Kana mubalile ka tokomelo limagazini za Tawala ya Mulibeleli za silimo se? Hamubone nji mwakona kualaba lipuzo zelatelela:

“Kucinca munahano wamina” kuamañi? (Maro. 12:2)

Hakuami kueza feela lika lisikai zende mwa bupilo bwamina. Kono kukopanyeleza kuitekula kuli muzibe mutu yemuli yena mwahali ni kueza licinceho ka momukonela kaufela kuli mupile ka likuka za Jehova.—w23.01, make. 8-9.

Lukona kubonisa cwañi kuli lunani mubonelo oswanela halubona zeezahala mwa lifasi?

Lubatanga kuziba mo lika zeezahala mwa lifasi litaleleleza bupolofita bwa mwa Bibele. Kono luswanela kuambuka mukwa wa kunuhelela, ili nto yekona kutahisa kuli kusike kwaba ni swalisano, mi lukaeza hande haiba litaba zeluambola litoma fa litaba zehatisizwe ki kopano ya Jehova. (1 Makor. 1:10)—w23.02, like. 16.

Kolobezo ya Jesu ishutana cwañi ni ya balateleli bahae?

Jesu naapepezwi mwa sicaba sene siineezi kale ku Mulimu; kacwalo, naasatokwi kuineela ku Jehova sina moluezezanga luna. Jesu naali mutu yapetahalile, ili yasina sibi. Naasatokwi kubakela libi.—w23.03, like. 5.

Ki lika mañi zeluswanela kueza kuli lufe babañwi kolo ya kualaba kwa mikopano?

Likalabo zaluna liswanela kuba zekuswani, kuli lufe babañwi kolo ya kualaba. Haluswaneli kubulelanga lisupo zeñata halualaba. Fo lukafa babañwi kolo ya kualaba.—w23.04, like. 23.

“Nzila Yekenile” yebulezwi kwa Isaya 35:8 iama kwañi?

Nzila ya swanisezo ye sapili neiama kwa nzila yene baitusisize Majuda hane bakutela kwa naha yahabo bona kuzwa kwa Babilona. Kono kucwañi ka za lilimo za cwanoñu fa? Lilimo zeñata-ñata pili silimo sa 1919 sisika fita kale, nekuezizwe musebezi wa kulukisa nzila—kutoloka ni kuhatisa Libibele ki yeñwi ya misebezi yeneezizwe. Batu ba Mulimu bazwezipili kuzamaya mwa “Nzila Yekenile” kakuli ibatusa kuba mwa paradaisi ya kwa moya mi ika batusa kufumana limbuyoti zeñata zekatahiswa ki Mubuso wa Mulimu kwapili.—w23.05, make. 15-19.

Liproverbia kauhanyo 9 ilufa kelezo ka za basali bafi bababeli ba swanisezo?

Buka ya Liproverbia ibulela za “musali wa sikuba” ili yo memo yahae ilibisa “mwa libita” ni za “butali bwa niti,” bobuswaniseza musali, ili yo memo yahae ilibisa kwa “nzila ya kutwisiso” ni kwa bupilo. (Liprov. 9:1, 6, 13, 18)—w23.06, make. 22-24.

Mulimu naabonisize cwañi buikokobezo ni kutwisiso hanaasebelisana ni Lota?

Jehova naataluselize Lota kuli azwe mwa Sodoma ni kusabela kwa malundu. Kono Lota hanaaikupezi kuli asabele mwa tolopo ya Zoari, Mulimu naamulumelelize kueza cwalo.—w23.07, like. 21.

Ki lika mañi zakona kueza musali yanyezwi haiba muunaa hae unani mukwa wa kubuha maswaniso a mapunu?

Musali yo uswanela kuhupula kuli haki mulatu wahae. Uswanela kueza mwakonela kaufela kuisa pilu kwa silikani sahae ni Mulimu ni kunahanisisa litaba za mwa Bibele za basali bane balembwalile, ili bane baomba-ombilwe ki yena. Wakona kutusa muunaa hae kutokolomoha miinelo yekona kutahisa kuli abuhe maswaniso a mapunu.—w23.08, make. 14-17.

Kuba ni kutwisiso kukona kulutusa cwañi kuba bababunolo haiba litaba zelulumela lilwaniswa?

Haiba lubuziwa puzo kamba haiba litaba zelulumela lilwaniswa, luswanela kuunga taba yeo sina kolo ya kuziba zanahana mutu yomuñwi kamba zalumela. Mi kueza cwalo, kuka lutusa kualaba ka nzila yebunolo.—w23.09, like. 17.

Lukona kuitutañi ku Maria ka za mwakubela ni maata?

Maria hanaataluselizwe kuli naakaba mahe Mesia, naatusizwe ki babañwi kuba ni maata. Lingeloi Gabriele ni Elizabeta nebasusuelize Maria ka kuitusisa Mañolo. Ni luna, mizwale ni likaizeli baluna bakona kulutusa kuba ni maata.—w23.10, like. 15.

Jehova ukona kualaba cwañi litapelo zaluna?

Usepisa kuli ukateeleza kwa litapelo zaluna mi ukanyakisisa moliswalisanela ni mulelo wahae. (Jer. 29:12) Nihaike kuli ukona kualaba likupo zeswana ka linzila zeshutana, kamita uka lutusa.—w23.11, make. 21-22.

Maroma 5:2 ibulezwi za “Sepo”, kono ki kabakalañi haibulezwi hape mwa timana 4?

Haiba mutu ateeleza kwa taba yende, wakona kuba ni sepo ya kuto ikola bupilo mwa paradaisi fa lifasi. Kono haiba akopana ni nyandiso, kuitiyela, ni kulemuha kuli utabisa Mulimu, sepo yahae yakona kutiya mi ikaba ya luli ku yena.—w23.12, make. 12-13.