Litimana zeo libonisa tulemeno totu 9 tobatokwa kuba ni tona Bakreste: “Muselo wa moya ki lilato, tabo, kozo, pilu-telele, sishemo, bunde, tumelo, bunolo, buiswalo.” Kono haluswaneli kuunga kuli moya wa Mulimu ukona kulutusa feela kuba ni tulemeno to.

Muapositola Paulusi pili asika bulela kale za muselo wa moya, naañozi kuli: “Misebezi ya nama . . . ki muzamao wa buhule, masila, muzamao wa kusaswabela bufosi, kulapela milimu ya maswaniso, tumelo ya mioya, sitoyo, lifapahano, lifufa, buhali, likañi, likauhano, tukwata totulatelela batu, muna, bucakolwa, mikiti yelilata, ni zeñwi zecwalo.” (Magal. 5:19-21) Paulusi naafelize ka kubulela kuli “ni zeñwi zecwalo,” ili taba yebonisa kuli naasika punda “misebezi ya nama” yecwale ka yebulezwi kwa liñolo la Makolose 3:5. Ka mukwa oswana, hasaapundile tulemeno totunde totu 9, naabulezi kuli: “Hakuna mulao olwanisa zeo.” Kacwalo, Paulusi naasika punda tulemeno totunde kaufela, ili to moya okenile ukona kulutusa kuba ni tona.

Lukona kuutwisisa hande taba ye halubapanya “muselo wa moya” ni taba ya “muselo wa liseli” yanaabulezi Paulusi hanaañolezi puteho ya Efese kuli: “Muselo wa liseli ukopanyeleza mufuta kaufela wa bunde ni kuluka ni niti.” (Maef. 5:8, 9) Ki niti kuli “bunde,” hamohocwalo ni kuluka ni niti, ki kalulo ya “muselo wa liseli,” kono hape isali kalulo ya “muselo wa moya.”

Ka mukwa oswana, Paulusi naasusuelize Timotea kuba ni tulemeno totunde totu 6, ili ‘kundongwama kuluka, busepahali ku Mulimu, tumelo, lilato, buitiiso, ni bunolo.” (1 Tim. 6:11) Ki tulemeno feela totulaalu totubulezwi kwa liñolo leo (tumelo, lilato, ni bunolo) totuli kalulo ya “muselo wa moya.” Kono hape Timotea naatokwa moya okenile kuli umutuse kuba ni tulemeno totuñwi, totucwale ka kuluka, busepahali ku Mulimu, ni buitiiso.—Mubapanye Makolose 3:12; 2 Pitrosi 1:5-7.

Kacwalo, kwa liñolo la Magalata 5:22, 23 hakusika pundiwa tulemeno kaufela tobatokwa kuba ni tona Bakreste. Moya wa Mulimu wakona kulutusa kuba ni tulemeno totu 9 totuli kalulo ya “muselo wa moya.” Kono kunani tulemeno totuñwi totuñata tolutokwa kuba ni tona kuli lube Bakreste babahulile kwa moya ni kuli ‘luapale butu bobunca bone bubupilwe ka kulikana ni tato ya Mulimu mwa kuluka kwa niti ni busepahali.’—Maef. 4:24.