1. Jehova uikutwanga cwañi haiba yomuñwi wa batanga bahae bane batuhezi kumusebeleza akutela ku yena?

MWA taba yefelile, neluitutile kuli Jehova uswana sina mulisana yomunde yababalela ni kutokomela yeñwi ni yeñwi ya lingu zahae. Mi haiba kunani ngu yelatehile, ubonanga teñi kuli waibata ni kuikutiseza mwa mutapi. Jehova naabulelezi Maisilaele bane batuhezi kumusebeleza kuli: “Hamukutele ku na, mi ni na nikakutela ku mina.” Lwaziba kuli ni kacenu usatabela kuli batu babatuhezi kumusebeleza bakutele ku yena, kakuli uli: “Hanicinci.” (Mala. 3:6, 7) Mane Jesu naabulezi kuli Jehova ni mangeloi babanga ni tabo yetuna haiba alimuñwi kwa batanga ba Mulimu bane batuhezi kumusebeleza akutela ku yena.—Luka 15:10, 32.

2. Lukanyakisisañi mwa taba ye?

² Halunyakisiseñi liswanisezo zetaalu zanaafile Jesu zebonisa molukona kutuseza bahasanyi babatuhezi kusebeleza Jehova. Lukanyakisisa tulemeno toluswanela kuba ni tona kuli lutuse batu bao babaswana sina lingu zelatehile ilikuli bakutele ku Mulimu. Mi hape lukanyakisisa limbuyoti zeluka fumana haiba lutusa bahasanyi babafokozi.

3-4. Ki kabakalañi musali yabulezwi kwa liñolo la Luka 15:8-10 hanaabatile ka tokomelo drakima yenelatehile?

³ Kuli lufumane batu bababata kukutela ku Jehova, luswanela kueza buikatazo bobutuna. Mwa swanisezo ya Jesu yeñozwi mwa buka ya Evangeli ya Luka, Jesu naatalusize zanaaezize musali yomuñwi kuli afumane sheleñi ya muwayawaya yebizwa drakima, yenelatehile. Musali yo naaezize buikatazo bobutuna kuli afumane sheleñi ya muwayawaya yeo.—Mubale Luka 15:8-10.

⁴ Jesu naatalusize mwanaaikutwezi musali yo hasaafumani sheleñi ya muwayawaya yenelatehile. Jesu hanaali fa lifasi, fokuñwi basali ba Majuda nebafanga mwana wamusizana masheleñi a muwayawaya alishumi fa lizazi la sinawenga sahae. Mwendi sheleñi ya muwayawaya yebulezwi mwa swanisezo ya Jesu ni yona neli yeñwi  ya masheleñi a muwayawaya anaafilwe musali yo ki bo mahe. Musali yo naanahana kuli sheleñi yeo neiwezi fafasi. Kacwalo atukisa lambi ni kuibata-bata mwa muzuzu, kono naasika ifumana. Mwendi lambi yahae ya oli neisike yamukonisa kubona hande sheleñi yenyinyani ya silivera yeo. Kacwalo afiyela ndu kaufela ka tokomelo. Hasafelize, amonyeha lambi yahae fa mubu wanaazwisize mwa ndu hanaafiyela, mi fateñi abona drakima yanaasweli kubata inze ibenya. Munahane feela tabo yanaabile ni yona! Kacwalo abiza balikani bahae ni babayahile ni yena kuli batabe ni yena.

5. Ki kabakalañi hakukona kuba taata kufumana batu babatuhezi kuswalisana ni puteho?

⁵ Swanisezo ya Jesu ye, ibonisa kuli mutu utokwa kueza buikatazo bobutuna kuli afumane sika sesilatehile. Ka nzila yeswana, ni luna luswanela kueza buikatazo bobutuna kuli lufumane batu babatuhezi kuswalisana ni puteho. Mwendi sekufitile lilimo zeñata kuzwa fobatuhelela kuswalisana ni luna. Mwendi mane batutezi kwa sibaka sisili, mi mizwale ni likaizeli ba kwa sibaka seo haba bazibi. Kono babañwi kwa bahasanyi babafokozi bao batabela luli kukutela ku Jehova. Babata luli kusebeleza Jehova hamoho ni mizwale ni likaizeli babona, kono kuli baeze cwalo, luswanela kubatusa.

6. Bahasanyi kaufela mwa puteho bakona kutusa cwañi mwa musebezi wa kubata babafokozi?

⁶ Ki bo mañi babaswanela kubata bahasanyi babafokozi? Kaufelaa luna lwaswanela kutusa mwa musebezi wo, ibe kuli lu baana-bahulu, lu mapaina, lu mwa lubasi lwa mutu yafokozi, hamohocwalo ni bahasanyi kaufela mwa puteho. Kana munani mulikani kamba wahabo mina yafokozi? Muswanela kuezañi haiba mufumana mutu yafokozi hamunze mukutaza fa ndu ni ndu kamba hamunze mueza bupaki bwa fa nyangela? Haiba mutu yo amifa keyala yahae kamba nombolo ya luwaile lwahae, mwakona kufa litaba zeo kwa baana-bahulu ba puteho yamina.

7. Luitutañi kwa manzwi anaabulezi muuna-muhulu yomuñwi yabizwa Thomas?

⁷ Ki lika mañi zebaswanela kueza baana-bahulu kuli bazibe kobaina batu bababata kukutela ku Jehova? Lwakona kuituta sesiñwi kwa manzwi anaabulezi muuna-muhulu yomuñwi yabizwa Thomas, * yapila mwa naha ya Spain. Muzwale yo utusize Lipaki za Jehova babafitelela 40 kuli bakutele ku Jehova. Bo Thomas bali: “Pili nibuzanga mizwale ni likaizeli ba mwa puteho yaluna haiba baziba kobaina mizwale ni likaizeli babafokozi. Mi fokuñwi nibuzanga bahasanyi haiba kunani mutu yebaziba yatuhezi kufumaneha kwa mikopano ya puteho. Babañata mwa puteho batabelanga kueza cwalo, kakuli baikutwanga kuli ni bona babata kutusa mwa musebezi wo wa kubata bahasanyi babafokozi. Hasamulaho, haniyo potelanga mizwale ni likaizeli babafokozi, nibabuzanga mobazuhela, bona ni bana babona, mane cwalo ni mabasi abona amañwi. Bahasanyi babañwi bane bafokozi nebatahanga ni bana babona kwa mikopano ya puteho, mi mwendi ni bana babona bao nebabanga bahasanyi. Kacwalo, banana bao ni bona batokwa kutusiwa kuli bakutele ku Jehova.”

8. Ndate yabulezwi mwa swanisezo ya mwana yanaalatehile yefumaneha kwa Luka 15:17-24, naaezizeñi mwanaa hae hanaabakile?

⁸ Ki tulemeno mañi toluswanela kuba ni tona kuli lutuse batu bababata kukutela ku Jehova? Halunyakisiseñi zelukona kuituta kwa swanisezo yanaafile Jesu ya mwana yasautwi yanaazwile fa lapa la bashemi bahae. (Mubale Luka 15:17-24.) Jesu naatalusize kuli kwa mafelelezo, mwana yo aikupula mi aikatulela kukutela kwa ndu ya bashemi bahae. Ndatahe hamubona, amumatela ni kuyo mukumbata, ili kubonisa kuli naalata hahulu mwanaa hae. Mwana yo naaikutwile  hahulu bumaswe bakeñisa zanaaezize, mi aikutwa kuli bashemi bahae nebasa swaneli kuzwelapili kumuunga kuli ki mwanaa bona. Mwana hanaanzaa talusa mwanaaikutwela, ndatahe amushwela makeke. Hasamulaho, ndatahe alukiseza mwanaa hae nto yeñwi yenebonisa kuli naatabile hahulu kubona mwanaa hae hakutela kwa ndu, isi sina mutanga, kono sina mwana yalatwa. Ndatahe naabonisize kuli naalata mwanaa hae yanaabakile yo ka kumulukiseza mukiti ni kumufa liapalo zende hahulu.

9. Ki tulemeno tufi toluswanela kuba ni tona kuli lutuse batu babafokozi kukutela ku Jehova? (Mubone mbokisi yeli, “ Molukona Kutuseza Bababata Kukutela ku Jehova.”)

⁹ Jehova uswana sina ndate yabulezwi mwa swanisezo yeo. Walata mizwale ni likaizeli baluna babafokozi mi ubata kuli bakutele ku yena. Haiba lulikanyisa Jehova, lwakona kubatusa kukutela ku yena. Kuli lueze cwalo, lutokwa kuba ni pilu-telele, kubashwela makeke, ni kubabonisa lilato. Ki kabakalañi haluswanela kubonisa tulemeno to, mi lukona kutubonisa cwañi kwa batu bababata kukutela ku Jehova?

10. Ki kabakalañi haluswanela kuba ni pilu-telele kuli lutuse mutu kukutela ku Jehova?

¹⁰ Luswanela kuba ni pilu-telele bakeñisa kuli kukona kuunga nako yetelele kuli mutu akutele ku Jehova. Bahasanyi babañata bane bafokozi kwamulaho batalusa kuli nebakalile kusebeleza Jehova hape hamulaho wa kupotelwa hañata-ñata ki baana-bahulu ni mizwale ni likaizeli mwa puteho. Kaizeli yabizwa Nancy, wa kwa Southeast Asia, naañozi kuli: “Nenitusizwe hahulu ki kaizeli yanaali mulikanaa ka yomutuna mwa puteho. Naanilata hahulu mane inge kuli nenili muhulwanaa hae. Naanihupulisanga linako zende zene luikolanga kusebeza hamoho kwamulaho. Naaniteelezanga hane nitalusa maikuto aka, mi naanifanga likelezo. Naabonisize  kuli ki mulikani wa niti mi ka nako kaufela naatabela kunitusa.”

11. Ki kabakalañi halutokwa kushwela makeke mutu yafoselizwe ki mutu yomuñwi?

¹¹ Sina feela mulyani haukona kufolisa sitombo, ni luna haiba lushwela makeke mutu yafoselizwe ki mutu yomuñwi, lwakona kumutusa. Batu babañwi bafokozi bakeñisa kuli nebasitatalisizwe ki mutu yomuñwi mwa puteho lilimo zeñata kwamulaho mi basanani ndimbelela. Kuba ni maikuto acwalo kubapaleliswa kukutela ku Jehova. Babañwi mwendi baikutwa kuli nebasika eziwa hande. Kacwalo batokwa mutu yebaka taluseza maikuto abona ili yaka bautwisisa. (Jak. 1:19) Bo María, bane bafokozi ka nako yeñwi, batalusa kuli: “Nenitokwa mutu wa kutaluseza mone niikutwela, yanaaka niomba-omba, ni kunieleza.”

12. Lilato la Jehova kwa batu bahae liswana sina muhala ka mukwa ufi?

¹² Bibele ibonisa kuli lilato la Jehova kwa batu bahae liswana sina muhala. Lilato la Mulimu liswana sina muhala ka mukwa ufi? Halunyakisiseñi mutala wo: Luungeñi kuli muwezi mwa musima otungile. Musima wo utungile hahulu kuli mane hamukoni kuzwa mwateñi munosi. Mukona feela kuzwa mwateñi haiba mutu yomuñwi aminepela muhala ni kumihoha mwateñi. Jehova naabulelezi Maisilaele bane batuhezi kumusebeleza kuli: ‘Nazwelapili kubahoha ka mihala ya lilato.’ (Hos. 11:4) Ni kacenu, Mulimu ubata kutusa bahasanyi babatuhezi kumusebeleza ni babaimelizwe ki matata ni lipilaelo za mwa bupilo. Baswana sina babawezi mwa musima otungile. Mulimu ubata kuli bazibe kuli wabalata, mi ubata kuli bakutele ku yena. Mi Jehova wakona kuitusisa mina kubatusa kuziba kuli wabalata.

13. Mutala wa bo Pablo ubonisa cwañi kuli haiba lunani lilato lwakona kutusa batu kukutela ku Jehova?

 ¹³ Luswanela kutusa babafokozi kuziba kuli Jehova wabalata ni kuli ni luna lwabalata. Bo Pablo, bababulezwi mwa taba yefelile, nebafokozi ka lilimo zefitelela 30. Batalusa kuli: “Zazi leliñwi kakusasana hanizwa fa ndu, nenikopani ni kaizeli wamusupali yanaanani sishemo mi naambozi ni na ka lilato. Hanaanze aambola ni na cwalo, nakala kulila sina mwanana. Nabulelela kaizeli yo kuli ki Jehova yanaa mulumile kuli aambole ni na. Mi ka yona nako yeo, naikatulela kukutela ku Jehova.”

14. Ka kuya ka swanisezo ye kwa liñolo la Luka 15:4, 5, ki lika mañi zanaaezize mulisana hanaafumani ngu yenelatehile?

¹⁴ Luswanela kuzwelapili kutusa babafokozi. Baswana sina mwana yanaalatehile wa mwa swanisezo ya Jesu, mi mwendi banani litaba zebabilaeza. Mi miinelo yebakopani ni yona mwa lifasi lelizamaiswa ki Satani ibafokolisize kwa moya. Luswanela kubatusa kutiisa tumelo yabona ku Jehova hape. Mwa swanisezo yanaafile Jesu ya ngu yenelatehile, naabulezi kuli mulisana naabeile ngu yeo fa maheta ni kuikutiseza mwa mutapi. Mulisana naaezize buikatazo bobutuna bwa kubata ngu yelatehile. Nihakulicwalo, naalemuhile kuli naatokwa kuikutisa mwa mutapi bakeñisa kuli neisike yaba ni maata a kukutela mwa mutapi ka ili yona.—Mubale Luka 15:4, 5.

15. Lukona kutusa cwañi bahasanyi babafokozi mwa tumelo ili bababata kukutela ku Jehova? (Mubone mbokisi yeli, “ Hatiso Yetusa.”)

¹⁵ Lukatokwa kuitombola nako ni maata aluna kuli lutuse bahasanyi babafokozi kutula butata bobu bapaleliswa kukutela ku Jehova. Ka tuso ya moya wa Jehova, Linzwi lahae, ni lihatiso zelufiwa ki kopano, lwakona kubatusa  kuli batiye hape. (Maro. 15:1) Lukona kubatusa cwañi? Muzwale yomuñwi yasebelize sina muuna-muhulu mwa puteho ka lilimo zeñata uli: “Buñata bwa batu babafokozi batokwanga kuzamaisezwa tuto ya Bibele hase baezize katulo ya kukutela ku Jehova.” * Kacwalo haiba baana-bahulu bamikupa kuli muzamaisange tuto ya Bibele ku mutu yafokozi, muitebuhe tohonolo yeo. Muuna-muhulu yo uekeza kubulela kuli: “Muhasanyi yazamaisa tuto yeo uswanela kuba mutu yanani silikani, ilikuli yafokozi alukuluhe kumutaluseza maikuto ahae kaufela.”

16. Luziba cwañi kuli mangeloi alutusa mwa musebezi wa kubata batu bababata kukutela ku Jehova?

¹⁶ Kunani litaba zeñata zeezahezi mwa bupilo zebonisa kuli mangeloi alutusa mwa musebezi wa kubata bahasanyi babafokozi bababata kukutela ku Jehova. (Sin. 14:6) Ka mutala, bo Silvio ba kwa Ecuador, nebalapezi ku Jehova kuli abatuse kukutela ku yena. Hane banze balapela cwalo, bautwa batu babangongota kwa munyako. Habakwalula sikwalo, bafumana baana-bahulu bababeli. Mi baana-bahulu bao baikambota ni bona ni kubatusa kuziba zene baswanela kueza kuli bakutele ku Jehova.

17. Ki mbuyoti mañi yelukaba ni yona haiba lutusa bahasanyi babafokozi kwa moya?

¹⁷ Haiba lutusa bahasanyi babafokozi kwa moya kuli bakutele ku Jehova, lukaba ni tabo yetuna. Bo Salvador, babali mapaina, babaikatazanga kutusa bahasanyi babafokozi kwa moya, batalusa kuli: “Fokuñwi mane nalotisanga miyoko bakeñisa tabo. Nitabanga hahulu kuziba kuli Jehova upilisize yeñwi ya lingu zahae ka kuizwisa mwa lifasi la Satani, ni kuli nibile ni tohonolo ya kusebeza hamoho ni yena mwa musebezi wo.”—Lik. 20:35.

18. Haiba mufokozi kwa moya, ki buikolwiso mañi bomuswanela kuba ni bona?

¹⁸ Haiba mutuhezi kuswalisana ni batu ba Jehova, mube ni buikolwiso bwa kuli Mulimu usa milata. Ubata kuli mukutele ku yena. Kono muswanela kuikataza kuli mukutele ku Mulimu. Mi sina ndate wa mwa swanisezo yanaafile Jesu, Jehova wamilibelela kuli mukutele ku yena, mi uka miamuhela.