ZEKONA KULUTUSA KUFELISA SITOYO
2 | Musike Mwakutiseza Babañwi Bumaswe
Zeiluta Bibele:
“Musike mwakutiseza mutu bumaswe. . . . Mueze ka momukonela, kaufela kuli mupilisane ka kozo ni batu kaufela. Musike mwakutiseza bumaswe, . . . kakuli kuñozwi kuli: “‘Ki na yakutiseza bumaswe; ki na yakakutiseza,’ kubulela Jehova.”—MAROMA 12:17-19.
Zelitalusa Liñolo:
Kaufelaa luna lwahalifanga halufoselizwe, kono Mulimu hatabeli kulubona inze lukutiseza babañwi bumaswe. Mane yena ulususueza kubonisa pilu-telele kabakala kuli onacwale cwale fa, ukafelisa bumaswe kaufela.—Samu 37:7, 10.
Zemukona Kueza:
Kukutisezana bumaswe kutahisanga kuli sitoyo sizwelepili. Kacwalo, haiba mutu yomuñwi umifoselize kamba umiezize maswe, musike mwamukutiseza bumaswe. Mubonise buiswalo ni kuunga muhato okatahisa kozo. Mwa miinelo yemiñwi, lwakona kuambuka matata ka kuswalela mutu yalufoselize. (Liproverbia 19:11) Kono fokuñwi mwendi mukatokwa kuunga muhato omuñwi kuli mutatulule butata bo. Ka mutala, haiba ki mina babafoselizwe, mwakona kuyo biha taba yeo kwa polisi kamba kwa batu babañwi babazamaisa mwa silalanda samina.
Mutu yazwelapili kubonisa sitoyo ukakena mwa butata
Kono mukona kuezañi haiba kuba taata kufumana nzila yemukona kutatulula ka yona butata bo ka kozo? Kamba kucwani haiba semulikile kutatulula butata bo ka kozo kono kupalile? Musike mwakutiseza mutu yamifoselize bumaswe. Kueza cwalo kukatahisa kuli butata buzwelepili. Kono muambuke kutoya mutu yo. Mwakona kusepa kuli Mulimu ukatatulula butata bo. ‘Muitinge ku yena, mi uka mitusa.’—Samu 37:3-5.
Hape Mwendi Mwakona Kutabela Litaba Ze
BIBELE YACINCANGA BUPILO BWA BATU
Nenibata Kufelisa Saluluti
Bo Rafika nebakeni mwa sikwata sesiñwi ka mulelo wa kuli bafelise saluluti. Kono nebaitutile za sepiso yefumaneha mwa Bibele ya kuli Mubuso wa Mulimu ki ona okatahisa kuli batu bapile mwa kozo ni kueza babañwi hande.
LIKALABO KWA LIPUZO ZA BIBELE
Bibele Ibulelañi ka za Kukutisa Misuha?
Mwa Bibele kunani likelezo zende zesetusize batu babañata kutuhela moya wa kulata kukutisa misuha.
