Taba yende ya Mubuso wa Mulimu isweli yakutazwa mwa lifasi kaufela, sina feela mwanaapolofitezi Jesu. (Mateu 24:14) Buka ya mwa Bibele ya Daniele ilutaluseza kuli Mubuso wo ki mulonga wa Mulimu. Mwa kauhanyo 2 ya buka ye, kunani bupolofita bobutalusa za mibuso kamba milonga ya batu yemaata yebile teñi kuzwa kwamulaho, kukala ka Babilona wa kwaikale kuto fita mwa linako za luna. Ka kubonisa lika zekaezahala kwapili, timana 44 ibulela cwana:

“Mulimu wa lihalimu ukatoma mubuso osike wasinyiwa nikamuta. Mi mubuso wo hauna kushimbulukela kwa sicaba sisili. Ukatuba ni kufelisa mibuso ye kaufela, mi ki ona feela okaba teñi kuya kuile.”

Bupolofita bo ni bupolofita bobuñwi bwa mwa Bibele bubulela za lika zeuka eza Mubuso wa Mulimu kwapili, ili kuyola mibuso kaufela ya batu ni kutisa kozo kwa batu babaka pila fa lifasi. Bupilo bukaba cwañi Mubuso wa Mulimu hase ukalile kubusa? Halunyakisiseñi lisepiso zeñwi zende zeuka taleleza Mubuso wa Mulimu.

• HAKUSANA KUBA NI LINDWA

  Samu 46:9: “[Mulimu] ufelisa lindwa mwa lifasi kamukana. Uloba buta ni kupumaka lilumo; ucisa likoloi za ndwa ka mulilo.”

  Munahane feela molikona kubela lifasi kambe masheleñi kaufela ni yeloseli kamba zibo yeitusiswa kwa kupanga lilwaniso liitusiswa kwa kutusa batu kufita kubabulaya! Sepiso yeo ikatalelezwa luli Mubuso wa Mulimu hauka busa.

• HAKUSANA KUBA NI MATUKU

  Isaya 33:24: “Hakuna yayahile mwa naha yakali: ‘Nakula.’”

  Munahane feela mokukabela mwa lifasi muta batu habasana kukula matuku a pilu, kansa, malaria, kamba matuku amañwi cwalo. Haluna kutokwa lipatela ni milyani. Kwapili, batu babakapila fa lifasi bakaba ni buikangulo bobupetehile.

• HAKUSANA KUBA NI KUTAELA KWA LICO

  Samu 72:16: “Kukaba ni bubeke bobuñata mwa lifasi; bukaba bobuñata hahulu fahalimwaa malundu.”

  Mwa lifasi kukaba ni lico zeñata zekakwana batu kaufela. Hakusana kuba ni tala kamba butuku bobutiswa ki tala.

• HAKUSANA KUBA NI LIKA ZEUTWISA BUTUKU, MASWABI, NI LIFU

  Sinulo 21:4: “[Mulimu] ukatakula miyoko kaufela kwa meeto abona, mi lifu halisana kubateñi, nihaiba kutahelwa ki maswabi kamba kulila kamba kuutwa butuku. Zapili lifelile.”

   Taba yeo ibonisa kuli batu bakapila kuya kuile inze bapetehile mwa paradaisi fa lifasi! Sepiso yeo ki yona yalusepisa Mubupi waluna yalilato, yena Jehova Mulimu.

Kana lisepiso zelunyakisisize likatalelezwa luli kamba halina kutalelezwa? Nihaike kuli batu babañata bakona kulumela kuli lisepiso za Mulimu zebulezwi mwa Bibele ki zende luli, kutaata ku bona kuutwisisa taba ya kupila kuya kuile. Taba yeo haikomokisi, kakuli hakuna mutu yakile apila bupilo bobucwalo kuli akone kulutaluseza mokuutwahalela kupila kuya kuile.

Batu bazwezipili kukopana ni lika zemaswe zetiswa ki sibi ni lifu ka nako yetelele, zecwale ka matuku, manyando, ni miinelo yemiñwi yetaata kuli mane habasakona kuutwisisa kuli kupila bupilo bobusina manyando kwakonahala. Kono Mubupi waluna Jehova Mulimu naasika lela kuli batu bapile cwalo.

Kuli lukone kuba ni buikolwiso bwa kuli lika zelusepisizwe kaufela likatalelezwa, Mulimu ulubulelela cwana ka za linzwi lahae: “Halina kukutela ku na lisika eza sesiñwi, kono likapeta nto kaufela yenilata, mi likakondisa luli seni lilumezi.”—Isaya 55:11.

Mwa Bibele, Jehova utaluswa kuli ki Mulimu “yasakoni kupuma.” (Tite 1:2) Bakeñisa kuli Mulimu ulusepisize kuli lika zende ze kaufela likaezahala kwapili, ki kokunde kuipuza lipuzo zelatelala: Kana kwakonahala kuli batu bapile kuya kuile mwa Paradaisi yesepisizwe fa lifasi? Luswanela kuezañi kuli lutoikola lika zalusepisize Mulimu? Mukafumana litaba zekamitusa kuziba likalabo za lipuzo zeo mwa litaba zelatelela.