BATU

Zeibulela Bibele: Mulimu ‘naasika bupa feela lifasi kusina mulelo, kono naa liezize kuli liyahiwe.’ —ISAYA 45:18.

PULANETI YA LIFASI

Zeibulela Bibele: “Lusika loluñwi lwaya, mi lusika loluñwi lwataha, kono lifasi liina kuya kuile.” —MUEKELESIA 1:4.

ZEITALUSA TABA YEO: Ka kuya ka Bibele, lifasi halina kusinyiwa ni kamuta mi kamita likayahiwa. Kacwalo, taba ya kuli lifasi likafela italusañi?

MUNYAKISISE TABA YE: Bibele ibapanya kufela kwa lifasi le ku zeneezahezi mwa mazazi a Nuwe. Ka nako yale, lifasi ‘nelitezi mifilifili.’ (Genese 6:13) Nihakulicwalo, Nuwe neli mutu yalukile. Kacwalo, Mulimu naapilisize Nuwe ni lubasi lwahae, kono naayundisize batu babamaswe ka muunda. Ka kuama ku zeneezahezi mwa mazazi a Nuwe, Bibele ibulela kuli: “Lifasi la nako yani nelisinyizwe hane likwahezwi ki mezi.” (2 Pitrosi 3:6) Ale neli ona mafelelezo a lifasi ka nako yani. Kono ki lika mañi zenefelisizwe? Nesi lifasi, batu babamaswe ki bona bane bayundisizwe. Kacwalo, Bibele haibulela ka za kufela kwa lifasi, haitalusi kusinyiwa kwa pulaneti ya lifasi. Kono italusa za kufeliswa kwa batu babamaswe baba mwa lifasi ni lika zeñwi zemaswe zetezi mwa lifasi.

MIINELO YETAATA NI BUMASWE

Zeibulela Bibele: “Kusiyezi feela nakonyana, mi babamaswe habasana kubateñi; ukatalima fone bainzi, kono habana kufumaneha fateñi. Kono babaishuwa bakaluwa lifasi, mi bakataba hahulu kabakala kozo yetuna.”—SAMU 37:10, 11.

ZEITALUSA TABA YEO: Muunda wa mwa linako za Nuwe neusika felisa bumaswe kuya kuile. Hamulaho wa Muunda wa Nuwe, batu babamaswe nebatahisize kuli batu fa lifasi basike bapila ka kozo. Nihakulicwalo, hona cwale-cwale fa, Mulimu ukafelisa bumaswe. Walisamu naabulezi kuli: “Babamaswe habasana kubateñi.” Mulimu ukafelisa bumaswe ka kuitusisa Mubuso wahae wa kwa lihalimu ili okabusa batu babalukile.

MUNYAKISISE TABA YE: Kana babusi ba lifasi bakatabela kubusiwa ki Mubuso wa Mulimu? Bibele ibonisa kuli habana kutabela. Ka butoto, bakalwanisa Mubuso wa Mulimu. (Samu 2:2) Ki lika mañi zekaezahala? Mubuso wa Mulimu ukafelisa mibuso kaufela ya batu, mi “ki ona feela okaba teñi kuya kuile.” (Daniele 2:44) Kono ki kabakalañi lipuso za batu halitokwa kufeliswa?

Zeibulela Bibele: “Mutu yazamaya haakoni nihaiba kuetelela mihato yahae.”—JEREMIA 10:23.

ZEITALUSA TABA YEO: Batu nebasika bupiwa kuli baipuse ili bona. Hababusi hande batu mi habafelisi matata ebakopana ni ona batu.

MUNYAKISISE TABA YE: Piho yeñwi ibonisa kuli lipuso za batu lipalezwi “kutatulula matata acwale ka bubotana, tala, matuku, likozi za ka taho, ni lindwa kamba mifilifili.” Piho izwelapili kubulela kuli: “Batu babanwi. . . balumela kuli kutokwa kuba feela ni mubuso ulimuñwi wa lifasi okabusa lifasi kaufela, mi ki ona okona kufelisa lika zemaswe zeo.” Nihakulicwalo, mibuso ya lifasi kaufela niha neika swalisana kuba mubuso ulimuñwi, lifasi nelika zwelapili kubusiwa ki batu babasika petahala ili babasa koni kufelisa miinelo yetaata yebulezwi fahalimu. Mubuso wa Mulimu ki ona feela onani maata a kufelisa miinelo yemaswe yeo kuya kuile.

Kacwalo, ka kuya ka Bibele, batu babande habaswaneli kuikalelwa kamba kusaba taba ya kuli lifasi lituha lifela, ili kutalusa miinelo yemaswe. Kono baswanela kutabela kakuli lifasi lelimaswe le, likayoliswa ki lifasi lelinca la Mulimu!

Taba yeo ikaezahala lili? Mwa taba yetatama, lukanyakisisa kalabo ya Bibele kwa puzo yeo.