Haiba haki cwalo, mwendi semuiponezi batu babañwi hababoniswa sitoyo mwa linzila zeshutana-shutana. Haluteelezanga kwa makande, luutwanga ka za lipiho za batu babatoile batu babañwi kabakala kuli bazwa kwa naha isili, banani mubala wa litalo oshutana ni wabona, kamba kabakala kuli ki ba kalombe. Kabakala lipiho zeo, linaha zeñata litomanga milao yelwanisa likezo za sitoyo.

Kutoiwa ki mutu yomuñwi kutahisanga kuli mutu yatoilwe ni yena atoye babañwi. Mi muinelo wo utahisanga kuli sitoyo sisike safela.

Mwendi mukile mwaketululwa ki batu babañwi, kutoiwa kabakala komusimuluha, kushubulwa, kutapaulwa, kamba kubembiwa. Kono hape sitoyo siboniswanga mwa linzila zeñwi zemaswe hahulu. Hañata sitahisanga kuli batu baeze lika zesituhu zecwale ka kutolisa babañwi, kusinya maluwo a babañwi, kuholofaza babañwi, kuswala mutu likalala, kubulaya mutu yomuñwi, kamba mane kubulaya batu ba mushobo usili.

Mwa magazini ye, lukanyakisisa lipuzo zelatelela mi hape lukanyakisisa lika zekona kulutusa kuambuka kuba ni sitoyo:

• Ki kabakalañi hakunani hahulu sitoyo mwa lifasi?

• Lukona kufeza cwañi sitoyo?

• Kana kukaba ni nako yekusike kwaba ni sitoyo kuya kuile?