Lwakona kuikutwa hahulu bumaswe haiba mulikanaa luna ukula butuku bwa mwa munahano. Kono lwakona kubonisa kuli lwamuisa pilu ka kumutusa kutiyela butuku bwakula. Ka mukwa ufi?

‘Mulukela kuba babaakufa kuteeleza.’—JAKOBO 1:19.

Nzila yeñwi yende yemukona kutusa ka yona mulikanaa mina ki kuteeleza ka tokomelo habata kubulela. Hamuswaneli kuikutwa kuli mutokwa kualaba lika kaufela zabulela. Uswanela kulemuha kuli mwateeleza mi mwamuisa pilu. Muutwisise mwaikutwela mi musike mwamuatula. Muhupule kuli wakona kubulela lika asika nahanisisa ili zakona kuinyaza hasamulaho.—Jobo 6:2, 3.

“Mubulele ka nzila yeomba-omba.” —1 MATESALONIKA 5:14.

Mulikanaa mina wakona kubilaela kamba kuba ni maikuto a kuli haki wa butokwa. Kuli mumutuse kulemuha kuli mwamuisa pilu, mwakona kumuomba-omba ni kumususueza nihaikaba kuli hamuzibi luli zemuswanela kubulela.

“Mulikani wa niti ubonisa lilato ka nako kaufela.”—LIPROVERBIA 17:17.

Mumutuse. Mwa sibaka sa kunahana feela kuli mwaziba momukona kutuseza mulikanaa mina, mumubuze kuli amitaluseze zemukona kueza. Haiba kumubela taata kutalusa lika zatokwa, mufe akalezo yekona kutusa, inge cwalo  kuzamaya-zamaya inze muishumusa. Kamba mwakona kumukupa kuli muyo mulekela lika zeñwi, kumukeniseza fa sibaka sahae, kamba kumuezeza lika zeñwi.—Magalata 6:2.

“Mube ni pilu-telele.” —1 MATESALONIKA 5:14.

Mulikanaa mina ka linako zeñwi haana kulukuluha kumitaluseza litaba. Mukolwise mulikanaa mina kuli mukatabela kumuteeleza haka ikutwa kuli watabela kumitaluseza. Bakeñisa kuli wakula, mulikanaa mina wakona kueza lika kamba kubulela lika zekona kumiutwisa butuku. Wakona kuhana kueza lika zene mubata kueza hamoho kamba mwendi kufilikanywa ki nto yeñwi. Mube ni pilu-telele ni kutwisiso hamunze mumutusa.—Liproverbia 18:24.

“Niezanga monikonela kaufela kuli mulikanaa ka aniinge kuba mulikani yakona kusepa. Nihaike kuli hanikoni kufelisa matata ahae, niezanga monikonela kaufela kuteeleza ku zabulela. Ka linako zeñwi utokwanga feela mutu yakona kumuteeleza ka tokomelo, mi hasamulaho uikutwanga hande.”—Bo Farrah, a bao mulikanaa bona unani lipilaelo ni minahano yemiñata ili yemupalelwisanga kuca lico.

“Yomuñwi wa balikani baka unani sishemo mi wanisusuezanga. Naanimemile kwa ndu yahae kuyo ca ni yena sico. Naanani silikani, mi nto yeo neitahisize kuli kunibele bunolo kumutaluseza moniikutwela. Neniikutwile kususuezwa luli!”—Bo Ha-eun, babakula butuku bwa kuba ni minahano yemiñata.

“Ki kwa butokwa kuba ni pilu-telele. Bo musalaa ka habaezanga lika zeninyemisa, nihupulanga kuli nto yetahisanga kuli baeze cwalo ki kabakala kuli bakula. Kuezanga cwalo kunitusanga kusahalifa ni kubaisa pilu.”—Bo Jacob, ili bao bo musalaa bona bakula butuku bwa kuba ni minahano yemiñata.

“Bo musalaa ka banitusanga hahulu mi baniomba-ombanga. Hanikenelwanga hahulu ki lipilaelo, haba nihapelezangi kueza lika zenisa lati. Mi haba nihapelezangi kueza nihaiba nto yebalata hahulu. Ki ba butokwa hahulu ku na bakeñisa kuli banani bufani mi habana buitati.”—Bo Enrico, babakula butuku bwa kuba ni lipilaelo.