Munahane feela mone bukabela bupilo kambe fa lifasi hakuna lizazi. Lizazi litahiseza likota mufutumala olitusa kushoshela matali, kutubula lipalisa, kubeya miselo, ni kutahisa lipeu. Mufutumala wo hape utusa likota kuanya mezi kuzwelela mwa mubu ka kuitusisa mibisi, mi mezi ao aya kwa matali ni kuya mwahalimu hamulaho.

Bakeñisa kuli Mulimu unani sishemo, unelisanga pula yetahisanga kuli lika zelucezi limele ni kutahisa lico. Mulimu ulunelisezanga pula kuzwelela kwahalimu, ili yelutahisezanga lico zeshutana-shutana zeluikolanga kuca ni kuba ni tabo.

Baana babañata babanani mabasi babilaezwanga ki mobaka fumanela mabasi abona lico zebatokwa ni liapalo. Mañolo abulela kuli: “Hamutalimisise linyunywani za lihalimu; halicali peu kamba kukutula kamba kukubukanya mwa mabulukelo, kono Ndataa mina ya kwa lihalimu walifepa. Kana mina hamu ba butokwa hahulu kufita linyunywani?”—Mateu 6:25, 26.

“Muitute kwa mutala wa mwahulela mayangayanga a mwa naheñi . . . ; kono namibulelela nili, nihaiba yena [Mulena] Salumoni mwa kanya yahae kaufela, naasika kaba sina leliñwi laona. Cwale haiba Mulimu uapesa cwalo limela za mwa naheñi . . . , kana hana kumiapesa hahulu ni kufita?”—Mateu 6:28-30.

Bakeñisa kuli Mulimu wakona kulutusa kufumana lico ni liapalo, taba yeo ibonisa kuli wakona kulutusa kufumana lika kaufela zelutokwa mwa bupilo. Haiba luikataza kueza zatokwa Mulimu, wakona kulutusa kufumana lico kamba kulutusa kufumana musebezi oka lutusa kuleka zelutokwa.—Mateu 6:32, 33.

Halunyakisisa lika zalufile Mulimu zecwale ka lizazi, pula, linyunywani, ni lipalisa, lwaswanela luli kulata Mulimu. Mwa taba yetatama, lukanyakisisa nzila yaambolanga ka yona Mubupi waluna ni batu.