KWA liñolo la 2 Makorinte 12:2, 3, Paulusi naatalusize za mutu ‘yanaangezwi kwa lihalimu labulaalu.’ Mutu yo neli mañi? Paulusi hanaañolela puteho ya mwa Korinte, naakoñomekile kuli Mulimu naaitusisa yena sina muapositola. (2 Makor. 11:5, 23) Hasamulaho, abulela za “lipono ni zepatuluzwi za Mulena.” Mwa liñolo leo, Paulusi naasika bulela za mizwale babañwi. Taba yeo ibonisa hande kuli Paulusi naaipulela ili yena hanaatalusa za mutu yanaafilwe lipono ni zepatuluzwi za Mulena.—2 Makor. 12:1, 5.

Kacwalo, Paulusi neli yena ‘yanaangezwi kwa lihalimu labulaalu’ ni ‘yanaangezwi mwa paradaisi.’ (2 Makor. 12:2-4) Paulusi naaitusisize linzwi la “zepatuluzwi” ili zebonisa kuli naabulelezwi zekaezahala kwapili.

“Lihalimu labulaalu” lanaaboni Paulusi litalusañi?

Mwa Bibele, linzwi la “lihalimu” likona kutalusa mbyumbyulu. (Gen. 11:4; 27:28; Mat. 6:26) Kono hape linzwi la “lihalimu” likona kutalusa lika zeñwi. Fokuñwi likona kutalusa puso ya batu. (Dan. 4:20-22) Kamba likona kutalusa puso ya Mulimu, ka kuitusisa Mubuso wahae.—Sin. 21:1.

Paulusi naaboni “lihalimu labulaalu.” Taba yeo italusañi? Ka linako zeñwi, Bibele ikutelanga kubulela nto yeñwi halaalu, kuli ikoñomeke sisupo, ili kubonisa kuli nto yeo ki ya butokwa. (Isa. 6:3; Ezek. 21:27; Sin. 4:8) Kubonahala kuli Paulusi hanaabulela za “lihalimu labulaalu,” naabata kubonisa kuli puso yanaabulela ka za yona ki puso yende hahulu ni yepahami, ona Mubuso wa Mesia okabusiwa ki Jesu Kreste ni ba 144,000. Sina mwanaañolezi muapositola Pitrosi, lulibelezi “mahalimu amanca” ka kuya ka sepiso ya Mulimu.—2 Pit. 3:13.

Linzwi lanaaitusisize Paulusi la “paradaisi” lona litalusañi?

Linzwi la “paradaisi” ni lona likona kutalusa: (1) Lifasi le, lelikaba Paradaisi kwapili, sina mone kubezi kwa makalelo. (2) Likona kutalusa kozo yebaka ikola batu ba Mulimu mwa lifasi lelinca. (3) Kuzwa fo, likona kutalusa muinelo omunde wa kwa lihalimu, yona “paradaisi ya Mulimu,” yebulezwi kwa liñolo la Sinulo 2:7.—Mubone Tawala ya Mulibeleli, ya July 15, 2015, like. 8. para. 8.

Ikona kuba kuli Paulusi naaama kwa litaluso zetaalu zeo kaufela hanaatalusa muinelo wanaaipumani ku ona wo, ili wanaatalusize kwa liñolo la 2 Makorinte 12:4.

Ka bukuswani lukona kubulela kuli:

“Lihalimu labulaalu” lelibulezwi kwa liñolo la 2 Makorinte 12:2, lilukela kuba Mubuso wa Mesia okabusiwa ki Jesu Kreste ni ba 144,000, ona “mahalimu amanca.”—2 Pit. 3:13.

Mubuso wo ubizwa “lihalimu labulaalu” kakuli puso yaona ki yona yepahami ka kufitisisa.

“Paradaisi” ‘yanaangezwi’ ku yona Paulusi mwa pono ilukela kuba (1) Paradaisi yekaba teñi kwapili fa lifasi, (2) kozo yebaka ikola batu ba Mulimu ka nako yeo, ili yefita kozo yebaikola batu ba Mulimu babapila mwa paradaisi ya kwa moya kacenu, ni (3) “paradaisi ya Mulimu” ya kwa lihalimu yekaba teñi lifasi halikaba Paradaisi.

Kacwalo, linzwi la paradaisi likopanyeleza mahalimu amanca ni lifasi lelinca. Ikaba tukiso yenca ya Mubuso wa kwa lihalimu ni batu babaka sebeleza Jehova mwa paradaisi fa lifasi.