1. Kaufelaa luna luswanela kuezañi?

KANA nemuka tabela kumata mwa siyano inze muziba kuli kutaata kueza cwalo, sihulu haiba mwakula kamba mukatezi? Mwendi nemusike mwaeza cwalo. Niteñi, muapositola Paulusi naabulezi kuli Bakreste ba niti kaufela ba mwa siyano. (Maheb. 12:1) Haiba lubata kuamuhela mupuzo waka lufa Jehova, kaufelaa luna luswanela kuitiisa kuisa kwa mafelelezo ibe kuli lu banana kamba lu babahulu, lunani maata kamba lukatezi.—Mat. 24:13.

2. Sina mokuboniselizwe kwa liñolo la 2 Timotea 4:7, 8, ki kabakalañi Paulusi hanaakona kufa kelezo ye?

² Paulusi naakona kufa kelezo yecwalo kakuli yena ‘naamatile mwa siyano kuyo fita kwa mafelelezo.’ (Mubale 2 Timotea 4:7, 8.) Kono ki siyano ya mufuta mañi yanaatalusa Paulusi?

3. Ki siyano yecwañi yanaatalusa Paulusi?

³ Fokuñwi, Paulusi naañolanga lika zene baezanga batu mwa lipapali za mwa naha ya Magerike ya kwaikale kuli alute lituto za butokwa. (1 Makor. 9:25-27; 2 Tim. 2:5) Naaswaniselize bupilo bwa Mukreste kwa taba ya kumata mwa siyano. (1 Makor. 9:24; Magal. 2:2; Mafil. 2:16) Mutu ukona kukala kumata mwa “siyano” ye, haineela ku Jehova ni kukolobezwa. (1 Pit. 3:21) Mi ukona kufita kwa mafelelezo a siyano Jehova haamufa mupuzo wa bupilo bobusa feli.—Mat. 25:31-34, 46; 2 Tim. 4:8.

4. Lukanyakisisañi mwa taba ye?

⁴ Mupilelo wa Sikreste uswana cwañi ni siyano ya kumata musipili omutelele? Kunani lika lisikai zeswana. Halunyakisiseñi zetaalu za ku zona. Sapili, luswanela kumata mwa nzila  yelukile; sabubeli, luswanela kuisa pilu kwa kufeza siyano; mi sabulaalu, luswanela kuzwelapili kumata niha lukopana ni miinelo yetaata.

5. Ki mutala wa mañi oluswanela kulikanyisa, mi ki kabakalañi?

⁵ Kuli mumati afiwe mupuzo, utokwa kumata mwa nzila yabulelezwi ki bazamaisi ba siyano. Ka nzila yeswana, haiba lubata kufiwa mupuzo wa bupilo bobusa feli, luswanela kulikanyisa mutala wa Kreste. (Lik. 20:24; 1 Pit. 2:21) Nihakulicwalo, Satani ni balateleli bahae habalati kuli lueze zelukile; babata kuli luzwelepili “kumata ni bona.” (1 Pit. 4:4) Balunyefula kabakala mupilelo waluna mi baipapata kuli wabona ki omunde; ukonisa mutu kuba ni tukuluho. Kono yeo haki niti.—2 Pit. 2:19.

6. Muitutañi kwa mutala wa bo Brian?

⁶ Mutu kaufela yapila ka kulatelela lifasi la Satani utuha alemuha kuli nzila yali ku yona haifi mutu tukuluho kono imubisa mutanga. (Maro. 6:16) Halunyakisiseñi mutala wa bo Brian. Bashemi babona neba basusuezanga kupila ka kulatelela likuka za Jehova. Kono habato kena mwa lilimo za kunonoboka, bakakanya ka za haiba kueza cwalo nekuka tahisa kuli babe ni tabo. Bo Brian bakala kulatelela mikwa ya lifasi la Satani. Batalusa kuli: “Nenisa zibi kuli kubata tukuluho nekuka tahisa kuli nilate hahulu kueza lika zemaswe. Hamulaho wa nako, nakala kuitusisa maswe milyani yekola, kunwa hahulu bucwala, ni kuba ni muzamao omaswe. Hase kufitile lilimonyana, nakala kuitusisa milyani yemaswe yekola hahulu mi nangongwelwa ki yona. . . . Nakala kulekisa milyani yekola kuli nizwelepili kupila mupilelo wo.” Hamulaho wa nako, bo Brian baikatulela kupila ka likuka za Jehova. Bacinca mupilelo wabona mi bakolobezwa ka silimo sa 2001. Cwale sebanani tabo yetuna mwa bupilo kakuli sebapila ka nzila yetabisa Jehova. *

7. Ka kuya ka liñolo la Mateu 7:13, 14, ki linzila mañi zepeli zelutokwa kuiketela kuzamaya ku zona?

⁷ Kaniti, luswanela kuketa nzila yende yeluka latelela! Satani ubata kuli kaufelaa luna lutuhele kumata mwa nzila yesisani ‘yeya kwa bupilo’ ni kuli lube mwa nzila yeatami yebali ku yona batu babañata mwa lifasi le. Babafita mwa nzila yeatami ki babañata mi ibunolo kuzamaya ku yona. Kono ‘iisa kwa sinyeho.’ (Mubale Mateu 7:13, 14.) Kuli luzwelepili kuba mwa nzila yelukile ni kuli lusike lwayaululwa ki lifasi le, luswanela kusepa Jehova ni kumuutwa.

8. Haiba mumati asitatala, ki sika mañi saezanga?

⁸ Bamati baba mwa siyano ya musipili omutelele batalimanga mwa nzila yebatokwa kufita ku yona ilikuli basike basitatala. Nihakulicwalo, mwendi basakona kusitataliswa ki mumati yomuñwi ka kusalibelela kamba mane bakona kuhata mwa musima. Habawa, bayemanga kapili ni kuzwelapili kumata. Habaisangi pilu kwa lika zebasitatalisize kono baisanga hahulu mamelelo yabona kobaya ni kwa mupuzo obaka fiwa habaka fita kwa mafelelezo a siyano.

9. Haiba lusitatala, luswanela kuezañi?

⁹ Mwa siyano yaluna, mwendi lwakona kusitatala hañata-ñata ni kueza mafosisa ku zelubulela kamba zelueza. Kamba bamati babañwi bakona kueza mafosisa aluutwisa butuku kwa pilu. Haluswaneli kukomoka haiba kuba cwalo. Kaufelaa luna halusika petahala, mi kaufelaa luna lusweli kumata mwa nzila yesisani yeya kwa bupilo. Kacwalo, halunze lusebeleza Jehova, fokuñwi lwakona kusitatalisa mizwale ni likaizeli baluna kamba mane bona kulusitatalisa. Paulusi naalemuhile kuli fokuñwi lwabanga ni “libaka la kutongoka babañwi.” (Makolo. 3:13) Kono kufita kuisa hahulu pilu kwa lika zene lusitatalisize, luise pilu kwa mupuzo oluka fiwa kwapili. Haiba lusitatala, haike luyeme ni kuzwelapili kumata. Kono haiba luhalifa ni kuhana kuyema, haluna kufita kwa mafelelezo a siyano yaluna ni kufiwa mupuzo. Kuzwa fo, mane lukona kusitatalisa bamati babañwi babasweli kulika ka taata kumata mwa nzila yesisani yeya kwa bupilo.

10. Lukona kuambuka cwañi kuba “sisitataliso” ku babañwi?

¹⁰ Nzila yeñwi yekona kulutusa kuambuka kuba “sisitataliso” kwa mizwale ni likaizeli baluna, ki kubatuhelela kueza lika ka nzila yebabata hakukonahala kueza cwalo, isiñi kuli nako kaufela baeze lika ka nzila yelutabela feela luna. (Maro. 14:13, 19-21; 1 Makor. 8:9, 13) Ka nzila yeo, lushutana ni bamati luli baba mwa siyano. Bona bakangisananga ni bamati babañwi, mi mumati ni mumati uezanga ka taata kuli afumane mupuzo wahae anosi. Bamati bao banahananga feela  lika zeka batusa kufumana mupuzo. Kacwalo, mwendi bakona kukasheza bamati babañwi kwatuko kuli bona babe bapili. Ka kushutana ni bamati bao, luna halukangisani ni mizwale ni likaizeli baluna. (Magal. 5:26; 6:4) Lubata kutusa batu babañata kumata kuyo fita kwa mafelelezo a siyano ni kufumana mupuzo wa bupilo. Kacwalo, lueza molukonela kaufela kusebelisa kelezo ya Paulusi yanaañozi ka kususumezwa ki moya, ya kuli ‘muise pilu, isiñi ku zamina feela, kono ni ku za babañwi.’—Mafil. 2:4.

11. Mumati unahananga hahulu zañi, mi ki kabakalañi?

¹¹ Bamati habatalimangi feela nzila yebatokwa kufita ku yona, kono banahananga hahulu za kuyo fita kwa mafelelezo a siyano. Nihaike kuli habakoni kubona luli fobayo feleza, baiponanga inze bafita kwa mafelelezo a siyano ni kuamuhela mupuzo wabona. Kuisa pilu kwa mupuzo obaka fiwa kubatusanga kuzwelapili kumata kuyo fita kwa mafelelezo.

12. Ki lika mañi zalusepisize Jehova ka lilato?

¹² Mwa siyano yeluli ku yona, Jehova ka lilato, usepisa kufa batu bahae mupuzo wa bupilo bobusa feli haiba bafita kwa mafelelezo a siyano yeo, ibe kuli banani sepo ya kuyo pila kwa lihalimu kamba mwa paradaisi fa lifasi. Bibele italusa limbuyoti zeluka ikola kwapili, ili kulutusa kunahanisisa mobuka tabiseza bupilo ka nako yeo. Haiba lunahanisisa hahulu lika zaka luezeza Jehova kwapili, lukaitiisa niha lukopana ni miinelo yetaata.

13. Ki lika mañi zelunani zona zebasina bamati babamata mwa siyano?

¹³ Bamati bane baezanga lipapali kwamulaho mwa naha ya Magerike, nebakopananga ni miinelo yetaata yecwale ka mukatalo ni kuutwa butuku. Kono bona nebaitingile fa maata abona ni lituto za kutiisa mubili. Ni luna luswana sina bamati bao kabakala kuli lwalutiwa moluswanela kumatela mwa siyano yeluli ku yona. Kono luna lunani lika zeñwi zebasina bamati. Lwakona kukupa Jehova kuli alufe maata, mi ukazwelapili kulutusa. Haiba lumusepa, uka luluta ni kulufa maata kuli luzwelepili kumata mwa siyano yeo!—1 Pit. 5:10.

14. Liñolo la 2 Makorinte 12:9, 10 lilutusa cwañi halukopana ni miinelo yetaata?

¹⁴ Paulusi naakopani ni miinelo yetaata yemiñata. Naalwahakilwe ni kunyandiswa ki batu, mi fokuñwi naaikutwanga kutokwa maata, mi naanani kutiyela muinelo wanaabizize kuli ki “muutwa mwa mubili.” (2 Makor. 12:7) Nihakulicwalo, naasika zwafa kono hanaakopani ni miinelo yetaata, naaitingile ku Jehova. (Mubale 2 Makorinte 12:9, 10.) Bakeñisa kuli Paulusi naasepile Jehova, naamutusize kutiyela miliko kaufela yanaakopani ni yona.

15. Lukatusiwa cwañi haiba lulikanyisa mutala wa Paulusi?

¹⁵ Ni luna, batu bakona kululwahaka ni kulunyandisa kabakala tumelo yaluna. Hape mwendi lutalimana ni mapongo ni miinelo yelukatalisa. Kono haiba lulikanyisa mutala wa Paulusi, Jehova uka lutusa kabakala kuli walulata.

16. Ki lika mañi zemukona kueza niha munani mapongo?

¹⁶ Kana mu bakuli mi hamukoni kunanuha fa mumbeta kamba mu lihole mi muitusisa sipula sa mawili? Kana mukula mañwele kamba hamuboni hande? Haiba ki cwalo, kana mwakona kumata mwa siyano hamoho ni babanca, babaikanguzi? Eni mwakona! Batu babañata babali basupali ni babanani mapongo basweli bamata mwa siyano ya bupilo. Kono habasika itinga fa maata abona. Baitingile ku Jehova yabafanga maata ka kubalukiseza mikopano ya Sikreste, ili yebateelezanga fa lipangaliko. Mi baezanga musebezi wa kuluta batu kuba  balutiwa ka kukutaza kwa madokota, manasi, ni bahabo bona.

17. Jehova uikutwa cwañi ka za batu babasina buikangulo bobunde bwa kwa mubili?

¹⁷ Nikamuta, musike mwazwafa ni kunahana kuli hamuna kukona kuzwelapili kumata mwa siyano ya bupilo bakeñisa kutokwa hande buikangulo bwa kwa mubili. Jehova wamilata kabakala kuli munani tumelo ku yena ni kabakala buitiiso bwamina. Mutokwa hahulu kutusiwa ki yena, mi haana kumifulalela. (Samu 9:10) Kono mane ukasutelela hahulu ku mina. Halunyakisiseñi zanaabulezi kaizeli yomuñwi yanani makulanu, yanaaize: “Bakeñisa makulanu, fokuñwi kunibelanga taata kukutaza ku babañwi. Kono kuziba kuli Jehova waitebuha lika zenyinyani zeni muezeza, kunitahisezanga tabo.” Hamuikutwa kuzwafa, muzibe kuli hamuyo munosi. Muhupule mutala wa Paulusi ni manzwi ahae asusueza, aali: “Natabela hanifokola, . . . kakuli hanifokola, kihona niba ni maata.”—2 Makor. 12:10.

18. Ki muinelo mañi otaata obakopana ni ona babañwi?

¹⁸ Batu babañwi babamata mwa siyano ya bupilo batalimana ni butata bobuñwi. Batalimana ni butata bobasa koni kubona babañwi kamba kuutwisisa. Ka mutala, babañwi balembwalile kamba baimelizwe ki lipilaelo zeñata. Ki kabakalañi muinelo obali ku ona batanga ba Jehova babalatiwa ba, sihulu hauli otaata? Kabakala kuli kubunolo kulemuha mutu yalobehile lizoho kamba yali sihole, ili yazamaela mwa sipula sa mawili ni kumutusa bakeñisa kuli lumushwela makeke. Niteñi, fokuñwi mwendi halukoni kulemuha mutu yalembwalile kamba yanani butata bwa mwa munahano. Muinelo obali ku ona utaata sina feela mutu yalobehile lizoho kamba lihutu, kono bakeñisa kuli batu babañwi habalemuhangi muinelo wabona, haba babonisangi lilato ni kubatusa sina mobaezezanga ku mutu yalobehile lizoho kamba lihutu.

19. Luitutañi kwa mutala wa Mefibosheti?

¹⁹ Haiba mutalimana ni muinelo omuñwi omipaleliswa kueza zeñata mwa sebelezo yamina ku Jehova mi muikutwa kuli batu haba miutwisisi, mwendi mwakona kuituta sesiñwi kwa mutala wa Mefibosheti. (2 Sam. 4:4) Mefibosheti naali sihole, mi Mulena Davida naasika mueza hande. Mefibosheti haki yena yanaatahisize butata bwanaakopani ni bona. Nihakulicwalo, naasika tuhelela taba yeo kumuzwafisa; kono naaitebuhile lika zende zanaaikola mwa bupilo. Naaitebuhile lika zende zanaa muezelize Davida kwamulaho. (2 Sam. 9:6-10) Kacwalo, Davida hanaasika mueza hande, Mefibosheti naalikile kunyakisisa miinelo kaufela. Naasika tuhelela mafosisa  a Davida kumuzwafisa. Mi naasika nyaza Jehova kabakala lika zanaaezize Davida. Mefibosheti naaisize pilu kwa lika zanaakona kueza kuli atuse mulena yanaaketilwe ki Jehova. (2 Sam. 16:1-4; 19:24-30) Jehova naaboni teñi kuli likande la Mefibosheti lañolwa mwa Bibele kuli ni luna luitute sesiñwi ku yena.—Maro. 15:4.

20. Lipilaelo litahisa kuli batu babañwi baikutwe cwañi, kono ki buikolwiso mañi bolukona kuba ni bona?

²⁰ Bakeñisa kuimezwa ki lipilaelo mwa bupilo, mizwale ni likaizeli babañwi baikalelwanga hahulu habali ni batu babañwi. Kukona kubabela taata kuba mwahalaa batu babañata, kono bazwelapili kufumanehanga kwa mikopano ya puteho, mikopano ya mupotoloho, ni mikopano yemituna. Hape niha kubabelanga taata kuambola ni batu bobasa zibi, bakutazanga kwa batu babañwi. Haiba wo ki ona muinelo omuli ku ona, muhupule kuli haki mina munosi. Batu babañwi babañata bakopana ni muinelo oswana. Muhupule kuli Jehova waitebuha kuli mumusebeleza ka pilu yamina kaufela. Uzwelapili kumifuyaula ni kumifa maata, ki lona libaka hamusika zwafa. * (Mafil. 4:6, 7; 1 Pit. 5:7) Haiba musebeleza Jehova kusina taba kuli munani mapongo kamba mukopana ni miinelo yezwafisa, mube ni buikolwiso bwa kuli musweli mwatabisa Jehova.

21. Jehova ukatusa mañi ni mañi waluna kuezañi?

²¹ Niteñi, kunani shutano ye mwahalaa siyano tenyene ni siyano yanaatalusize Paulusi. Mwa siyano ya mwa linako zene iñolwa Bibele, neli mutu alimuñwi feela yanaafiwanga mupuzo. Ka kushutana ni siyano yeo, mutu kaufela yamata mwa siyano ya Sikreste yazwelapili kuitiisa ka busepahali ukafiwa mupuzo wa kupila kuya kuile. (Joa. 3:16) Mi bamati babamata mwa siyano tenyene batokwa kuba babaiketile kwa mubili; hakusicwalo habakoni kuwina siyano yeo. Niteñi, buñata bwaluna haluna buikangulo bobunde bwa kwa mubili, kono lusweli lwaitiisa. (2 Makor. 4:16) Ka tuso ya Jehova, lukazwelapili kumata mwa siyano kuyo fita kwa mafelelezo!