1. Ki kabakalañi Jehova hanaaibapanyize ku me yaanyisa?

MWA linako za mupolofita Isaya, Jehova naabuzize kuli: “Kana musali wakona kulibala mwanaa hae yaanya?” Naaekelize kubulelela batu bahae kuli: “Basali ba, niha bakalibala, na hanina kukulibala nikamuta.” (Isa. 49:15) Hañata, Jehova haibapanyangi ku me. Kono naaezize cwalo ka nako yeo. Naaitusisize mutala wa me yabonisanga lilato lelituna ku mwanaa hae kuli atuse batanga bahae kuziba kuli naabalata hahulu. Bashemi babasali babañata baikutwa sina mwanaaikutwezi kaizeli yomuñwi wa libizo la Jasmin, yanaabulezi kuli: “Hamunze mubabalela ni kuuta mwanaa mina, mufita fa kumulata hahulu, mi lilato leo halifelangi.”

2. Jehova uikutwanga cwañi haiba yomuñwi wa bana bahae afokola?

² Jehova walemuhanga haiba yomuñwi wa bana bahae atuhela kufumaneha kwa mikopano ya puteho ni kukutaza. Kaniti luli, uikutwanga hahulu butuku kwa pilu kubona batanga bahae babañata-ñata habafokola * silimo ni silimo.

3. Jehova ubata kuli batanga bahae babafokozi baezeñi?

³ Buñata bwa mizwale ni likaizeli bane bafokozi bakalanga kuswalisana ni puteho hape, mi mizwale ni likaizeli babona babaamuhelanga ka mazoho amabeli! Jehova ubata kuli bakutele ku yena, mi ni luna luikutwa cwalo. (1 Pit. 2:25) Lukona kubatusa cwañi kuli bakale kuswalisana ni puteho hape? Lusika alaba kale puzo yeo, lutokwa kuziba pili zetahisanga kuli mizwale ni likaizeli babañwi batuhele kufumanehanga kwa mikopano ya puteho ni kukutaza.

4. Misebezi ya kwa mubili itahisanga kuli babañwi baipumane mwa muinelo mañi?

⁴ Babañwi bafokozi kabakala kutupwikela hahulu mwa misebezi yabona ya kwa mubili. Muzwale yomuñwi yapila kwa Southeast Asia yabizwa Hung * naabulezi kuli: “Nenitandanga nako yeñata hahulu kwa musebezi. Neninahana kuli hane nikaba ni masheleñi amañata, nenika kona kusebeleza hande Jehova, kono ko neli kuipuma. Kacwalo, nenizwezipili kutanda nako yeñata kwa musebezi. Nakala kushuta mikopano yemiñata, mi kwa mafelelezo natuhela kuyanga kwa mikopano ya puteho. Satani uitusisa lifasi le kuyaulula batanga ba Mulimu hanyinyani-hanyinyani, ilikuli batuhele kusebeleza Mulimu.”

5. Miinelo yetaata yanaakopani ni yona kaizeli yomuñwi neitahisize kuli aezeñi?

⁵ Mizwale ni likaizeli babañwi bakopana ni miinelo yetaata yemiñata. Ka mutala, kaizeli yabizwa Anne wa kwa Britain unani bana baketalizoho. Kaizeli yo utalusa kuli: “Mwanaka yomuñwi naapepilwe ali sihole. Hamulaho wa nako, yomuñwi wa bana baka babasizana azwisiwa mwa puteho mi mwanaka wamushimani akala kukula mwa munahano. Nenilembwalile hahulu kuli mane natuhela kuyanga kwa mikopano ya puteho ni kukutaza. Hamulaho wa nako, nafokola.” Kaufelaa luna luikutwa bumaswe bakeñisa miinelo yetaata yakopana ni yona kaizeli Anne ni lubasi lwahae, hamohocwalo ni babañwi babakopana ni miinelo yeswana.

6. Kusasebelisa sikuka sesiñozwi kwa liñolo la Makolose 3:13 kukona kutahisa cwañi kuli mutu afokole?

⁶ Mubale Makolose 3:13. Batanga ba Jehova babañwi basitatalisizwe ki mizwale ni likaizeli babona. Muapositola Paulusi naaziba kuli fokuñwi lwakona kuba ni “libaka la kutongoka” mizwale ni likaizeli baluna. Mwendi mane bakona kusa lueza hande. Halusa tokomeli, lwakona kuba ni ndimbelela. Bakeñisa kufilikana, mutu wakona kufulalela Jehova ni batu bahae. Halunyakisiseñi mutala wa muzwale yabizwa Pablo wa kwa South America. Muzwale yo naatamelelizwe kuli naaezize bufosi bobuñwi, mi aamuhiwa buikalabelo bwanaanani bona mwa puteho. Naaezize cwañi? Muzwale yo utalusa kuli: “Nenifilikani hahulu mi hanyinyani-hanyinyani, natuhela kuyanga kwa mikopano ya puteho.”

7. Kusisitwa ki lizwalo kukona kutahisa kuli mutu aezeñi?

⁷ Hape haiba mutu yomuñwi naaezize sibi kwamulaho, lizwalo lahae likona kumusisita ni kutahisa kuli aikutwe kuli Mulimu haamulati. Kusina taba kuli ubakile mi ushemubilwe, ukona kuikutwa kuli haswaneli kuba mutangaa Mulimu. Muzwale yomuñwi wa libizo la Francisco naaikutwile cwalo. Utalusa kuli: “Nenifilwe nyazo kabakala kuli neniikenyize mwa muzamao wa buhule. Nihaike kuli nenizwezipili kuyanga kwa mikopano, nalembwala hahulu mi nakala kuikutwa kuli nenisa swaneli kuba yomuñwi wa batanga ba Jehova. Lizwalo laka nelinze linisisita mi neniikutwa kuli Jehova naasika niswalela. Hamulaho wa nako, natuhela kukutaza ni kuyanga kwa mikopano.” Muikutwa cwañi ka za mizwale ni likaizeli babakopana ni miinelo yelusazo nyakisisa? Kana mwabashwela makeke? Mi Jehova uikutwa cwañi ka za muinelo wabona?

8. Kana Jehova walibalanga batu bane bamusebelezanga? Mutaluse.

⁸ Jehova haalibalangi batu bane bamusebelezanga, ili babatuhezi kuswalisana ni batu bahae ka nakonyana, mi haalibalangi  misebezi yabona. (Maheb. 6:10) Mupolofita Isaya naañozi swanisezo yebonisa kuli Jehova waisa pilu batu bahae. Naañozi kuli: “Ukababalela mutapi wahae sina mulisana. Ukakubukanya lingunyana ka lizoho lahae, mi uka lilwala fa sifuba sahae.” (Isa. 40:11) Mulisana Yomutuna uikutwanga cwañi halemuha kuli yeñwi ya lingu zahae izwile mwa mutapi? Jesu naabuzize balutiwa bahae puzo yelutusa kuziba mwaikutwelanga Jehova, hanaaize: “Mubona cwañi? Haiba mutu unani lingu ze 100 mi iliñwi yazona izwa mwa mutapi, kana haana kusiya ze 99 fa malundu ni kuya kuyo bata iliñwi yezwile mwa mutapi? Mi haiba aifumana, kaniti namibulelela nili, ukataba hahulu kabakala ngu iliñwi yeo kufita ze 99 zenesika zwa mwa mutapi.”—Mat. 18:12, 13.

9. Balisana babande ba mwa linako zene iñolwa Bibele nebababalelanga cwañi lingu zabona? (Mubone siswaniso sesi fa kava.)

⁹ Ki kabakalañi hakuswanela kubapanya Jehova ku mulisana? Kabakala kuli mulisana yomunde wa mwa linako zene iñolwa Bibele naaiyakatwa hahulu lingu zahae. Ka mutala, Davida naalwanisize tau ni bere kuli asileleze lingu zahae. (1 Sam. 17:34, 35) Mulisana yomunde walemuhanga haiba kunani ngu yetondahala mwa mutapi wahae. (Joa. 10:3, 14) Mulisana yacwalo ukona kusiya lingu zahae ze 99 mwa mulaka kamba kukupa balisana babañwi kuli bamutuse kubabalela lingu zahae hasayo bata ngu yelatehile. Jesu naaitusisize swanisezo yeo kuli alute tuto ya butokwa ye: “Haki nto yetabisa ku Ndate ya kwa lihalimu kuli nihaiba alimuñwi ku babanyinyani bao ashwe.”—Mat. 18:14.

10. Ka kuya ka liñolo la Ezekiele 34:11-16, Jehova naasepisize kuli naakaezañi kwa lingu zahae zelatehile?

¹⁰ Jehova walata mañi ni mañi waluna, kukopanyeleza cwalo ni “babanyinyani” babazwile mwa mutapi wahae. Naaitusisize mupolofita Ezekiele kusepisa kuli naakabata lingu zahae zelatehile ni kulitusa kuba ni silikani sesinde ni yena hape. Mi naabonisize zanaaka eza kuli atuse lingu zahae, ili nto yeswana yene baezanga balisana ba Maisilaele. (Mubale  Ezekiele 34:11-16.) Pili, mulisana naatokwa kubata ngu yelatehile, mi kueza cwalo nekutokwa nako ni buikatazo. Mi hasafumani ngu yenelatehile, naaikutisezanga mwa mutapi. Kuzwa fo, haiba neiholofezi kamba neilapile, mulisana naababalelanga hande ngu yeo yefokozi, kutama litombo zayona, kuishimba, ni kuifepa. Baana-bahulu, bona babali balisana ba “mutapi wa Mulimu,” batokwa kueza nto yeswana kuli batuse mutu yatuhezi kuswalisana ni puteho. (1 Pit. 5:2, 3) Batokwa kubata batu babacwalo, kubatusa kukutela mwa mutapi, ni kubabonisa lilato ka kubatusa kuba ni silikani sesinde ni Jehova. *

11. Mulisana yomunde naazibañi ka za lingu zahae?

¹¹ Mulisana yomunde naaziba kuli lingu nelikona kulateha. Mi haiba yeñwi ya lingu zahae ilateha mi aifumana, naasa inatangi. Halunyakisiseñi zelukona kuituta ku Mulimu ka mwanaatuselize batanga bahae bane batuhezi kumusebeleza ka nakonyana.

12. Jehova naaezize cwañi Jonasi hanaamatile musebezi wanaa mufile?

¹² Mupolofita Jonasi naamatile musebezi wanaafilwe. Nihakulicwalo, Jehova naabonisize pilu-telele ka kuzwelapili kuitusisa Jonasi. Ka kuba mulisana yomunde, Jehova naamupilisize ni kumufa maata anaatokwa kuli aeze musebezi wanaa mufile. (Jona. 2:7; 3:1, 2) Hasamulaho, Mulimu naaitusisize libonobono kuli atuse Jonasi kulemuha kuli naanga bupilo bwa batu kuba bwa butokwa. (Jona. 4:10, 11) Luitutañi kwa taba yeo? Baana-bahulu baswanela kuzwelapili kuba ni pilu-telele ni kutusa babafokozi. Baswanela kulika kuutwisisa zenetahisize kuli ngu izwe mwa mutapi. Mi haiba ngu ikutela ku Jehova, baana-bahulu baswanela kuzwelapili kuiisa pilu ni kuibonisa lilato.

13. Luitutañi ku Jehova ka mwanaaezelize muñoli wa Samu 73?

¹³ Muñoli wa Samu 73 naazwafile hahulu kubona batu babamaswe habakondisa. Naakalile kuikutwa kuli kusebeleza Mulimu nekusa tusi sesiñwi. (Samu 73:12, 13, 16)  Jehova naamutusize cwañi? Naasika munyaza. Mulimu mane naalukisize kuli manzwi anaabulezi muñoli wa Samu añolwe mwa Bibele. Hamulaho wa nako, muñoli wa samu yo afita fa kulemuha kuli kuba ni silikani sesinde ni Jehova ki kwa butokwa hahulu kufita nto ifi kamba ifi. (Samu 73:23, 24, 26, 28) Luitutañi kwa taba yeo? Baana-bahulu habaswaneli kuakufa kuatula batu babaikutwa kuli kusebeleza Jehova hakutusi. Kono baswanela kulika kuutwisisa libaka lelitahisa kuli baikutwe cwalo. Hasamulaho, bakona kubasusueza ka kuitusisa Mañolo.

14. Ki kabakalañi Elia hanaatokwa kutusiwa, mi Jehova naamutusize cwañi?

¹⁴ Mupolofita Elia naabalehile bakeñisa kuli naasaba Muoli Jezabele. (1 Mal. 19:1-3) Naanahana kuli nekusina mutu yomuñwi yanaali mupolofita wa Jehova kwandaa yena, mi naaikutwa kuli musebezi wanaaezize neli wa mbango. Elia naalembwalile hahulu kuli mane aikupela kushwa. (1 Mal. 19:4, 10) Niteñi, Jehova naasika nyaza Elia, kono amutiisa ka kumuzibisa kuli nekusanani batu babañwi bane bamusebeleza ka busepahali, amusepisa kuli naaka mutusa, ni kumutaluseza kuli kunani musebezi wanaasa tokwa kueza. Jehova naateelelize ku Elia ka tokomelo mi amufa misebezi yemiñwi hape. (1 Mal. 19:11-16, 18) Luitutañi kwa taba yeo? Kaufelaa luna, sihulu baana-bahulu, luswanela kubonisa sishemo kwa lingu za Jehova. Baana-bahulu baswanela kuteeleza ka tokomelo mutu yomuñwi hatalusa maikuto ahae, ibe kuli ueza cwalo ka bunyemi kamba uikutwa kuli Jehova haana  kumuswalela bakeñisa bufosi bwaezize. Hasamulaho, baswanela kuomba-omba mutu yo kuziba kuli Jehova wamulata.

15. Ka kuya ka liñolo la Joani 6:39, Jesu naanga cwañi lingu za Ndatahe?

¹⁵ Jehova ubata kuli luunge cwañi lingu zahae zelatehile? Lwakona kuituta kwa mutala wa Jesu. Jesu naaziba kuli Jehova naanga lingu zahae kaufela kuba za butokwa ku yena; kacwalo naaezize mwanaakonela kaufela kutusa “lingu zelatehile za ndu ya Isilaele” kukutela ku Jehova. (Mat. 15:24; Luka 19:9, 10) Mi ka kuba mulisana yomunde, Jesu hape naaezize mwanaakonela kaufela kuli asike alatehelwa ki yeñwi ya lingu za Jehova.—Mubale Joani 6:39.

16-17. Baana-bahulu baswanela kuikutwa cwañi ka za kutusa lingu zelatehile? (Mubone mbokisi yeli, “ Moiikutwelanga Ngu Yelatehile.”)

¹⁶ Muapositola Paulusi naasusuelize baana-bahulu ba puteho ya Efese kulikanyisa mutala wa Jesu. Naaize: “Mulukela kutusa babafokola, mi mulukela kuhupula manzwi a Mulena Jesu, hanaaize: ‘Kunani tabo yetuna mwa kufana yefita ye mwa kufiwa.’” (Lik. 20:17, 35) Kaniti, baana-bahulu kacenu banani buikalabelo bobutuna bwa kutusa batanga ba Jehova. Muuna-muhulu yomuñwi wa kwa Spain wa libizo la Salvador naabulezi kuli: “Hanihupulanga kuli Jehova uiyakatwa hahulu lingu zahae zelatehile, nilikanga monikonela kaufela kulitusa. Naziba kuli Jehova ubata kuli nilibabalele.”

¹⁷ Bahasanyi kaufela bane bafokozi bababulezwi mwa taba ye nebatusizwe kukutela ku Jehova. Ni kacenu, batu babatuhezi kuswalisana ni puteho babata kueza nto yeswana. Mwa taba yetatama, lukanyakisisa ka butungi zeluswanela kueza kuli lubatuse kukutela ku Jehova.