1. Ki tohonolo mañi yelunani yona?

LUNANI tohonolo yetuna ya kuba mwa puteho ya Jehova! Luikola kozo ni tabo yetuna halunze lusebeleza Jehova hamoho ni mizwale ni likaizeli baluna mwa puteho. Ki lika mañi zemupeta mwa puteho?

2. Ki ifi swanisezo yanaaitusisize muapositola Paulusi mwa mañolo ahae asikai anaañozi ka kususumezwa ki moya okenile?

² Lukona kuituta zeñata ka za taba ye halunyakisisa swanisezo yanaabulezi muapositola Paulusi mwa mañolo asikai anaañozi ka kususumezwa ki moya okenile. Mwa mañolo ao, Paulusi naabapanyize puteho ya Sikreste kwa mubili wa mutu. Hape, naabapanyize mizwale ni likaizeli mwa puteho kwa lilama za mubili.—Maro. 12:4-8; 1 Makor. 12:12-27; Maef. 4:16.

3. Ki lituto mañi zetaalu zeluka nyakisisa mwa taba ye?

³ Mañi ni mañi waluna ueza musebezi wa butokwa mwa puteho ya Jehova. Kaufelaa luna lwakona kueza misebezi yetusa puteho kusina taba ni simuluho yaluna, puo yaluna, lufumile kamba lu babotana, sizo saluna, luitutile kamba kutokwa. Mwa taba ye, lukanyakisisa lituto zetaalu za butokwa zelukona kuituta kwa swanisezo ya Paulusi. Sapili, lukanyakisisa taba ya kuli mañi ni mañi waluna ki wa butokwa mwa puteho ya Jehova. Sabubeli, lukanyakisisa zeluswanela kueza haiba kulubelanga taata kulemuha kuli luba butokwa mwa puteho. Sabulaalu, lukanyakisisa libaka mañi ni mañi waluna haswanela kuzwelapili kueza musebezi walufile Jehova.

4. Liñolo la Maroma 12:4, 5 lilulutañi?

⁴ Tuto yapili yeluituta kwa swanisezo yanaafile Paulusi ki ya kuli mañi ni mañi waluna ki wa butokwa mwa lubasi lwa Jehova. Paulusi hanaafile swanisezo yahae, naakalile ka kubulela kuli: “Sina mubili waluna haunani lilama zeñata, kono lilama zeo kaufela haliezi musebezi oswana, cwale ni luna, niha luli babañata, lu mubili ulimuñwi ku Kreste, kono lu lilama zeswalisani hamoho.” (Maro. 12:4, 5) Paulusi naatalusañi? Naatalusa kuli nihaike kuli mañi ni mañi waluna ueza musebezi oshutana ni wa yomuñwi, kaufelaa luna luba butokwa.

5. Jehova ufile puteho “limpo” zecwañi?

⁵ Hamunahana za batu babapeta musebezi wa butokwa mwa puteho, mwendi mukona kuikutwa kuli mizwale babanani buikalabelo ki bona feela babaeza cwalo. (1 Mates. 5:12; Maheb. 13:17) Jehova uitusisa Kreste kufa puteho “limpo zeli batu.” (Maef. 4:8) “Limpo zeli batu” zeo likopanyeleza mizwale ba mwa Sitopa Sesietelela, Batusi ba Sitopa Sesietelela, mizwale ba mwa Tutengo Twa Mutai, baokameli ba mupotoloho, mizwale babaketilwe kuluta kwa likolo za Bibele, baana-bahulu ba puteho, ni likombwa za puteho. Mizwale bao kaufela baketilwe ki moya okenile kuli bababalele lingu za Jehova za butokwa ni kutusa puteho.—1 Pit. 5:2, 3.

6. Ka kuya ka 1 Matesalonika 2:6-8, ki lika mañi zebaikatazanga kueza mizwale babaketilwe ki moya okenile?

⁶ Moya okenile uketanga mizwale kuli baeze misebezi yeshutana-shutana mwa puteho. Sina feela likalulo za mubili zeshutana-shutana zecwale ka mazoho ni mahutu haliezanga misebezi yeshutana-shutana yetusa mubili kaufela, mizwale babaketilwe ki moya okenile ni bona basebeza ka taata kutusa puteho kaufela. Habaezangi cwalo kuli baipatele libubo. Kono baezanga mobakonela kaufela kuli basusueze ni kutiisa mizwale ni likaizeli babona. (Mubale 1 Matesalonika 2:6-8.) Lwaitumela ku Jehova kabakala kuli ulufile baana bao babalilato, ili babakwanisize zetokwahala za mwa Mañolo kuli balutuse!

7. Ki limbuyoti mañi zebaikola mizwale ni likaizeli babañata baba mwa sebelezo ya nako kaufela?

⁷ Babañwi mwa puteho baketiwanga kuli basebeze sina balumiwa, mapaina babaipitezi, kamba mapaina ba kamita. Mane mizwale ni likaizeli babañwi mwa lifasi kaufela baitomezi sikonkwani sa kuba mwa sebelezo ya nako kaufela, ili kukutaza ni kuluta batu kuba balutiwa. Ka kueza cwalo, batusize batu babañata kuba balutiwa ba Kreste Jesu. Nihaike kuli mizwale ni likaizeli bao baba mwa sebelezo ya nako kaufela habana lika zeñata kwa mubili, Jehova ubafile limbuyoti zeñata. (Mare. 10:29, 30) Kaniti, mizwale ni likaizeli bao lwabalata luli, mi luitumela kuli luswalisana ni bona mwa puteho!

8. Ki kabakalañi Jehova haanga bahasanyi kaufela kuba ba butokwa?

⁸ Kana mizwale babanani buikalabelo ni mizwale ni likaizeli baba mwa sebelezo ya nako kaufela ki bona feela babaeza musebezi wa butokwa mwa puteho? Batili! Bahasanyi kaufela ba taba yende ki ba butokwa ku Mulimu, mi baeza musebezi otusa puteho. (Maro. 10:15; 1 Makor. 3:6-9) Mane omuñwi wa misebezi ya butokwa hahulu obaeza mizwale ni likaizeli mwa puteho ki kuluta batu kuba balutiwa ba Mulenaa luna Jesu Kreste. (Mat. 28:19, 20; 1 Tim. 2:4) Mizwale ni likaizeli kaufela babaswalisana ni puteho, ibe kuli ki bahasanyi babakolobelizwe kamba babasika kolobezwa, baanga musebezi wo kuba wa butokwa hahulu mwa bupilo bwabona.—Mat. 24:14.

9. Ki kabakalañi haluitebuha likaizeli zaluna mwa puteho?

 ⁹ Jehova ubonisa kuli wakuteka likaizeli ka kubafa musebezi wa butokwa mwa puteho. Waitebuha likaizeli bao baba musebeleza ka busepahali, ibe kuli banyezwi, banani bana, ki limbelwa, kamba ki makwasha. Bibele ilutaluseza za basali babañata bane batabisize Mulimu. Bataluswa kuli nebatomile mutala omunde wa kuba ni butali, tumelo, tukufalelo, bundume, bufani, ni misebezi yeñwi yeminde. (Luka 8:2, 3; Lik. 16:14, 15; Maro. 16:3, 6; Mafil. 4:3; Maheb. 11:11, 31, 35) Luitumela hahulu ku Jehova kuli ulufile likaizeli babacwalo mwa liputeho zaluna, ili babanani tulemeno totunde totuswana ni to!

10. Ki kabakalañi haluitebuha musebezi obaeza mizwale ni likaizeli babasupezi?

¹⁰ Hape lutabile kuli lunani basupali babañata mwa puteho. Mwa liputeho zeñwi kunani mizwale ni likaizeli babasupali babañata base basebelelize Jehova ka busepahali mwa bupilo bwabona kaufela. Basupali babañwi bona mwendi ki hona basazo ituta niti. Ibe kuli sebasebelelize Jehova ka lilimo zeñata kamba ki hona basazo ituta niti, bakona kutalimana ni mapongo kabakala busupali. Miinelo yetaata yeo ikona kutahisa kuli basike baeza zeñata mwa puteho kamba mwa musebezi wa kukutaza. Nihakulicwalo, kwatabisa kuli mizwale ni likaizeli babasupali bao, baeza mobakonela kaufela kukutaza mi basusuezanga ni kuluta babañwi misebezi! Mi luituta zeñata ku zebaipumani ku zona mwa bupilo. Kaniti luli, Jehova waitebuha musebezi obaeza, mi ni luna lwaitebuha bona.—Liprov. 16:31.

11-12. Mususuelizwe cwañi ki mutala wa babanca bomukopana ni bona mwa puteho?

¹¹ Hape mwa puteho kunani babanca. Babanca bakopana ni miinelo yemiñata yetaata mwa bupilo mwa lifasi le lelizamaiswa ki Satani Diabulosi, ili lasweli kukukueza ka kuluta lituto za buhata. (1 Joa. 5:19) Kono kaufelaa luna lwasusuezwanga kubona babanca habaalaba kwa mikopano ya puteho, kukutaza, ni kuyemela litaba zebalumela ka bundume. Kaniti, mina babanca mueza musebezi wa butokwa hahulu mwa puteho ya Jehova!—Samu 8:2.

 ¹² Nihakulicwalo, mizwale ni likaizeli babañwi baikutwa kuli haki ba butokwa mwa puteho. Ki lika mañi zekona kulutusa kuikutwa kuli luba butokwa mwa puteho? Halunyakisiseñi taba yeo.

13-14. Ki kabakalañi babañwi mwa puteho habakona kuikutwa kuli haki ba butokwa?

¹³ Swanisezo yanaafile Paulusi iluluta tuto yeñwi yabubeli. Paulusi naatalusize za mubonelo omuñwi oswana ni obanani ona batu babañata kacenu; baikutwa kuli haki ba butokwa mwa puteho. Paulusi naañozi kuli: “Haiba lihutu lili: ‘Bakeñisa kuli hani lizoho, hani kalulo ya mubili,’ taba yeo haitahisi kuli lisike laba kalulo ya mubili. Mi haiba zebe ili: ‘Bakeñisa kuli hani liito, hani kalulo ya mubili,’ taba yeo haitahisi kuli zebe isike yaba kalulo ya mubili.” (1 Makor. 12:15, 16) Paulusi naatalusañi hanaañozi manzwi ao?

¹⁴ Haiba muibapanya ku babañwi mwa puteho, mukona kukala kuikutwa kuli hamu ba butokwa. Babañwi mwa puteho mwendi ki baluti babande, baonga-ongi babande, kamba balisana babande. Mukona kuikutwa kuli mina hamuna buikoneli bobuswana ni bwabona. Maikuto acwalo abonisa kuli mwaikokobeza mi munani buishuwo. (Mafil. 2:3) Kono mutokwa kutokomela. Haiba muzwelapili kuibapanya kwa mizwale ni likaizeli babanani buikoneli kumifita, mukona kuikutwa kuli musebezi omueza mwa puteho haki wa butokwa. Mane mukona kuikutwa kuli hamu ba butokwa sina mwanaaboniselize Paulusi mwa swanisezo yahae. Ki lika mañi zekona kumitusa kucinca mubonelo ocwalo?

15. Ka kuya ka 1 Makorinte 12:4-11, luswanela kuhupulangañi ka za limpo zelunani zona?

¹⁵ Halunyakisiseñi taba ye: Jehova naafile Bakreste babañwi ba mwa linako za baapositola limpo za moya za kueza limakazo, kono nesi Bakreste kaufela bane bafilwe limpo zeswana. (Mubale 1 Makorinte 12:4-11.) Jehova naabafile limpo ni buikoneli bobushutana-shutana, kono mañi ni mañi wa Bakreste bao naangiwa kuba wa butokwa. Luna kacenu haluna limpo za moya za  kueza limakazo. Nihaike kuli haluna buikoneli bobuswana, Jehova uunga kuli kaufelaa luna luba butokwa ku yena.

16. Ki kelezo ifi yanaafile muapositola Paulusi yelutokwa kusebelisa?

¹⁶ Kufita kuibapanya kwa Bakreste babañwi, lutokwa kusebelisa kelezo yanaañozi muapositola Paulusi ka kususumezwa ki moya okenile, naaize: “Mutu ni mutu atatube likezo zahae, mi cwale ukaba ni libaka la kunyakalala ka lona anosi, mi isiñi ka kuibapanya ku yomuñwi.”—Magal. 6:4.

17. Lukatusiwa cwañi haiba lusebelisa kelezo yanaafile Paulusi?

¹⁷ Haiba lusebelisa kelezo yanaafile Paulusi yeo ni kunyakisisa misebezi yaluna, lukalemuha kuli lunani buikoneli bobasina babañwi. Ka mutala, mwendi muuna-muhulu yomuñwi haana buikoneli bwa kufa lingambolo, kono mwendi ueza hande mwa musebezi wa kuluta batu kuba balutiwa. Kamba mwendi haonga-ongangi hande lika sina baana-bahulu babañwi mwa puteho yaswalisana ni yona, kono mwendi uzibahala kuba mulisana yalilato, mi bahasanyi balukuluhanga kumukupa kelezo ya mwa Mañolo. Kamba mwendi uzibahala kuba muzwale yalata kuamuhela baenyi. (Maheb. 13:2, 16) Haiba lulemuha kuli ni luna lunani buikoneli bobuñwi, lukasusuezwa kueza molukonela kaufela kuli lutuse puteho. Mi haluna kushwela muna mizwale baluna babanani buikoneli bobushutana ni bwaluna.

18. Ki lika mañi zekona kulutusa kuekeza kwa buikoneli bwaluna?

¹⁸ Kusina taba ni musebezi olueza mwa puteho, kaufelaa luna luswanela kuikatulela kueza zeñata mwa sebelezo yaluna ku Mulimu ni kuekeza kwa buikoneli bwaluna. Jehova uitusisa kopano yahae kuli alulute lituto za butokwa zelukonisa kueza cwalo. Ka mutala, kwa Mukopano wa Mwahalaa Sunda, lufiwanga litaelo zelutusa kuekeza kwa buikoneli bwaluna mwa bukombwa. Kana mwasebelisanga litaelo zeo?

19. Mutokwa kuezañi kuli mukwanise sikonkwani sa kukena Sikolo sa Bakutazi ba Mubuso?

¹⁹ Hape Jehova ululuta lituto za butokwa ka kuitusisa Sikolo sa Bakutazi ba Mubuso. Mizwale ni likaizeli baba mwa sebelezo ya nako kaufela, ili babali mwahalaa lilimo za 23 ni 65 ki bona babakona kukena sikolo seo. Mukona kuikutwa kuli hamukoni kukena sikolo seo. Kufita kufa mabaka hamusa koni kukena sikolo seo, munyakisise libaka hamubata kusikena. Hasamulaho, muitomele likonkwani zeka mitusa kukwanisa zetokwahala kuli mukene sikolo seo. Ka tuso ya Jehova ni buikatazo bwamina, mwakona kueza zene muikutwa kuli halikonahali.

20. Luitutañi kwa liñolo la Maroma 12:6-8?

²⁰ Tuto yabulaalu yeluituta kwa swanisezo yanaafile Paulusi ifumaneha kwa Maroma 12:6-8. (Mubale.) Kwa liñolo leo, Paulusi hape ubonisa kuli mizwale ni likaizeli mwa puteho banani limpo zeshutana-shutana. Kono cwale ukoñomeka kuli luswanela kuitusisa mpo kaufela yelunani yona kuli lutuse mizwale ni likaizeli mwa puteho ni kubatiisa.

21-22. Luitutañi ku bo Robert ni bo Felice?

²¹ Halunyakisiseñi mutala wa muzwale yabizwa Robert. * Muzwale yo naasebeleza mwa naha isili, kono hasamulaho, akupiwa kuyo sebeleza fa Betele mwa naha yahabo. Nihaike kuli naataluselizwe kuli naasika cinciwa musebezi wanaaezanga kabakala kuli kunani zanaafosize, naabulezi kuli: “Nenizwafile hahulu kakuli neniikutwa kuli nenipalezwi kueza musebezi, mi nenizwezipili kuba ni maikuto ao ka likweli zeñata. Fokuñwi, nenibatanga  kutuhela sebelezo yaka ya fa Betele.” Ki lika mañi zenetusize bo Robert kuba ni tabo hape? Muuna-muhulu yomuñwi mwa puteho naabahupulisize kuli Jehova naalulutile misebezi yeshutana-shutana kwamulaho ilikuli lukone kueza hande musebezi walufile ka nako ya cwale. Bo Robert nebalemuhile kuli nebatokwa kutuhela kuikumbuta lika za kwamulaho, kono nebatokwa kuisa pilu kwa lika zene bakona kueza ka nako yeo.

²² Muzwale Felice Episcopo ni yena naakopani ni muinelo oswana. Yena ni musalaa hae nebakwazize sikolo sa Giliadi ka 1956, mi naali muokameli wa mupotoloho mwa naha ya Bolivia. Ka silimo sa 1964, baba ni mwana. Bo Felice batalusa kuli: “Neku lubezi taata kutuhela musebezi waluna one lulata. Kubulela feela niti nenikwanisize silimo inze nizwafile. Kono ka tuso ya Jehova, nacinca mubonelo waka mi naisa pilu kwa buikalabelo bwaka bobunca bwa kuba mushemi.” Kana ni mina mukile mwaipumana mwa muinelo oswana ni wa bo Robert kamba bo Felice? Kana fokuñwi mwazwafanga kabakala kuli hamusa eza musebezi omuñwi one muezanga kwamulaho? Haiba ki cwalo, mukaba ni tabo hamuka cinca mubonelo wamina ni kuisa pilu kwa lika zemukona kueza ka nako ya cwale hamunze musebeleza Jehova ni mizwale bamina. Muzwelepili kuitusisa buikoneli bwamina kuli mutuse babañwi, kakuli hamuka eza cwalo, mukaba ni tabo hamunze mutusa puteho.

23. Ki lika mañi zeluswanela kunahanisisanga, mi lukanyakisisañi mwa taba yetatama?

²³ Jehova uunga mañi ni mañi waluna kuba wa butokwa. Ubata kuli luikutwe kuli lu mwa lubasi lwahae. Haiba luzwelapili kunahanisisa lika zelukona kueza kuli lutuse mizwale ni likaizeli baluna mi lueza lika zeo, haluna kuikutwa kuli musebezi olueza mwa puteho haki wa butokwa. Kono luunga cwañi mizwale ni likaizeli mwa puteho? Lukona kubonisa cwañi kuli lwabalata ni kubakuteka? Lukanyakisisa lipuzo zeo mwa taba yetatama.