Mwa Bibele, kunani litaba zeñata za baana ni basali babañata bane bakopani ni miinelo yemiñata ili yene bakatalize mwa munahano. Halunze lubala mitala yabona, lukalemuha kuli yomuñwi wa ku bona naanani maikuto aswana ni aluna.

Kaufelaa luna lubata kuli batu babañwi bautwisise moluikutwela. Kono sihulu lukona kutabela kuli baluutwisise haiba lukatazwa ki butuku bwa mwa munahano. Haiba lubala Bibele, lukafumana mitala ya batu bane baikutwa sina moluikutwelanga. Haluka lemuha kuli batu babañwi nebakopani ni muinelo olukopana ni ona, haluna kuikutwa hahulu buinosi muta lukenelwa ki lipilaelo ni minahano yemaswe.

• Mwa Bibele, kunani litaba zeñata zene babulezi batu babañwi bane baikutwile kuziyeleha hahulu ni kuikutwa kuli hakuna yanaakona kubatusa. Kana mukile mwaikutwa kuli hamusa kona kuzwelapili kuitiisa? Mushe, Elia, ni Davida ni bona nebaikutwile cwalo.—Numere 11:14; 1 Malena 19:4; Samu 55:4.

• Bibele ilutaluseza za musali yabizwa Anna ‘yanaaswabile hahulu’ bakeñisa kuli naasakoni kupepa bana mi hape naasheununwanga hahulu ki muhalizo wahae.—1 Samuele 1:6, 10.

• Bibele ilutaluseza za muuna yabizwa Jobo yanaakopani ni miinelo yeswana ni yelukopana ni yona kacenu. Nihaike kuli naanani tumelo yetiile ku Jehova, ka nako yeñwi naaikutwile kuziyeleha hahulu mi mane naabulezi kuli: “Nitoile bupilo bwaka; hanisa lata kupila.”—Jobo 7:16.

Kunyakisisa zenetusize batanga ba Jehova kufelisa maikuto abona amaswe kwakona kulutusa ni luna kuziba molukona kuitiiseza halukenelwa ki minahano yemaswe.