1. Mukona kuba cwañi mulikanaa mutu?

KULI mube mulikani yomutuna wa mutu, mutokwa kutandanga nako yeñata ni yena. Hamunze muambola ni mutu yo, kumutaluseza zemunahana ni momuikutwela, mwakona kuba balikani. Nihakulicwalo, kukona kulubela taata kuba mulikanaa Jesu yomutuna. Kabakalañi?

2. Ki lifi libaka lapili lelikona kutahisa kuli kulubele taata kuba balikani ba Jesu?

² Libaka lapili lelikona kutahisa kuli kulubele taata kuba balikani ba Jesu kikuli lwali kuba lubone Jesu. Bakreste babañata ba mwa linako za baapositola ni bona nebakopani ni butata bobuswana. Kono muapositola Pitrosi naabulezi kuli: “Niha musika mubona, mwamulata. Nihaike kuli hamu muboni ka nako yacwale, mubonisa tumelo ku yena.” (1 Pit. 1:8) Kacwalo, lwakona kuba balikani ba Jesu babatuna nihaike kuli halusika mubona kale.

3. Ki lifi libaka labubeli lelikona kutahisa kuli kulubele taata kuba balikani ba Jesu?

³ Libaka labubeli kikuli, halukoni kuambola ni Jesu. Halulapela, luambolanga ni Jehova. Ki niti kuli lulapelanga ka libizo la Jesu, kono haluambolangi ku yena kasibili. Mane Jesu haabati kuli lulapelange ku yena. Kabakalañi? Kakuli ki  Jehova feela anosi yelulukela kulapela. (Mat. 4:10) Kono lusakona kubonisa kuli lwalata Jesu.

4. Ki lifi libaka labulaalu lelikona kutahisa kuli kulubele taata kuba balikani ba Jesu, mi lukanyakisisañi mwa taba ye?

⁴ Libaka labulaalu kikuli, Jesu upila kwa lihalimu; kacwalo halukoni kutanda nako ni yena. Kono lusakona kuziba litaba zeñata ka za Jesu nihaike kuli halupili hamoho ni yena. Kacwalo, halunyakisiseñi lika zeene zelukona kueza kuli lutiise silikani saluna ni yena. Pili, halunyakisiseñi libaka kuba balikani ba Kreste babatuna hakuli kwa butokwa.

5. Ki kabakalañi haluswanela kuba balikani ba Jesu? (Mubone ni tumbokisi totuli, “ Kuba Balikani ba Jesu Kuka Mitusa Kuba Balikani ba Jehova” ni “ Kuba ni Mubonelo Oswanela ka za Lika Zapeta Jesu.”)

⁵ Kuli silikani saluna ni Jehova sibe sesitiile, luswanela kuba balikani ba Jesu. Kabakalañi? Halunyakisiseñi mabaka amabeli alatelela. Sapili, Jesu naabulelezi balutiwa bahae kuli: “Ndate kasibili wamilata, kabakala kuli munilatile.” (Joa. 16:27) Hape naabulezi kuli: “Hakuna yataha ku Ndate haisi ka na.” (Joa. 14:6) Kulika kuba mulikanaa Jehova inze lusi balikani ba Jesu babatuna kuswana feela sina kulika kukena mwa muyaho kusina kuitusisa munyako. Jesu naaitusisize swanisezo yeswana hanaatalusize kuli ki yena “munyako wa lingu.” (Joa. 10:7) Libaka labubeli kikuli, Jesu naalikanyisize tulemeno twa Ndatahe ka kutala. Naabulelezi balutiwa bahae kuli: “Mutu kaufela yaniboni uboni ni Ndate.” (Joa. 14:9) Kacwalo, nto ya butokwa yekona kulutusa kuziba Jehova ki kuituta za bupilo bwa Jesu. Halunze  luituta ka za Jesu, luka mulata hahulu. Mi silikani saluna ni yena hasinze sitiya, lukafita fa kulata hahulu Ndatahe.

6. Ki lifi libaka leliñwi haluswanela kuba balikani ba Jesu? Mutaluse.

⁶ Kuli litapelo zaluna lialabiwe, luswanela kuba balikani ba Jesu. Fo kutalusa kuli, kunani lika zeñwi zelutokwa kueza kwandaa kubulelanga feela kuli “ka libizo la Jesu” halulapela. Luswanela kuziba mo Jehova aitusiseza Jesu kualaba litapelo zaluna. Jesu naabulelezi baapositola bahae kuli: “Semukupa kaufela ka libizo laka, nika sieza.” (Joa. 14:13) Nihaike kuli Jehova ki yena yautwa ni kualaba litapelo zaluna, ufile Jesu maata a kupeta likatulo zahae. (Mat. 28:18) Kacwalo, pili Jehova asika alaba kale litapelo zaluna, unyakisisanga kubona haiba lusebelisize kelezo yanaafile Jesu. Ka mutala, Jesu naabulezi kuli: “Haiba muswalela batu lifoso zabona, Ndataa mina ya kwa lihalimu ni yena uka miswalela; kono haiba musaswaleli batu lifoso zabona, Ndataa mina ni yena hana kumiswalela lifoso zamina.” (Mat. 6:14, 15) Kaniti, ki kwa butokwa kuli lueze hande babañwi sina feela Jehova ni Jesu moba luezeza!

7. Ki bo mañi babaka tusiwa ki sitabelo sa Jesu sa tiululo?

⁷ Ki batu feela babanani silikani sesinde ni Jesu babaka tusiwa ki sitabelo sahae sa tiululo. Luziba cwañi cwalo? Jesu naabulezi kuli ‘naakatoboha bupilo bwahae kabakala balikani bahae.’ (Joa. 15:13) Batu babasepahala bane bapilile pili Jesu asika taha kale fa lifasi bakatokwa kuituta ka za hae ni kumulata. Baana ni basali babacwale ka Abrahama, Sara, Mushe, ni Rahaba bakazusiwa kwa bafu; nihakulicwalo, batanga ba Jehova ba, bakatokwa kuba balikani ba Jesu kuli bafumane bupilo bobusa feli.—Joa. 17:3; Lik. 24:15; Maheb. 11:8-12, 24-26, 31.

8-9. Sina mokutaluselizwe kwa Joani 15:4, 5, kuba balikani ba Jesu kulukonisa kuezañi, mi ki kabakalañi kueza cwalo hakuli kwa butokwa?

⁸ Lunani tabo kakuli lusebeza hamoho ni Jesu mwa musebezi wa kukutaza ni kuluta batu taba yende ya Mubuso. Jesu hanaali fa lifasi, naali muluti. Mi kuzwa feela fakutela kwa lihalimu, Jesu ka kuba toho ya puteho, uzwezipili kuetelela musebezi wa kukutaza ni kuluta. Wabona mi waitebuha buikatazo bwamina bwa kutusa batu babañata kufita fa kumuziba ni kuziba Ndatahe. Mane lukona feela kupeta hande musebezi wo ka tuso ya Jehova ni Jesu.—Mubale Joani 15:4, 5.

⁹ Linzwi la Mulimu libonisa kuli luswanela kuzwelapili kuba balikani ba Jesu kuli lutabise Jehova. Kacwalo, halunyakisiseñi lika zeene zelutokwa kueza kuli lube balikani ba Jesu.

10. Ki ufi muhato wapili olutokwa kuunga kuli lube balikani ba Jesu?

¹⁰ (1) Muzibe hande Jesu. Lukona kueza cwalo ka kubalanga libuka za mwa Bibele za Mateu, Mareka, Luka, ni Joani. Halunze lunahanisisa litaba za mwa Bibele zebulela ka za bupilo bwa Jesu, lukafita fa kulata ni kukuteka Jesu kabakala kuli naaezize batu ka sishemo. Ka mutala, nihaike kuli neli Mulenaa bona, naasika anga balutiwa bahae sina batanga. Kono naababulelelanga zanaanahana ni mwanaaikutwela. (Joa. 15:15) Hane babanga mwa maswabi, Jesu ni yena naaikutwanga bumaswe mi naalilanga ni bona. (Joa. 11:32-36) Nihaiba lila zahae nelilemuhile kuli naali mulikanaa batu bane baamuhezi lushango lwahae. (Mat. 11:19) Halulikanyisa  Jesu ka mwanaasebelisanezi ni balutiwa bahae, silikani saluna ni babañwi sikaba sesinde, lukakolwa ka lika zelunani zona ni kuba ni tabo, mi luka mulata hahulu ni kumukuteka.

11. Ki ufi muhato wabubeli olutokwa kuunga kuli lube balikani ba Jesu, mi ki kabakalañi kueza cwalo hakuli kwa butokwa?

¹¹ (2) Munahane ni kueza lika sina Jesu. Haiba luziba ni kulikanyisa mwanahanela Jesu, silikani saluna ni yena sikatiya. (1 Makor. 2:16) Lukona kulikanyisa cwañi Jesu? Halunyakisiseñi mutala ulimuñwi feela. Jesu naalata hahulu kutusa babañwi kufita kueza lika zetabisa feela yena. (Mat. 20:28; Maro. 15:1-3) Bakeñisa kuli naalata kutusa babañwi, naanani moya wa buitomboli mi naalata kuswalela babañwi. Naasanyemiswangi kapili ki lika zene babulela batu ka za hae. (Joa. 1:46, 47) Mi naasanahanangi zemaswe ka za mutu kabakala mafosisa anaaezize kwamulaho. (1 Tim. 1:12-14) Jesu naabulezi kuli: “Batu kaufela bakaziba kuli mu balutiwa baka ka taba ye—haiba mulatana mwahalaa mina.” (Joa. 13:35) Muipuze kuli: “Kana nisweli nalikanyisa mutala wa Jesu ka kueza monikonela kaufela kupilisana ka kozo ni mizwale ni likaizeli baka?”

12. Ki ufi muhato wabulaalu olutokwa kuunga kuli lube balikani ba Jesu, mi lukona kueza cwañi cwalo?

¹² (3) Mutuse banyani ba Kreste. Jesu uunga lika kaufela zelueza kuli lutuse banyani bahae babatozizwe sina baba liezeza yena. (Mat. 25:34-40) Nzila yende hahulu yelukona kutusa ka yona babatozizwe, ki kueza molukonela kaufela kukutaza ni kuluta batu kuba balutiwa, sina feela mwanaa lulaelezi Jesu. (Mat. 28:19, 20; Lik. 10:42) Banyani ba Kreste bakona feela kupeta musebezi omutuna wa kukutaza mwa lifasi kaufela ka kutusiwa ki ba “lingu zeñwi.” (Joa. 10:16) Haiba mu ba lingu zeñwi, muzibe kuli nako kaufela hamueza musebezi wo, mubonisa kuli mwalata Bakreste babatozizwe mi mwalata Jesu.

13. Lukona kusebelisa cwañi kelezo ya Jesu ye kwa liñolo la Luka 16:9?

¹³ Hape lukona kuba balikani ba Jehova ni Jesu ka kufa linubu za masheleñi kuli lutuse mwa musebezi obasweli kuetelela. (Mubale Luka 16:9.) Ka mutala, lwakona kufa linubu za musebezi wa mwa lifasi kaufela, mi linubu ze, liitusiswa kwa kutusa mwa musebezi wa kukutaza mwa libaka za kwahule, kwa kuyaha ni kubabalela libaka za kulapelela, ni kwa kutusa babawezwi ki likozi za ka taho kamba babatalimana ni miinelo yemiñwi yetaata. Hape lwakona kufa linubu kuli lituse kwa kulifela lisinyehelo za puteho yaluna ni kutusa batu babañwi boluziba kuli ba mwa butokwi. (Liprov. 19:17) Halueza cwalo, lutusa banyani ba Kreste.

14. Sina mokuboniselizwe kwa Maefese 4:15, 16, ki ufi muhato wabune olutokwa kuunga kuli lube balikani ba Jesu?

¹⁴ (4) Mulatelele litukiso zeeziwa ki kopano ya Jehova. Lukatiisa silikani saluna ni Jesu, ka kuba yena toho ya puteho, haiba luswalisana ni baana babaketilwe kuli baluetelele. (Mubale Maefese 4:15, 16.) Ka mutala, lusweli kueza molukonela kaufela kubona teñi kuli Mandu A Mubuso kaufela aitusiswa hande. Ki lona libaka liputeho zeñwi halikopanyizwe ni zeñwi kueza puteho iliñwi, ni milulwani ya kalulo ya simu haicincizwe. Ka kueza cwalo, kopano ikonile kubuluka hande masheleñi asweli kufiwa sina linubu za kuzwisezapili musebezi  wa Mubuso. Kono licinceho zeo litahisize kuli bahasanyi babañwi baeze licinceho zeñwi. Bahasanyi babasepahala bao mwendi sebaswalisani ni puteho yeñwi ka lilimo zeñata mi mwendi nebanani balikani babatuna mwa puteho yeo. Kono cwale bakupilwe kuyo swalisana ni puteho isili. Kaniti luli, Jesu ubanga ni tabo yetuna kubona balutiwa babasepahala bao habaamuhela licinceho zeo!

15. Silikani saluna ni Jesu sikaba cwañi sesinde kwapili?

¹⁵ Bakreste babatozizwe ka moya okenile banani sepo ya kupila ni Jesu kuya kuile, ni kubusa ni yena mwa Mubuso wa Mulimu. Mane bakaba ni Kreste; baka mubona, kuambola ni yena, ni kutanda nako ni yena. (Joa. 14:2, 3) Babanani sepo ya kupila fa lifasi ni bona bakaboniswa lilato ki Jesu mi uka bashemuba. Nihaike kuli habana kubona Jesu, silikani sabona ni yena sikatiya hahulu habanze baikola bupilo bwabafile Jehova ni Jesu.—Isa. 9:6, 7.

16. Kuba balikani ba Jesu kulutusa cwañi?

¹⁶ Haiba luamuhela memo ya Jesu ya kuba balikani bahae, lukaikola limbuyoti zeñata. Ka mutala, walulata, mi lwaiponela mwasweli kulutuseza. Lunani sepo ya kupila kuya kuile. Mi sa butokwa nikufita kikuli, kuba balikani ba Jesu kuka lutusa kuba ni silikani sesitiile ni Ndatahe Jesu, yena Jehova. Kaniti luli, ki tohonolo yetuna kuba balikani ba Jesu!