1. Ki kabakalañi Jehova hanaabupile lika?

KA NAKO yeñwi, Jehova naabanga anosi. Kono naasashwangi bulutu. Jehova haatokwi kuba ni mutu yomuñwi kuli abe ni tabo. Nihakulicwalo, Mulimu naabata kuli kube ni libupiwa zeñwi ni kuli libupiwa zeo liikole bupilo. Kabakala lilato lahae, Jehova akala kubupa lika.—Samu 36:9; 1 Joa. 4:19.

2. Jesu ni mangeloi nebaikutwile cwañi kubona Jehova haabupa lika?

² Sibupiwa sapili sanaakalile kubupa Jehova, ki Jesu, yena Mwanaa hae. Hamulaho wa fo, aitusisa Mwanaa hae kubupa “lika zeñwi kaufela,” kukopanyeleza cwalo ni mangeloi amañata-ñata. (Makolo. 1:16) Jesu naabile ni tabo yetuna kusebeza hamoho ni Ndatahe. (Liprov. 8:30) Mi bana ba Mulimu babali mangeloi ni bona nebatabile hahulu. Bana ba Mulimu bao nebaiponezi Jehova ni Jesu, yena Mubeleki wa Sikwala, habaeza mahalimu ni lifasi. Mangeloi naabonisize cwañi kuli naatabile? ‘Akala kuhuweleza ka milumbeko’ haabona lifasi halibupiwa, mi kusina kukakanya, nebanze balumbeka Jehova hanaazwelapili kubupa lika, kukopanyeleza cwalo ni pupo ya mafelelezo yeipitezi, bona batu. (Jobo 38:7; Liprov. 8:31) Yeñwi ni yeñwi ya lika zanaabupile Jehova neibonisa lilato ni butali bwahae.—Samu 104:24; Maro. 1:20.

3. Ka kuya ka liñolo la 1 Makorinte 15:21, 22, sitabelo sa Jesu silutusa cwañi?

³ Jehova naabata kuli batu bapile kuya kuile fa lifasi lelinde lanaabupile. Kono bakeñisa kuli Adama ni Eva nebakwenuhezi  Ndataa bona yalilato, bana babona bahoza sibi ni lifu, ili kutahisa kuli balatehelwe ki tohonolo ya kupila kuya kuile. (Maro. 5:12) Jehova naaezize cwañi ka za taba yeo? Kapili-pili, atalusa zanaaka eza kuli apilise batu. (Gen. 3:15) Jehova asepisa kuli naakafa Mwanaa hae sina sitabelo sene sikaliulula bana ba Adama ni Eva kwa sibi ni lifu. Hasamulaho, naakafa bupilo bobusa feli ku mutu kaufela yanaaka iketela kumusebeleza.—Joa. 3:16; Maro. 6:23, mubale 1 Makorinte 15:21, 22.

4. Ki lipuzo mañi zeluka nyakisisa mwa taba ye?

⁴ Lukona kuba ni lipuzo zeñata ka za sepiso ya Mulimu ya kuzusa batu babashwile. Ka mutala, zuho ya bafu mwendi ikaba cwañi? Kana lukaziba balatiwa baluna habaka zusiwa kwa bafu? Ki kabakalañi halukona kubulela kuli zuho ya bafu ika lutahiseza tabo? Mi kunahanisisa za zuho ya bafu kukona kulutusa cwañi kuitebuha lilato, butali, ni pilu-telele ya Jehova? Halunyakisiseñi yeñwi ni yeñwi ya lipuzo zeo.

5. Ki kabakalañi halulibelela kuli batu habana kuzusiwa ka nako yeswana?

⁵ Jehova haakaitusisa Mwanaa hae kuzusa batu babañata-ñata babashwile, lulibelela kuli batu bao kaufela mwendi habana kuzusiwa ka nako yeswana. Kabakalañi? Kabakala kuli hane kukaba ni batu babañata hahulu fa lifasi ka nako yeswana, nekuka zuha butata. Mi Jehova kamita uezanga lika ka nzila yeswanela. Waziba kuli lika liswanela kuezwa ka swanelo kuli kube ni kozo. (1 Makor. 14:33) Jehova Mulimu naabonisize butali ni pilu-telele hanaasebelisani ni Jesu kubupa lika fa lifasi, pili asika bupa kale batu. Jesu ni yena ukaeza cwalo ka nako ya puso yahae ya Lilimo ze 1,000 haakaswalisana ni batu babaka punyuha Armagedoni kulukisa sinca lifasi ilikuli  batu babaka zusiwa kwa bafu bato fumana lika zebatokwa.

6. Ka kuya ka Likezo 24:15, ki bo mañi babañwi bakazusa Jehova kwa bafu kwandaa babalukile?

⁶ Sa butokwa nikufita kikuli, babaka punyuha Armagedoni bakatokwa kuluta batu babaka zusiwa kwa bafu ka za Mubuso wa Mulimu ni litaelo za Jehova. Kabakalañi? Kabakala kuli buñata bwa batu babaka zusiwa kwa bafu ikaba “babasika luka.” (Mubale Likezo 24:15.) Bakatokwa kueza licinceho zeñata mwa bupilo bwabona kuli batusiwe ki sitabelo sa Kreste sa tiululo. Munahane feela musebezi omutuna okatokwa kuezwa wa kuluta batu babañata-ñata babasa zibi Mulimu litaba za niti ka za hae. Kana mañi ni mañi wabona ukaba ni mutu yomuñwi yaka mulutanga sina feela moluezezanga haluzamaisa lituto za Bibele kacenu? Kana kukaba ni liputeho, mi kana mañi ni mañi wabona ukaabelwa mwa liputeho ni kulutiwa mwakalutela babañwi babaka zusiwa hasamulaho? Lukatokwa kulibelela ni kubona zekaezahala. Kono seluziba kikuli, hamulaho wa Puso ya Kreste ya Lilimo ze 1,000, “lifasi likatala zibo ya Jehova.” (Isa. 11:9) Kaniti luli, lukaikola kusebeza ka nako yeo ya puso ya lilimo ze 1,000!

7. Ki kabakalañi batu ba Mulimu habaka tokwa kuba ni kutwisiso habanze baluta batu babazusizwe kwa bafu?

⁷ Ka nako ya Puso ya Kreste ya Lilimo ze 1,000, batanga ba Jehova kaufela bakatokwa kuzwelapili kueza licinceho mwa bupilo bwabona kuli bamutabise. Kacwalo, lukatokwa kuba ni kutwisiso halunze lutusa batu babaka zusiwa kwa bafu kutuhela mikwa yene banani yona yetiswa ki sibi ni kubatusa kumamela likuka za Jehova. (1 Pit. 3:8) Batu babaka zusiwa kwa bafu bakalemuha kuli batu ba Jehova baikokobeza mi bazwelapili “kulwanela kupiliswa [kwabona]”; kabakaleo, bakabata kuswalisana ni bona.—Mafil. 2:12.

8. Ki kabakalañi halukona kubulela kuli lukaziba balatiwa baluna babaka zusiwa kwa bafu?

⁸ Kunani mabaka amañata halukona kubulela kuli batu babaka amuhela balatiwa babona babazusizwe kwa bafu, baka baziba. Ka mutala, ka kuya ka mwanaazuselize batu bane bashwile kwamulaho, kubonahala kuli Jehova haaka bupa sinca mibili ya batu, bakabonahala honacwalo sina mone babonahalelanga, mone babulelelanga, ni mone banahanelanga nakonyana pili basika shwa kale. Muhupule kuli Jesu naaswaniselize lifu kwa buloko mi naaswaniselize zuho ku mutu yazusizwe kwa buloko. (Mat. 9:18, 24; Joa. 11:11-13) Mutu yanaalobezi haazuha fa buloko, ubonahalanga honacwalo mwanaabonahalelanga pili asika lobala kale, linzwi lahae halicincangi, mi haalibalangi lika zanaanahana pili asika lobala kale. Halunyakisiseñi mutala wa Lazaro. Nese kufitile mazazi amane kuzwa fashwela, mi mubili wahae nese ukalile kubola. Niteñi, Jesu hanaa muzusize kwa bafu, likaizeli zahae nebasika mutimelelwa, neba muzibile honafo feela, mi kusina kukakanya, Lazaro ni yena naabazibile.—Joa. 11:38-44; 12:1, 2.

9. Ki kabakalañi batu babaka zusiwa kwa bafu habasike baba ni mibili ni minahano yepetahalile?

⁹ Jehova usepisa kuli mwa Paradaisi hakuna yakali: “Nakula.” (Isa. 33:24; Maro. 6:7) Kacwalo, babaka zusiwa kwa bafu, bakaba ni mibili yeiketile. Nihakulicwalo, habana kuba babapetahalile honafo feela. Hane bakazusiwa inze bapetahalile, balatiwa babona mwendi nebasike babaziba. Kubonahala kuli mwahalaa Puso ya Kreste ya Lilimo ze 1,000, batu kaufela bakafita fa kupetahala hanyinyani-hanyinyani. Jesu ukakutisa Mubuso ku Ndatahe kwa mafelelezo a puso yahae ya lilimo ze 1,000. Ka nako yeo, Mubuso ukabe upetile milelo ya Jehova ka kutala, kukopanyeleza  cwalo ni kutusa batu kuba babapetahalile.—1 Makor. 15:24-28; Sin. 20:1-3.

10. Zuho ya bafu ikatahisa kuli muikutwe cwañi?

¹⁰ Munahane feela momuka ikutwela hamuka amuhela balatiwa bamina babaka zusiwa kwa bafu. Kana mukalila kamba kuseha kabakala tabo? Kana mukaopelela Jehova milumbeko? Kusina kukakanya, mukalata hahulu Ndataa mina yalilato ni Mwanaa hae kabakala mpo ya kuzusa balatiwa bamina babashwile.

11. Ka kuya ka manzwi a Jesu añozwi kwa Joani 5:28, 29, ki lika mañi zekaezahala kwa batu babaka pila ka kulatelela likuka za Mulimu zelukile?

¹¹ Munahane feela tabo yebakaba ni yona batu babaka zusiwa kwa bafu habanze batubula butu bwakale ni kupila ka kulatelela likuka za Mulimu zelukile. Batu babaka eza licinceho zecwalo bakafiwa tohonolo ya kupila kuya kuile mwa Paradaisi. Kono Jehova haana kulumeleza batu babaka hana kumuutwa kuzwelapili kupila mwa Paradaisi ni kutahisa kuli batu babañwi basike bapila mwa kozo.—Isa. 65:20; mubale Joani 5:28, 29.

12. Jehova ukafuyaula cwañi batu kaufela babaka pila fa lifasi?

¹² Mubuso wa Mulimu hauka busa, batanga ba Jehova kaufela bakaiponela buniti bwa manzwi añozwi kwa Liproverbia 10:22, ali: “Kufuyolwa ki Jehova ki kona kokufumisa mutu, mi haekezi kwateñi butuku.” Moya wa Jehova ukatusa batanga ba Mulimu kuba ni tulemeno twanani tona Kreste mi hanyinyani-hanyinyani batu bakapetahala. (Joa. 13:15-17; Maef. 4:23, 24) Zazi ni zazi, batu bakazwelapili kuba ni mibili yeiketile ni kuba batu babande. Kaniti luli, bupilo bukatabisa ka nako yeo! (Jobo 33:25) Kono kunahanisisa za zuho kukona kumitusa cwañi ka nako ya cwale?

13. Sina mokuboniselizwe kwa liñolo la Samu 139:1-4, zuho ya bafu ibonisa cwañi kuli Jehova uluziba hande?

¹³ Sina mose lunyakisiselize, Jehova haakazusa batu kwa bafu, uka bakutiseza mikwa ni mihupulo yeswana yene banani yona pili basika shwa kale. Munahane feela zeitalusa taba yeo. Jehova umilata hahulu kuli mane walemuhanga ni kuhupula zemunahana, momuikutwela, zemubulela, ni zemueza. Kacwalo, haaka mizusa kwa bafu, kuka mubela bunolo kumizusa inze munani mihupulo, mibonelo, ni mikwa yeswana ni yene munani yona pili musika shwa kale. Mulena Davida naaziba kuli Jehova uziba hande mañi ni mañi waluna. (Mubale Samu 139:1-4.) Luswanela kuikutwa cwañi halunahana za taba ya kuli Jehova uluziba hande?

14. Luswanela kuikutwa cwañi halunahana za taba ya kuli Jehova uluziba hande?

¹⁴ Halunahanisisa taba ya kuli Jehova uluziba hande, haluswaneli kuikalelwa kuli uisanga pilu kwa mafosisa aluna. Kabakalañi? Muhupule kuli Jehova wamilata luli. Uunga mañi ni mañi waluna kuba wa butokwa. Waziba lika kaufela zelukopani ni zona mwa bupilo, ili zetahisa kuli lueze lika ka nzila yeñwi. Kaniti, taba yeo yaomba-omba luli! Nikamuta, lusike lwaikutwa kuli luinzi lunosi. Jehova uinzi ni luna kamita mi ubata kulutusa.—2 Makol. 16:9.

15. Sepo ya zuho ibonisa cwañi kuli Jehova unani butali?

¹⁵ Lifu ki sila saluna sesituna. Batu babazamaiswa ki Satani babembanga babañwi kuli baka babulaya haiba basabeteki balikani babona kamba kueza nto yeñwi yebaziba kuli haisika luka. Kono luna halusabiswi ki taba yeo. Lwaziba kuli haiba lila zaluna lilubulaya,  Jehova uka luzusa kwa bafu. (Sin. 2:10) Lunani buikolwiso bwa kuli hakuna nto yebakona kueza yeka lukahuhanya kwa lilato la Jehova. (Maro. 8:35-39) Kaniti luli, Jehova ubonisize butali bobutuna ka kulufa sepo ya zuho! Bakeñisa kuli lunani sepo ya zuho, halusabangi batu babazamaiswa ki Satani haba lubemba kuli baka lubulaya haiba luhana kueza zebabata kuli lueze, mi hape lubanga ni bundume bwa kuzwelapili kusepahala ku Jehova.

16. Ki lipuzo mañi zemutokwa kuipuza, mi likalabo zamina likona kumitusa cwañi kuziba kuli musepile Jehova kamba kutokwa?

¹⁶ Haiba lila za Jehova limibemba kuli lika mibulaya, kana mukasepa kuli Jehova uka mizusa kwa bafu? Mukona kuziba cwañi kuli mukasepa Jehova ka nako yeo? Nto yeñwi yeka mitusa ki kuipuza kuli: ‘Kana likatulo zenyinyani zeniezanga zazi ni zazi, libonisa kuli nisepile Jehova?’ (Luka 16:10) Hape mukona kuipuza kuli: ‘Kana mupilelo waka ubonisa kuli nisepile sepiso ya Jehova ya kuli uka nitusa kufumana lika zenitokwa haiba nibeya za Mubuso mwa sibaka sapili?’ (Mat. 6:31-33) Haiba mualabile kuli eni kwa lipuzo zeo, uzibe musepile Jehova mi muitukiselize kutiyela miliko yemukona kukopana ni yona.—Liprov. 3:5, 6.

17. (a) Zuho ya bafu ibonisa cwañi kuli Jehova unani pilu-telele? (b) Lukona kubonisa cwañi kuli lwaitebuha pilu-telele ya Jehova?

¹⁷ Jehova utomile lizazi ni nako lakasinya lifasi lelimaswe le. (Mat. 24:36) Kono haana kusinya lifasi pili nako yeo isika fita kale. Nihaike kuli Jehova unyolelwa kuzusa babashwile, uzwelapili kuba ni pilu-telele. (Jobo 14:14, 15) Ulibelela kuli nako yeswanela ya kubazusa kwa bafu ifite. (Joa. 5:28) Kaniti luli, kwaswanela kuitumela ku Jehova kabakala pilu-telele yahae. Munahane feela taba ye: Bakeñisa pilu-telele ya Jehova, batu babañata hamohocwalo ni luna, lubile ni nako ya ‘kubaka.’ (2 Pit. 3:9) Jehova ubata kuli batu babañata bafumane bupilo bobusa feli. Kacwalo, haike lubonise kuli lwaitebuha pilu-telele ya Jehova. Ka mukwa ufi? Ka kueza molukonela kaufela kubata batu “ba lipilu zende bababata bupilo bobusa feli” ni kubatusa kulata Jehova ni kumusebeleza. (Lik. 13:48) Haiba lueza cwalo, ni bona bakatusiwa ki pilu-telele ya Jehova, sina luna.

18. Ki kabakalañi haluswanela kubonisa babañwi pilu-telele?

¹⁸ Bakeñisa kuli Jehova unani pilu-telele, haana kulibelela kuli lukaezanga lika zelukile ka nako kaufela. Waziba kuli lukaba feela batu  babapetahalile hamulaho wa Puso ya Kreste ya Lilimo ze 1000. Kufitela nako yeo ifita, Jehova ukazwelapili kuswalela libi zaluna. Kacwalo, luswanela kulikanyisa mutala wahae, ni kuisa pilu kwa lika zende zebaeza babañwi ni kubabonisa pilu-telele. Halunyakisiseñi mutala wa kaizeli yomuñwi, ili yo muunaa hae naakatazwa hahulu ki lipilaelo zeñata mi naatuhezi kufumaneha kwa mikopano ya puteho. Kaizeli yo utalusa kuli: “Taba ye, nei niutwisize hahulu butuku kwa pilu. Bupilo bwaluna nebucincize ka sipundumukela, mi nelupalezwi kueza lika zene lulelile kueza.” Nihakulicwalo, kaizeli yo naazwezipili kulata muunaa hae ni kumubonisa pilu-telele. Naaitingile ku Jehova mi naasika zwafa. Sina Jehova, naaisize pilu kwa lika zende zanaaeza muunaa hae. Kaizeli yo uekeza kubulela kuli: “Bo muunaaka banani mikwa yeminde, mi hanyinyani-hanyinyani, baeza mobakonela kaufela kuli babe hande.” Kaniti luli, ki kwa butokwa hahulu kuli lubonise pilu-telele ba lubasi lwaluna ni mizwale ni likaizeli mwa puteho babasweli kueza mobakonela kaufela kutiyela miinelo yetaata!

19. Luswanela kuikatulela kuezañi?

¹⁹ Jesu ni mangeloi nebabile ni tabo lifasi hane libupilwe. Kono munahane feela tabo yetuna yebakaba ni yona, mwa lifasi hakuka pila feela batu babapetahalile, ili babalata Jehova ni kumusebeleza. Munahane feela tabo yetuna yebakaba ni yona batu babalekilwe fa lifasi kuli bayo busa ni Jesu, habaka bona batu inze batusiwa ki musebezi wabona. (Sin. 4:4, 9-11; 5:9, 10) Mi munahane feela bupilo mobuka bela muta batu bakalotisa miyoko ya tabo isiñi ya kuutwa butuku, ili nako yeo matuku, maswabi, ni lifu likafeliswa kuya kuile. (Sin. 21:4) Kufitela nako yeo ifita, haike muzwelepili kulikanyisa Ndataa luna yalilato, yabutali ni yanani pilu-telele. Haiba mueza cwalo, mukazwelapili kuba ni tabo kusina taba ni miliko yemukona kukopana ni yona. (Jak. 1:2-4) Kaniti luli, luitumela kuli Jehova ulusepisize kuli “kukaba ni zuho!”—Lik. 24:15.