Kana mubalile ka tokomelo limagazini za Tawala ya Mulibeleli za cwanoñu fa? Hamubone nji mwakona kualaba lipuzo zetatama:

Ki kabakalañi bashemi babazwa mwa naha isili habaswanela kunyakisisa ka tokomelo puo yekona kutusa bana babona kueza zwelopili ya kwa moya?

Banana mwendi bakaituta puo yeitusiswa mwa silalanda habali kwa sikolo kamba mwa libaka zeñwi. Kono kwakona kutusa haiba banana baziba lipuo lisikai. Bashemi baswanela kunyakisisa puo yekatusa banana kuutwisisa niti ni kuzwelapili kwa moya, ibe mwa puteho yeitusisa puo ya mwa sibaka sebapila ku sona kamba yeitusisa puo yabona. Bashemi ba Sikreste baiyakatwanga pili za zwelopili ya kwa moya ya bana babona kufita lika zebatabela bona bañi.—w17.05, make. 9-11.

Jesu hanaabuzize Pitrosi kuli: “Kana unilata kufita ze?” naatalusañi? (Joa. 21:15)

Kubonahala kuli Jesu naatalusa litapi zenebundami fafasi kamba pisinisi ya litapi. Hamulaho wa lifu la Jesu, Pitrosi naazwezipili kueza musebezi wanaaezanga sapili—wa bundui. Bakreste habaswaneli kutuhelela mubeleko wabona kubapaleliswa kubeya lika za kwa moya mwa sibaka sapili.—w17.05, make. 22-23.

Ki kabakalañi Abrahama hanaakupile musalaa hae kubulela kuli ki kaizelaa hae? (Gen. 12:10-13)

Mane Sara neli kaizelaa Abrahama luli, kakuli ndataa bona neli alimuñwi. Sara hanaaka bulela kuli neli musalaa Abrahama, Abrahama mwendi naakabulaiwa, mi Abrahama naasike akona kupepa mwana yanaa musepisize Mulimu.—wp17.3, make. 14-15.

Ki muezezo mañi wanaakalile kuitusisa Elias Hutter kuli atuse batu bane babata kuituta Siheberu?

Naabata kutusa batu kuziba shutano ye mwahalaa manzwi aatolokilwe fa manzwi luli a Siheberu aitusisizwe mwa Bibele ni manzwi abeiwanga kwa makalelo kamba kwa mafelelezo a linzwi. Kacwalo, naañozi manzwi aatolokilwe fa manzwi luli a Siheberu mwa muñolo otibile, kono añola manzwi aekelizwe kwa makalelo ni kwa mafelelezo mwa muñolo osika tiba. Bibele ya Sikuwa ya New World Translation of the Holy Scriptures—With References iitusisize muezezo oswana mwa litaluso ze kwatasi.—wp17.4, make. 11-12.

Ki likuka mañi zekona kutusa Mukreste kulemuha kuli haaswaneli kuluwa tobolo ilikuli akone kuisileleza kwa batu babañwi?

Zeñwi za likuka zeo ki ze: Mulimu uunga bupilo kuli ki bwa butokwa. Jesu naasika bulelela balateleli bahae kuli baitusise mikwale kwa kuisileleza. (Luka 22:36, 38) Luswanela kutula mikwale yaluna kuieza malimi a likekele. Bupilo ki bwa butokwa hahulu kufita maluwo a kwa mubili. Lukuteka mazwalo a batu babañwi, mi lubata kutoma mutala omunde. (2 Makor. 4:2)—w17.07, make. 31-32.

Ki kabakalañi litaba zanaañozi Mateu ka za bupilo bwa Jesu hanaasali mwanana halishutana ni litaba zanaañozi Luka?

Mateu ukoñomeka hahulu litaba zeama Josefa, zecwale ka za mwanaaikutwezi Josefa halemuha kuli Maria uitwezi ni zanaa mutaluselize Mulimu kuli abalehele kwa Egepita ni kuli ayo kuta hasamulaho. Kono Luka yena ukoñomeka hahulu litaba zeama Maria; ka mutala, utalusa za musipili wa Maria wa kuyo potela Elizabeta, ni mwanaaikutwezi halemuha kuli Jesu usiyezi kwa tempele.—w17.08, like. 32.

Linzwi la Mulimu lipunyuhile mwa miinelo mañi?

Linzwi la Mulimu lipunyuhile kusina taba ni kuli taluso ya manzwi ni lipulelo zeitusisizwe mwa Bibele licincize. Mi lipunyuhile kusina taba ni kuli kucinca kwa mibuso kutahisize kuli puo yebulelwa hahulu ki batu babañata icince. Mi hape Linzwi la Mulimu lipunyuhile nihaike kuli musebezi wa kutoloka Bibele mwa lipuo zebulelwa hahulu ulwanisizwe.—w17.09, make. 19-21.

Kana munani lingeloi leli misileleza?

Batili. Jesu naabulezi kuli mangeloi a balutiwa bahae abonanga pata ya Mulimu. (Mat. 18:10) Jesu fo naatalusa kuli mangeloi atabela kutusa mañi ni mañi wa balutiwa bahae, isiñi kuli mangeloi asilelezanga yomuñwi ni yomuñwi wabona ka makazo.—wp17.5, like. 5.

Ki lilato lelicwañi lelifita mifuta kaufela ya lilato?

Lilato leliboniswa ka kulatelela likuka zelukile (lona la a·gaʹpe) ki lona lilato lelifita mifuta kaufela ya lilato. Lilato lelicwalo likona kutalusa kutabela mutu yomuñwi kamba kuba ni silikani. Kono lukona kulibonisa ka kuezeza babañwi lika zebonisa kuli haluitati.—w17.10, like. 7.