Kana mwakona kualaba lipuzo ze zezwa mwa limagazini za Tawala ya Mulibeleli za 2019?

Sepiso ya Mulimu yeli: “Hakuna silwaniso sesiezezwa wena sesika konda” italusañi? (Isa. 54:17)

Lunani buikolwiso bwa kuli Jehova uka lusileleza kwa “lilata la bahateleli.” (Isa. 25:4, 5) Lila zaluna halina kukona kulupaleliswa kufumana bupilo bobusa feli.—w19.01, make. 6-7.

Mulimu naabonisize cwañi katulo yelukile kulikana ni zanaaezize kwa Makanana hamohocwalo ni Maisilaele bane basasepahali?

Mulimu naafile koto batu bane baikenyize mwa likezo za somano ni bane banyandisa basali ni banana. Naafuyauzi batu bane babonisa busepahali ku yena ni kueza hande babañwi.—w19.02, make. 22-23.

Luswanela kuezañi haiba mutu yasi mulumeli alapela inze luliteñi?

Luswanela kuina feela inze lukuzize ni kubonisa likute ku babañwi kono haluswaneli kubulela kuli “ameni” hamulaho wa tapelo yefilwe kamba kuswalana ni babañwi kwa mazoho ka nako ya tapelo. Lwakona kuitapelela tapelo yaluna mwa pilu.—w19.03, like. 31.

Ki kabakalañi kusilafaza mwanana haili sibi sesituna?

Kusilafaza mwanana ki kufoseza hahulu mwanana yo yaezizwe maswe, kufoseza puteho, muuso, ni kufoseza Mulimu. Baana-bahulu bamamelanga mulao wa kubiha batu babakulubelwa kuli basilafalize banana haiba kunani mulao ocwalo mwa naha.—w19.05, make. 9-10.

Ki lika mañi zekona kumitusa kucinca munahano wamina?

Zemuswanela kueza: Mulapele ku Jehova. Muitekule. Mukete hande balikani bamina.—w19.06, like. 11.

Lukona kuitukiseza cwañi nyandiso ka nako ya cwale?

Luswanela kutiisa silikani saluna ni Jehova. Lube ni buikolwiso bwa kuli Jehova walulata mi haana kulusiya nikamuta. Luswanela kubalanga Bibele zazi ni zazi, ni kulapela kamita. Lube ni buikolwiso bwa kuli lisepiso za Mubuso wa Mulimu likatalelezwa. Lupete mañolo olutabela hahulu ni lipina zelumbeka Jehova.—w19.07, make. 2-4.

Lukona kutusa cwañi bahabo luna kuli bato piliswa?

Lutokwa kubonisa kuli lwabaisa pilu, kuba ni muzamao omunde, ni kuba ni pilu-telele ni maseme.—w19.08, make. 15-17.

Ki kabakalañi musebezi walufile Jesu hauli okatulusa? (Mat. 11:28)

Lunani baokameli babande, balikani babande hahulu, ni musebezi omunde hahulu.—w19.09, like. 23.

Mulimu ukona kulufa cwañi takazo ni maata a kuunga muhato? (Mafil. 2:13)

Halubala Linzwi la Mulimu ni kunahanisisa zelubala, Mulimu wakona kulutusa kuba ni takazo ya kueza tato yahae ni maata a kuunga muhato. Moya wahae wakona kulutusa kuekeza kwa buikoneli bwaluna.—w19.10, like. 21.

Ki lika mañi zeluswanela kueza pili lusika eza kale katulo ya butokwa?

Luswanela kueza lika zeketalizoho ze: Lueze lipatisiso ka butungi. Lulapele kuli lufiwe butali. Lunyakisise libaka lelitahisa kuli lueze katulo yeñwi. Luzibe luli sikonkwani selubata kupeta. Lube ni mubonelo oswanela.—w19.11, make. 27-29.

Kana tuto ya kuli moya haushwangi isimuluha kwa litaba zanaabulezi Satani ku Eva?

Hakubonahali cwalo. Satani naasika taluseza Eva kuli mubili wahae neuka shwa kono moya wahae ona neuka zwelapili kupila. Bulapeli bwa buhata kaufela nebufelisizwe ka nako ya Muunda wa Nuwe. Kulukela kuba kuli batu nebakalile kulumela kuli moya wa mutu haushwangi, pili Mulimu asika hasanyeza kale batu bane bayaha tawala ya Babele mwa lifasi kaufela.—w19.12, like. 15.