Zazi leliñwi, kaizeli yomuñwi yapila kwa New Zealand naabuhile vidio yeli, ‘Mubabalelane,’ Jehova wautwelanga batu makeke ni kuunga muhato wa kubatusa. (Isa. 63:7-9) Kaizeli yo aikatulela kuitusisa zanaaitutile ka kutusa mutu yomuñwi. Hasamulaho fa lizazi leliswana leo, kaizeli yo hanaayo leka lika zeñwi akopana ni musali yomuñwi yanaasina kwa kuina mi amubuza haiba naakatabela kulekelwa lico. Musali yo alumela. Kaizeli yo atisa lico, mi akutaza ku musali yo ka bukuswani ka kuitusisa trakiti yeli, Kana Manyando Akafela Muta Omuñwi?

Musali yo akala kulila. Musali yo atalusa kuli naahuliselizwe mwa lubasi lwa Lipaki kono naasika eza zwelopili ya kwa moya. Nakonyana pili musali yo asika kopana kale ni kaizeli yo, naalapezi ku Jehova kuli amutuse kukutela ku yena. Kaizeli yo afa musali yo Bibele mi balukisa kuli bakalise kuitutanga Bibele. a

Lwakona kulikanyisa Jehova ka kubonisa mukekecima kwa batu babañwi, kukopanyeleza cwalo ni bahabo luna ni mizwale ni likaizeli baluna. Mi lwakona kubonisa mukekecima ka kubata linzila za kukutaza ka zona ku babañwi.