Luituta za Mulimu Kwa Bapolofita
Mwa linako za kwamulaho, Mulimu naaitusisanga bapolofita kuli bataluseze batu litaba zahae. Kana litaba zeo zakona kulutusa kuziba zeluswanela kueza kuli lufumane limbuyoti za Mulimu? Eni. Halunyakisiseñi zeluituta kwa bapolofita babalaalu bane basebelelize Mulimu ka busepahali.
ABRAHAMA
Mulimu haketululi mi ubata kufuyaula batu kaufela.
Mulimu naasepisize mupolofita Abrahama kuli: “Mabasi kaufela a lifasi akafuyolwa ka wena.”—Genese 12:3.
Zeluituta. Mulimu ululata hahulu mi ubata kuli batu kaufela, ili baana, basali, mane hamohocwalo ni banana babamuutwa, bafumane limbuyoti zahae.
MUSHE
Mulimu unani makeke mi utusanga batu kaufela babaeza kataata kuli bamuzibe.
Yamaata kaufela naafile mupolofita Mushe maata a kueza limakazo zetuna. Nihakulicwalo, Mushe naalapezi kuli: “Nizibise linzila zahao, kuli nikuzibe ni kuli nizwelepili kushemubiwa ki wena.” (Exoda 33:13) Mulimu naatabisizwe hahulu ki zanaakupile Mushe, kacwalo, amufa zibo yetuna ni kutwisiso kuli azibe linzila ni butu bwahae. Ka mutala, Mushe naafitile fa kuziba kuli Mubupi waluna ki “Mulimu yanani makeke ni mukekecima.”—Exoda 34:6, 7.
Zeluituta. Mulimu ubata kufuyaula batu kaufela, ili baana, basali, ni banana, haiba feela baeza mobakonela kaufela kuli bamuzibe. Mwa Mañolo Akenile, Mulimu ulutaluseza moluswanela kumulapelela mi hape ulutaluseza kuli ubata luli kulufuyaula.
JESU
Jesu naabonisize makeke ka kufolisa matuku kaufela
Lwakona kufuyaulwa ki Mulimu kuya kuile haiba luituta za Jesu.
Halubala Linzwi la Mulimu, lwakona kuituta litaba zeñata ka za bupilo bwa Jesu ni lituto zanaalutile. Mulimu naafile Jesu maata a kueza limakazo zetuna, zecwale ka kufolisa libofu, bosusu, ni lihole. Jesu mane naazusize ni bane bashwile. Ka kueza cwalo, Jesu naabonisize zakaezeza batu Mulimu kwapili. Naatalusize zatokwa kueza mañi ni mañi waluna kuli ato ikola limbuyoti zeo. Naaize: “Kuli bafumane bupilo bobusa feli, batokwa kuzwelapili kukuziba, wena Mulimu anosi wa niti, ni yene ulumile, yena Jesu Kreste.”—Joani 17:3.
Jesu naanani mukekecima, musa, ni sishemo. Baana, basali, banana ni babahulu nebatile ku yena hanaa bamemile kuli: “Muitute ku na, kakuli ninani musa mi niwile pilu, mi mukakatuluha.” (Mateu 11:29) Ka kushutana ni batu babañwi bane banyandisa basali ka nako yeo, Jesu yena naabonisize sishemo kwa basali ni kubakuteka.
Zeluituta. Jesu naabonisize lilato lelituna kwa batu, mi naatomile mutala omunde hahulu wa moluswanela kupilisanela ni babañwi.
JESU HAKI MULIMU
Mañolo Akenile aluluta kuli “ku luna kunani feela Mulimu alimuñwi” ni kuli Jesu Kreste naalumilwe feela ki Mulimu. (1 Makorinte 8:6) Jesu naabulezi ka kuutwahala hande kuli Mulimu ki yomutuna ku yena ni kuli Mulimu naamulumile fa lifasi.—Joani 11:41, 42; 14:28. *
^ para. 17 Kuli muzibe zeñata ka za Jesu Kreste, mubale likalulo 8 ni 9 za broshuwa ya Real Faith—Your Key to a Happy Life yefumaneha fa webusaiti ya www.pr418.com.
