1. Ki kabakalañi halukona kubulela kuli Abrahama naakozwi kuli naakafiwa zanaasepisizwe?

 JEHOVA naasepisize mulikanaa hae Abrahama kuli macaba kaufela a lifasi naakafuyaulwa ka mwanaa hae. (Gen. 15:5; 22:18) Bakeñisa kuli Abrahama naanani tumelo yetiile ku Mulimu, naakozwi kuli sepiso ya Mulimu neika talelezwa. Nihakulicwalo, Abrahama ni musalaa hae nebasina mwana niha naanani lilimo ze 100 mi musalaa hae naanani ze 90. (Gen. 21:1-7) Niteñi, Bibele ibulela kuli: “[Abrahama] aba ni tumelo kabakala sepo yahae, kuli naakaba ndatahe macaba amañata kulikana ni sene sibulezwi.” (Maro. 4:18) Mwaziba kuli Abrahama naafumani zanaasepisizwe. Naapepile mwana wamushimani yanaalibelezi ka nako yetelele, yena Isaka. Ki kabakalañi Abrahama hanaakozwi kuli Jehova naakataleleza sepiso yahae?

2. Ki kabakalañi Abrahama hanaakozwi kuli Jehova naakataleleza sepiso yahae?

² Bakeñisa kuli Abrahama naanani silikani sesitiile ni Jehova, “naakozwi ka kutala kuli sanaasepisize Mulimu” nesika talelezwa. (Maro. 4:21) Abrahama naatabisize Jehova mi aangiwa kuba yalukile kabakala tumelo yahae. (Jak. 2:23) Sina mokuboniselizwe kwa Maroma 4:18, Abrahama naanani tumelo ni sepo. Halunyakisiseñi cwale zabulela muapositola Paulusi ka za sepo, sina mokuboniselizwe kwa Maroma kauhanyo 5.

3. Ki lika mañi zabulela Paulusi ka za sepo?

 ³ Paulusi utalusa libaka halukona kukolwa kuli “sepo hailuswabisi.” (Maro. 5:5) Hape ulutusa kuziba molukona kutiiseza sepo yaluna ya Sikreste. Halunze lunyakisisa zanaabulezi Paulusi kwa Maroma 5:1-5, munahane ka za mo sepo yamina ya za kwapili seitiyezi hahulu kufita kwamulaho. Taba ye hape ika lutusa kulemuha molukona kutiiseza hahulu sepo yelunani yona cwale. Halukaleñi ka kunyakisisa sepo yekanya yanaatalusize Paulusi kuli hailuswabisi.

4. Ki lika mañi zebulezwi kwa Maroma 5:1, 2?

⁴ Mubale Maroma 5:1, 2. Paulusi naañolezi puteho yeneli mwa Roma manzwi ao. Mizwale ni likaizeli mwa puteho yeo nebaitutile ka za Jehova ni Jesu, nebabonisize tumelo, mi nebabile Bakreste. Kacwalo, Mulimu “[ababeya] babalukile kabakala tumelo,” mi abatoza ka moya okenile. Kabakaleo, nebabile ni sepo yende.

5. Ki sepo mañi yebanani yona Bakreste babatozizwe?

⁵ Hasamulaho, Paulusi naañolezi Bakreste babatozizwe ba mwa Efese ka za sepo yene babizelizwe. Sepo yeo ikopanyeleza “saanda [sesifiwa] ku babakenile.” (Maef. 1:18) Paulusi hape naataluselize Bakreste ba mwa Kolose kone baka felwa mupuzo wabona. Naabizize mupuzo wo kuli ki “sepo yemubulukezwi mwa mahalimu.” (Makolo. 1:4, 5) Kacwalo, sepo ya Bakreste babatozizwe ki ya kuli bakazusezwa kuyo pila kuya kuile kwa lihalimu, kobakayo busa ni Kreste.—1 Mates. 4:13-17; Sin. 20:6.

6. Ki lika mañi zanaabulezi muzwale yomuñwi yatozizwe ka za sepo yahae?

⁶ Bakreste babatozizwe baitebuha sepo yeo. Ka 1991, Muzwale Frederick Franz, yomuñwi wa Bakreste babatozizwe, naabulezi cwana kuzwelela kwatasaa pilu kuli: ‘Sepo yaluna ki ya luli, mi kaufelaa luna ba 144,000 lukaamuhela zalusepisize Mulimu, mi mupuzo waluna ufitela kwahule nto ifi kamba ifi yelukona  kunahana.’ Naasa sebelelize Mulimu ka busepahali ka lilimo zeñata, mi naaekelize kubulela ka buikolwiso kuli: ‘Lusazwelapili kuitebuha hahulu sepo yaluna. . . . Kuzwelapili kuba ni sepo yeo kutahisa kuli luitebuhe hahulu yona. Luikatulezi kuzwelapili kuba ni yona nihaikaba kuli kukafita lilimo zeñata-ñata kuli zelusepisizwe litalelezwe. Niitebuha hahulu sepo yaluna ka nako ya cwale kufita mone niitebuhela yona kwamulaho.’

7-8. Ki sepo ifi yebanani yona batu babañata babasebeleza Jehova? (Maroma 8:20, 21)

⁷ Buñata bwa batu babasebeleza Jehova kacenu banani sepo isili. Ki yona sepo yanaanani yona Abrahama ya kupila kuya kuile mwatasaa puso ya Mubuso wa Mulimu. (Maheb. 11:8-10, 13) Paulusi naañozi ka za kanya yebakaba ni yona batu babanani sepo yeo. (Mubale Maroma 8:20, 21.) Ki lika mañi zene munyolezwi hahulu hane muitutile lwapili ka za sepiso ya mwa Bibele ya za kwapili? Kana neli taba ya kuli zazi leliñwi mukaba babapetahalile mi hamuna kuba ni sibi? Kamba kana nemutabile hane muitutile kuli balatiwa bamina babashwile bakapila hape mwa paradaisi fa lifasi? Taba yeo neitahisize kuli munyolelwe hahulu zekaezahala kwapili “ka sepo.”

⁸ Ibe kuli lunani sepo ya kuyo pila kuya kuile kwa lihalimu kamba ya kuto pila fa lifasi, kaufelaa luna lunani sepo yekanya yelutahiseza tabo. Mi sepo yelutahiseza tabo yeo yakona kutiya hahulu nikufita. Manzwi atatama anaañozi Paulusi abonisa mokukona kubela cwalo. Halunyakisiseñi zanaañozi ka za sepo yaluna. Kueza cwalo kuka lutusa kukolwa ka kutala kuli sepo yaluna ikazwelapili kutiya mi haina kuluswabisa.

9-10. Ka kuya ka zeneezahezi ku Paulusi, ki lika mañi zebakona kukopana ni zona Bakreste? (Maroma 5:3) (Mubone ni maswaniso.)

⁹ Mubale Maroma 5:3. Muhupule kuli manyando akona kulutusa kuba ni sepo yetiile. Taba yeo yakona kulukomokisa. Niti kikuli balateleli ba Kreste kaufela bakona kukopana  ni manyando. Halunyakisiseñi mutala waPaulusi. Naabulelezi Bakreste ba mwa Tesalonika kuli: “Haneluli ni mina, nelu mitalusezanga cimo kuli lukakopana ni manyando, mi ki mona mokuezahalezi.” (1 Mates. 3:4) Mi naañolezi Bakreste ba mwa Korinte kuli: “Halulati kuli musike mwaziba za manyando ene lukopani ni ona . . . Mane [nelufelezwi] ki sepo ya kupila.”—2 Makor. 1:8; 11:23-27.

¹⁰ Bakreste kacenu ni bona bakona kukopana ni manyando ashutana-shutana. (2 Tim. 3:12) Kana mukile mwanyandiswa kabakala kulumela ku Jesu ni kuba balateleli bahae? Mwendi mukile mwa sheununwa ki balikani ni bahabo mina. Mwendi mane neba miezize ka situhu. Kana katulo yamina ya kusepahala mwa lika kaufela imitahiselize butata kwa mubeleko? (Maheb. 13:18) Kana mukile mwalwaniswa ki ba muuso kabakala kutaluseza babañwi ka za sepo yamina? Nihakulicwalo, Paulusi naabulezi kuli lwakona kuba ni tabo kusina taba ni manyando elukona kukopana ni ona. Libaka?

11. Ki kabakalañi haluswanela kuikatulela kutiyela muinelo otaata ufi kamba ufi olukona kukopana ni ona?

¹¹ Lwakona kuba ni tabo halukopana ni manyando, kakuli manyando alutusa kuba ni kalemeno ka butokwa. Liñolo la Maroma 5:3 libulela kuli: “Manyando atahisa buitiiso.” Bakreste kaufela bakakopana ni manyando; kacwalo, Bakreste kaufela batokwa kuba ni buitiiso. Luswanela kuikatulela kutiyela miinelo yetaata kaufela yelukona kukopana ni yona. Lukakona feela kuamuhela zelusepisizwe haiba lueza cwalo. Halulati kuba sina batu banaanahana Jesu hanaaambola za lipeu zenewezi fa macwe. Kwa makalelo, nebaamuhezi linzwi ka tabo, kono “hamulaho wa ñalelwa kamba kunyandiswa,” basitatala. (Mat. 13:5, 6, 20, 21) Niti kikuli, kukopana ni twaniso kamba ni miliko haki nto yebunolo kamba yetabisa, kono haiba luitiyela lukatuseha. Ka mukwa ufi?

12. Kutiyela miinelo yetaata kukona kulutusa cwañi?

¹² Mulutiwa Jakobo naatalusize molukona kutusehela halutiyela miliko. Naañozi kuli: “Mutuhelele buitiiso kupeta musebezi wabona, kuli mukone kutalelela ni kukwanelela mwa linto kaufela, musatokwi sesiñwi.” (Jak. 1:2-4) Jakobo utalusa buitiiso inge kuli bunani musebezi obuswanela kueza. Ki musebezi mañi ona wo? Bukona kumitusa kuba hahulu ni tulemeno totucwale ka pilu-telele, tumelo, ni kuitinga ku Mulimu. Nihakulicwalo, buitiiso hape bulutusa ka nzila yeñwi ya butokwa.

13-14. Buitiiso bulutusa cwañi, mi taba yeo iswalisana cwañi ni sepo? (Maroma 5:4)

¹³ Mubale Maroma 5:4. Paulusi utalusa kuli, buitiiso butahisa “kulumelelwa ki Mulimu.” Kacwalo, haiba muitiisa, mukalumelelwa ki Jehova. Taba yeo haitalusi kuli Jehova watabanga hamukopana ni miliko kamba miinelo yetaata. Kono utabanga kabakala kuli muzwelapili kuitiisa ka busepahali. Kwatabisa kuziba kuli haluitiisa lutabisa Jehova!—Samu 5:12.

¹⁴ Muhupule kuli Abrahama naatiyezi miliko yanaakopani ni yona, mi naatabisize Jehova. Jehova naamuunga kuba mulikanaa hae mi amuunga kuba yalukile. (Gen. 15:6; Maro. 4:13, 22) Taba yeo yakona kuezahala ni ku luna. Misebezi yelueza mwa sebelezo yaluna ku Mulimu kamba buikalabelo bolunani haki zona zetahisa kuli lulumelelwe ki yena. Kuitiisa ka busepahali ki kona kokutahisa kuli lulumelelwe ki Jehova. Mi kaufelaa luna lwakona kuitiisa kusina taba ni lilimo zelunani, muinelo oluli ku ona, kamba  buikoneli bolunani bona. Kana musweli kutiyela muinelo otaata ka busepahali? Haiba ki cwalo, muzibe kuli mutabisa Mulimu. Kuziba kuli lutabisa Mulimu kwakona kutiisa hahulu sepo yaluna.

15. Ki sisupo mañi sesiñwi sabulela Paulusi, mi ki kabakalañi batu babañwi habakona kukomokiswa ki taba yeo?

¹⁵ Sina mwanaataluselize Paulusi, lukalumelelwa ki Jehova haiba lutiyela miinelo yetaata ka busepahali. Mulemuhe zanaabulezi Paulusi hanaazwelapili kubulela za taba yeo, naaize: “Kulumelelwa ki Mulimu kutahisa sepo, mi sepo hailuswabisi.” (Maro. 5:4, 5) Taba yeo yakona kukomokisa batu babañwi. Libaka? Kakuli kwa Maroma 5:2, Paulusi naabulezi kuli Bakreste ba mwa Roma bao, nebanani sepo, yona “sepo ya kanya ya Mulimu.” Kacwalo, batu babañwi bakona kubuza kuli: ‘Haiba Bakreste bao nebanani sepo, ki kabakalañi Paulusi hanaakutezi kubulela za sepo?’

16. Mutu ukalanga cwañi kuba ni sepo yetiile? (Mubone ni maswaniso.)

¹⁶ Lukautwisisa zanaatalusa Paulusi haiba lubeya mwa munahano taba ya kuli sepo yakona kutiya. Ka mutala: Kana mwahupula mone muikutwezi lwapili hane muutwile za sepo yende yefumaneha mwa Linzwi la Mulimu? Mwendi ka nako yeo nemunahanile kuli taba ya kupila kuya kuile mwa Paradaisi fa lifasi haikoni kuezahala. Kono hane muitutile litaba zeñata ka za Jehova ni lisepiso za mwa Bibele, nemukozwi ka kutala kuli sepiso yeo ikatalelezwa.

17. Ki lika mañi zetahisanga kuli sepo izwelepili kutiya hamulaho wa kuneela bupilo ku Mulimu ni kukolobezwa?

¹⁷ Sepo yamina neizwezipili kutiya nihaiba hamulaho wa kuneela bupilo bwamina ku Mulimu ni kukolobezwa, kuituta zeñata ka za hae ni kuba Mukreste yahulile kwa moya. (Maheb. 5:13–6:1) Mwendi muiponezi buniti bwa manzwi a kwa Maroma 5:2-4. Nemukopani ni manyando amañata, kono nemuatiyezi mi nemulemuhile kuli nemutabisize Mulimu.  Bakeñisa kuli mwaziba kuli nemutabisize Mulimu, munani mabaka amande a kulumela kuli mukaamuhela lika zamisepisize. Sepo yamina itiile hahulu ka nako ya cwale, kufita kwamulaho. Semuunga sepo yeo kuba ya luli ku mina. Iama hahulu likatulo zemueza mwa bupilo, ili kuama bupilo bwamina kaufela, mi imitusa kupilisana hande ni lubasi lwamina, kueza likatulo zende, mane ni kuitusisa hande nako yamina.

18. Ki lika mañi zekona kumikolwisa kuli zamisepisize Jehova lika talelezwa?

¹⁸ Muapositola Paulusi uekeza kubulela sisupo sa butokwa hahulu ka za sepo yemunani yona hamulaho wa kulumelelwa ki Mulimu. Umikolwisa kuli lika zemusepisizwe likatalelezwa. Ki kabakalañi hamukona kuba ni buikolwiso bo? Paulusi naasusumelizwe kuñolela Bakreste manzwi akolwisa a, ali: “Sepo hailuswabisi; kakuli lilato la Mulimu lisululezwi mwa lipilu zaluna ka moya okenile, one lufilwe.” (Maro. 5:5) Munani mabaka a kukolwa kuli sepo yamifile Jehova ki ya niti.

19. Ki buikolwiso mañi bomukona kuba ni bona ka za sepo yamina?

¹⁹ Munahanisise ka za sepiso ya Jehova ku Abrahama ni zenetahisize kuli alumelelwe ki Mulimu ni kuungiwa kuba mulikanaa hae. Abrahama naaamuhezi zanaasepisizwe. Bibele ibulela kuli: “Abrahama hasaabonisize pilu-telele, afiwa sanaasepisizwe.” (Maheb. 6:15; 11:9, 18; Maro. 4:20-22) Kaniti luli, naafilwe zanaasepisizwe. Ni mina mwakona kukolwa kuli haiba muzwelapili kusepahala, mukafiwa zemusepisizwe. Sepo yamina ki ya luli, imitahiseza tabo, mi haina kumiswabisa! (Maro. 12:12) Paulusi naañozi kuli: “Haike Mulimu yafa sepo amitaze tabo ni kozo kaufela ka kumusepa kwamina, kuli mutale sepo ka maata a moya okenile.”—Maro. 15:13.