuli batu kaufela babaka zusiwa bakatokwa kumamela “zeñozwi mwa miputo,” ili kutalusa milao yeminca yaka lufa Mulimu mwa lifasi lelinca. Batu babasike bamamela milao yeo, bakayundiswa.—Isa. 65:20.

Daniele 12:2 neipolofitile kuli batu babañwi babashwile “bakazuhela bupilo bobusa feli, mi babañwi bona bazuhele kushubulwa ni kushwaulwa kuya kuile.” Timana ye italusa za katulo ya mafelelezo yebaka fiwa batu babaka zusiwa kwa bafu—babañwi bakazuhela “bupilo bobusa feli” mi babañwi bona bakazuhela “kushwaulwa kuya kuile.” Kacwalo, kwa mafelelezo a lilimo ze 1,000, batu babañwi bakafiwa bupilo bobusa feli mi babañwi bona bakayundiswa kuya kuile.—Sin. 20:15; 21:3, 4.

Halunyakisiseñi mutala wo. Muinelo wa likwata zepeli za batu babaka zusiwa kwa bafu ukona kubapanywa kwa muinelo obakona kuipumana ku ona bazwahule bababata kupila mwa naha isili. Babalukile baswana sina batu babafilwe pampili ya tumelezo yebalumeleza kusebeleza kamba kupila mwa naha isili, ili yeebatusa kuba ni liswanelo zeñwi ni kubafa tukuluho. Kono babasika luka bona baswana sina bazwahule babafilwe pampili ya tumelezo yebalumeleza kuina mwa naha isili ka nakonyana kamba sina bapoti. Bazwahule babacwalo bakatokwa kulatelela milao kaufela ya mwa naha yeo pili basika lumelezwa kuzwelapili kupila mwa naha yeo. Ka mukwa oswana, batu babasika luka babaka zusiwa kwa bafu bakatokwa kumamela milao ya Jehova ni kubonisa kuli balukile ilikuli bazwelepili kupila mwa Paradaisi. Mi kusina taba ni mufuta wa pampili ya tumelezo yebafilwe bazwahule ka nako yebakena mwa naha isili, hamulaho wa nako, muuso wakona kulumeleza babañwi kuba bayahi ba naha yeo kono babañwi bona bakona kulundulwa mwa naha. Katulo yekaezwa ki ba muuso ikaitinga fa moya obabonisa batu bao ni likezo zabona mwa naha yenca yeo. Ka mukwa oswana, katulo ya mafelelezo yekafiwa ku babaka zusiwa kwa bafu ikaitinga fa busepahali bwabona ni likezo zabona mwa lifasi lelinca.

Jehova ki Mulimu yanani mukekecima mi hape ulata katulo yelukile. (Deut. 32:4; Samu 33:5) Ukabonisa lilato lahae ka kuzusa batu babalukile ni babasika luka kwa bafu. Kono ka nako yeswana, ukabata kuli batu bao bazwelepili kumamela likuka zahae zepahami ka za lika zelukile ni zesika luka. Ki batu feela baba mulata ni babapila ka likuka zahae babaka lumelezwa kuzwelapili kupila mwa lifasi lelinca.