ZEKONA KULUTUSA KUFELISA SITOYO
4 | Mulimu Wakona Kumitusa Kufelisa Sitoyo
Zeiluta Bibele:
“Muselo wa moya ki lilato, tabo, kozo, pilu-telele, sishemo, bunde, tumelo, bunolo, buiswalo.” —MAGALATA 5:22, 23.
Zelitalusa Liñolo:
Lwakona kufelisa sitoyo ka tuso ya Mulimu. Moya wahae okenile wakona kulutusa kuba ni tulemeno totunde tolusakoni kuba ni tona ka maata aluna. Kacwalo, kufita kuitinga fa maata aluna kuli luambuke sitoyo, lutokwa kuitinga ku Mulimu kuli alutuse. Haiba lueza cwalo, lukaikutwa sina mwanaaikutwezi muapositola Paulusi yanaañozi kuli: “Nifumana maata mwa lika kaufela ka yena yanifa maata.” (Mafilipi 4:13) Kaniti, lukakona kubulela kuli: “Tuso yaka izwa ku Jehova.”—Samu 121:2.
Zemukona Kueza:
“Jehova ucincize bupilo bwaka, nenili mutu wa mifilifili kono cwale senili mutu wa kozo.”—BO WALDO
Mulapele ku Jehova, mi mumukupe kuli amife moya wahae okenile. (Luka 11:13) Mumukupe kuli amituse kuba ni tulemeno totunde. Muitute zeibulela Bibele ka za tulemeno totukona kumitusa kuambuka kuba ni sitoyo, inge cwalo lilato, kozo, pilu-telele, ni buiswalo. Muikataze kubonisa tulemeno to mwa bupilo bwamina. Mi muswalisane ni batu babanani tulemeno totuswana. Batu bao bakona kumitusa “kuba ni lilato ni misebezi yeminde.”—Maheberu 10:24.
Hape Mwendi Mwakona Kutabela Litaba Ze
MUZUHE!
Zeibulela Bibele ka za Mifilifili
Mulimu unga cwañi mifilifili? Kana batu ba mifilifili bakona kucinca?
