1-2. Ki kabakalañi Jesu hanaaikalezwi hahulu?

JESU naaikalezwi hahulu fa lizazi lahae la mafelelezo pili asika bulaiwa kale. Naaziba kuli batu babamaswe nebatuha bamunyandisa ni kumubulaya ka nzila yesituhu. Kono Jesu naasika ikalelwa feela kabakala kuli naatuha abulaiwa. Naalata hahulu Ndatahe mi naabata kumutabisa. Jesu naaziba kuli haiba azwelapili kusepahala ku Mulimu ka kutiyela miliko yanaatuha akopana ni yona, naakatahisa kuli libizo la Jehova likanyiswe. Jesu hape naalata batu, mi naaziba kuli haiba azwelapili kusepahala ku Mulimu kuisa lifu, naakatusa batu kaufela kufumana bupilo bobusa feli.

² Kono kusina taba kuli Jesu naaikalezwi hahulu, naanani kozo. Naabulelezi baapositola bahae kuli: “Nimifa kozo yaka.” (Joa. 14:27) Naanani “kozo ya Mulimu” yetahiswa ki kuba ni silikani sesinde ni Jehova. Kozo yeo neitusize Jesu kutiyela miinelo yanaakopani ni yona ka bundume.—Mafil. 4:6, 7.

3. Lukanyakisisañi mwa taba ye?

³ Hakuna ku luna yakakopana ni miliko yeswana ni yanaakopani ni yona Jesu, kono lwaziba kuli balateleli ba Jesu kaufela bakatalimana ni miinelo yetaata. (Mat. 16:24, 25; Joa. 15:20) Ni luna ka linako zeñwi lukaikalelwanga sina mwanaaikalelezwi Jesu. Ki lika mañi zeluswanela kueza kuli lipilaelo zaluna lisike zalupaleliswa kuba ni kozo ya mwa munahano? Halunyakisiseñi lika zetaalu zanaaezize Jesu mwa bukombwa bwahae bwa fa lifasi, ni molukona kumulikanyiseza halukopana ni miinelo yetaata.

4. Mufe mitala yebonisa kuli Jesu naalapezi hañata-ñata fa lizazi lahae la mafelelezo pili asika bulaiwa kale, ili kulumelelana ni zeñozwi kwa liñolo la 1 Matesalonika 5:17.

⁴ Mubale 1 Matesalonika 5:17. Jesu naalapezi hañata-ñata fa lizazi lahae la mafelelezo fa lifasi pili asika bulaiwa kale. Hanaabonisa balutiwa bahae mwakuezeza mukiti wa kuhupula lifu lahae, naalapezi pili asika bafa kale sinkwa ni waine. (1 Makor. 11:23-25) Mi naalapezi ni balutiwa bahae basika zwa kale kwa sibaka kone bacezi mukiti wa Paseka. (Joa. 17:1-26) Hape Jesu ni balutiwa bahae habafita fa sibaka sa Getsemani busihu, naalapezi ka kukuta-kutela. (Mat. 26:36-39, 42, 44) Mi manzwi a mafelelezo anaabulezi Jesu pili asika shwa kale, naaabulezi inzaa lapela. (Luka 23:46) Jesu naalapezi ku Jehova ka za lika kaufela zeneezahezi fa lizazi lahae la mafelelezo pili asika bulaiwa kale.

5. Ki kabakalañi baapositola hane bapalezwi kubonisa bundume?

⁵ Jesu naakonile kutiyela miinelo yetaata yanaakopani ni yona bakeñisa kuli naasepile Ndatahe mi naalapezi ku yena. Kono baapositola bona nebasika tundamena kulapela fa busihu bo. Kabakaleo, nebapalezwi kubonisa bundume tumelo yabona hane ilikilwe. (Mat. 26:40, 41, 43, 45, 56) Ni luna lukakona feela kutiyela miliko yelukopana ni yona haiba lulikanyisa mutala wa Jesu ni ‘kuzwelapili kulapela.’ Ki lika mañi zelukona kukupa mwa tapelo?

6. Tumelo ika lutusa cwañi kuba ni kozo?

⁶ Lwakona kukupa Jehova kuli ‘aluekeleze kwa tumelo.’ (Luka 17:5; Joa. 14:1) Lutokwa kuba ni tumelo kakuli Satani ukalwanisa balateleli ba Jesu kaufela. (Luka 22:31) Tumelo ika lutusa cwañi kuba ni kozo halutalimana ni miinelo yetaata? Hase luezize molukonela kaufela kutatulula muinelo otaata oluli ku ona,  lukasiya lika kaufela mwa mazoho a Jehova. Kueza cwalo kuka lutusa kuba ni kozo ya mwa munahano bakeñisa kuli lunani tumelo ya kuli Jehova ki yena yakona kutatulula hande butata bo, kufita molukona kuezeza luna.—1 Pit. 5:6, 7.

7. Muitutileñi ku zebabulezi bo Robert?

⁷ Tapelo ilutusa kuzwelapili kuba ni kozo ya mwa munahano kusina taba ni miinelo yetaata yelukopana ni yona. Halunyakisiseñi mutala wa Muzwale Robert yasebelize sina muuna-muhulu mwa puteho ka lilimo zeñata, ili yanani lilimo zefitelela 80. Utalusa kuli: “Kelezo yeñozwi kwa Mafilipi 4:6, 7 initusize kutiyela miinelo yetaata yemiñata yenikopani ni yona mwa bupilo. Nenikopani ni butata bwa kutokwa hande masheleñi. Mi nenituhelisizwe kusebeza sina muuna-muhulu ka nakonyana.” Ki lika mañi zetusize bo Robert kuzwelapili kuba ni kozo ya mwa munahano? Batalusa kuli: “Nalapelanga ku Jehova nisakala feela kuikutwa bumaswe. Nilumela kuli haiba nilapela kuzwelela kwatasaa pilu, nikaba ni kozo ya mwa munahano.”

8. Ka kuya ka liñolo la Joani 8:29, ki lifi libaka leliñwi lene litahisize kuli Jesu abe ni kozo ya mwa munahano?

⁸ Mubale Joani 8:29. Jesu naanani kozo ya mwa munahano niha naanyandiswa bakeñisa kuli naaziba kuli naatabisa Ndatahe. Naazwezipili kuipeya kuutwa Mulimu hane kuli taata kueza cwalo. Jesu naalata Ndatahe mi kusebeleza Jehova neli yona nto ya butokwa hahulu mwa bupilo bwahae. Asika taha kale fa lifasi, naali “mubeleki wa sikwala” yanaasebeza ni Mulimu. (Liprov. 8:30) Mi hanaasa pila fa lifasi, naataluselize babañwi ka za Ndatahe ka tukufalelo. (Mat. 6:9; Joa. 5:17) Musebezi wo neutahiselize Jesu tabo yetuna.—Joa. 4:34-36.

9. Kutukufalelwa mwa musebezi wa kukutaza kukona kulutusa cwañi kuzwelapili kuba ni kozo ya mwa munahano?

 ⁹ Lukalikanyisa Jesu haiba luipeya kuutwa Jehova ni ‘kupateha kueza zeñata mwa musebezi wa Mulena.’ (1 Makor. 15:58) Haluka ‘tukufalelwa hahulu’ mwa musebezi wa kukutaza, haluna kuisa hahulu pilu kwa miinelo yetaata yelukopana ni yona. (Lik. 18:5) Ka mutala, batu bolukutazanga ku bona bakopana ni miinelo yetaata kufita yelukopana ni yona. Kono habaitutanga Bibele, kulata Jehova, ni kusebelisa zebaituta, bupilo bwabona bubanga bobunde mi babanga ni tabo. Halubonanga batu bolukutaza ku bona habaeza licinceho zeo, lubanga ni buikolwiso bwa kuli Jehova uka lutusa. Mi buikolwiso bo bulutusa kuzwelapili kuba ni kozo ya mwa munahano. Kaizeli yomuñwi yanaalembwalanga ni kuikutwa kuli haana tuso, uiponezi buniti bwa taba yeo. Utalusa kuli: “Hanipatehanga kueza musebezi wa kukutaza, niikutwanga kuba ni tabo mi hanibangi ni maikuto amaswe. Nibona kuli libaka haniikutwanga cwalo kikuli, silikani saka ni Jehova sitiyanga hahulu hanikutaza.”

10. Muitutileñi ku zebabulezi bo Brenda?

¹⁰ Hape halunyakisiseñi mutala wa kaizeli yabizwa Brenda. Kaizeli yo ni mwanaa hae wamusizana bakula butuku bobumaswe hahulu, bobubatisa lilama za mubili, bobubizwa multiple sclerosis. Bo Brenda habakoni kuzamaya; kacwalo, baitusisanga sipula sa mawili, mi habana hande maata mwa mubili. Fokuñwi, bakutazanga fa ndu ni ndu, kono hañata bakutazanga ka kuñola mañolo. Batalusa kuli: “Hase nilemuhile kuli muinelo waka haukoni kucinca mwa lifasi la cwale, naikatulela kuisa hahulu pilu kwa musebezi wa kukutaza. Mane hanikutazanga, haninahanangi za miinelo yetaata yenikopana ni yona. Kono kukutaza kunitusize kuisa pilu batu ba mwa kalulo yaka ya simu bonikutazanga ku bona. Mi kukutaza kunitusanga kuhupula sepo yeninani yona ya lika zekaezahala kwapili.”

11-13. (a) Baapositola ni batu babañwi nebabonisize cwañi kuli neli balikani ba Jesu ba niti? (b) Balikani ba Jesu neba mutusize cwañi?

¹¹ Mwahalaa nako kaufela ya bukombwa bwa Jesu, baapositola bahae nebabonisize kuli neli balikani ba niti. Neli balikani babande luli, ili babatalusizwe mwa Bibele kuli: “Kunani mulikani yakumalela hahulu mutu kufita mwanahabo.” (Liprov. 18:24) Jesu naaitebuhile hahulu kuba ni balikani bao. Ka nako ya bukombwa bwahae fa lifasi, banyani bahae nebasika bonisa tumelo ku yena. (Joa. 7:3-5) Mane ka nako yeñwi, babañwi nebanahanile kuli watakana. (Mare. 3:21) Kono baapositola bahae bona nebasepahalile ku yena kuli mane fa busihu bwahae bwa mafelelezo naababulelezi kuli: “Mina ki mina babatiiselize ni na mwa litiko zaka.”—Luka 22:28.

¹² Ki niti kuli fokuñwi baapositola nebaezize lika zenesika tabisa Jesu, kono naasika landalala fa mafosisa abona, mi naalemuhile kuli nebanani tumelo ku yena. (Mat. 26:40; Mare. 10:13, 14; Joa. 6:66-69) Fa busihu bwahae bwa mafelelezo pili asika bulaiwa kale, Jesu naabulelezi baana babasepahala bao kuli: “Nimibizize balikani, kakuli nimizibisize lika kaufela zeniutwile ku Ndate.” (Joa. 15:15) Kusina kukakanya, balikani ba Jesu neba mususuelize hahulu. Tuso yene bamufile mwa bukombwa neitahisize kuli abe ni tabo yetuna.—Luka 10:17, 21.

¹³ Kwandaa feela baapositola bahae, Jesu hape naanani balikani babañwi, ili baana ni basali bane bamutusize mwa musebezi wa kukutaza ni mwa linzila zeñwi. Babañwi neba mumemelanga kwa mandu abona kuli bayo ca ni yena sico. (Luka 10:38-42; Joa. 12:1, 2)  Babañwi nebayanga ni yena hanaayo kutalezanga kwa libaka zeñwi ni kuikabela lika zene banani zona ni yena. (Luka 8:3) Jesu naanani balikani babande bakeñisa kuli ni yena naali mulikani yomunde ku bona. Naabaezezanga lika zende mi naasabatangi kuli bamuezeze lika zene basakoni kueza. Jesu neli mutu yapetahalile, kono naaitebuhile hahulu tuso yene bamufile balikani bahae bane basika petahala. Mi kusina kukakanya, neba mutusize kuzwelapili kuba ni kozo ya mwa munahano.

14-15. Ki lika mañi zeka lutusa kuba ni balikani babande, mi balikani babande bakona kulutusa cwañi?

¹⁴ Balikani babande baka lutusa kuzwelapili kusepahala ku Jehova. Kuli lube ni balikani babande, lutokwa kuba balikani babande ni luna. (Mat. 7:12) Ka mutala, Bibele ilususueza kutusa batu babañwi sihulu ‘babatokwile.’ (Maef. 4:28) Kana kunani mutu yomuñwi mwa puteho yamina yemukona kutusa? Kana mwakona kutusa muhasanyi yomuñwi yasakoni kuzamaya bakeñisa makulanu kamba busupali ka kuyo mulekela lika zeñwi zatokwa? Kana mwakona kutusa lubasi loluñwi lolushebile ka kulufa lico? Haiba mwaziba mwakuitusiseza hande webusaiti yaluna ya jw.org^® kamba progilamu ya JW Library,^® kana mwakona kutusa batu babañwi mwa puteho yamina kuziba mobakona kufumanela litaba za butokwa zefumaneha fateñi? Haiba lupateha kutusa babañwi, lukaba ni tabo.—Lik. 20:35.

¹⁵ Balikani baluna baka lutusa haluka talimana ni miinelo yetaata, mi baka lutusa kuzwelapili kuba ni kozo ya mwa munahano. Sina feela Elihu hanaateelelize ku Jobo ka nako yanaatalusa za miliko yahae, balikani baluna ni bona baka lutusa ka kuteeleza ku luna ka tokomelo, halunze lubataluseza moluikutwela.  (Jobo 32:4) Nihaike kuli haluswaneli kulibelela kuli balikani baluna baka luezeza likatulo, luswanela kuteeleza ku bona haba lufa kelezo ya mwa Bibele. (Liprov. 15:22) Sina Mulena Davida hanaaamuhezi tuso yene bamufile balikani bahae, ni luna luswanela kubonisa kuli lwaikokobeza ka kuamuhela tuso yeba lufa balikani baluna haluziyelehile. (2 Sam. 17:27-29) Kaniti luli, balikani babande babacwalo ki mpo yezwa ku Jehova.—Jak. 1:17.

16. Ka kuya ka liñolo la Mafilipi 4:6, 7, lukona kufumana cwañi kozo ya mwa munahano? Mutaluse.

¹⁶ Mubale Mafilipi 4:6, 7. Ki kabakalañi Jehova halutaluseza kuli lukona kuba ni kozo “ka Kreste Jesu”? Libaka kikuli lukona feela kuba ni kozo ya mwa munahano haiba luutwisisa musebezi wapeta Jesu ni kuba ni tumelo ku yena. Ka mutala, libi zaluna kaufela zakona kuswalelwa kabakala sitabelo sa tiululo sa Jesu. (1 Joa. 2:12) Kuziba taba yeo kwaluomba-omba luli! Ka kuba yena Mulena wa Mubuso wa Mulimu, Jesu ukafelisa manyando kaufela elukopana ni ona atahiswa ki Satani ni lifasi lahae. (Isa. 65:17; 1 Joa. 3:8; Sin. 21:3, 4) Taba yeo ilufa sepo ya kuli kwapili lika kaufela likaba hande! Mi nihaike kuli Jesu ululaezi kueza musebezi otaata, lwaziba kuli uinzi ni luna, mi usweli walutusa mwa mazazi a mafelelezo a lifasi le. (Mat. 28:19, 20) Taba yeo ilutusa kuba ni bundume! Kacwalo, kuli lube ni kozo ya mwa munahano, lutokwa kuomba-ombiwa, kuba ni sepo, ni kuba ni bundume.

17. (a) Mukreste utokwa kuezañi kuli azwelepili kuba ni kozo ya mwa munahano? (b) Ka kuya ka liñolo la Joani 16:33, ki lika mañi zeluka kona kueza?

¹⁷ Kacwalo, ki lika mañi zemutokwa kueza kuli muzwelepili kuba ni kozo ya mwa munahano hamutalimana ni miinelo yetaata? Muswanela kulikanyisa Jesu ka kueza sina mwanaaezelize. Sapili, muswanela kuzwelapili kulapela. Sabubeli, muzwelepili kuipeya kuutwa Jehova ni kukutaza ka kutukufalelwa niha kukona kuba taata kueza cwalo. Mi sabulaalu, muamuhelange tuso yemufiwa ki balikani bamina hamutalimana ni miliko. Hamuka eza cwalo, kozo ya Mulimu ikasileleza minahano yamina ni lipilu zamina. Mi sina Jesu, ni mina mukatiyela miinelo yetaata yemuka kopana ni yona.—Mubale Joani 16:33.