1. Kaufelaa luna lutabela kuli bahabo luna baezeñi?

KAIZELI yabizwa Pauline * naabulezi kuli: “Kuzwa feela fone niitutezi niti, nenibatanga kuli lubasi lwaka luitute niti kuli nito ba ni lona mwa Paradaisi. Sihulu nenibata kuli bo muunaaka, bo Wayne, ni mwanaaka wamushimani basebeleze Jehova.” Kana ni mina munani bahabo mina babasa zibi Jehova kamba babasa mulati? Mwendi ni mina mutabela kuli bahabo mina baitute niti sina mone babatela bo Pauline.

2. Lukanyakisisa lipuzo mañi mwa taba ye?

² Halukoni kuhapeleza bahabo luna kuamuhela taba yende kono lwakona kubatusa kutabela lushango lwa mwa Bibele. (2 Tim. 3:14, 15) Ki kabakalañi haluswanela kukutaza ku bahabo luna? Ki kabakalañi haluswanela kubonisa kuli lwabautwisisa? Luswanela kuezañi kuli lutuse bahabo luna kulata Jehova sina luna? Mi mizwale ni likaizeli ba mwa puteho bakona kulutusa cwañi?

3. Ka kuya ka liñolo la 2 Pitrosi 3:9, ki kabakalañi haluswanela kukutaza ku bahabo luna?

³ Hona cwale-cwale fa, Jehova ukafelisa lifasi lelimaswe le. Ki batu feela “ba lipilu zende bababata bupilo bobusa feli” babaka piliswa. (Lik. 13:48) Lutandanga nako yeñata ni kuitusisa maata aluna kuli lukutaze kwa batu bolusa zibi bolukopananga ni bona mwa bukombwa; kacwalo, kwaswanela kuli lubate kutusa bahabo luna kuli ni bona basebeleze Jehova. Ndataa luna yalilato,  Jehova, “hatabeli kuli mutu ufi kamba ufi atimezwe kono utabela kuli batu kaufela babake.”—Mubale 2 Pitrosi 3:9.

4. Ki mafosisa mañi elukona kueza halukutaza ku bahabo luna?

⁴ Luswanela kuhupula kuli haiba lusatokomeli, lwakona kukutaza lushango lolupilisa ka nzila yesaswaneli. Ka mutala, lubanga ni maseme halukutaza kwa batu bolusa zibi, kono mwendi haluezangi cwalo halukutaza ku bahabo luna.

5. Luswanela kuhupulangañi halubata kukutaza ku bahabo luna?

⁵ Buñata bwaluna lwainyazanga haluhupula mone lukutalelize ku bahabo luna sapili. Muapositola Paulusi naaelelize Bakreste kuli: “Haike manzwi amina kamita abe anani musa, alungilwe lizwai, kuli muzibe momuswanela kualabela mutu ni mutu.” (Makolo. 4:5, 6) Luswanela kuhupulanga kelezo yeo halukutaza ku bahabo luna. Haiba lusaezi cwalo, lwakona kutahisa kuli kubabele taata kuituta niti hailifo luswanela kubatusa kuteeleza kwa lushango lwaluna.

6-7. Mufe mutala obonisa libaka Mukreste haswanela kuisa pilu mutu yanyalani ni yena yasi mulumeli.

⁶ Mubonise kuli mwabaisa pilu. Bo Pauline bababulezwi kwa makalelo batalusa kuli: “Sapili, nenibatanga feela kuambola ni bo muunaaka litaba za Mulimu ni za mwa Bibele. Nelusa ambolangi hahulu ka za lika zeneezahala mwa bupilo bwaluna.” Niteñi, bo Wayne, nebaziba feela litaba zenyinyani ka za Bibele; kacwalo, nebasa utwisisangi litaba zene babulelanga bo Pauline. Nebaikutwa kuli bo Pauline nebaisize hahulu pilu kwa bulapeli bwabona. Nebaikalezwi kuli bo Pauline nebakalile kuswalisana ni sikwata sa bakwenuheli mi nebapumiwa feela.

⁷ Bo Pauline baitumelela kuli hañata manzibwana ni kwa mafelelezo a sunda, nebatandanga nako yeñata ni mizwale ni likaizeli babona kwa  mikopano, mwa bukombwa, ni kuya kwa libaka zeñwi kuli bayo itabisa ni bona. Bo Pauline batalusa kuli: “Fokuñwi bo Wayne nebafumananga kuli hakuna batu fa ndu, mi nebaikutwanga bulutu.” Kusina kukakanya, bo Wayne nebatondanga bakubona ni mwanaa bona. Bo Wayne nebasa zibi kuli bo Pauline ni mwanaa bona nebatandanga nako ni bo mañi luli, mi nekubonahala inge kuli bo Pauline nebaanga balikani babona babanca bao kuba ba butokwa hahulu kufita bona. Kabakaleo, bo Wayne babemba bo Pauline ka kubataluseza kuli babata kufeza linyalo labona. Kana mulemuhile zene baswanela kueza bo Pauline kuli babonise kuli nebaisa pilu bo muunaa bona?

8. Ka kuya ka liñolo la 1 Pitrosi 3:1, 2, ki lika mañi zekona kutusa bahabo luna kutabela kuituta niti?

⁸ Mube ni muzamao omunde. Hañata, zekona kutusa bahabo luna kutabela kuituta niti ki lika zelueza isiñi zelubulela. (Mubale 1 Pitrosi 3:1, 2.) Bo Pauline nebalemuhile taba yeo hasamulaho. Batalusa kuli: “Neniziba kuli bo Wayne neba lulata, mi nebasa bati luli kufelisa linyalo laluna. Kono hase batalusize kuli babata kufelisa linyalo laluna, nalemuha kuli neniswanela kusebelisa likuka za Jehova ka za linyalo. Mwa sibaka sa kukutaza ku bona nako kaufela, nenitokwa kutoma mutala ka kubonisa tulemeno totunde.” Bo Pauline batuhela kuhapeleza bo Wayne kuambola ni bona litaba za mwa Bibele, mi bakala kuambolanga ni bona litaba lisili za ka zazi ni zazi. Bo Wayne balemuha kuli bo musalaa bona bazwelapili kuba ni tulemeno totunde mi mwanaa bona seli mwana yaikutekile. (Liprov. 31:18, 27, 28) Bo Wayne hane balemuhile kuli Bibele neitusize lubasi lwabona kuba batu babande, bakala kutabela kuituta Linzwi la Mulimu.—1 Makor. 7:12-14, 16.

9. Ki kabakalañi haluswanela kuzwelapili kubata nzila ya kutusa ka yona bahabo luna?

 ⁹ Muzwelepili kubata nzila ya kutusa ka yona bahabo mina. Jehova ulutomezi mutala omunde. “Hape ni hape” ufanga batu kolo ya kuutwa taba yende ni kufumana bupilo bobusa feli. (Jer. 44:4) Mi muapositola Paulusi naataluselize Timotea kuli atundamene kutusa babañwi. Kabakalañi? Kabakala kuli kueza cwalo nekuka pilisa yena ni baba muutwa. (1 Tim. 4:16) Lwalata bahabo luna; kacwalo, lubata kuli baitute niti yefumaneha mwa Linzwi la Mulimu. Lipulelo ni likezo za bo Pauline nelitusize bo muunaa bona kuituta niti hasamulaho. Cwale sebanani tabo ya kusebeleza Jehova hamoho ni bakubona. Sibeli sabona ki mapaina, mi bo Wayne sebasebeza sina baana-bahulu mwa puteho.

10. Ki kabakalañi halutokwa kuba ni pilu-telele?

¹⁰ Mube ni pilu-telele. Bahabo luna bakona kufumana taata kuutwisisa licinceho zeluezize mwa bupilo bwaluna kabakala kuli selupila ka likuka za Mulimu. Hañata, bakalanga kulemuha kuli halusa swalisana ni bona mwa mikiti ya bulapeli kamba kuikenya mwa litaba za lipolitiki. Bahabo luna babañwi bakona kulunyemela kabakala taba yeo. (Mat. 10:35, 36) Kono haluswaneli kuikutwa kuli habakoni kucinca. Haiba lutuhela kubatusa kuutwisisa litaba zelulumela, lubonisa kuli lubaatuzi kale kuli habaswaneli kufumana bupilo bobusa feli. Jehova haasika lufa musebezi wa kuatula babañwi; ufile musebezi wo ku Jesu. (Joa. 5:22) Haiba luba ni pilu-telele, hamulaho wa nako, bahabo luna bakona kutabela kuteeleza kwa lushango lwaluna.—Mubone mbokisi yeli: “ Mubalute ka Kuitusisa Webusaiti Yaluna.”

11-13. Muitutañi kwa mutala obonisa mone batuselize bo Alice bashemi babona?

¹¹ Musike mwatuhelela bahabo mina kucinca katulo yemuezize, kono mueze cwalo ka maseme. (Liprov. 15:2) Halunyakisiseñi mutala wa bo Alice. Bo Alice nebaitutile niti ka za Jehova hane bapila mwa naha isili, kwahule ni bashemi babona bane baikenyize hahulu mwa litaba za lipolitiki, ili bane basalumeli kuli Mulimu uteñi. Hane banze baituta niti, balemuha kuli nebaswanela kutaluseza bashemi babona litaba zende zene baituta kapili-pili. Bo Alice batalusa kuli: “Haiba mulibelela kuli kufite nako yetelele pili musika taluseza kale bahabo mina lika zenca zemulumela ni licinceho zemuezize mwa bupilo, bakanyema hahulu nikufita.” Bo Alice nebañolelanga bashemi babona mañolo ni kubabuza mubonelo wabona fa litaba zeñwi za mwa Bibele zenekona kuhoha mamelelo yabona, zecwale ka butokwa bwa kubonisa lilato. (1 Makor. 13:1-13) Nebaitumezi kwa bashemi babona kabakala kuli neba bahulisize ni kubababalela hande, mi neba balumelanga limpo. Hane bapotelanga bashemi babona, nebaezanga mobakonela kaufela kutusa bo maa bona kueza misebezi ya fa lapa. Kwa makalelo, bashemi ba bo Alice nebasika tabela muta bo Alice neba bataluselize litaba zenca zene balumela.

¹² Bo Alice hane bapotelanga bashemi babona, nebazwezipili kulatelela tomahanyo yabona ya kubala Bibele zazi ni zazi. Batalusa kuli: “Kueza cwalo nekutusize bo ma kuutwisisa kuli neniinga Bibele kuba ya butokwa.” Kono bo ndataa bona bo Alice baikatulela kubala Bibele kuli bautwisise libaka mwanaa bona hanaacincize mwanaangela lika mi nebabata kufumana mafosisa mwa Bibele. Bo Alice batalusa kuli: “Neni bafile Bibele mi nañola mwateñi litaba zenekona kubafita kwa pilu.” Kueza cwalo nekutusize cwañi? Bo ndataa bona bo Alice nebasika fumana mafosisa mwateñi kono litaba zene babalile mwa Linzwi la Mulimu neli bafitile kwa pilu.

¹³ Haiba bahabo luna balulwanisa bakeñisa litaba zelulumela, haluswaneli kubatuhelela kucinca katulo yeluezize, kono lube ni maseme. (1 Makor. 4:12b) Ka mutala, bo Alice nebalwanisizwe ki bo maa bona. Bo Alice batalusa kuli: “Hane nikolobelizwe, bo ma nebabulezi kuli ni  ‘mwana yamaswe.’” Bo Alice nebaezizeñi? Batalusa kuli: “Nenisika saba kutalusa litaba zene nilumela; nabataluseza ka likute kuli niikatulezi kuba yomuñwi wa Lipaki za Jehova mi hanina kucinca katulo yeniezize. Nataluseza bo ma kuli neni balata hahulu. Sibeli saluna lwalila, mi nabaapehela lico zende. Kuzwa feela zazi leo, bo ma bakala kulemuha kuli Bibele nei nitusa kuba mutu yomunde.”

14. Ki kabakalañi halusa swaneli kutuhelela bahabo luna kutahisa kuli lucince katulo yeluezize ya kusebeleza Jehova?

¹⁴ Kukona kuungela bahabo luna nako kuli bautwisise kuli katulo yeluezize ya kusebeleza Jehova ki ya butokwa hahulu ku luna. Ka mutala, bo Alice hane baikatulezi kueza bupaina kufita kundongwama tuto yepahami, ilikuli bakene musebezi one babaketezi bashemi babona, bo maa bona balila hape. Niteñi, bo Alice nebasika cinca katulo yabona. Batalusa kuli: “Haiba mutuhelela bahabo mina kumicincisa katulo yeñwi yemuezize, mwendi hape bakona kutahisa kuli mucince likatulo zamina zeñwi. Kono haiba mubonisa sishemo ni kusatuhelela bahabo mina kutahisa kuli mucince katulo yemuezize, mwendi babañwi ku bona baka miteeleza.” Zeo ki zona zeneezahezi ku bo Alice. Bashemi babona cwale seli mapaina mi bo ndataa bona basebeza sina baana-bahulu mwa puteho.

15. Ka kuya ka liñolo la Mateu 5:14-16 ni la 1 Pitrosi 2:12, ‘misebezi yeminde’ ya mizwale ni likaizeli baluna ikona kutusa cwañi bahabo luna?

¹⁵ Jehova uhohelanga batu ku yena ka kuitusisa ‘misebezi yeminde’ ya mizwale ni likaizeli mwa puteho. (Mubale Mateu 5:14-16; 1 Pitrosi 2:12.) Haiba munyezi kamba kunyalwa ki mutu yasi Paki ya Jehova, kana bakumina bakile  bakopana ni mizwale ni likaizeli ba mwa puteho yamina? Bo Pauline babatalusizwe kwa makalelo, nebamemanga mizwale ni likaizeli kwa ndu yabona ilikuli bakubona bo Wayne bakone kuzibana ni bona. Bo Wayne habahupula zanaaezize muzwale yomuñwi kuli abatuse kuziba mobainezi Lipaki za Jehova, batalusa kuli: “Nebakupile sibaka kwa musebezi wabona kuli bato buha ni na papali yeñwi fa TV. Mi naipulelisa nali: ‘Kanti batu ba kunani lika zeñwi zebatabelanga kueza!’”

16. Ki kabakalañi haluswanela kumemela bahabo luna kwa mikopano yaluna?

¹⁶ Nzila yeñwi yende hahulu yelukona kutusa ka yona bahabo luna ki ka kubamemela kwa mikopano ya puteho. (1 Makor. 14:24, 25) Mukopano wapili one bafumanehile ku ona bo Wayne neli Kupuzo bakeñisa kuli neuezizwe manzibwana hamulaho wa kucaisa kwa musebezi mi neusika nga nako yetelele. Bo Wayne batalusa kuli: “Hanihupuli zenebulezwi mwa ngambolo kono nihupula zene baezize batu bone niizo kopana ni bona. Neba niatumezi ni kuniamuhela hande, mi banilumelisa ka tabo. Nenilemuhile kuli neli batu babande.” Muzwale yomuñwi ni musalaa hae nebatusanga bo Pauline kubabalela mwanaa bona habali kwa mikopano ni habali mwa bukombwa. Kacwalo, bo Wayne hane baikatulezi kuziba zeñata ka za litaba zene balumela bo Pauline, bakupa muzwale yo kuli aitute ni bona Bibele.

17. Ki kabakalañi halusa swaneli kuikutwa mulatu haiba bahabo luna habasebelezi Jehova, kono ki kabakalañi halusa swaneli kuikutwa kuli bahabo luna habakoni kucinca?

¹⁷ Kaufelaa luna lubata kuli bahabo luna basebeleze Jehova. Kono niha luezize molukonela kaufela kuli lutuse bahabo luna kusebeleza Mulimu, bakona kuhana kuamuhela niti. Haiba kuba cwalo, haluswaneli kuikutwa kuba ni mulatu bakeñisa katulo yebaezize. Kakuli mane halukoni kuhapeleza batu kulumela litaba zelulumela. Niteñi, haiba bahabo mina babona kuli kusebeleza Jehova kumitahiseza tabo yetuna, bakona kutabela kuituta niti hasamulaho. Kacwalo, mubalapelelange. Mubange ni maseme hamukutaza ku bona. Mi muswanela kubata nzila ya kubatusa ka yona. (Lik. 20:20) Mube ni buikolwiso bwa kuli Jehova ukafuyaula buikatazo bwamina. Mi haiba bahabo mina bateeleza ku mina, bakapiliswa!