1. Ki kabakalañi kolobezo haili muhato wa butokwa? (Mubone siswaniso sesi fahalimu.)

SILIMO ni silimo, baituti ba Bibele babañata-ñata bakolobezwanga. Buñata bwabona ki babanca, ili baba mwa lilimo za kunonoboka ni banana babanyinyani. Mwendi babañwi bahulisizwe ki bashemi babalapela Jehova. Kana mubabañwi ba ku bona? Haiba mubabañwi ba batu bao, lwamibabaza. Mukreste kaufela uswanela kukolobezwa, mi utokwa kuunga muhato wa butokwa wo kuli apiliswe.—Mat. 28:19, 20; 1 Pit. 3:21.

2. Ki kabakalañi hamusa swaneli kusaba kuunga muhato wa kuineela ku Jehova?

² Nihaike kuli kolobezo itahisa kuli muikole limbuyoti zeñata, kono hape itahisa kuli muikalabele ku Mulimu. Ka mukwa ufi? Fa lizazi lene mukolobelizwe, nemubuzizwe kuli: “Fa mutomo wa sitabelo sa Jesu Kreste, kana semubakezi libi zamina ni kuineela ku Jehova kuli mueze tato yahae?” mi nemualabile kuli, “eni.” Hane mukolobelizwe, nemubonisize kuli muineezi ku Jehova. Nemusepisize Jehova kuli muka mulata, ni kuli kueza tato yahae ikaba yona nto yapili mwa bupilo bwamina. Bo ki buitamo bobutuna. Kana  mwaswanela kuinyaza kabakala kueza buitamo bobucwalo? Batili. Hamuna kuinyaza nikamuta haiba mutuhelela Jehova kumietelela mwa bupilo. Hamunyakisise zekona kuezahala haiba mutu asatuheleli Jehova kumuetelela mwa bupilo bwahae. Mutu yasalati kuetelelwa ki Jehova uzamaiswa ki Satani. Diabulosi haalati kuli mupiliswe. Mane naakatabela kuli musike mwafumana bupilo bobusa feli ka kuswalisana ni yena mwakuhana bubusi bwa Jehova.

3. Ki limbuyoti mañi zemukona kuba ni zona haiba muneela bupilo bwamina ku Jehova?

³ Kufita kuswalisana ni Satani, munahanisise limbuyoti zemuikola kabakala kuba Mukreste yaineezi ni kukolobezwa. Bakeñisa kuli cwale semufanile bupilo bwamina ku Jehova, mwakona kubulela ka buikolwiso kuli: “Jehova u kwa lineku laka; hanina kusaba sesiñwi. Mutu saka nieza ki sika mañi?” (Samu 118:6) Hakuna tohonolo yetuna yemukona kuba ni yona mwa bupilo yefita kuba kwa lineku la Mulimu ni kulatiwa ki yena.

4, 5. (a) Ki kabakalañi halukona kubulela kuli buineelo ki katulo yaswanela kueza mutu ka butu? (b) Ki matata mañi ebakopana ni ona Bakreste kaufela, isi feela babanca?

⁴ Ka kuba Mukreste yakolobelizwe, hamuswaneli kunahana kuli haiba bashemi bamina banani silikani sesinde ni Jehova, kipeto ni mina mukaba ni silikani sesinde ni Jehova, inge kuli silikani seo ki maluwo emufilwe ki bashemi bamina. Kono mina ka butu muswanela kulwanela kupiliswa kwamina, nihaike kuli musapila ni bashemi bamina. Ki kabakalañi hamuswanela kuhupulanga taba ye? Kakuli hamukoni kuzibela cimo matata kaufela emuka kopana ni ona kwapili. Ka mutala, haiba nemukolobelizwe musika kena kale mwa lilimo za kunonoboka, mwendi hase muli mwa lilimo za kunonoboka mukaba ni litakazo zeñwi zemuka ikutwa mwa mibili yamina mi mukakopana ni matata amañwi. Musizana yomuñwi ya mwa lilimo za kunonoboka naabulezi kuli: “Hañata mwanana yali Paki ya Jehova haakoni kupalelwa kumamela mulao wa Jehova ka libaka feela la kuli babakena ni yena sikolo bamuhapeleza kuca keke ya mutu yabuluka lizazi lahae la kupepwa. Kono hamulaho wa lilimo lisikai, takazo ya kulobala ni mutu yomuñwi hainze ihula, uswanela kuba ni buikolwiso bwa kuli kumamela milao ya Jehova ki yona nto yende hahulu.”

⁵ Kono haki babanca feela babakopananga ni matata. Nihaiba batu bane bakolobelizwe inze bahulile, bakopananga ni matata amañata alika tumelo yabona, ili asalibelelwangi. Bakona kukopana ni matata a mwa manyalo, makulanu, kamba kutokwa misebezi. Kaniti, batu kaufela, kusina taba ni fobakuma, bakakopana ni miinelo yekalika busepahali bwabona ku Jehova.—Jak. 1:12-14.

6. (a) Mukona kubonisa cwañi kuli muineezi ku Jehova ka pilu kaufela? (b) Muitutañi kwa liñolo la Mafilipi 4:11-13?

⁶ Kuli muzwelepili kusepahala hamukopana ni matata, muhupule kuli nemusepisize kuli mukasebeleza Jehova ka pilu kaufela. Fo kutalusa kuli nemusepisize Mulena Yapahami ka Kufitisisa kuli mukazwelapili kumusebeleza, nihaikaba kuli balikani bamina ni bashemi bamina batuhezi kumusebeleza. (Samu 27:10) Hamukopana ni matata mwa bupilo, mukupe Jehova kuli amife maata ilikuli muzwelepili kupila ka kulumelelana ni buineelo bwamina.—Mubale Mafilipi 4:11-13.

7. Kutalusañi “kulwanela kupiliswa kwamina ka sabo ni likute lelituna”?

⁷ Jehova ubata kuli mube balikani bahae. Kono mutokwa kuikataza kuli muzwelepili kuba balikani bahae ni kulwanela kupiliswa kwamina. Mane liñolo la Mafilipi 2:12 libulela kuli: “Muzwelepili kulwanela kupiliswa kwamina ka sabo ni likute lelituna.” Manzwi ao abonisa kuli mutokwa kunahanisisa zemuswanela kueza kuli mutiise  silikani samina ni Jehova ni kuzwelapili kusepahala ku yena niha mukopana ni matata. Musike mwaba ni moya wa kuisepa hahulu. Muhupule kuli nihaiba batanga ba Mulimu babañwi baba musebelelize ka nako yetelele batuhezi kusepahala. Kacwalo, ki lika mañi zemuswanela kueza kuli mulwanele kupiliswa kwamina?

8. Ki lika mañi zeluswanela kueza haluituta Bibele ka butu, mi ki kabakalañi kuituta Bibele hakuli kwa butokwa?

⁸ Kuli lube balikani ba Jehova, luswanela kuteelezanga ku yena habulela, ni kuambolanga ni yena. Nzila ya butokwa hahulu yelukona kuteeleza ku Jehova ka yona ki ka kuitutanga Bibele ka butu. Fo kutalusa kuli luswanela kubalanga ni kunahanisisa zelubala mwa Linzwi la Mulimu ni lihatiso zetomile fa Bibele. Hamunze mueza cwalo, muhupule kuli kuituta Bibele hakuswani ni kuituta litaba za kwa sikolo. Hamuswaneli kupeta litaba inge mutu yabata feela kupasa tatubo kwa sikolo. Hamuituta Bibele ka butu, muswana feela sina mutu yatama musipili, mi hanzaa zamaya cwalo, uituta lika zende ka za Jehova. Kuituta ka nzila yecwalo kuka mitusa kusutelela ku Mulimu, mi ni yena ukasutelela ku mina.—Jak. 4:8.

9. Ki liitusiso mañi zemitusize mwa tuto yamina ya ka butu?

⁹ Kopano ya Jehova ilukisize liitusiso zeñata zekona kumitusa hamuituta Bibele. Ka mutala, kalulo yebizwa “Bible Study Activities” yefumaneha mwa kalulo ya “Teenagers” ya fa webusaiti ya jw.org yakona kumitusa kuziba zemukona kuituta mwa litaba zebulezwi mwa Bibele. Hape fa jw.org, kufumaneha litaba za kuituta zetomile fa buka ya “Bibele I Lutañi Luli?” zekona kumitusa kutiisa buikolwiso bwamina mwa litaba zemulumela. Litaba za kuituta zeo zakona kumitusa kuziba momukona kutaluseza babañwi litaba zemulumela. Liakalezo zeñwi zetusa lifumaneha mwa taba yeli, “Ba Banca ba Buza Kuli . . . Ni Kona ku Eza Cwañi Kuli ni Ikole ku Bala Bibele?” mwa magazini ya Muzuhe! ya July-September 2009. Kuituta Bibele ni kunahanisisa zemubala kwakona kumitusa kulwanela kupiliswa kwamina.—Mubale Samu 119:105.

10. Ki kabakalañi Mukreste yakolobelizwe hatokwa kulapelanga?

¹⁰ Tuto ya ka butu ilutusa kuteeleza ku Jehova, kono tapelo ki yona nzila yeluambola ka yona ni Jehova. Mukreste haswaneli kuunga tapelo sina taba feela yeezwanga kamita kamba sina  nto yeñwi yefa mutu matohonolo, yetahisa kuli akondise mwa bupilo. Kono tapelo ki nzila yeelukonisa kuambola ni Mubupi waluna. Jehova watabela kuutwa ze mwa lipilu zaluna. (Mubale Mafilipi 4:6.) Haiba mubilaezwa ki nto yeñwi mwa bupilo, mulatelele kelezo ya mwa Bibele yemisusueza ‘kunepela mushimbo wamina ku Jehova.’ (Samu 55:22) Kana luli mwalumela kelezo yeo? Mizwale ni likaizeli babañata-ñata batusizwe ki kelezo yeo. Ni mina mwakona kutusiwa ki kelezo yeswana!

11. Ki kabakalañi haluswanela kuitumelanga ku Jehova kamita?

¹¹ Haluswaneli feela kulapela ku Jehova halubata tuso ku yena. Bibele ili: “Mubonise buitumelo.” (Makolo. 3:15) Fokuñwi, lubilaezwanga hahulu ki matata aluna kuli mane lupalelwanga kulemuha limbuyoti zelunani zona. Kacwalo, zazi ni zazi mwakona kunahana lika zetaalu zemukona kuitumela ku Jehova. Kihona mukalapela ku Jehova ni kuitumela ku yena kabakala limbuyoti zeo. Musizana wa mwa lilimo za kunonoboka yabizwa Abigail, yanaakolobelizwe inze anani lilimo ze 12, uli: “Niikutwa kuli mwa pupo kaufela, hakuna yeluswanela kuitumela hahulu ku yena kufita Jehova. Luswanela kuitumela ku yena ka nako kaufela kabakala lika zalufile. Nako yeñwi neniutwile manzwi amande a: Hane lukaamuhiwa lika kaufela zelusika itumela ku Jehova kacenu, ki lika mañi zene lukasiyalelwa ki zona kamuso.” *

12, 13. Ki kabakalañi hamutokwa kunahanisisa lika zamiezelize Jehova zebonisa kuli ki yomunde?

¹² Mulena Davida wa kwaikale, yanaatusizwe mwa matata amatuna anaakopani ni ona, naabulezi manzwi alatelela a, mwa pina yahae: “Mulwaze mi mukaiponela kuli Jehova ki yomunde; tabo ki ya mutu yasabela ku yena.” (Samu 34:8) Timana yeo ibonisa molukona kutusezwa ki zeezahezi mwa bupilo bwaluna. Hamubala Bibele ni lihatiso zaluna, ni kufumaneha kwa mikopano ya Sikreste, mukaituta litaba zeka misusueza, zebonisa Mulimu mwatuselize babañwi kuli bazwelepili kusepahala ku yena. Kono hamunze mueza zwelopili ya kwa moya, mukatokwa kunahanisisa lika zamiezelize Jehova zebonisa kuli umitusize mwa bupilo bwamina. Muiponezi cwañi mwa bupilo bwamina kuli Jehova ki yomunde?

¹³ Kunani nzila yeñwi yetusize Bakreste kaufela kulemuha kuli Jehova ki yomunde. Mulimu ubonisize kuli ki yomunde ka kulumema kuli lusutelele ku yena ni ku Mwanaa hae. Jesu naabulezi kuli: “Hakuna mutu yakona kutaha ku na, konji haiba Ndate, yanilumile, amuhoha.” (Joa. 6:44) Kana muikutwa kuli ni mina Mulimu umihohezi ku yena? Mwanana yomuñwi wa mwa lilimo za kunonoboka ukona kubulela kuli, ‘Jehova naahohezi bashemi baka ku yena, na neni balatelezi feela.’ Kono hane muineezi ku Jehova ni kukolobezwa, nemubonisize kuli ni mina mukalisize kuba ni silikani sesinde ni yena. Cwale semuzibwa ki yena. Bibele ilutaluseza kuli: “Haiba mutu ulata Mulimu, mutu yo uzibwa ki Mulimu.” (1 Makor. 8:3) Kamita muitebuhe hahulu tohonolo ya kuba mwa kopano ya Jehova.

14, 15. Kukutaza kukatiisa cwañi tumelo yamina?

¹⁴ Nzila yeñwi yemukona kulemuha ka yona kuli Jehova ki yomunde, ki hamutusiwa ki yena ka nako yemutaluseza babañwi litaba zemulumela. Mwakona kutaluseza babañwi litaba zemulumela hamuli mwa bukombwa kamba hamuli kwa sikolo. Babañwi bafumananga taata kukutaza kwa batu babakena ni bona sikolo. Mi mwendi mwautwisisa libaka haku babelanga taata. Kakuli hakuzibahalangi haiba batu bakaamuhela lushango lwamina kamba kutokwa. Kukona kuba taata hahulu kukutaza kwa sikwata hamuli kwa sikolo kufita kukutaza ku mutu alimuñwi yemuli  ni yena mwa kilasi. Ki lika mañi zekona kumitusa?

¹⁵ Pili, munahanisise libaka hamukolwa litaba zemulumela. Kana litaba za kuituta zefumaneha fa webusaiti ya jw.org zafumaneha mwa puo yamina? Mulike kubata fa webusaiti kubona haiba zafumaneha. Litaba zeo lilukiselizwe kumitusa kunahanisisa zemulumela, libaka hamulumela litaba zeo, ni momukona kulitaluseza ku babañwi. Haiba muba ni buikolwiso bobutuna ni kuitukiseza hande, mukabata kupaka za libizo la Jehova.—Jer. 20:8, 9.

16. Ki lika mañi zekona kumitusa kuli musike mwasaba kutaluseza babañwi litaba zemulumela?

¹⁶ Kono niha muitukiselize, mwendi mukasaba kutaluseza babañwi litaba zemulumela. Kaizeli yomuñwi wa lilimo ze 18, yanaakolobelizwe inze anani lilimo ze 13, naabulezi kuli: “Naziba litaba zenilumela, kono fokuñwi kunibelanga taata kulitalusa.” Ki nto mañi yeemutusize kutula butata bo? Utalusa kuli: “Nilikanga kubulela inge yakandeka feela. Beniinzi ni bona mwa kilasi balukuluhanga kubulela litaba zebaezanga. Mi ni na nibatanga kulukuluha inge bona. Kacwalo, fokuñwi hanikandeka litaba zeñwi, nibulelanga kuli, ‘Zazi leliñwi neniikambota ni babañwi litaba zefumaneha mwa Bibele, mi . . .’ Kihona nizwelapili ni likande laka. Nihaike kuli hanikalangi ka kubulela litaba zefumaneha mwa Bibele, hañata babañwi babatanga kuziba zeniezanga haniluta Bibele. Fokuñwi babuzanga lipuzo ka za teñi. Haniitusisanga muezezo wo, kunibelanga bunolo kukutaza ku babañwi. Mi hase niezize cwalo, niikutwanga hande hahulu!”

17. Mubonelo wamina ka za litaba zemulumela ukona kumitusa cwañi kukutaza ku babañwi?

¹⁷ Hamunze mubonisa likute ku babañwi ni kubonisa kuli mwaiyakatwa bona, ni bona bakaeza nto yeswana ku mina. Kaizeli yabizwa Olivia, yanani lilimo ze 17, ili yanaakolobelizwe asika kena kale mwa lilimo za kunonoboka, naabulezi kuli: “Neniikalelwanga kuli haiba nibulela za Bibele mwa makande aka, batu nebaka niinga kuli ni wa likañi.” Hasamulaho acinca mubonelo wahae. Kaizeli Olivia naasika isa pilu kwa lika zanaaikalezwi, mi utalusa kuli: “Buñata bwa babanca habazibi sesiñwi ka za Lipaki za Jehova. Ki luna feela Lipaki za Jehova bebaziba. Kacwalo, zelueza likatahisa kuli baamuhele lushango lwaluna kamba kutokwa. Kono kucwañi haiba lupalelwa kutaluseza babañwi litaba zelulumela kabakala kuikutwa maswabi kamba kabakala sabo? Bakanahana kuli halutabeli kuba Lipaki za Jehova. Mane bakona nihaiba kuhana kuteeleza kwa lushango lwaluna kabakala kuli haluna bundume. Kono haiba lutaluseza babañwi litaba zelulumela ka kulukuluha ni ka bundume, sina moluezezanga halubulela feela, baka lukuteka.”

18. Ki lika mañi zemuswanela kueza kuli mulwanele kupiliswa kwamina?

¹⁸ Sina mose kutaluselizwe, munani buikalabelo bobutuna bwa kulwanela kupiliswa kwamina. Mukona kueza cwalo ka kubalanga Linzwi la Mulimu ni kunahanisisa zemubala, kulapela ku Jehova, ni kunahanisisa lika zamiezelize zebonisa mwamifuyaulezi ka butu. Haiba mueza lika zeo, mukakolwa kuli Jehova ki mulikanaa mina. Mi buikolwiso bobucwalo buka misusueza kutaluseza babañwi ka za litaba zemulumela.—Mubale Samu 73:28.

19. Ki kabakalañi hamuswanela kulwanela kupiliswa kwamina?

¹⁹ Jesu naabulezi kuli: “Haiba mutu ubata kunilatelela, aitobohe mi alwale kota yahae ya linyando mi azwelepili kunilatelela.” (Mat. 16:24) Taba yeo ibonisa hande fokusweu kuli Mukreste kaufela uswanela kuineela ni kukolobezwa, ilikuli abe mulutiwa wa Jesu. Mi haiba muunga muhato wo, mukafumana limbuyoti zeñata ka nako ya cwale, mi kwapili mukafumana bupilo bobusa feli mwa lifasi lelinca la Mulimu. Kacwalo, haike muzwelepili kulwanela kupiliswa kwamina!